“Da Mu Nanged E Re Rran Fa Re Awa”

“Fal’eged rogomed ngam pired ya da mu nanged e re rran fa re awa.”—MATT. 25:13.

UW ROGON NI GA RA FULWEG?

Mang boch ban’en nra fel’ rogodad riy ndawor da nanged fare rran ara awa ni nge taw fare tomur?

Uw rogon ni i tiyan’ e pi Kristiano ni kan dugliyrad?

Uw rogon, ma rayog ni ngad daged ni kad fal’eged rogodad ko ngiyal’ nra taw Kristus?

1-3. (a) Mang l’agruw ban’en ni kan weliy nra tamilangnag fan l’agruw e fanathin rok Jesus? (b) Mang e pi deer nib t’uf ni ngad pied e fulweg riy?

 SUSUN ni bay reb e tayugang’ ko am ni ke yog ngom ni ngam fek u karrow nga bang ya kan yarmiy nib ga’ fan ni nge yan ngaram. Machane, in e minit u m’on ni ngam fek e cha’ nem ko fare muulung ma ke yib ngan’um nde gaman e pensin ko karrow rom. Ere ba t’uf ni ngam man nib papey ngam chuw’iy boch. Tomuren ni kam chuw me yib e cha’ nem. Be sap u tooben ni be gayem, machane de yag ni nge piriegem. Dabiyog ni nge sonnagem ere ke non ngak be’ ni nge fek. Ma de n’uw nap’an ma kam sul, ma kam nang ni ke chuw e cha’ nem ma de yag rom ni ngam un ngak. Mang e ga ra lemnag?

² Chiney e ngam susunnag ni gur fare tayugang’ ma kam mel’eg dalip e pumoon ni ngar rin’ed boch e maruwel nib ga’ fan. Kam weliy ngorad e n’en ni ngar rin’ed, ma ke m’agan’rad ngay ni ngar folgad riy. Machane, nap’an ni kam sul ma kam pirieg ni kemus ni l’agruw i yad e kar lebuguyew e maruwel rorow. Ma bagayad e de fol ma ki towey. Ma bin riyul’ riy e de guy rogon ni nge rin’. Susun mang e ga ra lemnag?

³ U lan e fanathin rok Jesus u murung’agen fapi rugod ndawora nanged e pumoon nge murung’agen e salpiy, e be tamilangnag riy ni nap’an e tin tomuren e rran ma boch e Kristiano ni kan dugliyrad e yad ra par nib yul’yul’ mab gonop, machane boch i yad e danga’. * (Matt. 25:1-30) Miki yog ni gaar: “Ere fal’eged rogomed ngam pired ya da mu nanged e re rran fa re awa” ni aram e ngiyal’ nra pufthinnag e fayleng rok Satan. (Matt. 25:13) Rayog ni ngad fanayed e re fonow ney e ngiyal’ ney. Uw rogon ni nge fel’ rogodad ko n’en ni yog Jesus? Chon mini’ e kar fal’eged rogorad ngar mageygad ni yad ba fas? Ma mang e thingar da rin’ed e chiney ya nge yag rodad ni ngaud fal’eged rogodad?

 FAN NIB FEL’ NI NGAUN TIYAN’UY

4. Mang fan nde t’uf ni ngad nanged ko wuin e tomur ko re m’ag ney ya nge yag ni ngaud fal’eged rogodad?

⁴ Boch e maruwel ni bod e maruwel u factory, nge ngan guy reb e togta, ara ngan un ko karrow ni fan ko girdi’ ni yoor, e ba t’uf ni ngad bad nib tayim. Machane, boch e maruwel ni bod e ngan thang e nifiy ara ngan ayuweg e yafas ko girdi’ u tomuren ni ke yib e gafgow nib gel ni bod e yoko’ nge ku boch e magawon, e de t’uf ni ngan yaliy e kolok ya ra sagaalnag e maruwel, ma rayog ni nge tay e yafas rok be’ nga thatharen e riya’. Ngiyal’ ni ke yib e magawon ni aram rogon, ma kab ga’ fan ni ngan tiyan’uy ko maruwel ni yibe rin’ ko bin ni ngan guy rogon ni ngan nang e tayim. Maku arrogon e maruwel ni machib ni be ayuweg e girdi’ ni ngar nanged e pi n’en ni ke rin’ Jehovah ni nge ayuweg e yafas ko girdi’. Ma rib ga’ fan e re maruwel ney e chiney ni be chugur i yan e tomur ko re m’ag ney nib kireb. Faanra ngaud fal’eged rogodad ma ngad rin’ed e tin baadag Jehovah ni ngad rin’ed, ma de t’uf ni ngad nanged ko wuin e ra yib fare tomur. Bin riyul’ riy, e bay lal i fan nib fel’ ndad nanged e re rran ara re awa nem.

