Ma Kunuy Jehovah E Girdi’ Rok Ni Yad Ba Felfelan’

“Mu ulunguy [“kunuy,” NW] urngin e pumoon, nge ppin, nge bitir, nge girdi’ u yugu boch e nam ni be par u lan e pi binaw romed i yan.”—DEUT. 31:12.

UW ROGON NI GA RA FULWEG?

Mang nib ga’ fan e pi convention ni fan ko girdi’ rok Jehovah ni kab kakrom i yib?

Mang athamgil e thingari rin’ piyu Israel kakrom ya nge yag ni ngar uned ko pi madnom u Jerusalem?

Mang ni thingar dab mu pag reb e convention ndabiyog ni ngam un ngay?

1, 2. Mang e gad ra fil u murung’agen e pi convention ara muulung ko re article ney?

 KE BOKUM e duw ni ma un e Pi Mich Rok Jehovah ko muulung ni ka nog e international nge district convention ngay. Ma boor i gadad e kar uned ko gal muulung ney, ni sana boor yay u lan boor e duw.

² Bokum biyu’ e duw kakrom, maku ma un e girdi’ rok Got ko pi muulung nib thothup. Chiney e gad ra fil u murung’agen e pi muulung ni be weliy e Bible nge rogon nib taareb rogon e pi muulung nem ko muulung rodad e ngiyal’ ney. Maku gad ra fil ko mang fan nib fel’ ni ngad uned ko pi muulung ney.—Ps. 44:1; Rom. 15:4.

PI MUULUNG KAKROM NGE NGIYAL’ NEY NIB GA’ FAN

3. (a) Mang e ke buch u nap’an e bin som’on e convention ara muulung ko girdi’ rok Got nrogon ni be yog e Bible? (b) Uw rogon nra nang piyu Israel ko wuin e ngar muulunggad nga taabang?

³ Fare muulung ni kan ta’ u enggin fare Burey ni Sinai e aram e bin th’abi ga’ e muulung ni ke tay e girdi’ rok Got ni ngar motoyilgad ko thin rok. N’en ni ke buch u rom e rib ga’ fan ni fan ko liyor nib riyul’. Ngiyal’ nem, ma ke dag Jehovah gelngin ngak piyu Israel me pi’ e Motochiyel rok ngorad. Re rran nem e dabiyog ni ngar paged talin. (Ex. 19:2-9, 16-19; mu beeg e Exodus 20:18; Deuteronomy 4:9, 10.) Ma rorran nem ma bay ban’en ni ke thil u thilin Got nge piyu Israel. De n’uw nap’an u tomuren e re muulung nem ko fare Burey ni Sinai me yog Jehovah ngak Moses rogon ni nge pining e girdi’ ngaur muulunggad u taabang. Ke yog Jehovah ngak Moses ni nge ngongliy l’agruw i yabul ni silber. Nap’an ni yira thoy e gal yabul nem, ma ke nang piyu Israel nib t’uf ni nga ranod nga “langan e mab ko fare tent.” (Num. 10:1-4, BT) Mu susunnag e n’en ni yad be lemnag e ngiyal’ nem!

4, 5. Mang nib ga’ fan e pi muulung ni ke tay Moses nge Joshua?

⁴ Nap’an ni i par piyu Israel ni sogonap’an 40 e duw u daken  yungi binaw ni kan n’ag, me yarmiy Moses reb e muulung ni fan ko nam nu Israel ni polo’. Ke buch e re n’em u ba ngiyal’ nrib ga’ fan ngak fare nam nu Israel. Ke chugur ni nga ranod nga lan fare Nam ni Kan Micheg, ere rib fel’ ni nge puguran Moses ngak pi walagen e pi n’en ni ke rin’ Jehovah nge urngin ban’en ni bayi rin’ ni fan ngorad.—Deut. 29:1-15; 30:15-20; 31:30.

