Jehova i Singaot Ol Man Blong Hem Oli Kam Wanples

“Yufala i mas singaot olgeta man wetem ol woman oli kam wanples, wetem ol pikinini mo ol strenja ya we oli stap long ol ples blong yufala.”—DUT. 31:12.

?BAMBAE YU YU ANSA OLSEM WANEM?

?Wanem samting i soemaot se ol man blong Jehova oli tinghae long ol asembli?

?Ol man Isrel oli mekem wanem blong oli save joen long ol lafet long Jerusalem?

?From wanem yu mas go long evri asembli?

1, 2. ?Long stadi ya, bambae yumi lanem wanem long saed blong ol asembli?

PLANTE yia finis, ol man blong Jehova oli joen wanples long ol bigfala asembli mo ol asembli blong tri dei. Plante long yumi, yumi joen long ol asembli ya. Maet long ol yia we i pas yumi joen long plante asembli olsem.

² Plante taosen yia bifo, ol man blong God tu oli gat ol asembli. Naoia, i gud yumi luk ol asembli we Baebol i tokbaot, mo olsem wanem oli sem mak long ol asembli blong yumi tede. Mo bambae yumi luk from wanem i gud we yumi go long ol asembli ya.—Sam 44:1; Rom 15:4.

OL ASEMBLI LONG TAEM BLONG BAEBOL MO TEDE

3. (1) ?Wanem i hapen long fas asembli we Baebol i tokbaot? (2) ?Ol man Isrel oli save olsem wanem se oli mas joen wanples?

³ Fas bigfala asembli we Baebol i tokbaot, hemia taem ol man Isrel oli go long botom blong hil ya Sinae, blong Jehova i tijim olgeta. Hemia wan spesel taem long histri blong ol man we oli wosipim Jehova. Jehova i soemaot paoa blong hem long ol man Isrel, mo i givim Loa long olgeta. Oli no save fogetem dei ya. (Eks. 19:2-9, 16-19; ridim Eksodas 20:18; Dutronome 4:9, 10.) Long dei ya, fasin fren blong ol man Isrel wetem God i jenis. Smoltaem biaen, Jehova i stanemap wan rod blong singaot ol man blong hem oli kam wanples. Hem i talem long Moses blong i tekem silva mo i wokem tu trampet long hem. Taem oli blu long tufala trampet ya, ol man Isrel oli save se oli mas go long “doa blong Haos Tapolen.” (Nam. 10:1-4) !Ol man ya oli glad bigwan taem oli joen long ol asembli ya!

4, 5. ?From wanem ol asembli we Moses mo Josua i mekem, oli impoten?

⁴ Taem ol man Isrel oli stap long draeples blong  40 yia, Moses i singaot olgeta evriwan oli kam wanples long wan asembli. Taem ya i impoten long histri blong niufala neson ya, from we i no longtaem bambae oli go insaed long Promes Lan. Moses i wantem we ol man Isrel oli tingbaot bakegen ol samting we Jehova i mekem finis blong givhan long olgeta, mo ol samting we bambae hem i mekem yet.—Dut. 29:1-15; 30:15-20; 31:30.

⁵ Maet long taem ya nao Moses i talem long olgeta se bambae i gat wan spesel asembli. Evri seven yia, long Lafet Blong Ol Wansaed Haos, ol man, woman, pikinini, mo ol strenja, oli mas kam wanples long ples we Jehova i jusumaot. Bambae oli harem ol loa blong Jehova blong oli save ona long hem mo obei long ol tok blong hem. (Ridim Dutronome 31:1, 10-12.) I klia se Jehova i wantem we ol man blong hem oli kam wanples blong lanem ol loa blong hem, mo stamba tingting blong hem. Afta we ol man Isrel oli go insaed long Promes Lan, Josua i singaot olgeta oli kam wanples. Long taem ya, ol neson we oli no wosipim Jehova oli fulap raonabaot long olgeta. Taswe Josua i save se oli nidim ol gudfala tok blong givhan long olgeta blong oli holemstrong long Jehova. Long taem ya, ol man Isrel oli mekem wan strong promes se oltaem nomo bambae oli obei long Jehova.—Jos. 23:1, 2; 24:1, 15, 21-24.

6, 7. ?Wanem ol bigfala asembli we oli kamaot long taem blong yumi?