5. Uw rogon ni nge m’ug e n’en ni bay u lan gum’ircha’dad ni bochan ndad nanged fare rran nge awa?

⁵ Bin som’on, e bochan ndawor da nanged ko wuin e ra yib e tomur ma ra ayuwegdad ni nge m’ug e n’en ni bay u lan gum’ircha’dad. Be tay Jehovah fadad ya be pagdad ni ngad turguyed ni ngaud yul’yul’gad ngak. Yugu aram rogon ni gad be athapeg ni ngad mageygad nib fas u nap’an ni yira thang e re m’ag ney, machane gadad be pigpig ngak ya ba t’uf rodad ma gathi kemus ni gad baadag ni nge yag e yafas ngodad. (Mu beeg e Psalm 37:4.) Gad ba felfelan’ ni ngad rin’ed e tin nib m’agan’ ngay, ma kad nanged ni be fil ban’en ngodad ya baadag ni nge fel’ rogodad riy. (Isa. 48:17) De mo’maw’ e pi motochiyel rok.—1 John 5:3.

6. Faanra gad be pigpig ngak Got ya ba t’uf rodad, ma uw rogon u wan’? Mang fan?

⁶ Bin l’agruw, e ke fel’ rogodad ndawor da nanged fare rran ara awa ya kan bing e kanawo’ ngodad ni ngad felfelan’naged Jehovah. Faanra gad be pigpig ngak ya ba t’uf rodad, ma gathi bochan ni be yib fare tomur ara nge yag boch e tow’ath ngodad, ma aram e gad be ayuweg Jehovah ya nge yag ni nge pi’ e fulweg ngak Satan. (Job 2:4, 5; mu beeg e Proverbs 27:11.) Gad manang feni gel e gafgow ni ke yibnag Satan, ere gad ba felfelan’ ni ngad ayuweged e gagiyeg rok Jehovah ma dab da folgad ko gagiyeg rok Satan.

7. Mang fan ni ga baadag ni ngam fanay e yafas rom ko pigpig ku Got, ma ga ayuweg boch e girdi’?

⁷ Bin dalip e bochan ndawor da nanged e rran ni nge yib fare tomur ma mom ngodad ni ngad pigpiggad ngak, ma ngad ayuweged boch e girdi’ ni gathi bochan boch ban’en ni nge yag ngodad. Ngiyal’ ney, ma boch e girdi’ ndar nanged Got e ki mich u wan’rad nra yib e tomur. Yad be rus ni bay ban’en nra kirebnag e fayleng, ma aram fan ni ma lungurad, “nguud abichgad ma gadad be garbod, ya bayi gabul ma kad m’ad.” (1 Kor. 15:32) Machane gadad e darud rusgad. Ma gathi kemus ni goo gad e gad be lemnaged gadad. (Prov. 18:1) Gad be m’oneg Jehovah ko yafas rodad, ma ke m’agan’dad ngay ni ngad fanayed e tin ni bay rodad nib muun ngay e tayim nge gelngidad ni ngad machibnaged fare thin nib fel’ u murung’agen Gil’ilungun Got. (Matthew 16:24) Pigpig ni gad ma tay ni fan ku Got e be pi’ e felfelan’ ngodad, nib ga’ nu nap’an ni gad be ayuweg boch e girdi’ ni ngar nanged Got.

8. Mang thin nu Bible e be dag nib t’uf ni ngarda pagedan’dad ngak Jehovah nge Thin rok?

⁸ Bin aningeg, e bochan e dawor da nanged fare rran ara fare awa ma ke ayuwegdad ni ngarda pagan’dad ngak Jehovah ma ngad rin’ed e tin rayog rodad ya nge yag ni ngaud folgad ko Thin rok. Bochan ndawor da flontgad ma mom ni ngad pagedan’dad ngodad. I fonownag Paul urngin e Kristiano ni gaar: “En nra finey ni ke par ni ke mudugil e nge ayuw ya ri mul.” Ki yog ni 23,000 e girdi’ nu Israel ni ur togopuluwgad ngak Jehovah ma kar m’ad u m’on ni ngar tawgad ko fare Nam ni Kan Micheg. Miki yog Paul ni “kan yoloy nga babyor ni nge mang ba ning chilen ngodad” ni gadad  be par ko tayim ni kari chugur ni nge yib fare tomur ko re m’ag ney.—1 Kor. 10:8, 11, 12.