⁵ Sana ku ireray e ngiyal’ ni ke yog Moses ngak e girdi’ ni yira yarmiy reb e muulung nyugu ba thil. Gubin e medlip e duw, u nap’an e Madnom ko Nochi Naun, ma urngin e pumoon, nge ppin, nge bitir, nge girdi’ u yugu boch e nam ni be par u lan e pi binaw rorad ni ka nog ngorad ni ngar muulunggad nga taabang ko gin nra mel’eg Jehovah. Mu rom e ngar filed murung’agen e Motochiyel rok Jehovah ya nge yib madgun Got u wan’rad mar folgad rok. (Mu beeg e Deuteronomy 31:1, 10-12.) Ere, ba tamilang ni baadag Jehovah ni girdi’ rok e ngaur muulunggad nga taabang ni fan e ngar filed murung’agen e motochiyel rok nge tin nib m’agan’ ngay. Me munmun, ma tomuren ni ke gel piyu Israel ko cham mar tafnayed fare Nam ni Kan Micheg, me tay Joshua chilen ngorad ni ngar muulunggad u taabang. Ma ngiyal’ nem, ma girdi’ nda ur pigpiggad ngak Jehovah e yad ma par u toobrad, ere manang nib t’uf ni ngan pi’ e athamgil nga lanin’rad ya nge yag ni ngar yul’yul’gad ngak Jehovah. Ma rorran nem, e kari micheg piyu Israel ni ngar pigpiggad ngak Got.—Josh. 23:1, 2; 24:1, 15, 21-24.

6, 7. Mang e pi muulung nrib ga’ fan ni kan tay ndawori n’uw nap’an?

⁶ Dawori n’uw nap’an, ma ke tay e girdi’ rok Jehovah e pi muulung nib ga’ fan. Ma nap’an e pi muulung nem e yima yog ngak e girdi’ boch ban’en ni yima rin’ u lan e ulung ni kan thilyeg, nge murung’agen boch e thin nu Bible ni kafin nang fan. (Prov. 4:18) Nap’an e duw ni 1919, ma Piin ni Ma Fil e Bible e kar ted e bin som’on e muulung ara convention u tomuren fa Bin Som’on e Mahl ko Fayleng. Kar ted e re muulung nem u Cedar Point, Ohio, U.S.A., ma 7,000 e girdi’ ni kar uned ngay. Nap’an e re muulung nem, ma ka nog ni nge athamgil e girdi’ rok Got ni ngar machibgad u ga’ngin yang u fayleng. Nap’an e duw ni 1922, ma kun tay bayay reb e muulung u rom ni mereb e rran n’umngin nap’an. Ma nap’an e re muulung nem ma ke pi’ Joseph F. Rutherford reb e welthin ni be pi’ e athamgil nga laniyan’ e girdi’ ni ngaur machibgad u gubin yang nge mada’ ko ngiyal’ ni yira gothey fare Babylon nib Gilbuguwan. Me yog ni gaar: “Thingari nang e girdi’ ni Jehovah e ir e Got ma Jesus Kristus e Pilung ko pi pilung nge Somol ko pi somol. Ereray e rran ko pi rran. Am sap, be gagiyeg fare Pilung! Gimed e pi tamachib rok. Ere ngan machibnag, ngan machibnag, ngan machibnag, fare Pilung nge gil’ilungun.” Ma angin ni yib riy e piin ni kar uned ko re muulung nem, nge girdi’ rok Got u ga’ngin yang e fayleng, e kar tababgad ko machib u fithik’ e pasig.

⁷ Nap’an e muulung ara convention u Columbus, Ohio, ko duw ni 1931, ma Piin ni Ma Fil e Bible e kar felfelan’gad ni ngar fanayed fithingrad ni Pi Mich Rok Jehovah. Ma nap’an e muulung ni kan tay u Washington, D.C., ko duw ni 1935, me weliy Brother Rutherford fan fare ulung ni “pire’ ni pire’” ni bay ko Revelation ni “kar sak’iygad u p’eowchen tagil’ Got nge fare Fak e Saf.” (Rev. 7:9-17) Ma nap’an e Bin L’agruw e Mahl ko Fayleng ko duw ni 1942, me pi’ Nathan H. Knorr reb e welthin ni kenggin e “Rayog ni Nge Par ni Bay e Gapas, Fa?” Nap’an e re welthin nem ma ke tamilangnag fan fare “gamanman nib row” ni bay ko Revelation 17, me yog nrib t’uf ni ngaun machib u tomuren fare mahl.

8, 9. Mang fan ni bay boch e convention ara muulung nrib gel e felfelan’ ko girdi’ ni kar uned ngay?

