1, 2. Ano nga mga bahin han teokratiko nga mga kombensyon an aton hihisgotan?

AN INTERNASYONAL ngan distrito nga mga kombensyon maiha na nga bahin han moderno nga kasaysayan han mga Saksi ni Jehova. Damu ha aton an nakatambong hinin makalilipay nga mga okasyon, bangin damu na ka beses ha paglabay han mga tuig.

² Yinukot ka tuig na an naglabay, an katawohan han Dios nagkaada liwat baraan nga mga kombensyon. Aton yana hihisgotan an mga kombensyon han katawohan han Dios nga gin-unabi ha Biblia, an mga kaparihoan hito ha aton mga kombensyon yana, sugad man an mga kapulsanan han pagtambong hito.—Sal. 44:1; Roma 15:4.

3. (a) Ano an nahitabo ha siyahan nga nakarekord nga kombensyon han katawohan ni Jehova? (b) Paonan-o gintatawag an mga Israelita basi magkatirok?

³ An pagkatirok ha ubos han Bukid Sinai amo an siyahan nga nakarekord ha Biblia nga daku nga kombensyon han katawohan han Dios basi kumarawat hin mga instruksyon ni Jehova. Importante gud ito nga hitabo ha kasaysayan han putli nga pagsingba. Hiton makalilipay nga okasyon nga sigurado nga waray gud hingalimti han mga tinambong, iginpakita ni Jehova ha mga Israelita an iya gahum han iginhatag niya ha ira an iya Balaud. (Eks. 19:2-9, 16-19; basaha an Eksodo 20:18; Deuteronomio 4:9, 10.) Tikang hito nga okasyon, an Israel espesyal na nga katawohan han Dios. Waray pag-iha katapos hito, naghatag hi Jehova hin instruksyon kan Moises kon paonan-o titirukon an Iya katawohan. Iya ginsugo hi Moises nga maghimo hin duha nga silber nga trumpeta nga gagamiton ha pagtawag han “bug-os nga katiringban” basi magkatirok “ha ganghaan han tabernakulo han katiringban.” (Num.  10:1-4) Hunahunaa kon ano kamalipayon an katawohan hito nga mga okasyon!

4, 5. Kay ano nga importante gud an mga kombensyon nga gin-organisa ni Moises ngan ni Josue?

⁴ Ha ikatarapos han 40 ka tuig nga temporaryo nga pag-ukoy ha kamingawan han mga Israelita, ha importante gud nga panahon ha kasaysayan hiton bag-o pa la naorganisa nga nasud, gintirok ni Moises an iya mga igkasi-Israelita. Tisulod na hira ha Tuna nga Iginsaad, salit ito an husto nga panahon nga ipahinumdom ni Moises ha ira an ngatanan nga ginbuhat ni Jehova para ha ira ngan an ngatanan nga pagbubuhaton pa Niya.—Deut. 29:1-15; 30:15-20; 31:30.

⁵ Bangin hito liwat nga kombensyon gin-unabi ni Moises an regular nga kahikayan nga magkatirok an katawohan han Dios basi tutdoan hira. Kada pito ka tuig, durante han Piyesta han mga Payag, an kalalakin-an, kababayin-an, kabataan, ngan mga humarapit ha Israel ginsugo nga magkatirok ha lugar nga ginpili ni Jehova ‘basi hira makabati, makatoon, ngan mahadlok kan Jehova ngan magbantay ha pagbuhat han ngatanan nga pulong han balaud.’ (Basaha an Deuteronomio 31:1, 10-12.) Salit temprano ha kasaysayan han katawohan han Dios, matin-aw nga kinahanglan magkatirok hira hin agsob basi mahibaro han pulong ngan mga katuyoan ni Jehova. Han nasakop na han mga Israelita an Tuna nga Iginsaad kondi napapalibotan pa gihapon hira han pagano nga mga nasud, gintirok ni Josue an bug-os nga Israel basi parig-unon an ira determinasyon nga magpabilin nga maunungon kan Jehova. Sugad nga baton, an katawohan nanumpa nga mag-aalagad hira ha Dios.—Jos. 23:1, 2; 24:1, 15, 21-24.

6, 7. Ano an pipira nga makatirigamnan nga kombensyon han katawohan han Dios ha moderno nga panahon?

