Likolo za Bukombwa li Bonisa Kuli Jehova wa lu Lata

JEHOVA ki Muluti wa luna yo Mutuna. (Isa. 30:20) Jehova u luta batu ba hae bakeñisa kuli wa ba lata. Ka mutala, bakeñisa lilato la hae le lituna, Jehova u bonisa Jesu “lika kaufela za eza” yena Mulimu. (Joa. 5:20) Bakeñisa kuli Jehova wa lu lata ka ku ba Lipaki za hae, u lu fa “lilimi le li talifile” ha lu nze lu lika ka taata ku mu kuteka ni ku tusa ba bañwi.—Isa. 50:4.

Ka ku likanyisa lilato la Jehova, Katengo ka Tuto ka Sitopa se si Etelela ka itusisa likolo za bukombwa ze lishumi kwa ku luta batu ba ba na ni takazo ili bao miinelo ya bona i ba lumeleza ku kena mwa likolo zeo. Kana mwa lemuha kuli Jehova u bonisa lilato la hae ku luna ka ku lu fa likolo zeo?

Mu ikole litaba ze latelela ka za likolo za bukombwa ni ze ba bulezi batu ba bañwi ba ne ba keni mwa likolo zeo. Kihona mu ka ipuza kuli, ‘Ni kona ku tusiwa cwañi ki tuto ye, ye zwa ku Mulimu?’

 MU TUSIWE KI TUTO YA MI FA JEHOVA

Ka ku ba “Mulimu wa lilato,” Jehova u lu fa tuto ye lu tusa ku pila bupilo bo bunde, ye lu tusa ku tiyela butata bo lu kopana ni bona, mi tuto yeo i lu tusa ku ba ni tabo mwa bukombwa bwa luna. (2 Makor. 13:11) Sina mo ne ba ezezanga balutiwa ba mwa miteñi ya Jesu, kaufela luna lu itukiselize ku tusa ba bañwi ka ku ba ‘luta ku mamela lika kaufela’ ze lu laezwi.—Mat. 28:20.

Nihaike kuli ha lu koni ku kena mwa likolo zeo kaufela zona, lwa kona ku fumana tuso haiba lu kena nihaiba feela ku si li siñwi kwa likolo zeo. Mi lwa kona ku itusisa litaelo ze lu ituta mwa Bibele. Hape lwa kona ku ekeza kwa buikoneli bwa luna mwa bukombwa ka ku sebezanga ni batanga ba Jehova ba ba na ni yeloseli.

Mu ipuze kuli, ‘Kana miinelo ya ka ya ni lumeleza ku kena mwa sikolo se siñwi kwa likolo ze?’

Balapeli ba Jehova ba nga kuli ki tohonolo ye tuna ku kena ni ku ituta mwa likolo za butokwa ze. Haike tuto ye mu amuhela i mi suteleze ku Mulimu ni ku mi konisa ku taleleza buikalabelo bwa mina sihulu musebezi wa butokwa o lu filwe wa ku kutaza taba ye nde.

[Mbokisi/Maswaniso a fa likepe 13-17]

KU ZIBA HANDE LIKOLO ZA LUNA ZA BUKOMBWA

Sikolo sa Bukombwa sa Teokratiki

Mulelo: Ku luta bahasanyi kuli ba be bakutazi ni baluti ba taba ye nde ba ba buanyu.

Nako ye si Tanda Sikolo: Ha si feli.

Sibaka: Kwa Ndu ya Mubuso ya mwa silalanda.

Ba ba Kona ku Iñolisa Mwa Sikolo Se: Bahasanyi kaufela. Batu ba bañwi ba ba swalisana hahulu ni puteho, ba ba lumela ze i luta Bibele, ili ba ba pila ka ku lumelelana ni likuka za Sikreste ba kona ku iñolisa mwa sikolo se.

