Zeova i rasanble son pep ki zwaye
Zeova i rasanble son pep ki zwaye
“Rasanble lepep, bann zonm ek bann madanm ek bann zanfan ek bann rezidan etranze.”—DET. 31:12.
KI OU POU REPONN?
Akoz nou kapab dir ki bann lasanble i vreman enportan dan listwar pep Zeova?
Ki zefor bokou Izraelit dan letan lontan ti bezwen fer pour asiste bann lafet Zerizalenm?
Akoz nou devret asiste tou lasanble?
1, 2. Ki nou pou aprann konsernan lasanble dan sa lartik?
LASANBLE distrik e enternasyonal in enn bann aktivite ki Temwen Zeova i organize pour plizyer lannen. Bokou parmi nou in asiste sa bann lasanble diran sa plizyer dizenn lannen ki’n pase.
2 Plizyer milye lannen pase, pep Bondye osi ti organiz bann lasanble. Nou pou aprann diferan laspe sa bann lasanble ki Labib in koz lo la. Nou pou vwar similarite ki zot annan avek lasanble dan nou letan e ki byenfe nou kapab gannyen kan nou asiste zot.—Ps. 44:1; Rom. 15:4.
BANN LASANBLE ENPORTAN DAN LETAN LONTAN EK KONMELA
3. (a) Ki ti arive pandan sa premye lasanble pep Bondye ki’n ganny rikorde dan Labib? (b) Ki mannyer bann Izraelit ti ganny rasanble?
3 Premye gran lasanble ki’n ganny rikorde dan Labib ti kan pep Bondye ti rasanble devan Montanny Sinai pour ganny ansennyen par Zeova. Sa rasanbleman ti enn vreman spesyal dan listwar vre ladorasyon, enn ki ti san dout inoubliyab pour bann Izraelit ki ti la prezan. Zeova ti montre zot son lafors kan i ti pe donn zot son Lalwa. (Egz. 19:2-9, 16-19; lir Egzod 20:18; Deterononm 4:9, 10. *) Sa levennman ti sanz relasyon ki bann Izraelit ti annan avek Zeova. Pa tro lontan apre sa, Zeova ti dir avek Moiz konman pour rasanble son pep. I ti demann Moiz pour fer de tronpet annarzan ki i ti pou servi pour apel “lasanble antye” pour zwenn “kot larantre tabernak.” (Nom. 10:1-4) Esey imazin sa bann lokazyon byen eksitan!
4, 5. Akoz sa bann lasanble ki Moiz ek Zozye ti fer i vreman enportan?
4 I ti apepre 40 an depi ki bann Izraelit ti pe marse dan dezer e i ti’n ariv en moman enportan dan listwar sa nouvo nasyon. Zot ti pros pour antre dan Later Promiz e Moiz ti rasanble zot. La ti sa moman pli apropriye pour Moiz rapel son bann frer tou sa ki Zeova ti’n fer pour zot e tou sa ki i ti pou fer.—Det. 29:1-15; 30:15-20; 31:30.
5 I posib ki i ti pandan sa menm lasanble ki Moiz ti dir pep Izrael ki i ti pou annan bann lasanble spesyal kot zot ti pou ganny edike. Tou le set an pandan Lafet bann Payot, bann zonm, fanm, zanfan ek etranze ti devret rasanble dan en landrwa kot Zeova ti’n swazir ‘pour zot ekoute e pour zot kapab aprann pour annan lakrent pour Zeova e fer atansyon pour aplik tou bann parol lalwa.’ (Lir Deterononm 31:1, 10-12. *) Alor sa i montre klerman ki depi o konmansman, pep Bondye ti devret rasanble regilyerman pour aprann parol Zeova ek son plan. Kan bann Izraelit ti’n fini konkerir Later Promiz e ankor antoure avek bann nasyon payen, Zozye ti rasanble tou pep Izrael avek lobzektif pour ranforsi zot determinasyon pour reste fidel anver Zeova. Sa zour, lepep ti fer en ve pour servi Bondye.—Zoz. 23:1, 2; 24:1, 15, 21-24.