⁶ Ha kasaysayan han katawohan ni Jehova ha moderno nga panahon, may-ada liwat makatirigamnan nga mga kombensyon diin iginpahibaro an dagku nga pagbag-o ha teokratiko nga mga buruhaton o ha pagsabot ha pipira nga teksto ha Kasuratan. (Prob. 4:18) An siyahan nga daku nga kombensyon han mga Estudyante han Biblia katapos han Girra ha Kalibotan I ginhimo ha Cedar Point, Ohio, U.S.A. han 1919. Hito nga katirok nga gintambongan hin mga 7,000, iginpahibaro an pagtikang han pagsangyaw ha bug-os nga kalibotan. Han 1922, durante han siyam ka adlaw nga kombensyon ha amo gihap nga lokasyon, hi Joseph F. Rutherford naghatag hin mapwersa nga pahayag may kalabotan hini nga buruhaton ngan nagsagda ha atentibo nga mga mamarati: “Magin matinumanon ngan totoo nga mga saksi han Ginoo. Padayon ha pakig-away tubtob nga mabungkag an ngatanan nga tigaman han Babilonya. Ipasamwak an mensahe ha kahigrayoan. An kalibotan kinahanglan mahibaro nga hi Jehova an Dios ngan hi Jesu-Kristo an Hadi han mga hadi ngan Ginoo han mga ginoo. Ini an pinakaimportante ha ngatanan nga adlaw. Kitaa, an Hadi nagmamando na! Kamo an iya mga ahente nga magpapasamwak hito. Salit ipasamwak, ipasamwak, ipasamwak, an Hadi ngan an iya ginhadian.” An mga tinambong, ngan pati na an katawohan han Dios ha bug-os nga kalibotan, malipayon nga sinugot hito nga pag-aghat.

⁷ Han 1931 ha Columbus, Ohio, an mga Estudyante han Biblia nalipay gud pagkarawat han ngaran nga mga Saksi ni Jehova. Katapos, han 1935 ha Washington, D.C., iginsaysay ni Brother Rutherford kon hin-o an daku nga panon nga iginhulagway ha Pahayag nga “nagkakatukdaw ha atubangan han hadianon nga lingkuranan, ngan han Kordero.” (Pah. 7:9-17) Han 1942, durante han Girra ha Kalibotan II, iginpresenta ni Nathan H. Knorr an makapainteres nga pahayag nga “Kamurayawan—Magpapadayon ba Ito?” Iya iginsaysay kon ano an “mapula nga mananap” ha Pahayag kapitulo 17 ngan nagsiring nga daku pa an buruhaton ha pagsangyaw katapos han girra.

8, 9. Kay ano nga makapabantad gud an pipira nga kombensyon?

⁸ Ha “Glad Nations” Theocratic Assembly ha Cleveland, Ohio han 1946, makapainteres gud an pahayag ni Brother Knorr nga may ulohan “An mga Kakurian han Pagtukod Utro Ngan  Pagpahaluag.” Ha pagsaysay han reaksyon han mga mamarati hito nga pahayag, usa nga tinambong an nagsurat: “Nakapribilehiyo ako nga makapwesto ha iya luyo didto ha entablado hito nga gab-i, ngan samtang iginsasaysay niya an pagsangyaw nga buruhaton ngan katapos gin-unabi an mga plano nga padakuan an home ngan factory ha Brooklyn Bethel, pauroutro nga nagpakpak an mga mamarati. Bisan kon tikang ha entablado waray nakaklaro nga nawong, abat gud an ira kalipay.” Ha usa nga internasyonal nga kombensyon ha New York City han 1950, an mga tinambong nalipay ha pagkarawat han New World Translation of the Christian Greek Scriptures. Ha urhi nagin bahin ito han usa nga Biblia ha moderno nga English diin iginbalik an ngaran han Dios ha orihinal nga hinmumutangan hito ha iya Pulong.—Jer. 16:21.

⁹ Makapabantad gud liwat an mga kombensyon diin gintirok ni Jehova an iya matinumanon nga mga Saksi katapos hin maiha nga panahon nga gintimaraot hira o gindid-an nga magsangyaw. Nagsumpa hi Adolf Hitler nga iya pupoohon an mga Saksi ni Jehova ha Germany, kondi han 1955 ha usa nga kombensyon ha Nuremberg, 107,000 nga Saksi an nagkatirok ha pariho nga lugar nga ginkakatirokan hadto ni Hitler ngan han mga nasuporta ha iya. Damu han tinambong an nagtangis tungod han kalipay! Han 1989, nagkaada tulo nga “Godly Devotion” nga kombensyon ha Poland. Upod han 166,518 nga delegado an kabugtoan tikang ha hadto anay Soviet Union ngan Czechoslovakia, ngan tikang ha iba pa nga nasud ha Eastern Europe. Para ha iba ha ira, ito an siyahan nira nga pagtambong hin katirok han sobra 15 o 20 nga magsiringba han Dios. Ngan hunahunaa an kalipay ha “Divine Teaching” Internasyonal nga Kombensyon ha Kiev, Ukraine han 1993, diin 7,402 an nabawtismohan—an pinakadamu nga nabawtismohan nga mga Saksi ni Jehova nga nakarekord.—Isa. 60:22; Hag. 2:7.