Mwa ku Iñoliseza Mwa Sikolo Se: Mu ambole ni muokameli wa Sikolo sa Bukombwa sa Teokratiki.

Bo Sharon ba ne ba fumanwi ni butuku bo bu omelelisa lilama za mubili (amyotrophic lateral sclerosis kamba ALS) ba bulela kuli: “Sikolo sa Bukombwa sa Teokratiki si ni lutile ku ezanga patisiso ni ku fa litaba ka mukwa o munde. Hape ni itutile ku sa isa feela mamelelo kwa lika za ka butu, mi ni itutile ku isa pilu kwa lika za kwa moya ze ba tokwa ba bañwi.”

Bo Arnie ba ba sebelize ka nako ye telele sina muokameli wa maeto ba li: “Ha ne ni hula, ne ni naa ni butata bwa ku bulela ka sikukuma mi ne ni palelwanga ku talima batu mwa meeto. Sikolo se, si ni tusize ku ba ni bundume ni ku ikutwa ku ba wa butokwa. Ka tuso ya Jehova, sikolo se si ni tusize ku hoha ni ku lulanga moya ha ni bulela, ni ku isa mamelelo ku ze ni bulela. Ni itebuha hahulu bakeñisa buikoneli bo ni na ni bwa ku lumbeka Mulimu mwa puteho ni mwa bukombwa bwa ka.”

 Sikolo sa ba ba sa zo Taha fa Betele

Mulelo: Sikolo se, si lukiselizwe ku tusa mizwale ni likaizeli ba ba sa zo taha fa mutai kuli ba kondise mwa sebelezo ya bona ya fa Betele.

Nako ye si Tanda Sikolo: Lisunda ze 16 ka mizuzu ya 45 sunda ni sunda.

Sibaka: Fa Betele.

Ze Tokwahala: Batu ba ba kena mwa sikolo se ba swanela ku ba lilama za lubasi lwa Betele kamba baitateli ba ba lumelelizwe ku sebeleza fa Betele ka silimo si li siñwi kamba ku fitelela.

Mwa ku Iñoliseza Mwa Sikolo Se: Lilama za lubasi lwa Betele ba ba kwanisize ze tokwahala ba kupiwanga ku kena mwa sikolo se.

Bo Demetrius ba ne ba keni sikolo se ka silimo sa 1980, ba bulela kuli “Sikolo se ne si ni tusize ku itwaeza ku itutanga mi ne si ni tusize ku itukiseza musebezi wa fa Betele o ni ezize ka nako ye telele. Baluti ba ka, litaba ze ne lu ituta, ni likelezo ze tusa ne li ni kolwisize kuli Jehova wa iyakatwa na, mi naa bata ku ni tusa kuli ni kondise mwa sebelezo ya ka ya fa Betele.”

Bo Kaitlyn ba li: “Ne ni itutile ku isa pilu kwa lika za butokwa hahulu kuli ni ezange lika ka nzila ya bata Jehova. Sikolo sa ba ba sa zo Taha fa Betele si ni tusize ku itebuha ku Jehova, kwa Betele, hamohocwalo ni kopano ya hae.”

Sikolo sa Bukombwa Bwa Mubuso

Mulelo: Ku luta baokameli ba maeto, baana-bahulu, mi fokuñwi ni likombwa za puteho kuli ba kone ku peta hande buikalabelo bwa bona mwa kopano. (Lik. 20:28) Kwa sikolo seo ku nyakisiswanga mo li ezezwa lika mwa puteho, licinceho, ni lika ze ñwi ze tokwa ku cincwa kapili mwa liputeho. Sikolo se, si eziwanga hamulaho wa lilimo li sikai ku likana ni nako ye si toma Sitopa se si Etelela.

Nako ye si Tanda Sikolo: Mwa lilimo za cwanoñu fa, sikolo se, ne si tandanga lizazi ni licika kwa baana-bahulu ni lizazi li li liñwi kwa likombwa za puteho.