6, 7. Ki bann lasanble enportan ki’n ganny fer dan nou letan?
6 Dan nou letan, pep Zeova osi in fer bann lasanble enportan kot in annan bann sanzman dan aktivite teokratik oubyen lafason ki nou konpran Labib. (Prov. 4:18) Premye gran lasanble ki bann Etidyan Labib ti fer apre Premye Lager Mondyal ti sa enn an 1919 Cedar Point, Ohio, Leta-z-ini. Dan sa lasanble ki ti annan apepre 7,000 asistan, en kanpanny mondyal pour prese ti ganny lanse. An 1922, pandan en lasanble nef zour ki ti ganny fer dan menm landrwa, Joseph Rutherford ti fer en diskour vreman serye e i ti donn son lodyans ki ti byen atantif sa lankourazman: “Vin en temwen fidel e vre pour Senyer. Kontinyen dan sa lager ziska ki Gran Babilonn i ganny konpletman detrir. Pres sa mesaz partou kote. Lemonn i devret konnen ki Zeova i Bondye e ki Zezi Kri i Lerwa bann lerwa e Senyer bann senyer. Sa i en gran zour. Gete, nou Lerwa pe dirize! Zot zot sa bann ki i pe servi pour anons sa mesaz. Alor anonse, anonse, anonse konsernan sa Lerwa ek son rwayonm.” Bann ki ti dan lasistans e byensir tou pep Bondye dan lemonn antye ti vreman kontan e pran a ker sa parol.
7 Dan en lasanble ki ti ganny fer Columbus, Ohio an 1931, bann Etidyan Labib ti byen kontan pour ganny apele Temwen Zeova. An 1935, Washington, D.C., Frer Rutherford ti idantifye sa “gran lafoul” ki liv Revelasyon i dekrir konmkwa zot pe “debout devan tronn e devan Lanyo.” (Rev. 7:9-17) An 1942, pandan Dezyenm Lager Mondyal, Nathan Knorr ti fer en diskour ki ti annan pour tit: “Peace—Can It Last?” (Lape dirab, eski i posib?) Dan sa diskour, i ti idantifye sa “bebet rouz” dan Revelasyon sapit 17 e i ti montre ki sa travay predikasyon ti pou kontinyen apre lager.
8, 9. Kwa ki’n fer serten lasanble enn ki vreman ankourazan?
8 Enn parmi bann diskour remarkab ki ti ganny fer dan sa lasanble “Glad Nations” (Nasyon zwaye) an 1946 Cleveland, Ohio, ti sa enn ki Frer Knorr ti fer ki ti annan pour tit: “The Problems of Reconstruction and Expansion” (Problenm rekonstriksyon ek lagrandisman). En frer ti fer sa komanter lo leksitasyon ki ti annan parmi lodyans pandan sa diskour: “Mon ti ganny sa privilez pour asiz par deryer li lo platform sa zour swar e anmezir ki i ti pe koz lo travay predikasyon e apre mansyonn konsernan plan pour agrandi Betel Brooklyn ek son lizin, lodyans ti aklanm ankor e ankor. Menm si ou pa ti kapab remark figir bann dimoun, ou ti konpran ki zot ti vreman zwaye.” Pandan en lasanble enternasyonal ki ti ganny fer dan lavil New York an 1950, lodyans ti vreman kontan pour ganny New World Translation of the Christian Greek Scriptures. I ti pli tar form parti en Labib dan langaz modern ki ti remet non Bondye dan son plas kot i ti devret ete.—Zer. 16:21.
