«Qué ganna tu padxí nin pora»
«Qué ganna tu padxí nin pora»
«Naquiiñe gataná tu purti qué ganna tu padxí nin pora.» (MAT. 25:13)
XI NICÁBILUʼ.
Xi guiráʼ ribeendunu pur qué gánnanu padxí ne pora guinitilú guidxilayú.
Ximodo huayataná ca xpinni Cristu ni bibí.
Ximodo rusihuínninu nuunu listu laga cabézanu gueeda Cristu.
1-3. 1) Xi bisiidiʼ Jesús lu chupa ejemplu stiʼ, ne xi zanda gacané laanu guiénenu ni. 2) Gunáʼ nga ca guendarinabadiidxaʼ zacábinu lu tema riʼ.
BIXUIʼLÚ ñabi ti binni nabé risaca lii chineluʼ laa ti lugar ra caquiiñeʼ cheʼ. Peru ante guireeluʼ de ralídxiluʼ para chiguuyuʼ laabe bidiiluʼ cuenta huaxiéʼ gasolina napa carru stiluʼ, nga runi nagueendaca zisiluʼ ni. Laga zeluʼ, hombre que maʼ nuu xizaa, cayuuyadxí guiráʼ ladu cabeza paneza chuʼluʼ. Cumu bindaaluʼ la? gunábabe sti binni chiné laabe, ngue runi maʼ qué guínnibe ora beeduʼ. Ximodo ñuni sentirluʼ óraque yaʼ.
2 Yanna bixuiʼlú lii nga binni risaca que ne guliluʼ chonna hombre para guni caadxi dxiiñaʼ nabé risaca stiluʼ, purtiʼ nannuʼ zanda gúnicabe ni. Bisiéneluʼ laacabe xi gúnicabe ne guiónnacabe guníʼcabe zúnicabe ni nagueendaca. Ora bibiguétaluʼ bidiiluʼ cuenta chupa si de laacabe biʼniʼ dxiiñaʼ que. Peru stobi de laacabe qué liica ñuni gastiʼ, ne ni jma triste nga nisi cuyubi gabi lii xiñee qué ñuni ni. Xi ñúniluʼ óraque yaʼ.
3 Zacagá nga chupa ejemplu ni bizeeteʼ Jesús ora guníʼ de chii binnidxaapaʼ ne de ca hombre gucuaa moneda para guni dxiiñaʼ. Né ca ejemplu riʼ bisiénebe ziuu xpinni Cristu ni bibí ni zuzuubaʼ diidxaʼ ne ziuu xpiaaniʼ lu ca últimu dxi, peru laaca ziuu xcaadxi ni qué zuzuubaʼ diidxaʼ (Mat. 25:1-30). a Ne sicaríʼ bisiénebe ni: «Naquiiñe gataná tu purti qué ganna tu padxí nin pora», racá caniʼbe de dxi gunduuxebe guidxilayú stiʼ Binidxabaʼ riʼ (Mat. 25:13). Nabé risaca ca diidxaʼ guniʼbe riʼ para laanu ca dxi riʼ. Xi zabeendunu pa guzúʼbanu stiidxaʼ Jesús ne gatananu. Tuu nga cani maʼ bisihuinni nuu listu para guilá. Xi naquiiñeʼ gúninu para gatananu.
NI ZABEENDUNU PA GATANANU
4. Xii nga ni jma risaca para ca xpinni Cristu.
4 Ora runi binni dxiiñaʼ ndaaniʼ ti fábrica, ora cheʼ ra nuu doctor ne ora chicaa ti carru para cheʼ sti lugar, naquiiñeʼ chindá hora nexheʼ guiuu. Peru lu xcaadxi dxiiñaʼ, casi ni runi ca bomberu o cani rulá binni, jma nga ricá íquecabe gúnicabe xhiiñacabe que gúʼyacabe pabiáʼ tiempu maʼ zinécabe lu dxiiñaʼ stícabe, purtiʼ zándaca chuʼ xquendanabánicabe ra naxoo. Ni jma risaca para laacabe nga xhiiñacabe ne cadi tiempu cayúnicabe ni. Zacaca nga laanu, cumu mayaca guinitilú guidxilayú malu riʼ la? jma risaca gusíʼdinu binni de Jiobá ti gánnacaʼ xi maʼ bíʼnibe para gulabe binni. Nga runi, cadi caquiiñepeʼ gánnanu padxí guinitilú guidxilayú riʼ para gatananu. Jmápeca ribeendunu ni galán purtiʼ qué gánnanu padxipeʼ gácani, guzéʼtenu gaayuʼ cosa ni ribeendunu.