Sibaka: Hañata sikolo se, si belanga fa Ndu ya Mubuso ye li bukaufi kamba kwa Ndu ya Mukopano.

Ze Tokwahala: Ba ba kena mwa sikolo se ba swanela ku ba baokameli ba maeto, baana-bahulu, kamba likombwa za puteho.

Mwa ku Iñoliseza Mwa Sikolo Se: Baana-bahulu ni likombwa za puteho ba amuhelanga memo ku zwelela ku muokameli wa mupotoloho. Mi ofisi ya mutai i memanga baokameli ba maeto.

Bo Quinn ba ba mwa siswaniso se si kwatasi ba li: “Nihaike kuli kwa sikolo seo ku itutiwanga litaba ze ñata mwa nako ye kuswani, sikolo se si tusa baana-bahulu ku zwelapili ku ba ni tabo ni ‘ku ba baana’ mwa sebelezo ya Jehova. Baana-bahulu ba se ba belekile ka nako ye telele ni ba ba sa zo ketiwa ba lutiwanga hande kuli ba be balisana ba bande mi ba bonisanga kuli ba swalisani ka ku ba ni ‘muhupulo u li muñwi.’”

Bo Michael ba li: “Sikolo se, si lu tusize ku utwisisa hande litaba ze lu lumela, ku lu lemusa likozi ze lu kona ku kopana ni zona, ni ku lu fa liakalezo ze kona ku lu tusa ku babalela hande mutapi. Jehova luli u bonisize sishemo ka ku lu tusa.”

 Sikolo sa Sebelezo ya Bupaina

Mulelo: Ku tusa mapaina ku ‘feleleza za bukombwa bwa bona.’—2 Tim. 4:5.

Nako ye si Tanda Sikolo: Lisunda ze peli.

Sibaka: Si ketiwanga ki ofisi ya mutai, kono hañata sikolo se si belanga fa Ndu ya Mubuso ye li bukaufi.

Ze Tokwahala: Mizwale ni likaizeli ba se ba kwanisize silimo kamba ku fitelela inze ba li mapaina ba kamita. *

Mwa ku Iñoliseza Mwa Sikolo Se: Mapaina ba ba kwanisize ze tokwahala ba kupiwanga ku kena mwa sikolo se, mi ba talusezwanga ki muokameli wa mupotoloho.

Bo Lily ba ba mwa siswaniso se si kwa bulyo ba li: “Sikolo seo si ni tusize ku tiyela butata bo bu shutana-shutana bo ni kopana ni bona mwa bukombwa ni mwa bupilo bwa ka, ni konile ku eza zwelopili ye tuna mo ni itutelanga, mo ni lutelanga ba bañwi, ni mo ni itusisezanga Bibele. Ni itutile ku tusa ba bañwi, ku swalisana ni baana-bahulu, ni ku tusa kuli puteho i hule.”

Bo Brenda ba se ba keni sikolo seo habeli ba li: “Sikolo seo si ni tusize ku eza lika za kwa moya ka ku tala, ku ba ni lizwalo le linde, ni ku isa pilu kwa ku tusa ba bañwi. Kaniti Jehova ki mufani luli!”

[Litaluso za kwatasi]

Sikolo sa Baana-Bahulu ba Puteho

Mulelo: Ku tusa baana-bahulu ku peta hande buikalabelo bwa bona mwa puteho ni ku ba tusa ku hula kwa moya.

Nako ye si ka Tanda Sikolo: Mazazi a ketalizoho.

Sibaka: Si ka ketiwa ki ofisi ya mutai, hañata sikolo se si belanga fa Ndu ya Mubuso ye li bukaufi kamba kwa Ndu ya Mukopano.

Ze Tokwahala: Ba ba kena mwa sikolo se ba swanela ku ba baana-bahulu.

Mwa ku Iñoliseza Mwa Sikolo Se: Ofisi ya mutai ki yona ye mema baana-bahulu kwa sikolo seo.

