Mashikola Ateokalatiki Amwekeshaña Kukeña kwaYehova

YEHOVA diyi ‘Ntañishi Yetu Wabadika.’ (Isa. 30:20) Kukeña kwamuleñelaña yatachiki kudizisha nikufumba antu. Chakutalilahu, hamuloña wakusweja kukeña, Yehova wamulejaña Yesu “yuma yejima yelañayi yomweni.” (Yow. 5:20) Hamuloña wakutukeña, aYinsahu jindi atwinkaña “idimi dawalejewaña,” hampinji yitunakuzata nañovu kulonda tumulemesheña nikukwasha antu.—Isa. 50:4.

Hamuloña wakwimbujola kukeña kwaYehova, Komiti Yatañishaña Yezaza Dalombolaña yazatishaña mashikola ikumi ateokalatiki kulonda yidizisheña antu adi nampwila nawa akweti chihandilu chikuyiteja kusonekesha. Komana mwamonaña awa mashikola nenu Yehova wukweti kukeña?

Diluñishenu hakuhituluka munsañu yamashikola ateokalatiki akatataka nimazu ahosheli antu ahita dehi munawa mashikola. Dihulenu nenu, ‘Nateli kuhetelamu ñahi muniyi shikola yatudizishañawu kudi Nzambi?’

 HETELENUMU MUKUDIZA SHIKOLA YATEOKALATIKI

Hakwikala ‘Nzambi wakukeña,’ Yehova watudizisha yuma yatukwashaña muchihandilu chetu, yatukwashaña kushinda kukala nikutukwasha kuwana muzañalu waweni mumudimu wakushimwina. (2 Kor. 13:11) Kufwana atumbanji amuyaaka nkulakaji yatachi, twekala adiloñesha chikupu kukwasha antu, ‘nikuyileja kuhemba yuma yejima’ yatulejawu.—Mat. 28:20.

Hela chakwila hitunateli kuhita munawa mashikola ejimaku, tunateli kuhetelamu neyi tuhita mushikola yimu hela kubadikahu. Tunateli kuzatisha kufumba kwamuBayibolu kutwadizaña. Tunateli cheñi kupaminaku mumudimu wakushimwina kuhitila mukuzatila hamu nawambuña aYehova adizishawu chikupu.

Dihulenu nenu, ‘Komana chihandilu chami chikuñiteja kuhita mushikola yimu hanawa mashikola?’

Akwakudifukula aYehova eluka nawu hikukooleka kweneni neyi ahita nikudiza munawa mashikola ashiyashana. Tunakulomba netu yuma yimunakudiza yiyikwashi kuswila kwakwihi naNzambi nikuyikwasha kuzata chiwahi nyidimu yindi, sweje-e mudimu wakushimwina nsañu yayiwahi swayi.

[Chikasha/Nyevulu yidi hefu 13-17]

KULUMBULULA MASHIKOLA ATEOKALATIKI

Shikola Yamudimu waTeokalatiki

Nkeñelu yaniyi shikola: Iyi shikola yakudizisha akwakushimwina kulonda ekali akwakushimwina niantañishi ansañu yayiwahi akuluka yitembi.

Kuleha kwampinji: Mpinji yejima.

Iluña: Hetala daWanta. Atela kwikala muniyi shikola: Antu ejima apompaña mpinji yejima, etejaña yuma yatañishaña Bayibolu, nawa anahimpi chihandilu chawu hamuloña wakulondela nshimbi jawakwaKristu.

Chakusonekesha: Nkoñi waShikola yaMudimu waTeokalatiki diyi wasonekaña atudizi.

Sharon, wakata chikatu chaamyotrophic lateral sclerosis (ALS), nindi: “Shikola yaMudimu waTeokalatiki yinandizishi chakusandujola nikuhana mpanji munjila yayiwahi. Nadizi cheñi kutoñojokelaku antu amakwawu akweti nzala yakuspiritu bayi yamami awenuku.”

Arnie, nkoñi wendaña wunashimbuli muniwu mudimu, nindi: “Kufuma kuwansi nadiña nachikukuma nawa nakañenyeña kutala antu neyi inakuhosha nawu. Iyi shikola yinankwashi kwikala namuchima wadikuhwelela nikudimona nami nalema. Nawukwashu waYehova kuhitila muniyi shikola, neluki njila jakonenamu chiwahi nikusoñama. Nidi namuzañalu chikupu hakwikala nañovu yakuhameka Nzambi muchipompelu nimwiha.”

