«Maʼ a wojleʼex u kʼiinil mix u yorail[iʼ]»
«Maʼ a wojleʼex u kʼiinil mix u yorail[iʼ]»
«Maʼ a weenleʼex, tumen maʼ a wojleʼex u kʼiinil mix u yorail[iʼ].» (MAT. 25:13)
¿BAʼAX JEʼEL A NÚUKIKEʼ?
¿Baʼax utsiloʼob ku taasik maʼ k-ojéeltik baʼax kʼiin yéetel baʼax hora u taal le xuʼulsajoʼ?
¿Bix tsʼoʼok u yeʼesik maʼ naayal u yóol le yéeyaʼanoʼoboʼ?
¿Bix jeʼel k-eʼesik táan k-páaʼtik u taal Cristoeʼ?
1-3. 1) ¿Bejlaʼeʼ baʼax ket tʼaaniloʼob jeʼel u yáantkoʼon k-naʼat le baʼax taak u kaʼansik Jesús tiʼ kaʼapʼéel u ket tʼaanoʼoboʼ? 2) ¿Baʼax kʼáatchiʼiloʼob ken k-il u núukil?
TUKULTEʼ juntúul máax jach yaan u páajtalileʼ ku yaʼaliktech ka a bis tuʼux kʼaʼabéet u bin. Baʼaleʼ le jach taʼaytak a bin a chʼaʼoʼ ka wilik maʼ yaʼab gasolina yaan tiʼ a cocheiʼ, le oʼolal ka jáan bin a mane. Mientraseʼ le máak páaʼtikechoʼ ku náakal u yóol yéetel ku joʼopʼol u súusut paakat. Ken u yil maʼ táan taaleʼ ku yaʼalik ka bisaʼak tumen yaanal máax. Ken kʼuchkecheʼ tsʼoʼok u bin. ¿Bix ken a wuʼuyilaba?
2 Beoraaʼ tukulteʼ teech le máax yaan u páajtaliloʼ yéetel ka yéeyik óoxtúul máak utiaʼal a kʼubéentiktiʼob nukuch meyajoʼob. Ka waʼaliktiʼob baʼax unaj u beetkoʼob yéetel tu séebaʼanil ku yaʼalikoʼob jeʼel u beetkoʼobeʼ. Baʼaleʼ ken suunakecheʼ ka wilik chéen kaʼatúul tu beetaj le baʼax ta waʼaloʼ. Le u yóoxtúuloʼ mix tu tsʼáajuba u beetiʼ, yéetel ku kaxtik baʼax u yaʼale. ¿Baʼax jeʼel a beetkeʼ?
3 Tiʼ u ket tʼaanil le x-chʼúupalal yéetel le talentoʼoboʼ Jesuseʼ tʼaanaj tiʼ le baʼaloʼob beyaʼ. Lelaʼ meyajnaj utiaʼal u tsolik baʼaxten yaan sukuʼunoʼob yéeyaʼanoʼob kun chúukpajal u yóoloʼob tu tsʼook kʼiinoʼob yéetel yaneʼ maʼatech (Mat. 25:1-30). * Tu jach eʼesaj le ka tu yaʼalaj: «Maʼ a weenleʼex, tumen maʼ a wojleʼex u kʼiinil mix u yorail[iʼ]», letiʼeʼ táan u tʼaan tiʼ le kʼiin ken u xuʼuls le kʼasaʼan yóokʼol kaabaʼ (Mat. 25:13). Le baʼax tu yaʼalaʼ jach jeʼel u yáantkoʼon teʼ kʼiinoʼobaʼ. ¿Baʼax utsil jeʼel u taasiktoʼon wa k-pʼil ich jeʼex tu yaʼalil Jesusoʼ? ¿Máaxoʼob tsʼoʼok u yeʼeskoʼob maʼ naayal u yóoloʼobiʼ? ¿Baʼax unaj k-beetik utiaʼal maʼ u xuʼulul k-pʼil ich?