Ha mu bone ze ba bulela ba bañwi ba ba keni sikolo seo ili mwa sitopa sa bu 92 ba ba pila mwa naha ya United States:

“Sikolo seo si ni tusize hahulu luli, si ni tusize na ka butu, mi hape si ni tusize ku bona mo ni kona ku babalelela mutapi wa Jehova.”

“Ni itukiselize ku susueza ba bañwi ka ku itusisa lisupo za mwa mañolo.”

“Ni ka itusisa tuto yeo mwa bupilo bwa ka kaufela.”

Sikolo sa Baokameli ba Maeto ni Basali ba Bona

Mulelo: Ku tusa baokameli ba mupotoloho ni ba sikiliti kuli ba pete hande buikalabelo bwa bona bwa ku sebeleza liputeho ni ku “sebeza ka ku talusa ni ka ku luta linzwi.”—1 Tim. 5:17; 1 Pit. 5:2, 3.

Nako ye si ka Tanda Sikolo: Likweli ze peli.

Sibaka: Si ka ketiwa ki ofisi ya mutai.

Ze Tokwahala: Muzwale u swanela ku ba muokameli wa mupotoloho kamba wa sikiliti.

Mwa ku Iñoliseza Mwa Sikolo Se: Baokameli ba maeto ba ba kwanisize ze tokwahala ni basali ba bona ba kupiwanga ki ofisi ya mutai ku kena mwa sikolo se.

Bo Joel ba ne ba keni mwa sitopa sa pili mwa silimo sa 1999 ba li: “Ne lu konile ku itebuha za peta Jesu ka ku ba toho ya puteho. Ne lu boni butokwa bwa ku susueza mizwale ba ne lu sebeleza ni ku tiisa swalisano ya puteho. Ze ne lu itutile ne li lu tusize ku utwisisa kuli muokameli wa maeto ha fa kelezo fa litaba ze ñwi, mulelo wa hae o mutuna ki wa kuli a tuse mizwale kuli ba bone kuli Jehova wa ba lata.”

 Sikolo sa Bibele sa Mizwale ba Makwasha

Mulelo: Ku tusa baana-bahulu ni likombwa za puteho ba makwasha kuli ba pete buikalabelo bo buñwi mwa kopano ya Jehova. Buñata bwa ba ba ka kwaza sikolo se, ba ka lumiwa ku yo sebeleza ko ku na ni butokwi mwa naha ya bona. Ba bañwi ba kana ba lumiwa ku yo sebeleza kwa naha i sili haiba feela ba taluseza ofisi ya mutai kuli ba lukuluhile ku yo sebeleza kwa naha i sili. Ba bañwi ba ba kwaza sikolo se, ba ka lumiwa ku yo sebeza sina mapaina ba ka nakonyana kuli ba tuse mwa ku kutaza taba ye nde mwa libaka za mwa matakanyani.

Nako ye si Tanda Sikolo: Likweli ze peli.

Sibaka: Si ketiwanga ki ofisi ya mutai; hañata sikolo se si belanga kwa Ndu ya Mukopano kamba fa Ndu ya Mubuso.

Ze Tokwahala: Mizwale ba makwasha ba lilimo za ku pepwa ze mwahalaa 23 ni 62, ba ba ikanguzi ili ba ba bata ku sebeleza mwa libaka kaufela ze mwa butokwi. (Mare. 10:29, 30) Ba swanela ku ba mapaina ba kamita ka lilimo ze ba to eza ze peli, kamba ba se ba sebelize sina baana-bahulu kamba likombwa za puteho ka lilimo ze peli ku si na ku tuhela.

Mwa ku Iñoliseza Mwa Sikolo Se: Kwa mukopano wa mupotoloho, ku ka ba ni mukopano wa ba ba tabela ku yo kena sikolo se mi litaba ze ñata ka za sikolo se li ka taluswa kwa mukopano wo.