10. Ano nga mga kombensyon an diri mo gud nahingangalimtan, ngan kay ano?

¹⁰ Bangin may distrito o internasyonal nga mga kombensyon nga diri mo nahingangalimtan. Nahinunumdoman mo ba an siyahan nga kombensyon nga imo gintambongan o an kombensyon diin ginbawtismohan ka? Importante gud ito nga mga hitabo ha imo pagsingba kan Jehova. Ayaw gud ito hingalimti!—Sal. 42:4.

11. Ano nga mga piyesta an iginsugo han Dios nga tambongan han mga Israelita kada tuig?

¹¹ Ginsugo ni Jehova an mga Israelita nga magkatirok ha Jerusalem hin tulo ka beses kada tuig para magselebrar hin mga piyesta—an Piyesta han mga Tinapay nga Waray Ipaturubo, Piyesta han mga Semana (ha urhi gintawag nga Pentekostes), ngan an Piyesta han mga Payag. May kalabotan hito, an Dios nagsugo: “Makatulo ha usa ka tuig an ngatanan nga imo mga kalalakin-an mapakada ha atubangan ni Jehova nga Ginoo.” (Eks. 23:14-17) Tungod kay maaram han daku nga espirituwal nga kapulsanan hito nga mga piyesta, damu nga ulo han pamilya an natambong upod an ira bug-os nga pamilya.—1 Sam. 1:1-7; Luk. 2:41, 42.

12, 13. Ano an sadang buhaton han damu nga Israelita basi makatambong ha mga piyesta kada tuig?

¹² Hunahunaa kon ano an sadang buhaton han usa nga Israelita nga pamilya basi makatambong  hito nga mga piyesta. Pananglitan, hira Jose ngan Maria kinahanglan magbiyahe hin mga 100 ka kilometro tikang ha Nasaret ngadto ha Jerusalem. Ha imo hunahuna, ano kaiha niyo babaktason ito kon may upod kamo nga gudtiay nga kabataan? Ha asoy mahitungod han pagkadto ni Jesus ha Jerusalem han bata pa hiya, aton hibabaroan nga an magpararyente ngan magsarangkay usahay nagbuburunyog pagbiyahe. Sigurado nga diri harumamay para ha ira an pagbiyahe ngan pag-andam hin pagkaon nga magkaurupod, pati na an pamiling hin makakaturogan ha mga lugar nga diri pamilyar ha ira. Kondi posible gud nga talwas an pagbiyahe kay gintagan hi Jesus hin igo nga kagawasan han iya mga kag-anak bisan kon 12 anyos pa la hiya. Sigurado nga ito nga mga piyesta diri gud hingangalimtan, labi na han kabataan!—Luk. 2:44-46.

¹³ Han an mga Israelita nagsarang ha iba-iba nga bahin han kalibotan, an mga natambong ha mga piyesta nagtikang ha damu nga nasud. Ha Pentekostes han 33 C.E., iginpakita han mga Judio ngan mga proselita nga ginpabilhan nira ito nga mga piyesta pinaagi ha pagbiyahe ngadto ha Jerusalem tikang ha mga lugar sugad han Italya, Libya, Kreta, Asia Minor, ngan Mesopotamia.—Buh. 2:5-11; 20:16.

14. Ano an gin-abat han mga Israelita han tinambong hira ha mga piyesta kada tuig?

¹⁴ Para ha magtinumanon nga Israelita, an pinakaimportante ngan pinakamakalilipay nga bahin han pagtambong hito nga mga piyesta amo an pagsingba kan Jehova kaupod han yinukot nga nahigugma liwat ha iya. Ano an gin-abat han mga tinambong? Hibabaroan naton an baton ha instruksyon ni Jehova ha iya katawohan may kalabotan ha Piyesta han mga Payag: “Maglipay ka ha imo piyesta, ikaw, ngan an imo anak nga lalaki, ngan an imo anak nga babaye, ngan an imo surugoon nga lalaki, ngan an imo surugoon nga babaye, ngan an Lebihanon, ngan an humarapit ngan an ilo hin amay, ngan an balo nga babaye, nga aada ha sulod han imo ganghaan. Ha pito ka adlaw pagsaurugon mo an piyesta kan Jehova nga imo Dios ha lugar nga pipilion ni Jehova; kay magbibendisyon hi Jehova ha imo ha ngatanan mo nga bunga, ngan ha ngatanan nga buhat han imo kamot, ngan magmamalipayon gud ikaw.”—Deut. 16:14, 15; basaha an Lukas 11:28.

15, 16. Ano nga mga sakripisyo an imo ginhimo basi makatambong ha mga kombensyon? Kay ano nga bawi gud an imo pangalimbasog?