9. Uw rogon, ma skeng nra yib ngodad e ra gelnag e michan’ rodad ma ra chugurnagdad ngak Got?

⁹ Bin lal, e bochan ndawor da nanged ko wuin e ra taw fare tomur, ma ra ayuwegdad ni ngad filed ban’en ko skeng nra yib ngodad, maku rayog ni ngad gelnaged e michan’ rodad. (Mu beeg e Psalm 119:71.) Tin tomuren e rran e riyul’ ni “mo’maw’ ni ngan par” riy. (2 Tim. 3:1-5) Boor e girdi’ ko fayleng rok Satan ni yad be fanenikaydad, ere rayog ni ngan gafgownagdad ni bochan e michan’ rodad. (John 15:19; 16:2) Faanra ngaud sobut’an’gad ma ud folgad ko thin rok Got u nap’an ni ke yib e skeng ngodad, ma ra gelnag e michan’ rodad ara machalbognag ni bod ni kan tay nga fithik’ e nifiy. Ma dab da talgad ko pigpig ngak, ya re n’ey e rayog ni nge gelnag e tha’ u thildad Got.—Jas. 1:2-4; 4:8.

10. Ra diin ma bod ni gowa be yan e tayim nib papey?

¹⁰ Rayog ni gowa be yan e tayim nib papey ara ba sagaal. Faanra boor ban’en ni gad be rin’ ma gathi gubin ngiyal’ ni gad be yaliy e kolok rodad, ma bod ni gowa rib papey ni be yan e tayim. Maku arrogon, nfaanra ri gad be tiyan’ ko maruwel ni ke pi’ Jehovah ngodad, ma bod nra yib fare tomur nrib papey ndad lemnaged. Ma ireray e n’en ni ka i rin’ yooren e Kristiano ni kan dugliyrad nrib fel’ ni ngad folgad rorad. Ngad sulod nga daken e n’en ni buch u tomuren ni ke Pilung Jesus ko duw ni 1914, ma ngad guyed ko uw rogon ni i par nib yul’yul’ boch i yad ma boch e danga’.

PIIN NI KAN DUGLIYRAD E KAR FAL’EGED ROGORAD

11. Tomuren e duw ni 1914, ma mang fan ni boch ko pi Kristiano ni kan dugliyrad e kar lemnaged ni ke sagaal Jesus?

¹¹ Mu lemnag fagali fanathin rok Jesus u murung’agen fapi rugod ndawora nanged e pumoon nge murung’agen e salpiy. Faanra ke nang fapi rugod nge fapi tapigpig u lan fagali fanathin ko wuin e ra yib fare moon ni ir e ngar mabgolgad ara masta rorad, ma de t’uf ni ngaur tedan’rad ngay. Machane dar nanged, ma aram fan nib t’uf ni ngaur fal’eged rogorad. U lan boor e duw ma Kristiano ni kan dugliyrad e kar nanged ni fare duw ni 1914 e rib ga’ fan, machane gathi rib tamilang u wan’rad ko mang e ra buch. Nap’an nde buch e n’en ni ur lemnaged ma boch i yad e kar lemnaged ni ke sagaal Jesus. Reb e walag ni pumoon e ke yog murung’agen fare duw ni 1914 ni gaar: “In i gamad e kug lemnaged ni gamad ra yan nga tharmiy u nap’an e bin som’on e wik ko October.”

12. Uw rogon ni dag e pi Kristiano ni kan dugliyrad ni yad ba yul’yul’ mab gonop?

¹² Mu lemnag nrayog ni nge mulan’ be’ nfaanra i lemnag reb e rran nra yib fare tomur machane de taw! Maku, pi walagdad ko ngiyal’ nem e ke yib e togopuluw ngorad ni bochan e Bin Som’on e Mahl ko Fayleng. Ke chugur ni nge tal fare maruwel ni ngan machib ni bod ni ke mol e pi Kristiano ni kan dugliyrad. Machane nap’an e duw ni 1919 ma bay ban’en ni ke pug e tafinay rorad! Ke yib Jesus ni nge yaliy urngin e piin ni ka rogned ni yad e Kristiano. Boch i yad e kan pirieg ni gathi yad e tin riyul’ e Kristiano ma dabkiyog ni ngar maruwelgad ni fan ngak Jesus ni ir fare Masta. (Matt. 25:16) Dar tedan’rad, ma kar boded fapi rugod ndar ted e gapgep ko magal rorad. Ma kar boded fare tapigpig nib malmal, ndar rin’ed ban’en ni fan nga Gil’ilungun Got. Machane yooren e Kristiano ni kan dugliyrad e kar pared ni yad ba yul’yul’, ma kar daged ni yad baadag ni ngar pigpiggad ngak Got u nap’an e pi duw nem nrib mo’maw’ ya yibe mahl.

