Isukulu Esuo-Ọghẹnẹ​—I Dhesẹ nọ Jihova O You Omai

JIHOVA họ ‘Owuhrẹ Ologbo’ mai. (Aiz. 30:20) Uyoyou o be wọe wuhrẹ amọfa. Wọhọ oriruo, uyoyou udidi o be wọ Jihova dhesẹ “eware kpobi nọ ọye oma riẹ o re ruẹ” kẹ Jesu. (Jọn 5:20) Uyoyou nọ Jihova o wo kẹ omai Isẹri riẹ o be wọe kẹ omai “ẹrọwo-unu otu nọ a wuhrẹ,” nọ ma be daoma mai kpobi re ma kẹe orro je fi obọ họ kẹ amọfa na.—Aiz. 50:4.

Ogbẹgwae Ewuhrẹ ọrọ Ugboma Esuo na o be rọ aro kele uyoyou Jihova, a be rọ ẹkwoma isukulu ukoko na nọ i bu te ikpe wuhrẹ ahwo nọ a wo isiuru, nọ uyero rai o kẹ uvẹ. Kọ who bi rri isukulu nana wọhọ odhesẹvia uyoyou Jihova?

Iviena se kpahe isukulu nana gbe eme nọ inievo jọ nọ i kpohọ isukulu nana no a ta. Kẹsena whọ vẹ nọ omara nọ, ‘Ẹvẹ mẹ sai ro wo erere no isukulu nana ze?’

 WO ERERE NO ISUKULU ESUO-ỌGHẸNẸ ZE

Jihova, “Ọghẹnẹ uyoyou” na o bi wuhrẹ omai re ma wo evawere evaọ uzuazọ, fi ebẹbẹ kparobọ, jẹ reawere iruo usiuwoma ota mai. (2 Kọr. 13:11) Wọhọ Ileleikristi ikpe-udhusoi ọsosuọ, a bi wuhrẹ omai re ma fi obọ họ kẹ amọfa, re ma “wuhrẹ ai, re a ru eware kpobi” nọ a je kẹ omai.—Mat. 28:20.

Dede nọ ma sai kpohọ isukulu na kpobi hi, ma sai wo erere no ejọ rai ze. Yọ ma rẹ sai fi eware nọ ma jọ isukulu na wuhrẹ no Ebaibol ze họ iruo. U te no ere no, ma rẹ sai wo onaa ziezi evaọ usiuwoma ota na nọ ma te bi lele inievo nọ a jọ isukulu nana wuhrẹ ziezi no kpohọ usiuwoma.

Nọ omara nọ, ‘Kọ uyero mẹ o te kẹ omẹ uvẹ kpohọ ọjọ evaọ usu isukulu nana?’

Idibo Jihova a rehọ e riẹ wọhọ uvẹ-ọghọ re a w’obọ evaọ isukulu nana je wo erere no ai ze. Jọ eware nọ who wuhrẹ i si owhẹ kẹle Ọghẹnẹ je fi obọ họ k’owhẹ ru oware nọ ọ gwọlọ, maero kọ iruo usiuwoma na nọ o gwọlọ ovẹrẹ na.

[Ẹkpẹti/Uwoho nọ o rrọ ẹwẹ-obe avọ 13-17]

ISUKULU SA-SA NỌ UKOKO JIHOVA U WO

Isukulu Odibọgba Esuo-Ọghẹnẹ

Ẹjiroro Isukulu Na: Re a wuhrẹ iwhowho-uvie epanọ a sae rọ ta usiuwoma na je wuhrẹ amọfa ziezi.

Epanọ U re Kri Te: Ribri.

Oria Isukulu Na: Ọgwa Uvie.

Enọ E rẹ Sai Fi Odẹ h’Otọ: Ohwo kpobi nọ ọ be ziọ ewuhrẹ ẹsikpobi nọ ọ rọwo iwuhrẹ Ebaibol je bi yeri uzuazọ rọwokugbe ehri-izi Ebaibol.

Epanọ A re ro Fi Odẹ h’Otọ: Ọsẹro Isukulu na a rẹ ta kẹ, o ve fi odẹ ohwo h’otọ.