UTSILOʼOB KU TAASIK K-PʼIL ICH
4. Toʼoneʼ, ¿baʼaxten maʼ tsaaj «k-sen paktik baʼax hora» utiaʼal maʼ u náayal k-óoliʼ?
4 Yaan baʼaxoʼob tsʼaʼan u yorail, jeʼex u yokol máak meyaj tiʼ junpʼéel fábrica, u bin máak yiknal doctor wa u yorail u jóokʼol junpʼéel camión. Baʼaleʼ le bomberoʼob wa le máaxoʼob ku binoʼob áantaj ken yanak junpʼéel nojoch loobiloʼ minaʼan tiempo u yilkoʼob baʼax hora, tumen jeʼel u náayal u yóoloʼobeʼ wa jeʼel tak u kíimil máakeʼ. Teʼ súutukiloʼob beyoʼ unaj u chʼíikil máak u beet u meyaj, maʼ u yilik baʼax horaiʼ. Le táan u náatsʼal u xuul le kʼasaʼan yóokʼol kaabaʼ, maas unaj xan k-chʼíikil k-kʼaʼayt le baʼax ken u beet Jéeoba utiaʼal u salvartikoʼonoʼ, maʼ «k-sen paktik baʼax horaiʼ». Yaan kex cinco bix u yáantkoʼon maʼ k-ojéeltik jach baʼax kʼiin yéetel baʼax hora ken taalak le xuʼulsajoʼ.
5. ¿Baʼaxten le maʼ k-ojéeltik baʼax kʼiin yéetel baʼax hora u taal le xuʼulsajoʼ ku tsʼáaik u páajtalil k-eʼesik baʼax yaan t-puksiʼikʼal?
5 Yáaxeʼ tumen maʼ k-ojel baʼax kʼiin u taal le xuʼulsajoʼ ku béeytal k-eʼesik baʼax yaan t-puksiʼikʼal. Jéeobaeʼ maʼ tu obligartik mix máak utiaʼal u chúukpajal u yóol tiʼ letiʼ. U jaajileʼ tuláakloʼon taak k-salvartikba ken xuʼulsaʼak le kʼasaʼan yóokʼol kaabaʼ, baʼaleʼ k-meyajtik Jéeoba tumen k-yaabiltmaj maʼ chéen tumen taak k-kuxtal utiaʼal mantatsʼiʼ (xokaʼak Salmo 37:4). Kiʼimak k-óol k-beetik baʼax ku yaʼalik yéetel k-ojel utiaʼal k-utsil (Isa. 48:17). Maʼatech k-ilik bey junpʼéel kuuch u aʼalmajtʼaanoʼobeʼ (1 Juan 5:3).
6. Ken k-meyajt Jéeoba tumen k-yaabiltmeʼ, ¿bix u yuʼubikuba yéetel baʼaxten?
6 U kaʼapʼéeleʼ ku béeytal k-kiʼimakkúuntik u yóol Jéeoba le maʼ k-ojéeltik baʼax kʼiin u taal le xuʼulsajoʼ. Ken k-meyajt yoʼolal yaabilaj, maʼ chéen tu yoʼolal junpʼéel fecha wa yoʼolal baʼax ken k-kʼameʼ, ku páajtal u yeʼesik Jéeoba maʼ jaaj le baʼax ku yaʼalik Satanás, le máax jach pʼekmiloʼ (Job 2:4, 5; xokaʼak Proverbios 27:11). Tu yoʼolal tuláakal le muʼyaj tsʼoʼok u beetik u yantal le Kʼaasilbaʼaloʼ, yéetel kiʼimak óolal k-eʼesik chéen tiʼ Jéeoba yaan u derechoil u gobernar yéetel k-tsʼáaikba tu contra Satanás.
7. ¿Baʼaxten a tuklik unaj u suuktal k-tsʼáaik baʼax yaantoʼon?
7 U yóoxpʼéeleʼ tumen maʼ k-ojel baʼax kʼiin u taal le xuʼulsajoʼ ku suuktal k-tsʼáaik yéetel kiʼimak óolal baʼax yáantoʼon. Bejlaʼeʼ yaan máaxoʼob maʼatech u creertikoʼob wa yaan Dios, baʼaleʼ saajkoʼob u xuʼulsaʼal le Luʼumaʼ. Le oʼolal ku yaʼalikoʼob: «Jaankoʼon yéetel ukʼulnakoʼon tumen sáamal bíin kíimkoʼon» (1 Cor. 15:32). Baʼaleʼ toʼoneʼ maʼ saajkoʼoniʼ. Maʼatech k-náachkuntikba tiʼ u maasil mix tech k-beetik chéen baʼax k-tsʼíiboltik (Pro. 18:1). Baʼaxeʼ k-tsʼáaik yéetel kiʼimak óolal k-tiempo, k-muukʼ yéetel uláakʼ baʼaxoʼob yaantoʼon utiaʼal k-kʼaʼaytik le Reinooʼ (xokaʼak Mateo 16:24). Jach kiʼimak k-óol k-meyajtik Dios, maases ken k-áant u maasil u natsʼuba tu yiknal.