⁸ Nap’an fare muulung ara convention ni kenggin e “Pi Nam nib Felfelan’” ko duw ni 1946 ma ke pi’ Brother Knorr reb e welthin ni kenggin e “Pi Magawon ni Ngan Toy Bayay e Naun nge Ngan Ga’nag.” Reb e walag ni immoy ko platform u nap’an fare welthin, e ke yoloy murung’agen e n’en nrin’ e girdi’ nbochan e re  welthin nem. Ke yog ni nap’an ni weliy Brother Knorr rogon ni ngan ga’nag fare Bethel home u Brooklyn nge factory, me wayway e girdi’ ni boor yay. Yugu aram rogon ni yad ba palog, machane, mom ni ngan nang ni kar felfelan’gad. Nap’an e international convention u New York City ko duw ni 1950, ma kari felfelan’ e girdi’ ya ke yag ngorad fare New World Translation of the Christian Greek Scriptures. Re n’ey e ke mang bang ko reb e Bible ni kan piliyeg ko bin ni beech e thin nu Meriken, ma kan sulweg fithingan Got ko yungin ni susun ni nge par riy.—Jer. 16:21.

⁹ Pi muulung ney e kun tay u boch e nam ni un gafgownag e Pi Mich Rok Jehovah riy kafram ara ka nog ngorad ndabiyog ni ngar machibgad riy. Piin ni kar uned ko pi muulung nem e kar felfelan’gad nib gel. Bod ni, immoy e tayim ni yog Adolf Hitler nra thang urngin e Pi Mich Rok Jehovah u Chiyamen. Machane, nap’an e duw ni 1955 ma kan tay reb e muulung u Nuremberg ni 107,000 e Pi Mich Rok Jehovah e kar uned ngay. Ma ireram e gin’en ni ma muulung Hitler nge girdi’ rok riy. Boor ko piin ni ur moyed ko re muulung nem e kar yorgad ko felfelan’! Ma nap’an e duw ni 1989, ma 166,518 ko pi walagdad e ka ranod nga Poland kar uned ko dalip e convention ni kenggin e “Ngan Yul’yul’ Ku Got.” Boor i yad e ra bad ko nam ni ka nog e Soviet Union ngay kafram nge Czechoslovakia, nge boch e nam ko ngek u Europe. Boch i yad e aram e yay ni som’on ni kar uned ko muulung ni boor ko 15 ara 20 e girdi’ ni bay riy. Ma ngam susunnag e felfelan’ ni ke yib ngak e piin kar uned ko International Convention u Kiev, Ukraine ko duw ni 1993 ni kenggin e “Machib ni Yib rok Got”. Ma nap’an e re muulung nem ma 7,402 e girdi’ ni kan taufenagrad, ma ireray e yay ni som’on nri boor e girdi’ ni kar uned ko taufe u nap’an e convention ko Pi Mich Rok Jehovah.—Isa. 60:22; Hag. 2:7.

10. Bin ngan e convention ara muulung e ri dab mu pag talin, ma mang fan?

¹⁰ Sana bay boch e district convention ara international convention nrib ga’ fan u wan’um. Gur, ke yib ngan’um fa bin som’on e convention ni kam un ngay ara fare convention ni kan taufenagem riy? Ireray e pi n’en nib ga’ fan ko liyor rom ngak Jehovah. Ma dab mu pag talin e pi n’em!—Ps. 42:4.

PI N’EN NI YIMA MADNOMNAG NI MA K’ARING E FELFELAN’

11. Mang e pi madnom ni ke yog Jehovah ngak piyu Israel ni ngar uned ngay u gubin e duw?

¹¹ Ke tay Jehovah chilen ngak piyu Israel ni ngaur muulunggad u Jerusalem ngar madnomnaged dalip e madnom u gubin e duw. Ma pi n’ey e Madnom ko Flowa Ndariy e Is Riy, nge Madnom ko Mokun Woldug, (ka nog e Pentekost ngay), nge Madnom ko Nochi Naun. Ke yog Jehovah ngak piyu Israel ni gaar: “Dalip i madnom ney u reb e duw e thingari yib gubin e pumoon romed i liyor ngog, i Gag Somol ni Got romed.” (Ex. 23:14-17, BT) Boor e piin pumoon ni kar nanged feni ga’ fan e pi madnom nem ni fan ko liyor rorad ngak Jehovah, ere yad ma fek chon e tabinaw rorad ngar uned ngay.—1 Sam. 1:1-7; Luke 2:41, 42.

12, 13. Mang e thingari rin’ piyu Israel ya nge yag ni ngar uned ko pi madnom rorad u gubin e duw?