Sharon nọ ẹyao ọ ko fihọ otọ ọ ta nọ: “Isukulu Odibọgba Esuo-Ọghẹnẹ na i wuhrẹ omẹ epanọ a re ru ekiakiẹ jẹ riẹ ẹme ru ziezi. Me te je wuhrẹ epanọ mẹ rẹ tẹrovi ẹgwọlọ amọfa evaọ egagọ Ọghẹnẹ, orọnikọ ẹgwọlọ mẹ ọvo ho.” Arnie nọ ọ rrọ iruo ọsẹro ọnyawariẹ kri no ọ ta nọ: “Me bru ekọkọ no emaha ze yọ mẹ rẹ sai rri amọfa ovao ho nọ mẹ tẹ be t’ẹme. Isukulu nana i ru omẹ vuhumu inọ me te ohwo re. Jihova ọ rọ ẹkwoma isukulu nana wuhrẹ omẹ riẹ epanọ ẹwẹ mẹ o re ro t’otọ nọ mẹ tẹ be t’ẹme gbe epanọ iroro mẹ e rẹ rọ jọ ẹme nọ mẹ be ta. Me yere Ọghẹnẹ gaga fiki uvẹ-ọghọ nọ mẹ be sai ro jiri ei evaọ ukoko na gbe usiuwoma ota.”

 Isukulu Enọ I Kpohọ Ebẹtẹle Obọ

Ẹjiroro Isukulu Na: A rẹ jariẹ wuhrẹ enọ i kpohọ Ebẹtẹle obọ epanọ a sai ro ru iruo rai evaọ Ebẹtẹle ziezi.

Epanọ U re Kri Te: Iminiti udhuvẹ gbe isoi koka koka evaọ eka ikpegbezeza.

Oria Isukulu Na: Ebẹtẹle.

Enọ I re Kpohọ Isukulu Na: Ohwo nọ ọ rrọ omọvo uviuwou Ebẹtẹle hayo ọnọ a zizie kpohọ Ebẹtẹle kẹ iruo ubroke nọ ọ te rria te ẹgbukpe hayo vrẹ ere.

Epanọ A re ro Fi Odẹ h’Otọ: Uwou ogha u re ru ọruẹrẹfihọ kẹ enọ e ziọ Ebẹtẹle obọ re a kpohọ isukulu na.

Demetrius nọ o kpohọ isukulu nana evaọ etoke ikpe 1980 ọ ta nọ: “Isukulu nana i fi obọ họ k’omẹ riẹ epanọ me re ru uwuhrẹ omobọ mẹ ziezi gbe epanọ mẹ sae rọ rria kri evaọ Ebẹtẹle. Inievo nọ i je wuhrẹ omai, omaa isukulu na, gbe ehrẹ nọ a kẹ omai e kẹ omẹ imuẹro inọ Jihova o gine you omẹ gbe nnọ ọ gwọlọ nọ mẹ reawere iruo Ebẹtẹle.”

Kaitlyn ọ ta nọ: “Isukulu na i fi obọ họ k’omẹ tẹrovi oware nọ o mai wuzou, oyehọ epanọ me re ro kruga ziezi evaọ egagọ Jihova. Isukulu nana i fi obọ họ k’omẹ wo ovuhumuo ziezi kpahe oghẹrẹ nọ Jihova ọ rrọ, uwou riẹ, gbe ukoko riẹ.”

Isukulu Odibọgba Uvie Na

Ẹjiroro Isukulu Na: A rẹ jariẹ wuhrẹ esẹro ọnyawariẹ, ekpako ukoko, je wuhrẹ idibo iruiruo ẹsejọ epanọ a re ro ru iruo ẹruọsa rai ziezi. (Iruẹru 20:28) A rẹ jọ isukulu na ta kpahe eware nọ e be via evaọ ikoko na gbe eware nọ inievo na a be rẹriẹ ovao dhe. A re ru isukulu nana n’oke t’oke nọ a te gbe imikpe jọ h’oma wọhọ epanọ Ugboma Esuo na o ma omaa riẹ.