9 Bann lasanble kot Zeova in rasanble son bann Temwen fidel apre en peryod persekisyon oubyen kot predikasyon ti ganny enterdi i osi vreman ankourazan. Adolf Hitler ti fer en ve pour detrir tou Temwen Zeova Lalmanny. Me dan sa menm landrwa kot larme Hitler ti abitye fer parad, Nuremberg, 107,000 Temwen Zeova ti ranpli sa landrwa pandan en lasanble an 1955. Bokou ki ti la prezan pa ti kapab evite plere avek lakontantman! An 1989, i ti annan 166,518 delege ki ti asiste sa lasanble distrik trwa zour Lapolonny ki ti annan pour tenm: “Godly Devotion” (Devosyon pour Bondye). Bokou parmi sa bann delege ti sorti sa landrwa ki lontan ti apel Linyon Sovyetik ek Tyekoslovaki, ek lezot pei dan Les Lerop. Pour serten sa bann dimoun, i ti fer premye fwa ki zot ti parmi plis ki 15 a 20 serviter Bondye. Aprezan zis mazin sa lazwa ki i ti annan kot sa lasanble enternasyonal ki ti ganny fer Kiev, Likrenn an 1993. Pandan sa lasanble distrik ki ti annan pour tenm: “Divine Teaching” (Lansennyman sorti kot Bondye), i ti annan 7,402 dimoun ki ti batize, posibleman pli gran kantite batenm parmi Temwen Zeova ki’n deza ganny rikorde dan en zour.—Iza. 60:22; Aga. 2:7.
10. Ki lasanble ki ti pli spesyal pour ou e akoz?
10 Petet ou mazin serten lasanble distrik oubyen enternasyonal ki ti pli spesyal pour ou. Eski ou rapel sa premye lasanble ki ou ti asiste oubyen sa lasanble kot ou ti batize? Sa ti bann levennman spirityel enportan pour ou. Zot bann souvenir ki ou devret toultan apresye!—Ps. 42:4.
BANN LOKAZYON KI FER NOU ZWAYE
11. Ki lafet Bondye ti demann bann Izraelit pour asiste tou le lannen?
11 Zeova ti demann bann Izraelit pour rasanble Zerizalenm pour selebre trwa lafet tou le lannen. Sa ti Lafet Gato san Lelven, Lafet bann Semenn (sa ki pli tar ti apel Lapannkot) ek Lafet bann Payot. Bondye ti dir zot: “Trwa fwa par an tou zonm parmi zot pou vin devan figir sa vre Senyer, Zeova.” (Egz. 23:14-17) Bokou sef fanmir ti asiste sa bann lafet avek tou zot fanmir akoz zot ti realize ki sa bann lafet ti vreman enportan.—1 Sam. 1:1-7; Lik 2:41, 42.
12, 13. Ki bann Izraelit ki ti asiste bann lafet tou le lannen ti bezwen fer?
12 Esey mazinen ki mannyer en fanmir Izraelit ti pou fer sa traze. Par egzanp, Zozef ek Mari ti pou bezwen mars apepre 100 kilomet pour sorti Nazaret pour al Zerizalenm. Konbyen letan ou mazinen i ti pou pran ou pour mars tou sa zistans si ti annan pti manrmay avek ou? Sa resi konsernan ler Zezi ti al Zerizalenm letan i ti ankor en pti garson i endike ki parfwa bann fanmir ek zanmi ti vwayaz ansanm. Zot ti bezwen mars ansanm, prepar manze ansanm e trouv en landrwa konvenab pour dormi dan en landrwa kot zot pa ti abitye avek. Kantmenm sa, nou konnen ki sa traze pa ti koz okenn danze akoz paran Zezi ti donn li serten laliberte menm si i ti annan zis 12 an. I ti pou’n bezwen vreman en leksperyans inoubliyab, sirtou pour bann zanfan!—Lik 2:44-46.
13 Apre ki bann Izraelit ti’n disperse partou dan lezot parti lemonn, bann ki ti asiste sa bann lafet ti sorti dan diferan pei. Pandan Lapannkot lannen 33 N.L., bann Zwif ek bann ki ti’n konverti dan larelizyon Zwif ti montre ki sa bann lafet ti enportan pour zot akoz zot ti vwayaze sorti dan bann pei parey Itali, Lalibi, Kret, Lazi Miner ek Mezopotami pour al Zerizalenm.—Akt 2:5-11; 20:16.