Bo Rick ba ne ba keni sikolo seo mwa sitopa sa bu 23 kwa United States ne ba bulezi kuli: “Ku isa hahulu pilu kwa lituto za kwa sikolo seo ku tahisize kuli moya wa Jehova u ni tuse ku eza licinceho ze tuna. Jehova ha lu fa musebezi, u ka lu tusa kuli lu u pete. Ni itutile kuli haiba lu isa pilu kwa ku eza tato ya Jehova, u ka lu tiisa.”

Bo Andreas ba ba sebeleza mwa Germany ba li: “Ni utwisisize kuli mo i sebeleza kopano ya Jehova kacenu kwa komokisa. Sikolo seo si ni tusize ku itukisezanga musebezi o ni ka eza kwapili. Hape mitala ya mwa Bibele ye miñata i ni lutile kuli ku sebeleza mizwale ni Jehova ku tahisa tabo ya niti.”

Sikolo sa Bibele sa Bakreste ba ba Nyalani

Mulelo: Sikolo se, si lelezwi ku luta Bakreste ba ba nyalani tuto ye ipitezi ilikuli ba kone ku itusiswa ka ku tala ki Jehova ni kopano ya hae. Buñata bwa ba ba ka kwaza sikolo se ba ka lumiwa ku yo sebeleza kwa libaka ze mwa butokwi mwa naha ya bona. Ba sikai ba ka lumiwa ku yo sebeleza kwa naha ye ñwi haiba ba lumela ku eza cwalo. Ba bañwi ba ba ka kwaza sikolo se ba ka sebeza sina mapaina ba ba ipitezi ka nakonyana kuli ba yo tusa mwa ku kutaza taba ye nde mwa libaka za mwa matakanyani.

Nako ye si Tanda Sikolo: Likweli ze peli.

Sibaka: Sikolo se si kalile kwa United States, mi ku kala mwa kweli ya September 2012, si ka ezezwa mwa libaka ze ñwi ze ketilwe za mwa lifasi kaufela, sihulu kwa Ndu ya Mukopano kamba kwa Ndu ya Mubuso.

Ze Tokwahala: Bakreste ba ba nyalani ba swanela ku ba ba lilimo za ku pepwa ze mwahalaa 25 ni 50, ba be ba ba ikanguzi, ba ba kona ku yo sebeleza kwa libaka kaufela ze mwa butokwi ili ba ba kona ku itumelela kuli: “Ki na yo, u lume na.” (Isa. 6:8) Hape ba swanela ku ba ba ba nyalani ka lilimo ze peli kamba ku fitelela ili ba ba mwa sebelezo ya nako kaufela ka lilimo ze peli kamba ku fitelela ku si na ku tuhela. Muuna u swanela ku ba muuna-muhulu kamba sikombwa sa puteho ka lilimo ze ba to ba ze peli ku si na ku tuhela.

Mwa ku Iñoliseza Mwa Sikolo Se: Kwa mukopano wa sikiliti, ku ka ba ni mukopano wa ba ba tabela ku yo kena sikolo se, mi litaba ze ñata ka za sikolo se li ka taluswa kwa mukopano wo. Haiba mukopano wo ha u na ku eziwa kwa mukopano wa mina wa sikiliti kono mwa tabela ku yo kena sikolo se, mwa kona ku ñolela kwa ofisi ya mina ya mutai kuli mu fiwe litaba ze ñata.

Bo Eric ni bakubona bo Corina ba ba mwa siswaniso se si kwatasi ba ne ba keni sikolo seo mwa sitopa sa pili mwa silimo sa 2011 ba li: “Ka ku ba batu ba ba nyalani, lisunda ze 8 ne li lu file kolo ye tuna ya ku eza ze ñata ha lu nze lu sebeleza Jehova! Lu ikatulezi ku pila bupilo bo bu bunolo ili bo bu ka lu konisa ku itusisa nako ya luna hande.”