5. Xi rusihuínninu pur qué gánnanu padxí guinitilú guidxilayú riʼ, ne xiñee.
5 Primé. Cumu qué gánnanu padxí ne pora guinitilú guidxilayú malu riʼ la? zanda gusihuínninu xi nuu ndaaniʼ ladxidoʼno. Jiobá runi respetar laanu, nga runi rudiibe lugar gúʼyanu pa zuzúʼbanu stiidxabe. Guiranu racaláʼdxinu guilanu ora guinitilú guidxilayú malu riʼ, peru qué rúninu ni nabe para si guicaanu guendanabani, sínuque rúninu ni purtiʼ nadxiinu laabe. Biblia na: «Laaca guyuu nayecheʼ ora guʼnuʼ ni na Jiobá, ne laa zudii lii guiráʼ ni guinabaʼ ladxidoʼloʼ» (Salmo 37:4). Riuuláʼdxinu gúninu ni nabe ne nánnanu cusiidibe laanu para cueendunu ni galán (Is. 48:17). Cadi nagana guiráʼ ni rinábabe laanu (1 Juan 5:3).
6. Ora rúninu ni na Jiobá purtiʼ nadxiinu laa, ximodo runi sentirbe, ne xiñee.
6 Guiropa. Cumu qué gánnanu padxí ne pora guinitilú guidxilayú malu riʼ la? nga zacané laanu gusiéchenu ladxidóʼ Jiobá. Ora rúninu ni na Jiobá purtiʼ dxandíʼ nadxiinu laa, ne cadi pur mayaca guinitilú guidxilayú riʼ o pur ni chigudiibe laanu, racanenu laabe para gusihuínnibe rusiguii xhenemígube, Binidxabaʼ. Biblia na: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa» (Proverbios 27:11; Job 2:4, 5). Maʼ bidúʼyanu guiráʼ yuubaʼ ne guendananá cutiidiʼ Binidxabaʼ binni, nga runi riéchenu gusihuínninu Jiobá nga napa derechu de guni mandar ne qué rudiʼnu lugar quite Binidxabaʼ laanu.
7. Xiñee riuuláʼdxiluʼ gúniluʼ ni na Dios ne gacaneluʼ binni gunibiáʼ laabe.
7 Guionna. Cumu qué gánnanu padxí ne pora guinitilú guidxilayú malu riʼ la? rucaani laanu iquiiñenu xquendanabáninu para gacanenu sti binni guiziidiʼ de Dios. Nuu binni qué runi cré Dios, peru ridxíbicaʼ guizaaca xiixa ni gunitilú Guidxilayú riʼ. Nga runi riníʼcabe: «[Guidoʼno ne guideʼnu], purti qué ganna nu pa nabani ru nu ixíʼ» (1 Cor. 15:32). Peru laanu qué ridxíbinu ne qué ruyúbinu puru si para laanu (Prov. 18:1). Riquiiñenu tiempu, stipa stinu ne cani nápanu para gucheechenu stiidxaʼ Reinu (biindaʼ Mateo 16:24). Riuuláʼdxinu gúninu ni na Dios, ne laaca riuuláʼdxinu gacanenu binni gunibiáʼ laabe.
8. Xi ejemplu zeeda lu Biblia rusiidiʼ laanu guni crenu Jiobá ne ni cá lu Stiidxaʼ.
8 Guidapa. Cumu qué gánnanu padxí ne pora guinitilú guidxilayú malu riʼ la? racaneni laanu guni crenu Jiobá ne gúninu guiráʼ ni rusiidiʼ Stiidxabe laanu. Cumu binni gulené donda laanu la? cadi nagana guiníʼ íquenu zanda gúninu ca cosa ca laasinu. Sicaríʼ gudxi Pablu guiráʼ ca xpinni Cristu: «Pa nuu tu na ma zuhuaa chaahui la? guuya gá qué guiaba». Ante guiuuné Josué xquidxi Dios lu Layú ni Bizabiruaa Dios gudii laacaʼ, guti veintitrés mil israelita purtiʼ qué nuzuubacaʼ diidxaʼ. Pablu na: «Irá nga [...] ucuá ni lu Xquiʼchi Dios para iziʼdi nu iduʼya gá nu laanu, cani nabani nu ra ma zeda iluxe guidxilayú riʼ» (1 Cor. 10:8, 11, 12).
