IEHOVA be iseda “Hadibaia Tauna” badana. (Isa. 30:20) Ena lalokau dainai ia ese ma haida dekenai diba ia henia. Hegeregere, Iehova ese ita ia lalokau henia dainai, “ia karaia gaudia ibounai” be Iesu ia hadibaia. (Ioa. 5:20) Ena lalokau dainai, ‘dahaka do ita herevalaia be ita ia hadibaia,’ unai amo ita gaukara goada ia ita hanamoa bona ma haida ita durua totona.​—⁠Isa. 50:4.

Hakaua Oreana ena Hadibaia Komiti be Iehova ena lalokau karana idia tohotohoa dainai, idia ese tiokratik sikuli 10 idia haginia. Unai amo bema tadikaka taihu edia noho dalana be ia hegeregere bona idia ura unai sikuli dekenai idia lao, unai idia karaia diba. Unai sikuli idauidau be Iehova ena lalokau karana idia hahedinaraia, ani?

Oi ai boiria inai atikol lalonai, unai sikuli ta ta do oi dibaia. Danu, unai sikuli dekenai idia lao taudia haida edia sivarai oi duahia diba. Sibona oi nanadaia, ‘Edena dala ai unai sikuli ta dekenai lau vareai diba?’

Iehova be lalokau Diravana dainai, ia amo ita abia treinini ese eda mauri ia hanamoa, ita ia durua hekwakwanai ita hanaia, bona eda haroro gaukara ita moalelaia totona. (2 Kor. 13:11) Keristani taudia ginigunadia bamona, ita be hegeregere momokani Baibel amo ma haida ita hadibaia, bona ita durudia idia dibaia gaudia idia badinaia totona.​—⁠Mat. 28:20

Ena be unai sikuli ibounai dekenai ita lao diba lasi, to unai sikuli ta o haida amo namo ita davaria diba. Bona ita dibaia gaudia be eda mauri lalonai ita badinaia diba. Danu, haroro gaukara ai unai sikuli dekenai idia lao taudia ita bamoa neganai, eda haroro gaukara ita hanamoa diba.

Sibona oi nanadaia: ‘Lau hegeregere unai sikuli ta dekenai lau vareai totona, a?’

Iehova ena Witnes taudia idia abia dae, unai sikuli idauidau dekenai idia lao bona diba idia abia be hahenamo badana ta. Namona be unai sikuli amo oi abia diba ese oi ia durua, Dirava kahirakahira oi lao bona sivarai namona harorolaia gaukarana oi hagugurua totona.