 Shikola Yawantu Anatachiki Mudimu wahaBeteli

Nkeñelu yaniyi shikola: Yakukwasha antu amaha anenzi haBeteli kulonda atweshi kuzata chiwahi nyidimu yawu.

Kuleha kwampinji: Jiminiti 45 mumulungu hadi nyilungu 16.

Iluña: Yekalaña haBeteli.

Atela kwikala muniyi shikola: Atela kwikala amana kwetu hela ahela amuchisaka chaBeteli hela mana kwetu wunadihani anetejiwu kuzatila haBeteli hadi chaaka chimu hela kubadikahu.

Chakusonekesha: Amamembala amaha amuchisaka chaBeteli ayisonekeshaña muniyi shikola.

Demetrius, wahitili muniyi shikola muma 1980, nindi: “Iyi shikola yankwashili kwikala nachaaku chakudiza nawa yankwashili kutwalekahu kuzatila haBeteli hadi yaaka yayivulu. Antañishi, nsañu yitwadizileña nikufumba kwakuwahi kwanleñeleli niluki nami Yehova watwakamenaña nawa wakeñeshaña nindi nimuzatileña haBeteli.”

Kaitlyn nindi: “Ankwashili kusha maana hayuma yalema, kwikala muntu walemesha yuma yakuspiritu. Shikola yawantu anatachiki mudimu wahaBeteli yinaleñeli nisweji kumwiluka Yehova, itala dindi nikuloñesha kwindi.”

Shikola yaMudimu waWanta

Nkeñelu yaniyi shikola: Yakudizisha ankoñi endaña, aeluda, nawa mpinji yikwawu niankoñi akuzatila kulonda akalakaleña nyidimu yawu yakulombola niyamukuloñesha. (Yil. 20:28) Adizaña hayuma yinakumwekana, yaaku nikukaankila kudi muyipompelu. Iyi shikola yekalañaku chimwahita yaaka yantesha kwesekeja nakufuukula Kwezaza Dalombolaña.

Kuleha kwampinji: Muyaaka yamakonu, iyi shikola yekalañaku hadi mafuku ayedi hela mafuku ayedi nachikunku yakudizisha ankoñi endaña, ifuku dimu nachikunku yawaeluda nawa ifuku dimu dawankoñi akuzatila.

Iluña: Kakavulu yekalilaña Hetala daWanta hela Hetala Deneni Dakupompela.

Atela kwikala muniyi shikola: Chiña wudi nkoñi wendaña, eluda hela nkoñi wakuzatila.

Chakusonekesha: Aeluda niankoñi akuzatila ayitambikaña kudi nkoñi wañinza. Kasanji kamutayi katambikaña ankoñi endaña.

Quinn nindi: “Hela chakwila muniyi shikola adizaña nsañu jajivulu mumpinji yantesha, yakoleshaña aeluda nikuyikwasha kwikala namuzañalu ‘nikudikwatisha neyi amayala’ mumudimu waYehova. Wejima wawu aeluda anashimbuli niamaha adizaña chakubiña chiwahi anyikoku nikwikala anuñañana ‘muyitoñojoka yoyimu.’”

Michael niyena nindi: “Iku kudiza kwashindamenaña hakutukwasha kulonda twiluki chikupu yuma yahosha hachikuhwelelu chetu, kutusoñamisha kuwubanji nikutuleja njila jajiwahi jakuhembelamu anyikoku. Yehova watukwashaña muloña wukweti luwi.”

 Shikola yaMudimu wawuPayiniya

Nkeñelu yaniyi shikola: Yakukwasha apayiniya kulonda ‘akalakali mudimu wawu awumanishi chikupu.’—2 Tim. 4:5.

Kuleha kwampinji: Nyilungu yiyedi.

Iluña: Kasanji kamutayi dikafuukulaña; kakavulu yekalilaña Hetala daWanta.

Atela kwikala muniyi shikola: Watela kwikala payiniya wampinji yejima wunazati hadi chaaka chimu hela kubadikahu. *

Chakusonekesha: Apayiniya ayisonekeshaña nikuyileja kudi nkoñi wañinza.

Lily nindi: “Iyi shikola yankwashili kushinda kukala kunamonaña mwiha nimuchihandilu chami. Napaminuku mukudiza, kutañisha nikuzatisha Bayibolu chachiwahi. Nadiloñeshi chikupu kukwasha antu, kuzatila hamu nawaeluda nikukwasha chipompelu kulonda chikuli.”