13. Uw rogon ni i lem e pi Kristiano ni kan dugliyrad u tomuren e duw ni 1914, nge ngiyal’ n’ey?

¹³ Tomuren e duw ni 1914, ma Fare Wulyang ko Damit e weliy rogon ni i lem yooren e pi Kristiano ni kan dugliyrad ko ngiyal’ nem. Ke weliy ni piin nib puluw lanin’rad e de mulan’rad. Me ulul ngay ni gaar: “Darud athapeged ni nge lebug e tin nib m’agan’dad ngay; ere nap’an ni kad pirieged nde puluw e n’en ni gad be lemnag nra buch ko October 1914, ma kad felfelan’gad nde thilyeg Somol e n’en ni Be Lemnag ya nge puluw ko lem rodad.  Dubdad ni nge rin’ ni aram rogon.” Kemus ni yad baadag ni ngar nanged e tin nib m’agan’ Got ngay nib fel’ rogon. Pi Kristiano ni kan dugliyrad e ngiyal’ ney e ku yad ba sobut’an’ ma yad baadag ni ngar rin’ed e tin nib m’agan’ Got ngay. Da rogned ni ke thagthag Got nga lanin’rad, machane yad baadag ni ngar rin’ed fare maruwel ni ke pi’ Jesus ngorad u roy u fayleng. Ma chiney e pi Kristiano ni ka nog ni yad “pire’ ni pire’” ara “yugu boch e saf” ngorad e ku yad be tiyan’rad ma yad ba pasig ya yad be folwok rok e pi Kristiano ni kan dugliyrad.—Rev. 7:9; John 10:16.

NGAD DAGED NI KAD FAL’EGED ROGODAD

14. Mang fan nib fel’ ni ngaud folgad ko pi n’en ni be fil fare tapigpig nib yul’yul’ mab gonop ngodad?

¹⁴ Ke mel’eg Got e piin ni yad ba yul’yul’ mab gonop ni ngar ayuweged e michan’ ko girdi’ rok, ara ngar filed ngorad rogon ni nge fel’ rogorad ko Thin rok nge gelngin nib thothup. Ma piin ni ka nog ni yad fare ulung nib pire’ ni pire’ e kar fal’eged rogorad ma kar folgad ko pi n’en ni be fil e piin kan dugliyrad ngorad. Bod ni yad be suguy e magal rorad ko gapgep. (Mu beeg e Psalm 119:130; John 16:13 *.) Ma aram fan ni ku rayog ni ngar fal’eged rogorad nge mada’ ko tomur u nap’an ni nge sul Kristus. Maku bay gelngirad ni ngar pared ni yad ba yul’yul’ u nap’an ni ke yib e magawon ngorad nrib gel. Bod ni, u lan reb e kalbus ni ka nog e Nazi prison camp ngay, ma pi walag ni kan kalbusnagrad u rom e kemus ni taareb e Bible rorad. Ere kar yibilayed ni nge yag ngorad boch ban’en ni ku rayog ni nge gelnag e michan’ rorad. Ma de n’uw nap’an nga tomuren, ma kar rung’aged ni bay reb e walag ni pumoon ni ka fini yib ni be fek boch e babyor ni Fare Wulyang ko Damit nib beech. Re walag ney e ke kireb ay ma kan non’ e palang ngay, ma kan mithag boch e babyor nga lan fare palang u ay. Tomur riy, ma bagayad e piin ni kan kalbusnagrad ni Ernst Wauer fithingan e ke yog ni ke ayuwegrad Jehovah ni nge mit ngorad e pi thin nib fel’ ko pi babyor nem. Miki gaar: “Ngiyal’ ney e rib mom ni ngan pirieg e thin rok Got, machane, gubin ngiyal’ ni gad ma tay fan e re n’ey, fa? Ke mudugil u wan’ug ni boor e tow’ath nra pi’ Jehovah ngak e piin ni be pagan’rad ngak, ma yad ba yul’yul’, ma yad ma duruw’iyed yad ko tebel ara ulung rok.”

15, 16. Uw rogon ni ke yib angin e machib ni ke tay ba wu’ i mabgol? Mang e n’en ni kam fil ko pi n’em?