8. ¿Bix u yeʼesik le Biblia unaj k-kʼubik k-óol tiʼ Jéeoba yéetel tiʼ u Tʼaanoʼ?
8 U kanpʼéeleʼ tumen maʼ k-ojel u kʼiinil mix u yorail le xuʼulsajoʼ k-maas kʼubik k-óol tiʼ Jéeoba yéetel k-tsʼáaik ichil k-kuxtal baʼax ku yaʼalik. Tumen kʼebanoʼoneʼ jach suuk k-kʼubik k-óol chéen tiʼ toʼon. Pabloeʼ tu yaʼalaj tiʼ tuláakal le cristianoʼoboʼ: «Le máax ku tuklik waʼalakbal maʼalobeʼ u kanáant maʼ u lúubul». Le jach taʼaytak u yoksaʼal le israelitaʼob tumen Josué teʼ Luʼum Aʼalaʼan u Tsʼaʼabaloʼ, veintitrés mil náachchajoʼob tiʼ Jéeobaiʼ. Pabloeʼ tu yaʼalaj: «Tuláakal lelaʼ [...] tsʼaʼab tiʼ le Kiliʼich Tsʼíiboʼ utiaʼal junpʼéel kaʼansaj tiʼ toʼon kuxaʼanoʼon tiʼ le u tsʼook kʼiinoʼobaʼ» (1 Cor. 10:8, 11, 12).
9. ¿Bix jeʼel u máaytikoʼon yéetel u natsʼkoʼon tiʼ Dios le talamiloʼoboʼ?
9 U cinco baʼax oʼolal maʼalob maʼ k-ojel baʼax kʼiin u taal le xuʼulsajoʼ, tumen ku muʼukʼaʼantal k-fe le ken k-aktáant le talamiloʼoboʼ (xokaʼak Salmo 119:71). U jaajileʼ tiʼ «talam kʼiinoʼob» yaan le kʼasaʼan yóokʼol kaabaʼ (2 Tim. 3:1-5). Yaʼab tiʼ le máaxoʼob tsaypachtik Satanasoʼ u pʼekmoʼon, le oʼolal maʼ xaaneʼ yaan k-chʼaʼpachtaʼal yoʼolal baʼax k-creertik (Juan 15:19; 16:2). Baʼaleʼ wa kabal k-óol yéetel k-kaxtik u nuʼuktaj Dioseʼ, le talamiloʼobaʼ bey yaan u máaytikoʼob k-fejeʼ. Tu lugar k-aʼalik maʼ t-tsaʼayaleʼ yaan k-maas náatsʼal tiʼ Jéeoba (Sant. 1:2-4; 4:8).
10. ¿Baʼaxten yaan kʼiineʼ séeb u máan le tiempooʼ?
10 Le tiempooʼ maʼ junpʼéeliliʼ bix k-ilik u máaniʼ. Wa k-chʼíikil k-beet wa baʼax yéetel mix t-ilik baʼax horaeʼ, jach séeb u máan. Wa k-chʼíikil xan k-beet le jatsʼuts meyaj u tsʼaamajtoʼon Jéeobaoʼ, maʼ xaaneʼ u kʼiinil yéetel u yorail le xuʼulsajoʼ séeb ken k-il u kʼuchul. U maas yaʼabil le sukuʼunoʼob yéeyaʼanoʼoboʼ jach bey u beetkoʼoboʼ. Koʼoneʼex kʼaʼajsik baʼax úuch tu jaʼabil 1914 le ka tsʼaʼab u beet u reyil Jesús. Yaan k-ilkeʼ yaan tiʼ le yéeyaʼanoʼoboʼ maʼ náay u yóoloʼobiʼ, baʼaleʼ yaneʼ náayi.