14. Ki benediksyon bann Izraelit ti gannyen kan zot ti asiste bann lafet tou le lannen?
14 Pour bann Izraelit fidel, laspe pli enportan e eksitan sa bann vwayaz sete pour ador Zeova ansanm avek plizyer milye dimoun. Ki lefe sa ti pou annan lo bann ki ti asiste sa bann lafet? Nou kapab trouv larepons dan sa ki Zeova ti dir avek son pep konsernan Lafet bann Payot: “Ou devret zwaye pandan ou lafet, ou, ou garson ek ou fiy, ou lesklav zonm ek ou lesklav fiy, ensi ki bann Levit, rezidan etranze, garson ki napa papa ek vev ki pe reste parmi ou. Pandan set zour ou pou selebre sa lafet pour Zeova ou Bondye dan landrwa kot Zeova in swazir, akoz Zeova ou Bondye pou beni tou sa ki ou prodwir ek tou travay ou lanmen, e ou devret ranpli zis avek lazwa.”—Det. 16:14, 15; lir Matye 5:3. *
AKOZ NOU DEVRET APRESYE NOU BANN LASANBLE?
15, 16. Ki sakrifis ou’n deza fer pour asiste bann lasanble? Akoz ou zefor ti vo lapenn?
15 Pa sa bann lasanble dan letan lontan i en bon legzanp pour pep Bondye ozordi! Menm si bokou keksoz in sanze diran bann syek, bann laspe enportan sa bann lasanble pa’n sanze. Dan letan lontan, bann adorater Zeova ti bezwen fer bokou sakrifis pour asiste lasanble. Nou osi ozordi nou bezwen fer sakrifis. Pourtan, benediksyon ki nou gannyen i fer li vo lapenn pour fer sa bann sakrifis. Sa bann levennman i touzour bann lokazyon spirityel ki enportan pour nou. Atraver zot nou ganny lenformasyon ek konprenezon ki vreman esansyel pour nou annan en bon relasyon avek Bondye. Bann lasanble i motiv nou pour aplik sa ki nou aprann, ed nou pour evit bann problenm e ankouraz nou pour reste konsantre lo bann keksoz ki fer nou ere, non pa lo sa ki pou vin en fardo pour nou.—Ps. 122:1-4.
16 Bann ki asiste lasanble i toultan santi zot zwaye. En lartik ki ti ganny ekrir lo en gran lasanble ki ti ganny fer an 1946 i dir: “I ti vreman eksitan pour vwar sa plizyer mil temwen dan en landrwa byen konfortab. Sa ki ti pli eksitan sete pour ekout sa gran lorkes ki ti akonpanny lavwa sa gran lafoul pour fer rezonnen bann zoli kantik Rwayonm pour rann glwar Zeova.” Sa lartik ti azoute: “Servis Volonter ti pe anrezistre bann travayer parmi bann delege pour travay dan tou departman, zot ti pe fer li dan lazwa akoz zot ti kontan pour servi zot bann frer ek ser.” Eski ou osi ou’n deza santi sa leksitasyon kot en lasanble distrik oubyen enternasyonal?—Ps. 110:3; Iza. 42:10-12.
17. Ki sanzman ki’n annan avek nou bann lasanble?
17 I annan serten keksoz ki’n sanze dan lafason ki lasanble i ganny organize. Par egzanp, serten serviter Bondye i ankor mazin bann lasanble ki ti ale pour wit zour! I ti annan sesyon bomaten, apremidi e aswar. Predikasyon ti en parti regilye sa progranm. Parfwa progranm ti konmans ne-v-er bomaten e fini ne-v-er diswar. Bann volonter ti travay dir pour plizyer erdtan pour prepar brekfas, dezennen ek dinen pour bann ki ti pe asiste sa bann lasanble. Konmela lasanble i pli kourt e sak fanmir ek endividi i prepar zot prop manze avan ki zot vini e sa i donn zot loportinite pour konsantre pli byen lo sa nouritir spirityel ki pe ganny donnen.