Epanọ U re Kri Te: Anwọ ikpe jọ ze na, a bi ru isukulu nana edẹ ivẹ hayo edẹ ivẹ gbe ubro rọkẹ esẹro ọnyawariẹ, ẹdẹ ọvo gbe ubro rọkẹ ekpako ukoko, gbe ẹdẹ ọvo rọkẹ idibo iruiruo.

Oria Isukulu Na: A rẹ mai ru ei evaọ Ọgwa Uvie hayo Ọgwa Okokohọ.

Enọ I re Kpohọ Isukulu Na: Esẹro ọnyawariẹ, ekpako ukoko, gbe idibo iruiruo.

Epanọ A re ro Fi Odẹ h’Otọ: Ọsẹro okogho o re zizie ekpako gbe idibo iruiruo. Obọ uwou ogha uzizie esẹro ọnyawariẹ u re no ze.

“Dede nọ a rẹ jọ isukulu na wuhrẹ eware buobu evaọ umutho oke, isukulu na i re ru ekpako ukoko wo evawere ziezi je fi obọ họ kẹ ae wọ ewha-iruo rai evaọ ukoko Jihova avọ ‘udu.’ Te inievo nọ e rrọ ekpako kri no gbe enọ a ro mu obọ a re wuhrẹ epanọ a rẹ sẹro uthuru na ziezi jẹ jọ ‘iroro evo.’”—Quinn (obotọ).

“Isukulu nana i wuhrẹ omai epanọ ma re ro wo otoriẹ eware nọ i kiekpahe egagọ mai, eware enwoma nọ ma rẹ yọroma kpahe, gbe oghẹrẹ nọ ma rẹ rọ rẹrote uthuru na ziezi. Jihova o wou kẹhẹ nọ o bi ro fi obọ họ k’omai evaọ edhere otiọna.”—Michael.

 Isukulu Ekobaro

Ẹjiroro Isukulu Na: Re a wuhrẹ ekobaro epanọ a re ro ru ‘iruo odibọgba rai gbunu.’​—2 Tim. 4:5.

Epanọ U re Kri Te: Eka ivẹ.

Oria Isukulu Na: Uwou ogha o rẹ salọ oria na, o rẹ mae jọ Ọgwa Uvie.

Enọ I re Kpohọ Isukulu Na: Enọ e rrọ ekobaro oke-kpobi te ukpe hayo vrẹ ere no i re kpohọ isukulu na. *

Epanọ A re ro Fi Odẹ h’Otọ: Ọsẹro okogho ọ rẹ vuẹ ekobaro nọ i te kẹ isukulu na nọ a zizie.

Lily (obọze) ọ ta nọ: “Isukulu na i fi obọ họ k’omẹ fi ebẹbẹ buobu kparobọ no evaọ uzuazọ gbe usiuwoma ota mẹ. Me wo ẹnyaharo ziezi no evaọ uwuhrẹ omobọ mẹ, oghẹrẹ nọ me bi wuhrẹ amọfa, gbe eroruiruo Ebaibol na. Isukulu na i wuhrẹ omẹ epanọ me re ro fi obo họ kẹ amọfa, tha ekpako na uke, je fiba ẹnyaharo ukoko na.”

Brenda nọ o kpohọ isukulu na isiava no ọ ta nọ: “Isukulu nana i fi obọ họ k’omẹ kruga ziezi no evaọ ukoko na, ru obroziẹ-iroro mẹ ga ziezi no, je fi obọ họ k’omẹ tẹrovi obufihọ kẹ amọfa. O rrọ vevẹ inọ Jihova o re gine ru ọghọ.”

[Oruvẹ-obotọ]

Isukulu Ekpako Ukoko

Ẹjiroro Isukulu Na: Re a wuhrẹ ekpako na epanọ a sae rọ rẹrote ewha-iruo rai evaọ ukoko na re a je kruga ziezi evaọ egagọ Jihova.

Epanọ U re Kri Te: Edẹ isoi.

Oria Isukulu Na: Uwou ogha o rẹ jiroro oria na; o rẹ mae jọ Ọgwa Uvie hayo Ọgwa Okokohọ.

Enọ I re Kpohọ Isukulu Na: Ekpako ukoko.