¹⁵ Maopay gud nga susbaranan ha katawohan han Dios yana ito nga mga katirok ha kadaan nga panahon! Bisan kon damu na an nabag-o ha paglabay han panahon, an importante nga mga bahin han mga kombensyon waray mabag-o. Ha kadaan nga panahon, an katawohan han Dios kinahanglan magsakripisyo basi makatambong. Ito liwat an ginbubuhat han damu ha aton yana. Kondi bawi gud an aton pangalimbasog tungod han kapulsanan nga aton nakakarawat. Tikang hadto tubtob yana, ini nga mga okasyon importante ha aton pagsingba. An mga impormasyon ngan pagsabot nga aton napapahimulsan ha mga kombensyon importante gud basi matipigan naton an duok nga relasyon ha Dios. An mga kombensyon nagpapagios ha aton nga iaplikar an aton hinbabaroan, nabulig ha aton nga malikyan an mga problema, ngan nag-aaghat ha aton nga magpabilin nga nakapokus ha mga butang nga makakapalipay imbes nga makakapaluya ha aton.—Sal. 122:1-4.

¹⁶ An mga kombensyon pirme nakakapalipay ha mga natambong hito. Usa nga report mahitungod han usa nga daku nga kombensyon han 1946 an nagsiring: “Makalilipay pagkit-on an yinukot nga saksi nga nagkakaurupod, ngan mas makalilipay pa gud an pagpamati samtang an usa ka daku nga orkestra naduyog ha mga tinambong ha pagkanta hin mag-opay nga kanta ha pagdayaw kan Jehova.” An report nagsiring liwat: “Damu nga delegado an nagpalista ha Volunteer Service Department basi magtrabaho ha iba-iba nga departamento, kay nalilipay gud hira pagserbi ha ira mga igkasi-saksi.” Inabat ka ba liwat hin  sugad hito nga kalipay ha distrito o internasyonal nga mga kombensyon?—Sal. 110:3; Isa. 42:10-12.

17. Ano an mga pagbag-o ha paagi han pag-organisa han mga kombensyon?

¹⁷ May mga pagbag-o ha paagi han pag-organisa han mga kombensyon. Pananglitan, an iba nga kabugtoan nahinunumdom pa han an mga kombensyon naabot hin walo ka adlaw! May sesyon ha aga, kulop, ngan gab-i. Regular nga bahin han programa an pagsangyaw ha kanataran. Usahay an programa nagtitikang ha alas-noybe han aga ngan natatapos ha alas-noybe han gab-i. An mga boluntaryo mauyatom nga nagtatrabaho hin damu ka oras basi mag-andam hin pamahaw, paniudto, ngan pangiklop han mga natambong. Yana diri na sugad kaiha an mga kombensyon, ngan an mga pamilya ngan mga indibiduwal na an abanse nga nag-aandam han ira pagkaon salit mas nakakapamati hira ha programa.

18, 19. Ano nga mga bahin han kombensyon an imo ginpapamulat, ngan kay ano?

¹⁸ May mga bahin han kombensyon nga maiha na nga api ha programa nga pirme naton ginpapamulat. Pananglitan, nakakarawat naton an “pagkaon ha igo nga panahon” pinaagi han mga pahayag ngan bag-o nga iginpagowa nga mga publikasyon nga nabulig ha aton nga mas masabtan an mga tagna ngan katutdoan han Biblia. (Mat. 24:45) Ito nga mga publikasyon agsob nga ginagamit ha pagbulig ha sinsero nga mga tawo nga masabtan an mga kamatuoran ha Biblia. An mga drama nga iginbasar ha Biblia nag-aaghat ha aton ngatanan nga usisahon an aton mga motibo ngan mag-ikmat nga diri maimpluwensyahan han diri diosnon nga panhunahuna han kalibotan. Sugad man, an pahayag ha bawtismo naghahatag ha aton ngatanan hin higayon nga usisahon an aton mga prayoridad ngan maeksperyensyahan an kalipay han pagkita ha iba nga nagsisimbolo han ira dedikasyon kan Jehova.

¹⁹ Oo, an mga kombensyon maiha na nga bahin han putli nga pagsingba. Nabulig ito ha aton nga magin malipayon ngan magpabilin nga matinumanon kan Jehova bisan ha makuri nga mga kahimtang, ngan nag-aaghat ito ha aton nga magbuhat hin dugang pa ha pag-alagad ha iya. Hito nga mga okasyon may higayon kita nga magkaada bag-o nga kasangkayan, ngan nabubuligan kita nga maapresyar an aton bug-os-kalibotan nga pagminagburugto. An mga kombensyon usa nga importante nga paagi nga ginbibendisyonan ngan ginmamangnoan ni Jehova an iya katawohan. Sigurado nga karuyag han tagsa ha aton nga siguruhon nga makatambong ngan magpahimulos ha ngatanan nga sesyon han tagsa nga kombensyon.—Prob. 10:22.