9. Ximodo riguidxi fe stinu ne riuʼnu gaxha de Jiobá ora gápanu guendanagana.
9 Gaayuʼ. Cumu qué gánnanu padxí ne pora guinitilú guidxilayú malu riʼ la? racaneni laanu para gaca fe stinu jma naguidxi. Biblia na: «Guleenduáʼ ni galán ora gudideʼ ra nagana purtiʼ zacá biziideʼ guneʼ ni na ca ley stiluʼ» (Salmo 119:71). Dxandíʼ nabé nagana para guibani binni lu ca últimu dxi riʼ (2 Tim. 3:1-5). Stale de ca binni ni nuu ndaaniʼ náʼ Binidxabaʼ nanaláʼdxicaʼ laanu, nga runi zándaca gucaalúcabe laanu pur ni runi crenu (Juan 15:19; 16:2). Peru pa qué gudxíʼbanu laca laanu ne gudiʼnu lugar gusiidiʼ Dios laanu la? zaquiiñeʼ ca guendanagana ni gápanu para gaca fe stinu jma naguidxi. Ne ziuʼnu jma gaxha de Jiobá que biaʼ guníʼ íquenu (Sant. 1:2-4; 4:8).
10. Xiñee ruluíʼ nagueenda ridiʼdiʼ tiempu.
10 Nuu tiru ruluíʼ nagueenda ridiʼdiʼ tiempu ne nuu biaje ruluíʼ nanene. Ora nabé nuu xhiiñanu la? nin qué ridúʼyanu lu reló, nga runi ruluíʼ nagueenda ridiʼdiʼ tiempu. Ngaca nga ni rizaacanu ora jma cayúninu xhiiñaʼ Jiobá, qué zudiʼnu cuenta pabiáʼ nagueenda zadxiña dxi guinitilú ca cosa malu nuu yanna riʼ. Stale de ca xpinni Cristu ni bibí cayúnicaʼ dxiiñaʼ zacá. Guidúʼyanu xi bizaaca gurí si Jesús casi rey lu iza 1914. Zadúʼyanu ximodo gutaná caadxi xpínnibe, peru laaca guyuu tu qué ñataná.
MAʼ BISIHUINNI CANI BIBÍ PUR ESPÍRITU NUUCAʼ LISTU
11. Xiñee guníʼ ique caadxi xpinni Cristu candaa Novio que gudiʼdiʼ si iza 1914.
11 Guzéʼtenu ca ejemplu guníʼ Jesús que sti biaje. Pa ñanna ca binnidxaapaʼ que padxí gueeda novio que o pa ñanna ca esclavu que padxí gueeda xpixuaanacaʼ, ñee nicá íquecabe ñatanácabe la? Peru gutanácabe purtiʼ qué gánnacabe padxí ni. Stale iza ante de 1914, ca xpinni Cristu ni bibí maʼ nánnacaʼ nabé risaca iza que, neca qué ñene chaahuicabe xi chiguizaaca. Dxi gunda iza que ne qué ñaca ni cabézacabe, caadxi de laacabe guníʼ ique nabé candaa para gueeda Novio que. Gudiʼdiʼ si tiempu guníʼ ti xpinni Cristu: «Caadxi de laadu nabé guníʼ íquedu ziuudu guibáʼ primé semana stiʼ octubre iza [1914]».
12. Ximodo bisihuinni cani bibí ruzuubacaʼ diidxaʼ ne nuu xpiaanicaʼ.
12 Guiníʼ íquenu pabiáʼ naná gúcani para laacabe purtiʼ qué ninitilú guidxilayú riʼ casi modo gulézacabe ni. Ne ni jma triste nga purtiʼ bicaalú binni laacabe dxi bizulú primé guerra que. Bisaana de gucheechecabe diidxaʼ, casi ora ñásicabe. Peru bibánicabe lu iza 1919. Beeda guuyaʼ Jesús ximodo nuu cani na xpinni Cristu laacaʼ. Caadxi de laacaʼ cadi jneza cayúnicaʼ dxiiñaʼ, ngue runi maʼ qué ñunineruʼ Jesús laaca dxiiñaʼ (Mat. 25:16). Beeda gácacabe casi ca binnidxaapaʼ ni cadi nuu xpiaaniʼ que, purtiʼ qué nizaaláʼdxicabe niziidicabe ni cá lu Stiidxaʼ Dios. Ne casi esclavu ni nachaabaʼ que, qué ninácabe ñúnicabe xhiiñaʼ Reinu. Peru stale de ca xpinni Cristu ni bibí qué nixélecaʼ de Jesús ne bisihuínnicaʼ pabiáʼ racaláʼdxicaʼ gúnicaʼ xhiiñabe, neca gúcani nagana para laacabe ca dxi cayaca guerra que.