¹² Mu lemnag fan e re milekag nem ngak reb  e tabinaw nu Israel ko ngiyal’ nem. Bod ni, Josef nge Maria e yad ma milekag ni sogonap’an 60 e mayel u Nazareth nge mada’ nga Jerusalem. Ere, susun gur nge pi bitir rom e gimed be un ko re milekag nem, ma uw n’umngin nap’an e rayog ni ngam tawgad nga Jerusalem? Faanra ngad beeged e thin nu Bible ni be weliy murung’agen e ngiyal’ ni ke yan Jesus nga Jerusalem, ma gad ra nang ni yu ngiyal’ e yad ma milekag u taabang ni be un ngorad e girdi’ nge fager rorad. Mu susunnag rarogorad u nap’an ni yad be milekag mab t’uf ni ngar fal’eged e ggan rorad u taabang, ma ngar ayuweged yad ni ngar pirieged bang nrayog ni ngar molod riy u lan e pi binaw ni gathi ri yad manang. Gad manang nre milekag nem e dariy e riya’ riy ya kan pi’ e puf rogon ngak Jesus ko yan. Rib mo’maw’ ni ngan pagtalin e re milekag nem, nib ga’ ni piin fel’ yangaren!—Luke 2:44-46.

¹³ Nap’an ni ke yoor e girdi’ nu Israel ni kar chuwgad ko binaw rorad kar pared u bang, ma nap’an nra taw ko rorran ni ngar madnomnaged e pi madnom rorad, ma boor i yad e ke yib u yugu boch e nam. Nap’an e Pentekost ko duw ni 33 C.E., ma piyu Jew nge yugu boch e tapigpig rok Jehovah e kar ted fan e pi madnom nem ya kar milekaggad nga Jerusalem ni kar bad u Italy, nge Libya, nge Crete, nge Asia Minor, nge Mesopotamia.—Acts 2:5-11; 20:16.

14. Uw rogon ni ke fel’ rogon piyu Israel ya ur uned ko pi madnom rorad u gubin e duw?

¹⁴ N’en nrib ga’ fan ko pi milekag nem ngak piyu Israel ni yad ba yul’yul’ e aram e ngar liyorgad ngak Jehovah u taabang nib muun bokum biyu’ e girdi’ ngay ni kub t’uf Got rorad. Uw rogon e pi madnom nem u wan’ e piin ni kar uned ngay? Nap’an ni non Jehovah ngak e girdi’ rok u murung’agen fare Madnom ko Nochi Naun, me yog ngorad ni gaar: “Mi gimed felfelan’ u taabang, ni gimed nge pi fakmed, nge pi tapigpig romed, nge pi Levi, nge girdi’ nu boch e nam, nge piin ka nim’ rorad, nge piin ni ke yim’ figirngirad ni yad ma par u lan e yochi binaw romed. Mathangeluwolnaged Somol ni Got romed ko re mur ney ni ngam ted ni medlip e rran ko ta’gin’en ni tagil’ e liyor. Nge felfelan’med, ya Somol e ke fal’eg waathmed ko wom’engin e woldug nge maruwel ni gimed be tay.”—Deut. 16:14, 15, BT; mu beeg e Luke 11:28.

MANG NI NGAN TAY FAN E PI CONVENTION RODAD E NGIYAL’ NEY?

15, 16. Mang athamgil ni kam tay ya nge yag ni ngam un ko pi convention ara muulung? Mang fan ni kam felfelan’ ya kam athamgil ni ngam un ngay?

¹⁵ Boor ban’en nib fel’ nrayog ni nge fil e pi tapigpig rok Got e ngiyal’ ney ko pi madnom nem u Jerusalem. Pi convention ara muulung ni gad ma tay e ngiyal’ ney e ba taareb rogon ko pi madnom nem u boor e kanawo’. Bod ni, girdi’ rok Got kakrom e rib gel e athamgil ni ur ted ya nge yag ni ngar uned ko pi madnom nem, maku arrogodad e ngiyal’ ney. Machane gad ma rin’ e re n’ey u fithik’ e felfelan’ ya gad manang nrib ga’ angin. Kab ga’ fan e pi n’ey ko liyor rodad e ngiyal’ ney. Ba t’uf ni ngaud motoyilgad ma ngad nanged fan e pi n’en ni yima weliy u nap’an e pi muulung nem ya nge par nib gel e tha’ u thildad Got. Pi convention ney ara muulung e ma pi’ e athamgil nga lanin’dad ni ngad folgad ko n’en ni kad filed u Bible, ma ma ayuwegdad ni ngad siyeged boch e magawon. Maku ma pi’ e athamgil nga lanin’dad ni ngad siyeged boch ban’en nra k’aring e magafan’ ngodad, ma ra k’aringdad ni ngad m’oneged ko yafas rodad e pi n’en nra pi’ e felfelan’ ngodad.—Ps. 122:1-4.