Epanọ A re ro Fi Odẹ h’Otọ: Uwou ogha u re zizie ekpako na.

Muẹrohọ ẹme nọ ekpako nọ e jọ eklase avọ 92 evaọ obọ America a ta:

“Isukulu na e k’omẹ irere gaga no, i fi obọ họ k’omẹ kiẹ omamẹ riwi re mẹ ruẹ epanọ mẹ sae rọ rẹrote uthuru Jihova.”

“Mẹ ruẹrẹ oma kpahe no enẹna re mẹ tuduhọ amọfa awọ ẹkwoma ẹgba nọ me re fihọ igogo eme evaọ Ikereakere na.”

“Me ti fi eware nọ me wuhrẹ evaọ isukulu na h’iruo evaọ edẹ uzuazọ mẹ kpobi.”

Isukulu Esẹro Ọnyawariẹ Avọ Eyae Rai

Ẹjiroro Isukulu Na: Re a wuhrẹ esẹro okogho gbe erọ ubrotọ epanọ a rẹ rọ rẹrote ikoko na ziezi gbe epanọ a re ro ‘ruẹme je wuhrẹ ziezi.’​—1 Tim. 5:17; 1 Pita 5:2, 3.

Epanọ U re Kri Te: Emerae ivẹ.

Oria Isukulu Na: Uwou ogha o rẹ salọ oria na.

Enọ I re Kpohọ Isukulu Na: Esẹro okogho hayo erọ ubrotọ.

Epanọ A re ro Fi Odẹ h’Otọ: Uwou ogha u re zizie esẹro ọnyawariẹ avọ eyae rai.

“Edẹro mai kẹ Jesu nọ o wuzou ukoko na e ga vi epaọ ọsosuọ. Ma ruẹ nọ u gine fo re ma tuduhọ inievo-emezae nọ e rrọ ikoko nọ ma re weze kpohọ awọ je ru re inievo na a wo okugbe ziezi. Isukulu na i ru omai vuhumu inọ dede nọ esẹro ọnyawariẹ e rẹ kẹ ehrẹ gbe ekpọvio ẹsejọ, ugogo iruo rai họ re a fi obọ họ kẹ inievo na riẹ nọ Jihova o you rai.”—Joel, nọ o nwrotọ no eklase ọsosuọ, 1999.

 Isukulu Ebaibol Rọkẹ Inievo-Emezae nọ E re Rọo Ho

Ẹjiroro Isukulu Na: Re a wuhrẹ ekpako ukoko gbe idibo iruiruo nọ e re rọo ho epanọ a rẹ rọ rẹrote ewha-iruo efa evaọ ukoko Jihova. A re dhe ibuobu enọ i nwrotọ no isukulu na ze kpohọ oria nọ ẹgwọlọ ọ rrọ evaọ orẹwho rai. A rẹ sai vi ejọ kpohọ orẹwho ofa otẹrọnọ a fialoma via. A rẹ sai je vi ejọ kpohọ iruo ọkobaro obọdẹ ubroke re a wha usiuwoma na te eria nọ i siomano.

Epanọ U re Kri Te: Emerae ivẹ.

Oria Isukulu Na: Uwou ogha o rẹ salọ oria na; o rẹ mae jọ Ọgwa Uvie hayo Ọgwa Okokohọ.

Enọ I re Kpohọ Isukulu Na: Inievo-emezae nọ e rrọ umuọ ikpe 23 rite 62 nọ oma rai o rrọ gaga yọ a gwọlọ ru iruo Uvie na evaọ oria kpobi nọ ẹgwọlọ ọ rrọ. (Mak 10:29, 30) A re ru iruo ọkobaro te ikpe ivẹ no, yọ a rẹ jọ ekpako hayo idibo iruiruo te ikpe ivẹ no.

Epanọ A re ro Fi Odẹ h’Otọ: A rẹ jọ okokohọ okogho se ẹgwae enọ e gwọlọ kpohọ isukulu nana, a vẹ ta ẹme kẹ ae kpahe isukulu na.