LE YÉEYAʼANOʼOBOʼ TSʼOʼOK U YEʼESKOʼOB MAʼ NAAYAL U YÓOLOʼOBIʼ
11. Ka máan u jaʼabil 1914, ¿baʼaxten yaan yéeyaʼanoʼobeʼ tu tukloʼob táan u xáantal le Tsʼuuloʼ?
11 Koʼoneʼex kʼaʼajsik le ket tʼanoʼob tu beetaj Jesusoʼ. Wa yojel kaʼach le chʼúupalal yéetel le palitsiloʼob baʼax súutukil u taal le novio wa tsʼuuloʼ, maʼ tsaaj kaʼach u pʼil ichoʼobiʼ. Baʼaleʼ tumen maʼ yojloʼobeʼ, kʼaʼabéetchaj maʼ u náayal u yóoloʼob. Yaʼab jaʼaboʼob táanil tiʼ 1914, le sukuʼunoʼob yéeyaʼanoʼoboʼ u yojloʼob yaan baʼax kun úuchul, baʼaleʼ maʼ u yojloʼob jach baʼaxiʼ. Ka kʼuch le jaʼab yéetel maʼ béeychaj le baʼax ku páaʼtkoʼoboʼ, yaan jujuntúuleʼ tu tuklaj táan u xáantal le Noviooʼ. Ka máan kʼiineʼ juntúul sukuʼuneʼ tu yaʼalaj: «Jujuntúul tiʼ toʼoneʼ jach táan k-páaʼtik kaʼach k-bin kaʼan tu yáax semanail octubre [tiʼ 1914]».
12. ¿Bix tu yeʼesil chúukaʼan óolal yéetel naʼatil le yéeyaʼanoʼoboʼ?
12 Chéen tukult bix tu yuʼubilubaʼob ka tu yiloʼob maʼ taal le xuʼulsajil ku páaʼtkoʼoboʼ. U tsʼookeʼ chʼaʼpachtaʼaboʼob ka léek le yáax nojoch baʼateltáambaloʼ. Leloʼ tu beetaj u xuʼulul u tsʼáaik u yóoloʼob, bey weenoʼobeʼ. Baʼaleʼ tu jaʼabil 1919, bey ajal tu beetoʼobeʼ. Jesuseʼ kʼuch tu templo Dios utiaʼal u yilik baʼax ku yúuchul. Yanoʼobeʼ maʼ chúukpaj u yóoloʼobiʼ, le oʼolal xuʼul u meyajoʼob utiaʼal le Reyoʼ (Mat. 25:16). Jeʼex le chʼúupalal minaʼan u naʼatoʼoboʼ, maʼ tu chʼaʼajoʼob le bukaʼaj aceite espiritual kʼaʼabéetoʼ. Yéetel jeʼex le palitsil maʼakʼóoleʼ, maʼ tu yóotoʼob meyaj utiaʼal le Reinooʼ. Baʼaleʼ u maas yaʼabil le yéeyaʼanoʼoboʼ tak tu kʼiinil le baʼateltáambaloʼ tu yeʼesoʼob yéetel chúukaʼan óolal taak u meyajtikoʼob le Tsʼuuloʼ.
13. ¿Bix u tuukul le palitsil ka tsʼoʼok 1914, yéetel bix u tuukul bejlaʼeʼ?
13 Tu jaʼabil 1916, le revistaaʼ tu yaʼalaj: «Sukuʼuneʼex, toʼon maʼatech k-tuukul kʼaas tiʼ Dioseʼ maʼatech u lúubul k-óol yoʼolal baʼaxoʼob ku chʼaʼtuklik. Maʼ k-kʼáat k-beet chéen baʼax uts t-tʼaaniʼ; le oʼolal le ka t-ilaj maʼ béeychaj le baʼax k-páaʼtik tu kʼiinil octubre tiʼ 1914, kiʼimakchaj k-óol tumen Yuumtsileʼ maʼ tu kʼexaj le baʼax u chʼaʼtukultmaj utiaʼal u béeytal le baʼax k-páaʼtikoʼ. Maʼ k-kʼáat ka u kʼex kaʼachiʼ. Chéen k-kʼáat k-ojéelt le baʼax ku chʼaʼtuklikoʼ». Bejlaʼeʼ le yéeyaʼanoʼob tumen Yuumtsiloʼ láayliʼ kabal u yóoloʼobeʼ yéetel u kʼubmaj u yóoloʼob tiʼ. Maʼ tu yaʼalikoʼob wa ku tʼaanoʼob tu yoʼolal Dios, baʼaleʼ jach ku kanáantkoʼob u baʼalubaʼob Yuumtsil way Luʼumeʼ. Tsʼoʼoleʼ jeʼex letiʼobeʼ le «yaʼabkach máakoʼob» yaan ichil le «uláakʼ tamanoʼob», kun pʼáatloʼob kuxtal way Luʼumeʼ, maʼatech u náayal u yóoloʼob (Apo. 7:9; Juan 10:16).