¹⁶ Gubin ngiyal’ ni ma pi’ e pi muulung ney e felfelan’ ngak e piin ni kar uned ngay. Thin ni ka nog murung’agen e convention ni kan tay ko duw 1946 e be yog nrib fel’ ni ngan guy bokum biyu’ e Pi Mich Rok Jehovah ni yad be muulung u taabang. Ma rib fel’ ni ngan guy boor e girdi’ ni yad be chubeg e musik nge girdi’ ni yad be yon’ e tang ni be pining e sorok ngak Jehovah. Ma ku nog ni boor e girdi’ ni kar pied e ayuw nga boch maruwel rorad nib thil thil. Yad ba felfelan’ ni yad be pi’ e ayuw ngak e pi walagrad. Ma gur, ke yib e felfelan’ ngom ni aram rogon u  nap’an ni kam un ko muulung ni district ara international convention?—Ps. 110:3; Isa. 42:10-12.

17. Uw rogon ni kan thilyeg boch e yaram ko pi convention ndawori n’uw nap’an?

¹⁷ Boch ban’en ni yima rin’ u nap’an e pi convention ney e kan thilyeg. Bod ni, boch e girdi’ e yad manang ni immoy e pi convention kafram ni meruk e rran n’umngin nap’an. Yima tay e muulung ni kakadbul nge mada’ ko nnep’. Ma machib e gubin yay ni yima tay ni bang ko program. Yu ngiyal’ e ma tabab e muulung ko mereb ni kakadbul nge mada’ ko mereb nnep’. Rib gel e maruwel ni ma tay e pi walag ni ngar lithed e ggan ni fan ko kakadbul, nge misiw’, nge blayal’. Chiney e kan ngochnag e program ko convention rodad. Ma yooren e walag e rayog ni ngar tedan’rad ko urngin e welthin ni bochan nra bagayad ma be fek e ggan rok.

18, 19. Mang bang ko convention nri ga baadag, ma mang fan?

¹⁸ Bay boch ban’en ko program nri gad baadag ni nge yag ngodad u nap’an e convention. Bod nnap’an e pi muulung ney e ma yag ngodad fare ggan ni yima pi’ “ko ngiyal’ ni yima pi’ riy” ni aram e pi n’en ni gad ma fil ko pi welthin nge pi babyor ni yima pi’ riy nra ayuwegdad ni nge tamilang fan u wan’dad e pi yiiy u Bible nge boch e machib. (Matt. 24:45) Ma boor ko pi babyor ney e rayog ni ngad fanayed ni nge nang e girdi’ fan e thin nu Bible. Ma pi drama ni kan fek u Bible e ma ayuwegdad ni gadad gubin ni nge mudugil u wan’dad nib puluw fan ni gad be pigpig ngak Jehovah maku ra ayuwegdad ni ngad siyeged e lem ko fayleng. Welthin ni fan ko piin ni ngar uned ko taufe e ma ayuwegdad ni ngad lemnaged e tin nrib ga’ fan ko yafas rodad. Ma gad ba felfelan’ ni ngad guyed e girdi’ ni yad be dag ni kar ognaged yad ngak Jehovah ya kar uned ko taufe.

¹⁹ Pi convention e ke mang bang ko liyor nib machalbog u lan bokum biyu’ e duw. Ma be ayuwegdad ni ngaud felfelan’gad ma ud pared ni gad ba yul’yul’ ngak Jehovah ko re ngiyal’ ney nib mo’maw’ e par riy, ma ma pi’ e athamgil nga lanin’dad ni ngad yoornaged e maruwel ni fan ngak. Ma ma ayuwegdad ni ngad pirieged boch e walag ni ngar manged e pi fager rodad, maku rayog ni ngad nanged fan ni ngad manged bang ko ulung rok Jehovah u ga’ngin yang u fayleng. Pi convention rodad e aram e n’en nrib fel’ ni ma fanay Jehovah ni nge ayuweg ara tow’athnag e girdi’ rok. Gadad gubin ni dubdad ni bay ban’en ko program ko convention ni nge dabiyog ni ngad motoyilgad ngay.—Prov. 10:22.

[Study Questions]

[Picture on page 30]

International convention u New York City ko duw ni 1950

[Picture on page 32]

MOZAMBIQUE

[Picture on page 32]

SOUTH KOREA