13. Xi jma gucuá ique esclavu que gudiʼdiʼ si 1914, ne xi cá íquebe yanna.
13 Lu iza 1916 guníʼ revista riʼ sicaríʼ: «Laadu, ca xpinni Cristu, riníʼ íquedu casi riníʼ ique Dios, nga runi qué riuʼdu triste pur guiráʼ ni rúnibe. Qué racaláʼdxidu gúnidu ni gápadu gana; nga runi, ora biénedu cadi jneza ni cabézadu gaca lu octubre iza 1914, biéchedu purtiʼ qué nuchaa Señor ni cá ique guni para gaca ni cabézadu. Qué nibézadu ñúnibe nga. Rápasidu gana guiénedu xi naguixhe íquebe gúnibe». Ngaca nga ejemplu ni zinanda ca xpinni Cristu ni bibí yanna, purtiʼ qué rudxiibacaʼ laca laacaʼ ne rúnicaʼ ni na Dios. Qué ruzeetecabe riniʼné Dios laacabe, peru maʼ gudixhe íquecabe gúnicabe dxiiñaʼ bisaanané Señor laacabe ndaaniʼ Guidxilayú. Ne yanna maʼ nuu «jma binni», cani zeeda gaca «xcaadxi dendxu» —ca xpinni cristu ni chiguibani lu Guidxilayú riʼ— laaca nexhenacaʼ ne zinándacaʼ ejemplu stiʼ cani bibí pur espíritu (Apoc. 7:9; Juan 10:16).
RUSIHUINNI XCAADXI DENDXUʼ NUUCAʼ LISTU
14. Xi zabeendunu pa chinándanu ni rusiidiʼ mozo ni nuu xpiaaniʼ.
14 Casi cani bibí pur espíritu, ca binni ni chiguibani ndaaniʼ Guidxilayú riʼ, rusihuínnicaʼ nexhenacaʼ ora rucaadiágacaʼ ni rusiidiʼ mozo ni bisaana Jiobá para gacané laacaʼ guiziidicaʼ jma de Dios. Zacá nga casi ora nigaacabe aceite ndaaniʼ lámpara stícabe. Biblia na: «Nayaʼniʼ cani rusiene Stiidxaluʼ, ne rusiéneni cani qué ganna» (Salmo 119:130; biindaʼ Juan 16:13). Zacá ruzuhuaacabe dxiichiʼ ne nuucabe listu ora gueeda Cristu, cayúnicabe dxiiñaʼ dede né ora ridxagalúcabe guendanagana pur fe stícabe. Guzéʼtenu ejemplu stiʼ caadxi xpinni Cristu ni biseguyoo ca nazi. Dxi nacubi biseguyoocabe laacaʼ nápacaʼ ti Biblia si, ngue runi gunábacaʼ Jiobá gudii laacaʼ ni caquiiñecaʼ para guiziidicaʼ jma de laa. Qué nindaa gúnnacabe bideguyoo sti xpinni Cristu, laa gunda guyuuné caadxi revista Torre stiʼ ni rapa nacubi, purtiʼ bicaachibe cani ndaaniʼ ti chuʼ ñeebe de yaga. Tobi de ca xpinni Cristu ni bilá nga Ernst Wauer, ti xpinni Cristu ni bibí, laa guníʼ xi bizaaca gudiʼdiʼ si caadxi iza: «Gucané Jiobá laadu para guizíʼdidu de memoria cani zeeda lu ca revista que». Ne laaca guniʼbe: «Yanna riʼ, cadi tan nagana para guizíʼdinu de Dios, peru rusisácanu ni rudiicabe laanu la? Nannaʼ dxicheʼ riguu Jiobá ndaayaʼ cani runi cré laabe, cani ruzuubaʼ stiidxabe ne cani rudii lugar gusiidibe laa».
15, 16. Xi ndaayaʼ gucuaa ti guendaxheelaʼ pur riuulaʼdxiʼ gucheeche diidxaʼ, ne xi rusiidiʼ ejemplu stícabe laanu.
15 Cani zeeda gaca xcaadxi dendxuʼ laaca cayacanecaʼ ca biʼchiʼ ne ca bizaʼnaʼ Cristu para gaca xhiiñaʼ Jesús né stale gana (Mat. 25:40). Gadxé si de ni biʼniʼ «hombre ni qué iquiiñeʼ» bizeeteʼ Jesús que, laacabe riuuláʼdxicabe gúnicabe stipa para gúnicabe xhiiñaʼ Reinu primé lu xquendanabánicabe. Guzéʼtenu xi biʼniʼ Jon ne Masako, laacaʼ guca invitarcaʼ chigucheechecaʼ diidxaʼ ndaaniʼ guidxi Kenia ra nuu binni ni riníʼ diidxaʼ chinu. Primé que gúcani nagana para laacabe, peru despué de biʼniʼ orárcabe biiyacabe zanda chécabe, ngue runi yebíʼcabe raqué.