KU YEʼESIK MAʼ NAAYAL U YÓOL LE ULÁAKʼ TAMANOʼOBOʼ
14. ¿Bix u yáantkoʼon k-kʼamik le kaʼansaj ku tsʼáaik le máaxoʼob tsʼaʼan tumen Jéeobaoʼ?
14 Jeʼex le sukuʼunoʼob yéeyaʼanoʼoboʼ, le yaʼabkach máakoʼoboʼ maʼatech u náayal u yóoloʼob, tumen ku kʼamkoʼob le kaʼansaj ku keʼetel yéetel janal ku tsʼáaik le máaxoʼob tsʼaʼan tumen Jéeobaoʼ. Beyoʼ ku yantaltiʼob xan le bukaʼaj aceite espiritual kʼaʼabéet ku taal tiʼ u Tʼaan Dios yéetel tiʼ u kiliʼich muukʼoʼ (xokaʼak Salmo 119:130 yéetel Juan 16:13). Beyoʼ ku chúukpajal u yóoloʼob u páaʼtoʼob u taal Cristo, yéetel u tsʼaamaj u yóoloʼob kex ku túuntaʼal u fejoʼob. Jeʼex tiʼ junpʼéel tuʼux ku kʼaʼalal kaʼach máak tumen le naziʼoboʼ, le sukuʼunoʼoboʼ chéen junpʼéel Biblia yaan kaʼach tiʼob, le oʼolal tu kʼáatoʼob tiʼ Jéeoba uláakʼ jóoʼsaʼanil ku keʼetel yéetel janal. Maʼ úuch tiʼ leloʼ tu yojéeltoʼobeʼ juntúul sukuʼun táant u kʼaʼalaleʼ tu yoksaj yaʼab túumben revistaʼob U Pʼíich Tulumil Kanan u taʼakmaj tu yook de cheʼ. Le sukuʼun Ernst Wauer, juntúul tiʼ le máaxoʼob kʼaʼaloʼ, ka máan kʼiineʼ tu yaʼalaj: «Jéeobaeʼ tu yáantoʼon utiaʼal maʼ u tuʼubultoʼon le baʼax ku kaʼansik le revistaʼoboʼ». Yéetel tu yaʼalaj: «Bejlaʼeʼ chéen chʼaʼabil u yantaltoʼon le jóoʼsaʼaniloʼob ku keʼetel yéetel janaloʼ, baʼaleʼ ¿k-yaabiltik? In wojel Jéeobaeʼ yaan u taasik yaʼab utsil tiʼ le máaxoʼob chúukaʼan u yóoloʼob tiʼ yéetel ku jaanloʼob tiʼ u mesaoʼ».
15, 16. ¿Baʼax utsiloʼob tu kʼamaj juntúul sukuʼun yéetel u yatan úuchik u tsʼáaik u yóol u meyajtoʼob Dios, yéetel baʼax k-kanik?
15 Ken u tsʼáa u yóol le uláakʼ tamanoʼob teʼ meyaj u kʼubéentmaj le Tsʼuuloʼ, ku yáantkoʼob u sukuʼunoʼob Cristo (Mat. 25:40). Letiʼobeʼ ku beetkoʼob yéetel kiʼimak óolal tuláakal baʼax kʼaʼabéet utiaʼal u tsʼáaikoʼob táanil le Reinooʼ, maʼ beyoʼob jeʼex le «kʼaakʼas yéetel maʼakʼóol palitsil» tu yaʼalaj Jesusoʼ. Jeʼex Jon yéetel Masakoeʼ invitartaʼaboʼob utiaʼal u binoʼob kʼaʼaytaj tiʼ le máaxoʼob ku tʼankoʼob chino tu luʼumil Keniaoʼ. Tu káajbaleʼ kaʼapʼéelchaj u tuukuloʼob, baʼaleʼ ka tsʼoʼok u payalchiʼob yéetel u yilkoʼob jeʼel u béeytaleʼ tu chʼaʼtuklaj u binoʼob.