Rick nọ o nwrotọ no eklase avọ 23 ọrọ isukulu nana evaọ obọ America ọ ta nọ: “Isukulu nana nọ me kpohọ u ru nọ ẹzi Jihova o ro fi obọ họ k’omẹ ru inwene ilogbo. Nọ Jihova ọ tẹ k’owhẹ iruo, o re fi obọ họ k’owhẹ ru iruo na. Me wuhrẹ inọ mẹ tẹ tẹrovi eruo oreva Ọghẹnẹ viukpọ omobọ mẹ, ọ te k’omẹ ẹgba.”

Andreas nọ a vi kpobọ Germany ọ ta nọ: “Me vuhumu inọ oghẹrẹ nọ Ọghẹnẹ ọ be rehọ ukoko riẹ ruiruo nẹnẹ o rrọ oware igbunu. Isukulu nana i fi obọ họ k’omẹ ruẹrẹ oma kpahe kẹ iruo nọ e rrọ obaro. Ofariẹ, iriruo buobu evaọ Ebaibol na i wuhrẹ omẹ inọ: Nọ mẹ tẹ be gbodibo kẹ Jihova gbe inievo na, o rẹ kẹ uvi evawere.”

Isukulu Ebaibol Rọkẹ Ezae Ileleikristi avọ Eyae Rai

Ẹjiroro Isukulu Na: Re a wuhrẹ ezae avọ eyae rai ugogo eware nọ i wuzou nọ a rẹ rọ jọ obufihọ ziezi kẹ Jihova avọ ukoko riẹ. A re dhe ibuobu enọ a wuhrẹ no kpohọ oria nọ ẹgwọlọ ọ rrọ evaọ orẹwho rai. A rẹ sai vi ejọ kpohọ orẹwho ofa, otẹrọnọ o rrọ ẹgwọlọ rai. A sai je vi enọ i nwrotọ no isukulu na ze kpohọ iruo ọkobaro obọdẹ ubroke re a wha usiuwoma na te eria nọ i siomano.

Epanọ U re Kri Te: Emerae ivẹ.

Oria Isukulu Na: A mu isukulu nana họ no evaọ obọ America, rekọ muhọ no September 2012 vrẹ, a te jọ Egwa Uvie hayo Egwa Okokohọ ru isukulu nana evaọ umutho erẹwho efa nọ a salọ.

Enọ I re Kpohọ Isukulu Na: Enọ e rọo no nọ e rrọ umuọ ikpe 25 rite 50 nọ oma rai o rrọ gaga nọ uyero rai o kuvẹ nọ a sae rọ jọ oria kpobi nọ ẹgwọlọ ọ rrọ ru iruo odibọgba na, nọ i wo ẹzi ọ: “Mẹ na! Vi omẹ.” (Aiz. 6:8) A rẹ rọo te ikpe ivẹ no, jẹ jọ iruo odibọgba oke-kpobi na te ikpe ivẹ no. Oniọvo-ọmọzae na ọ rẹ jọ ọkpako ukoko hayo odibo oruiruo te ikpe ivẹ no.

Epanọ A re ro Fi Odẹ h’Otọ: A rẹ jọ okokohọ ubrotọ se ẹgwae enọ e gwọlọ kpohọ isukulu nana, a vẹ ta ẹme kẹ ae kpahe isukulu na. Otẹrọnọ a se ẹgwae otiọye evaọ okokohọ ubrotọ rai hi yọ whọ gwọlọ kpohọ isukulu na, whọ sai kere se uwou ogha nọ o rrọ ẹkwotọ rai re a vuẹ owhẹ kpahe isukulu na.

“Emerae ivẹ yena i re nwene uzuazọ ohwo, e rẹ kẹ imava-orọo nọ e gwọlọ ewha-iruo efa evaọ ukoko na uvẹ-ọghọ ulogbo. Ma gba riẹ mu inọ ma re ru uzuazọ mai lọhọ re ma sae rọ oke mai ru iruo ziezi.”—Eric avọ Corina (obotọ), nọ a nwrotọ no eklase ọsosuọ, 2011.