16 Guluu Jiobá ndaayaʼ laacabe pur stipa bíʼnicabe. Laacabe guníʼcabe: «Nabé sicarú modo rireeche diidxaʼ raríʼ». Bizulú biindanécabe gadxe binni ne bizaacacabe stale cosa ni bisiecheʼ laacabe. Sicaríʼ guníʼcabe modo biʼniʼ sentírcabe: «Guiráʼ dxi rudiʼdu xquíxepeʼ Jiobá pur nuudu raríʼ». Laaca nuuruʼ xcaadxi xpinni Cristu ni maʼ bisihuinni pabiáʼ cayuni xhiiñaʼ Dios ne cadi cá íquecaʼ pabiáʼ tiempu cayaadxaʼ para guinitilú guidxilayú riʼ. Guiníʼ íquenu guiráʼ ca xpinni Cristu ni maʼ guyé Scuela stiʼ Galaad ne yegúnicaʼ dxiiñaʼ casi misioneru. Pa rápaluʼ gana gánnaluʼ xi guiráʼ dxiiñaʼ runi ti misioneru ti dxi, zanda gúʼndaluʼ tema ni láʼ: «Rúnidu biaʼ ganda gúnidu» (Hacemos todo lo que podemos), stiʼ La Atalaya 15 stiʼ octubre 2001. Laga cayuundaluʼ ni, guníʼ ique ximodo zanda gúniluʼ jma lu xhiiñaʼ Jiobá para gusisácaluʼ laa ne chuʼluʼ jma nayecheʼ.
GUTANÁ
17. Xi ribeendunu purtiʼ qué gánnanu padxí ne pora guinitilú guidxilayú riʼ.
17 Maʼ bizíʼdinu pabiáʼ sicarú nga cani ribeendunu purtiʼ qué gánnanu padxí ne pora guinitilú guidxilayú malu riʼ. Lugar de chuʼnu triste o guireʼnu gana, jma ricá íquenu gúninu ni na Jiobá ne runi sentirnu nuunu jma gaxha de Bixhózenu. Cayúninu dxiiñaʼ casi tuuxa ni maʼ gudixhenáʼ lu aradu ne qué rudiʼnu lugar chuʼ xiixa ni cueechú laanu, nga runi riuʼnu nayecheʼ ora maʼ cayúninu xhiiñaʼ Jiobá (Luc. 9:62).
18. Xiñee qué racaláʼdxinu gusaananu xhiiñaʼ Jiobá.
18 Nabé nagueenda zeeda dxiña dxi gunitilú Dios guiráʼ binni malu, ne qué rápanu gana chuʼ ladxidóʼ Jiobá ne Jesús triste pur cani gúninu. Guirópacabe maʼ bidiicabe laanu ti dxiiñaʼ sicarú lu ca últimu dxi riʼ. ¡Nabé riéchenu purtiʼ ruuyacabe laanu casi binni ni zanda guni xhiiñacabe! (biindaʼ 1 Timoteo 1:12.)
19. Ximodo rusihuínninu nuunu listu.
19 Pa cabézanu chuunu guibáʼ o guibáninu ndaaniʼ Paraísu, quixhe íquenu gúninu dxiiñaʼ bisaanané Dios laanu: gucheechenu diidxaʼ ne gacanenu binni gaca discípulo. Dede nagasi qué gánnanu padxí ne pora guinitilú guidxilayú riʼ, peru ñee caquiiñepeʼ gánnanu ni la? Zanda gusihuínninu nuunu listu ne naquiiñeʼ gúninu ni (Mat. 24:36, 44). Pa guni crenu Jiobá de guidubi ladxidoʼno ne pa gúninu xhiiñaʼ Reinu primé lu xquendanabáninu la? qué zusaanabe laanu (Rom. 10:11).
[Nota]
[Guendarinabadiidxaʼ stiʼ párrafo]
[Imagen ni zeeda lu yaza 26]
Neca cadídinu ra nagana, naquiiñeʼ guicá íquenu guizíʼdinu de Dios
[Imagen ni zeeda lu yaza 27]
Xiñee nagueenda ridiʼdiʼ tiempu ora jma cayúninu xhiiñaʼ Jiobá