⁶ Long taem blong yumi tu, i gat ol bigfala asembli we oli impoten. Long ol asembli ya, oli talemaot ol jenis we ogenaesesen blong Jehova i mekem. Mo oli eksplenem mining blong ol vas blong Baebol we oli kam klia moa. (Prov. 4:18) Long 1919, afta long Wol Wo Wan, ol Baebol Studen oli gat fas bigfala asembli blong olgeta, we i stap long Cedar Point, Amerika. I gat 7,000 man long asembli ya. Long asembli ya, oli talemaot se ol man blong God bambae oli traehad blong prij long olgeta ples long wol. Long 1922, oli mekem wan narafala asembli bakegen long sem ples. Asembli ya i blong naen dei. Brata Joseph F. Rutherford i mekem wan tok we i pulum evriwan blong oli prij long evri ples, kasem taem we Bigfala Babilon i lus. Hem i talem se: “Olgeta man long wol oli mas save se Jehova hem i God, mo se Jisas Kraes hem i King blong ol king mo Masta blong ol masta. Naoia yumi stap long taem we i impoten moa bitim ol narafala taem. !Yufala i luk, King i stap rul finis! Yufala nao i man we hem i yusum blong talemaot hem long olgeta man. Taswe talemaot, talemaot, talemaot, King ya mo kingdom blong hem.” Biaen, ol man we oli kam long asembli ya, mo ol man blong God long olgeta ples long wol, oli stat blong prij wetem strong tingting.

⁷ Long 1931, ol Baebol Studen oli joen long wan asembli long Columbus, Ohio. Long taem ya, oli glad tumas blong karem nem ya ol Witnes blong Jehova. Mo long 1935, long Washington, Brata Rutherford i givim wan tok blong eksplenem “bigfala hip blong ol man” we Revelesen i tokbaot se “oli stap stanap long fran blong bigfala jea blong king, mo long fes blong smol Sipsip.” (Rev. 7:9-17) Long 1942, long taem blong Wol Wo Tu, Brata Nathan H. Knorr i givim wan tok we i pulum tingting blong man. Nem blong tok ya, “Pis—?I Save Stap Blong Olwe?” Brata Knorr i eksplenem “anamol we i red we i red” we Revelesen 17 i tokbaot. Hem i talem se i gat bigfala wok blong prij i stap yet blong mekem afta long Wol Wo Tu.

8, 9. ?Wanem sam asembli we i mekem ol man blong God oli glad?

⁸ Long 1946, long asembli ya “Ol Neson We Oli Glad,” long Cleveland, Brata Knorr i givim wan tok we i pulum tingting blong man. Nem blong tok ya se, “Ol  Problem Blong Bildim Haos Mo Mekem i Kam Bigwan.” Wan brata we i stap long taem ya, i talem se taem Brata Knorr i tokbaot ol plan blong mekem Betel mo faktri long Brooklyn i kam bigwan moa, ol man oli klapem han we oli klapem han. Man we i stap longwe i save luk klia nomo se ol man long asembli ya oli harem gud tumas. Long 1950, long wan asembli long New York, evriwan oli glad blong kasem Baebol ya, New World Translation of the Christian Greek Scriptures. Hem i fas Baebol long Inglis blong tede, we oli putumbak nem blong God long stret ples blong hem.—Jer. 16:21, NW.

⁹ Oli mekem ol bigfala asembli tu long sam ples we fastaem ol man oli agensem strong ol Witnes blong Jehova, mo oli blokem wok blong prij. Hemia wan taem blong glad blong olgeta we oli go long asembli ya. Long Jemani, Adolf Hitler i talem se bambae hem i finisim olgeta Witnes blong Jehova. Be long 1955, i gat wan asembli long Nuremberg, ples we Hitler mo ol man blong hem oli stap joen long hem. Mo 107,000 Witnes blong Jehova oli go long asembli ya. !Plante long olgeta oli krae from we oli glad tumas! Long 1989, i gat 166,518 brata mo sista oli kam long asembli ya “Fasgud long God,” we oli mekem tri taem long Polan. Ol brata mo sista ya oli kam long Soviet Yunion, Jekoslovakia, mo ol narafala kantri long Yurop. Samfala, hemia fastaem blong olgeta blong oli stap long wan asembli olsem, we i gat bitim 15 no 20 man long hem. Long 1993, i gat wan asembli long Yukren we nem blong hem, “Tijing Blong God.” Yu traem tingbaot glad we ol man long asembli ya oli kasem, taem 7,402 man oli baptaes. Namba ya i bitim ol narafala namba blong ol Witnes blong Jehova we oli baptaes long wan dei.—Aes. 60:22; Hag. 2:7.