16 Yaʼab utsiloʼob tu kʼamoʼob yoʼolal le baʼax tu beetoʼoboʼ. Letiʼobeʼ ku yaʼalikoʼob: «¡Wayeʼ jach jatsʼuts u kʼaʼaytaj máak!». Káaj u tsʼáaikoʼob siete xookoʼob yéetel anchajtiʼob yaʼab jatsʼuts experienciaʼob. Letiʼobeʼ ku yaʼalik bix u yuʼubikubaʼob: «Sáamsamal k-tsʼáaik nib óolal tiʼ Jéeoba úuchik u chaʼik k-antal wayeʼ». Yaʼab uláakʼ sukuʼunoʼob xan ku tsʼáaik u yóol u meyajtoʼob Dios, kex jeʼel baʼaxak kʼiin ka taalak le xuʼulsajoʼ. Jeʼex le u milesil sukuʼunoʼob tsʼoʼok u binoʼob tiʼ le Escuela tiʼ Galaad utiaʼal u beetik u misioneroiloʼoboʼ. Wa taak a wojéeltik bix u kuxtal juntúul misioneroeʼ, xok tiʼ le revista La Atalaya 15 tiʼ octubre tiʼ 2001, le xook: «Hacemos todo lo que podemos». Le táan a xokikoʼ tukult bix jeʼel a maas meyajtik Jéeoba utiaʼal a kiʼikiʼtʼantik yéetel utiaʼal u yantaltech kiʼimak óolal.
PʼIL ICHNENEʼEX
17. ¿Bix u yáantkoʼon maʼ k-ojéeltik baʼax kʼiin yéetel baʼax hora u taal le xuʼulsajoʼ?
17 Jeʼex k-ilkoʼ jach ku yáantkoʼon maʼ k-ojéeltik baʼax kʼiin yéetel baʼax hora u taal le xuʼulsajoʼ. Tu lugar u lúubul k-óoleʼ, k-chʼíikil k-beet baʼax uts tu tʼaan Jéeoba, k-Taata yaan teʼ kaʼanoʼ, yéetel k-maas náatsʼal tiʼ. Tumen «[k-]machik u nuʼukul paakʼal» yéetel maʼ tu náayal k-óol yéetel mix baʼaleʼ, jach kiʼimak k-óol k-meyajtik le Tsʼuuloʼ (Luc. 9:62).
18. ¿Baʼaxten k-kanáantik maʼ u síistal k-fe?
18 Jach chich u náatsʼal u kʼiinil u pʼis óol Dios, yéetel maʼ k-kʼáat pʼat kʼaasil Jéeoba mix Jesusiʼ. Letiʼobeʼ u yojloʼob jeʼel k-beetik le jatsʼuts meyajoʼob u tsʼaamoʼobtoʼon teʼ tu tsʼook kʼiinoʼobaʼ. ¿Máasaʼ jach kiʼimak k-óol ikil u kʼubik u yóoloʼob tiʼ toʼon? (Xokaʼak 1 Timoteo 1:12.)
19. ¿Bix k-eʼesik maʼ naayal k-óoliʼ?
19 Wa táan k-páaʼtik k-kuxtal kaʼan wa way Luʼumeʼ, unaj k-chʼaʼtuklik u chúukpajal k-óol kʼaʼaytaj yéetel k-kaʼansik uláakʼ máakoʼob jeʼex u yaʼalmil Diosoʼ. Láayliʼ maʼ k-ojel baʼax kʼiin yéetel baʼax hora u taal le xuʼulsajoʼ, baʼaleʼ maʼ kʼaʼabéet k-ojéeltikiʼ. Baʼaxeʼ unaj k-eʼesik maʼ naayal k-óoliʼ (Mat. 24:36, 44). Mix juntéen ken u pʼatoʼon kʼaasil Jéeoba wa k-kʼubik k-óol tiʼ yéetel k-tsʼáaik táanil u Reino (Rom. 10:11).
[Tsolajil]
^ xóot’ol 3 Ilaʼak le revista La Atalaya 1 tiʼ marzo tiʼ 2004, táan juʼun 14 tak 18.
[U kʼáatchiʼiloʼob le xookoʼ]
[Foto yaan teʼ táan juʼun 26]
Kex yaan talamileʼ unaj k-kaxtik mantatsʼ le kaʼansaj ku keʼetel yéetel janaloʼ
[Foto yaan teʼ táan juʼun 27]
Ken chʼíikkoʼon k-meyajt Dioseʼ séeb u máan le tiempooʼ