Sikolo sa Giliadi sa Bibele

Mulelo: Ku luta baituti kuli ba sebeze sina balumiwa mwa linaha mo ku pila batu ba bañata hahulu, ku ba luta kuli ba be baokameli ba maeto, kamba kuli ba be lilama za Betele. Mulelo wa sikolo seo ki ku tiisa batu ba ba sebeleza mwa simu ni ba ba sebeza fa mutai.

Nako ye si Tanda Sikolo: Likweli ze ketalizoho.

Sibaka: Kwa Watchtower Educational Center, mwa Patterson, kwa New York, U.S.A.

Ze Tokwahala: Bakreste ba ba nyalani ili ba se ba sebelize mwa sebelezo ye ñwi ya ka nako kaufela inge cwalo balumiwa ba ba si ka kena kale sikolo se, mapaina ba ba ipitezi, baokameli ba maeto, kamba lilama za Betele. Ba swanela ku ba ba sebelize mwa sebelezo yeo ka lilimo ze taalu ku si na ku tuhela. Ba swanela ku ziba hande ku bulela, ku bala, ni ku ñola sikuwa.

Mwa ku Iñoliseza Mwa Sikolo Se: Bakreste ba ba nyalani ba kona ku kupiwa ki Katengo ka Mutai kuli ba kupe ku kena mwa sikolo seo.

Bo Lade ni bakubona bo Monique ba kwa United States ba sebeleza mwa Africa. Bo Lade ba li: “Sikolo sa Giliadi si lu lutile ku itukiseza ku yo sebeleza kwa sibaka sifi kamba sifi mwa lifasi, mi hape si lu lutile ku itukiseza ku sebeza ni mizwale ba luna.”

Bo Monique ba ekeza kuli: “Ha ni nze ni itusisa ze ni itutile mwa Linzwi la Mulimu, ni fumana tabo ye tuna mwa musebezi wa ka. Tabo yeo i bonisa hande kuli Jehova wa ni lata.”

Sikolo sa Mizwale ba Mwa Tutengo Twa Mitai ni Basali ba Bona

Mulelo: Sikolo se, si lelezwi ku tusa mizwale ba mwa Tutengo Twa Mitai kuli ba pete hande misebezi ya bona ya ku okamela mahae a Betele, ku talima litaba ze ama liputeho, ku okamela mipotoloho ni likiliti za mwa linaha za bona, hamohocwalo ni misebezi ya ku toloka, ku hatisa, ni ku lumela lihatiso.

Nako ye si Tanda Sikolo: Likweli ze peli.

Sibaka: Kwa Watchtower Educational Center, mwa Patterson, kwa New York, U.S.A.

Ze Tokwahala: Ba swanela ku ba lilama za Katengo ka Mutai kamba Katengo ka Naha kamba ba ba filwe buikalabelo bo bu cwalo.

Mwa ku Iñoliseza Mwa Sikolo Se: Mizwale ba ba kwanisize ze tokwahala ni basali ba bona ba ka memiwa ki Sitopa se si Etelela.

Bo Lowell ni bakubona bo Cara ba ne ba keni mwa sitopa sa bu 25, ba sebeleza mwa Nigeria. Bo Lowell ba li: “Ne ni itutile kuli ku si na taba kuli ni patehile hahulu kamba kuli ni filwe musebezi o cwañi, ki kwa butokwa ku ezanga lika ka nzila ya lata Jehova. Ze ne lu itutile ne li bonisize butokwa bwa ku eza ba bañwi ka lilato sina mwa ezeza Jehova kwa batanga ba hae.”

Bo Cara ba zwelapili kuli: “Nto ye ñwi ye ni hupulanga ka nako kaufela ki ya kuli haiba ha ni koni ku talusa taba ye ba ka utwisisa ba bañwi ka bunolo, ni tokwa ku itutanga taba yeo pili ni si ka luta kale ba bañwi.”