10. ?Wanem asembli i spesel long yu? ?Mo from wanem?

¹⁰ Maet i gat sam asembli blong tri dei mo sam bigfala asembli we oli spesel long yu. ?Yu yu tingbaot fas asembli we yu go long hem, no we yu baptaes long hem? Ol asembli ya oli impoten tumas long wosip we yu mekem long Jehova, mo yu no mas fogetem olgeta. !Hemia ol gudfala memori!—Sam 42:4.

OL LAFET WE OLI GO LONG HEM EVRI YIA

11. ?Wanem ol lafet we Jehova i wantem se ol man Isrel oli go long hem evri yia?

¹¹ Jehova i wantem se ol man Isrel oli go long Jerusalem, blong mekem tri bigfala lafet evri yia. Hemia Lafet blong Kakae Bred we i No Gat Is long hem, Lafet blong Tekemaot Kakae blong Garen (we biaen oli kolem lafet blong Pentekos), mo Lafet blong ol Wansaed Haos. God i talem long ol man Isrel se: “Evri yia, long trifala lafet ya, yufala ol man bambae yufala evriwan i mas kam mekem wosip long mi.” (Eks. 23:14-17) Plante man oli save se ol lafet ya oli impoten, taswe oli go wetem ful famle blong olgeta.—1 Saml. 1:1-7; Luk 2:41, 42.

12, 13. ?Plante man Isrel oli mas mekem wanem blong oli joen long ol lafet ya evri yia?

 ¹² ?Wan famle we i wantem go long lafet ya i mas mekem wanem? Josef mo Meri tufala i aot long Nasaret mo tufala i mas wokbaot klosap 100 kilometa i go long Jerusalem. ?Sipos yu yu mas wokbaot olsem wetem ol smol pikinini, yu ting se bambae yu tekem hamas taem? Taem yumi ridim stori blong Jisas, yumi lanem se samtaem ol fren mo famle oli wokbaot wanples i go long Jerusalem. Ating oli wokbaot wanples i go, oli rerem kakae blong olgeta, mo oli faenem ples blong slip blong olgeta, long ol ples we oli no save. Maet i nogat denja long rod, from we papa mo mama blong Jisas, tufala i letem hem i wokbaot wetem ol narafala, nating se hem i gat 12 yia nomo. !Ol yangfala oli no save fogetem gudfala taem ya!—Luk 2:44-46.

¹³ Plante yia afta, ol man Isrel oli go stap long sam narafala ples long wol. From samting ya, ol man we oli go long Jerusalem blong mekem ol lafet ya, oli kamaot long plante neson. Long yia 33, ol man Jiu mo ol narafala man we oli wosip long Jehova, we oli stap long Itali, Libia, Krit, Esia Maena, mo Mesopotamia, oli go long lafet blong Pentekos long Jerusalem. Olgeta ya oli tinghae long lafet ya.—Wok 2:5-11; 20:16.

14. ?Ol man Isrel oli harem olsem wanem taem oli go long ol lafet ya evri yia?

¹⁴ Samting we ol man Isrel oli laekem tumas, hemia blong wosipim Jehova wetem plante narafala we olgeta tu oli laekem Jehova. ?Olgeta we oli go long ol lafet ya oli harem olsem wanem? Taem Jehova i tokbaot Lafet blong ol Wansaed Haos, hem i talem se: “Yufala wetem ol pikinini blong yufala, mo olgeta we oli stap wok blong yufala, mo olgeta we oli stap wetem yufala, olsem ol Livaet, mo ol strenja, mo ol pikinini we papa blong olgeta i ded, mo ol wido, bambae yufala evriwan i mas glad. Yufala i mas kam long ples ya blong mekem wosip, we Hae God bambae i jusumaot mo yufala i mas mekem lafet ya go kasem seven dei, blong ona long hem. Bambae yufala i mas glad from we hem i stap blesem ol garen blong yufala, wetem ol wok blong yufala.”—Dut. 16:14, 15; ridim Matiu 5:3.

YUMI MAS TINGHAE LONG OL ASEMBLI BLONG YUMI

15, 16. ?Wanem samting we yu mas lego, blong yu save joen long asembli? ?From wanem yu yu glad blong lego ol samting ya?