18, 19. Ki laspe dan lasanble ou pli kontan e akoz?
18 I annan serten laspe ki’n toultan lo progranm lasanble ki nou espere avek enpasyans sak lasanble. Par egzanp, atraver bann diskour ek nouvo piblikasyon ki ganny lanse pandan lasanble, nou ganny “manze [spirityel] kan i ler” ki ed nou pour pli byen konpran bann profesi Labib ek lezot lansennyman. (Mat. 24:45) Sa bann nouvo piblikasyon ki ganny lanse i ed bann dimoun ki annan en leker senser konpran laverite ki dan Labib. Bann pyes teat baze lo Labib i ankouraz bann zenn konman vye pour egzamin zot motivasyon e pour pa les fason panse sa lemonn enfliyans zot. Diskour batenm osi i donn nou tou loportinite pour reegzamin nou bann priyorite e nou kontan pour vwar bann ki pe al batize konman en siny zot dedikasyon anver Zeova.
19 Depi byen lontan, bann lasanble i form parti nou ladorasyon ki fourni nou avek sa ki nou bezwen pour servi Zeova dan sa bon fason dan sa lemonn difisil. Sa bann rasanbleman i motiv nou spirityelman, ofer nou loportinite pour fer nouvo zanmi, ed nou vwar ki savedir form parti lasosyasyon bann frer ek ser dan lemonn e zot enn bann mwayen ki Zeova i beni e pran swen avek son pep. Sirman sakenn nou pou anvi organiz nou byen pour ki nou kapab asiste e benefisye atraver tou sesyon sak lasanble.—Prov. 10:22.
[Not anba lo paz]
^ par. 3 Egzod 20:18: “Tou dimoun ti pe vwar loraz ek zekler ek son tronpet ek lafimen lo montanny. Kan bann dimoun ti vwar sa, zot ti tranble e debout en zistans.” Deterononm 4:9, 10: “9 Selman vey byen ou lekor e fer byen atansyon, pour ki ou pa oubliy bann keksoz ki ou lizye in vwar e ki zot pa elwannyen avek ou leker tou dilon ou lavi; e ou bezwen rakont sa bann keksoz avek ou bann garson ek ou bann pti zanfan, 10 sa zour ki ou ti debout devan Zeova ou Bondye Oreb kan Zeova ti dir avek mwan: ‘Rasanble lepep ansanm ver mwan pour ki mon a kapab fer zot tann mon parol, pour ki zot kapab aprann annan lakrent pour mwan sak zour ki zot vivan lo sa later e pour ki zot a kapab ansenny zot bann garson.’”
^ par. 5 Deterononm 31:1, 10-12: “1 Apre Moiz ti ale e dir sa bann parol avek pep Izrael.” “10 Apre Moiz ti konmann zot an dizan: ‘A lafen tou le set an, pandan letan fikse, lannen ki bann det i ganny kennsel, pandan Lafet bann Payot, 11 kan tou pep Izrael i vin vwar figir Zeova ou Bondye dan sa landrwa ki i pou swazir, ou pou lir sa lalwa devan tou pep Izrael pour zot tande. 12 Rasanble lepep, bann zonm, bann madanm, bann zanfan ek bann rezidan etranze ki pe reste parmi zot pour zot kapab ekoute e ki zot kapab aprann, akoz zot devret annan lakrent pour Zeova zot Bondye e fer atansyon pour aplik tou bann parol sa lalwa.’”
^ par. 14 Matye 5:3 (NW): “Ere bann ki konsyan zot bezwen spirityel akoz rwayonm lesyel i pour zot.”
[Kestyon]
[Portre lo paz 30]
Lasanble enternasyonal lavil New York an 1950
[Portre lo paz 32]
Mozanbik
[Portre lo paz 32]
Sid Kore