¹⁵ Fare yugu boch e saf e yad be ayuweg e pi walagen Kristus ya yad ma tiyan’rad ko maruwel  ni machib. (Matt. 25:40) Yad ba thil ko fare tapigpig nib kireb mab malmal ko fare fanathin rok Jesus. Ke m’agan’rad ngay ni ngar maruwelgad nib gel mar paged e tin ni baadag e dowef rorad ya nge yag ni ngar m’oneged Gil’ilungun Got ko yafas rorad. Bod ni, Jon nge Masako e kan piningrow ni nga ranow nga Kenya ngar machibnagew piyu China u rom. Som’on e ke maruwaran’row ko yow ra yan, fa danga’. Machane tomuren ni kar gonopiyew rarogorow mar meybilgow ma kar turguyew ni nga ranow.

¹⁶ Bochan ni kar machibgow u fithik’ e pasig ma aram e kan tow’athnagrow. Ka rognew nrib fel’ e machib u rom. Kar tababgow i fil e Bible ngak medlip e girdi’ maku boor ban’en ni buch rorow nib fel’ u rom. Ma ka rognew ni lungurow: “Gamow ma pining e magar ngak Jehovah u gubin e rran ya ke ayuwegmow nge yag ni nggu bow ngaray.” Riyul’ ni boor e pi walag ni yad be dag ni yad baadag ni ngar yoornaged e maruwel rorad ni fan ngak Got nyugu demtrug ko wuin e ra yib fare tomur. Mu lemnag bokum biyu’ e girdi’ ni kar uned ko Gilead School ma kar manged e pi missionary. Rayog ni ngam fil boch murung’agen e maruwel ko missionary nge pi n’en ni buch rorad u lan e pi babyor rodad. Nap’an ni ngam sul nga daken e pi article ney, ma ngam lemnag rogon ni ngam yoornag e pigpig rom ngak Got. Pigpig ni ga ma tay e ra pining e sorok ngak ma ra pi’ e felfelan’ ngom.

KU ARROGON GUR, MU TIYAN’UM

17. Uw rogon, mab tow’ath ndawor da nanged fare rran ara awa?

¹⁷ Ere susun dabi mulan’dad ya dawor da nanged fare rran ara awa ni yira gothey e re m’ag ney. Rib tamilang nreb e tow’ath e re n’ey ngodad. Re n’ey e be ayuwegdad ni ngaud rin’ed e tin nib m’agan’ Got ngay u fithik’ e pasig, maku be gelnag e tha’ rodad ngak Got ni Chitamangidad ni ma t’ufegey. Ma bochan ni gad be tedan’dad ko fare maruwel ni ke pi’ Jesus ngodad ma gad be athamgil ndariy ban’en nrayog ni nge talegdad, ma aram e gad be pigpig ngak u fithik’ e felfelan’.—Luke 9:62.

18. Mang fan ni gad baadag ni ngad pared ni gad ba yul’yul’ ko pigpig ku Got?

¹⁸ Kari chugur e tomur ko re m’ag ney, ere gad baadag ni ngaud pigpiggad ngak Got u fithik’ e yul’yul’. Dubdad ni ngad kireban’naged Jehovah nge Jesus. Kar piew e maruwel ngodad ni ngad rin’ed e ngiyal’ ney. Ri gad ba felfelan’ ya be pagan’row ngodad!—Mu beeg e 1 Timothy 1:12.

19. Uw rogon ni ngad fal’eged rogodad ni fan ko ngiyal’ ni nge taw fare tomur ko re m’ag ney?

¹⁹ Yugu demtrug ko gadad be athapeg ni gad ra yan nga tharmiy ara gad ra par u Paradis u fayleng, ma ngaud folgad ko n’en ni yog Got ni ngad machibgad ma ngad pingeged e girdi’ ngar manged pi gachalpen Jesus. De t’uf ni ngad nanged fare rran nge awa ni nge taw fare rran rok Jehovah. Rayog ni ngad fal’eged rogodad ni fan ko re rran nem, ma ireray e n’en ni ngad rin’ed. (Matt. 24:36, 44) Kari mudugil u wan’dad nfaanra ngarda pagedan’dad ngak Jehovah ma ngad m’oneged Gil’ilungun ko yafas rodad ma dabi kireban’dad ngay.—Rom. 10:11.

[Footnotes]

[Study Questions]

[Picture on page 26]

Yugu aram rogon ni ke yib e magawon nib gel, ma ngaun gay e thin rok Got

[Picture on page 27]

Faanra ga be tiyan’um ko maruwel ni fan ku Got, ma bod ni gowa be yan e tayim nib papey