Isukulu ọ Giliad

Ẹjiroro Isukulu Na: Re a wuhrẹ inievo kẹ iruo imishọnare evaọ ekwotọ nọ ahwo a vọ, hayo re a jọ esẹro ọnyawariẹ, hayo re a vi ai kpohọ iruo Ebẹtẹle. Ẹjiroro na họ, re a rẹrote iruẹru uwou ogha gbe erọ ẹkwotọ usiuwoma ota evaọ erẹwho nọ a vi rai kpohọ.

Epanọ U re Kri Te: Emerae isoi.

Oria Isukulu Na: Watchtower Educational Center, Patterson, New York, U.S.A.

Enọ I re Kpohọ Isukulu Na: Ezae avọ eyae rai nọ e rrọ iruo odibọgba oke-kpobi ọrọ obọdẹ no vẹre, koyehọ inievo nọ ukoko u vi kpohọ iruo imishọnare no vẹre rekọ a ri kpohọ isukulu na ha, ekobaro obọdẹ, esẹro ọnyawariẹ, hayo ahwo nọ a rrọ iruo Ebẹtẹle. A rẹ jọ iruo nana te ikpe esa no ababọ eriosehọ. A rẹ jọ enọ e rẹ ta, se, je kere ẹvẹrẹ Oyibo ziezi.

Epanọ A re ro Fi Odẹ h’Otọ: Ogbẹgwae Uwou-Ogha o rẹ sae vuẹ ezae-avọ-eyae re a fi odẹ h’otọ.

Lade avọ Monique nọ a rrọ ahwo America a rrọ iruo na evaọ Africa enẹna. Lade ọ ta nọ: “Isukulu Giliad e ruẹrẹ omai kpahe re ma sai kpohọ oria kpobi evaọ akpọ na, je ru iruo kugbe inievo iyoyou mai.”

Monique o fibae nọ: “Nọ me bi fi eware nọ me wuhrẹ no Ẹme Ọghẹnẹ ze h’iruo na, me bi wo evawere ziezi evaọ iruo Uvie na. Me vuhumu inọ evawere yena i dhesẹ nọ Jihova o gine you omẹ.”

Isukulu Rọkẹ Inievo Ogbẹgwae Uwou Ogha avọ Eyae Rai

Ẹjiroro Isukulu Na: Re a wuhrẹ enọ e rrọ Ogbẹgwae Uwou Ogha epanọ a rẹ rọ sẹro iviuwou Ebẹtẹle ziezi, sẹro ikoko, gbe ikogho nọ e rrọ otọ ẹruọsa rai. A re je wuhrẹ kpahe ewha-iruo efafa, ebe nọ a re printi, gbe epanọ ebe na i re ro te ikoko obọ.

Epanọ U re Kri Te: Emerae ivẹ.

Oria Isukulu Na: Watchtower Educational Center, Patterson, New York, U.S.A.

Enọ I re Kpohọ Isukulu Na: Ohwo ọ rẹ jọ omọvo Ogbẹgwae Uwou Ogha hayo Ogbẹgwae Orẹwho hayo a be te rehọ iẹe mu ọjọ.

Epanọ A re ro Fi Odẹ h’Otọ: Ugboma Esuo na u re zizie inievo na avọ eyae rai.

Lowell avọ Cara nọ a nwrotọ no eklase avọ 25 a rrọ iruo na evaọ Nigeria. Lowell ọ ta nọ: “Isukulu nana e kareghẹhọ omẹ inọ, o tẹ make rọnọ obọ mẹ o rrọ eware buobu hayo a kẹ omẹ oghẹrẹ iruo jọ, usu okpekpe nọ me re wo kugbe Jihova họ ugogo edhere nọ me re ro ru ei eva were. Isukulu na i te je wuhrẹ omẹ inọ u wuzou gaga re mẹ rọ aro kele oghẹrẹ nọ Jihova o bi dhesẹ uyoyou kẹ idibo riẹ.”

Cara o fibae nọ: “Oware jọ nọ a ta evaọ isukulu na nọ me roro didi kpahe no họ, otẹrọnọ mẹ sae ta ẹme kpahe oware jọ evaọ edhere nọ o re ro vẹ amọfa ẹro ho, o gwọlọ nọ me re wuhrẹ kpahe oware na ziezi re mẹ tẹ rehọ iẹe wuhrẹ amọfa.”