¹⁵ Ol man blong God tede oli save lanem samting from ol lafet ya long Jerusalem. Long plante fasin, ol asembli tede oli sem mak long ol asembli ya blong bifo. Ol man blong God long taem blong Baebol oli lego plante samting we olgeta nomo oli wantem, blong oli save go long ol asembli ya. Plante long yumi oli glad blong mekem olsem, from we oli save se ol asembli ya oli givhan long olgeta. Ol asembli ya oli impoten long wosip blong yumi. Yumi nidim waes mo save blong mekem fasin fren blong yumi wetem Jehova i strong. Ol asembli oli pulum yumi blong mekem samting we yumi lanem i wok long laef blong yumi, mo oli givhan long yumi blong blokem trabol. Oli givhan long yumi blong blokem ol samting we oli save mekem yumi wari. Mo oli pulum yumi blong mekem ol samting we i givim glad.—Sam 122:1-4.

¹⁶ Olgeta we oli joen long ol asembli ya, oltaem oli harem gud. Wan ripot we i tokbaot wan asembli blong 1946, i talem se i gud tumas blong luk plante taosen Witnes oli joen wanples. Long taem ya, wan bigfala hip blong man oli plei miusik, mo ol man oli singsing long ol naesfala singsing blong presem Jehova. Mo plante man oli glad blong mekem ol defren wok blong givhan long brata sista blong olgeta. ?Yu yu gat sem filing olsem taem yu joen long ol  asembli blong tri dei, no ol bigfala asembli?—Sam 110:3; Aes. 42:10-12.

17. ?Wanem samting i jenis long fasin blong mekem ol asembli?

¹⁷ Tede, fasin blong mekem ol asembli i jenis. Sam man blong God oli tingbaot we bifo, sam asembli oli blong eit dei. I gat program blong moning, program blong aftenun, mo program blong sapa. Wan impoten haf blong program ya, hemia wok blong prij. Samtaem program i stat long naen klok long moning, mo i finis long naen klok long naet. Plante brata sista oli wok had blong rerem ti blong moning, wetem kakae blong dina mo sapa. Tede ol asembli oli no longfala olsem. Mo ol brata sista oli tekem kakae blong olgeta i kam long asembli, ale oli save lesingud long olgeta program blong asembli.

18, 19. ?Wanem haf blong ol asembli we yu yu laekem? ?From wanem?

¹⁸ I gat sam samting we oli stap hapen oltaem long ol asembli, we yumi wantem tumas blong luk olgeta. Sam long ol samting ya, hemia ol tok mo ol niufala buk. Oli olsem “kakae” we yumi kasem “long stret taem blong hem,” mo oli givhan long yumi blong kasem save long ol tijing mo profet tok blong Baebol. (Mat. 24:45) Yumi yusum plante long ol buk ya blong givhan long ol man, blong oli kasem save long ol trutok blong Baebol. I gat ol stori blong Baebol tu we ol man oli aktem. Ol stori ya oli givhan long yumi evriwan, ol yangfala mo ol olfala, blong yumi mekem wok blong Jehova wetem stret tingting. Mo blong yumi lukaotgud blong yumi no gat tingting blong wol. Mo i gat tok blong baptaes we i givhan long yumi blong yumi tingbaot ol samting we oli impoten long laef blong yumi. Mo yumi glad blong luk olgeta we oli givim laef blong olgeta i go long Jehova, oli baptaes.

¹⁹ Longtaem finis i kam, ol asembli oli haf blong wosip blong yumi. Oli givhan long yumi blong yumi harem gud, mo yumi holemstrong long Jehova long taem blong trabol. Oli pulum yumi blong yumi mekem moa long wok blong Jehova. Yumi gat janis blong faenem ol niufala fren. Ol asembli oli givhan long yumi blong luk se yumi joen long wan bigfala kampani blong ol brata sista long fulwol. Jehova i yusum ol asembli blong blesem ol man blong hem, mo blong lukaotgud long olgeta. Yumi evriwan i no wantem mestem nating wan haf blong evri asembli ya.—Prov. 10:22.

[Kwestin]

[Tok blong pija long pej 30]

Bigfala asembli long 1950, Niu Yok

[Tok blong pija long pej 32]

Mosambik

[Tok blong pija long pej 32]

Saot Korea