Brenda, wunahiti muniyi shikola kayedi, nindi: “Iyi shikola yankwashili kwiluka chikupu yuma yakuspiritu, kukolesha chinleji chami nikusha maana hakukwasha antu amakwawu. Mwalala, Yehova wahanaña!”

[Tumazu twaheshina]

Shikola yawaEluda amuChipompelu

Nkeñelu yaniyi shikola: Yakukwasha eluda kulonda akameneña nyidimu yawu yamuchipompelu nikukolesha wuspiritu wawu.

Kuleha kwampinji: Mafuku atanu.

Iluña: Kasanji kamutayi dikakeñaña iluña; kakavulu yekalilaña Hetala daWanta hela Hetala Deneni Dakupompela.

Atela kwikala muniyi shikola: Aeluda atondewa.

Chakusonekesha: Kasanji kamutayi dikatambikaña aeluda.

Tiyenu chahosheluwu amana kwetu ahitili mushikola yanaambala 92 muUnited States:

“Nahetelumu nankashi muniyi shikola, yinankwashi kudishinshika ami aweni kulonda niluki chinatela kuhemba chiwahi nyikoku yaYehova.”

“Ichi nateli kukolesha antu ejima chikupu kuhitila mukukonkomwena hayikuma yayeni yamuNsona.”

“Muchihandilu chami chejima nikuzatishaña yuma yinadizili.”

Shikola yawaNkoñi Endaña niAñodijawu

Nkeñelu yaniyi shikola: Yakukwasha ankoñi añinza niankoñi ankambi kulonda akwasheña chikupu yipompelu hampinji ‘yinakuzatawu nañovu hakushimuna nikuleja.’—1 Tim. 5:17; 1 Pet. 5:2, 3.

Kuleha kwampinji: Tukweji tuyedi.

Iluña: Kasanji kamutayi dikatondaña iluña.

Atela kwikala muniyi shikola: Mana kwetu watela kwikala nkoñi wañinza hela wankambi.

Chakusonekesha: Ankoñi endaña niañodijawu ayitambikaña kudi kasanji kamutayi.

Joel, wahitili mushikola yatachi, mu 1999 nindi: “Iyi shikola yatukwashili tusweji kumulemesha Yesu mutu wakunu kuloñesha. Twadizili netu twatela kukolesha amana kwetu itwakalakelaña nikukolesha yipompelu kulonda yikali yanuñañana. Iyi shikola yatukwashili kwiluka netu hela chakwila nkoñi wendaña walejaña amana kwetu mwakwilila nikuyifumba mpinji yikwawu, ilaña wafwilaña kukwasha amana kwindi kwiluka nawu Yehova wayikeña.”

Shikola Yakudiza Bayibolu Yawamana Kwetu Ajiki

Nkeñelu yaniyi shikola: Yakukwasha aeluda ajiki niankoñi akuzatila kulonda azateña nyidimu yikwawu yamukuloñesha kwaYehova. Amana kwetu amavulu ahita dehi muniyi shikola ayitemeshaña kudi kukaankila mwituña dawu. Amakwawu niwena neyi anadihani anateli kuyitemesha kwituña dacheñi. Amana kwetu amakwawu ahita dehi muniyi shikola anateli kuzata neyi apayiniya adimena hampinji yantesha kulonda atachiki nikutwala hambidi mudimu wakushimwina mumaluña mwabula akwakushimwina nawa ekala kwakulehi.

Kuleha kwampinji: Tukweji tuyedi.

Iluña: Kasanji kamutayi dikatondaña iluña; kakavulu yekalilaña Hetala daWanta hela Hetala Deneni Dakupompela.

Atela kwikala muniyi shikola: Amana kwetu ajiki adi nayaaka hakachi ka 23 ni 62 akola kumujimba nawa adi nampwila yakuzatila kwiluña kudi kukaankila. (Maku 10:29, 30) Chiña anakalakali wupayiniya wampinji yejima hadi yaaka yiyedi nawa azatahu dehi hadi yaaka yiyedi chakadi kuleka neyi eluda hela nkoñi wakuzatila.

Chakusonekesha: Kwekalaña mitiñi hakupompa kwañinza kulonda anakukeña iwu mudimu ayileji mwakwilila.

Rick, wahitili mushikola yanaambala 23 muUnited States nindi: “Kudiza chikupu iyi shikola kwaleñeleli spiritu yaYehova yinkwashi kuhimpa chikupu muwumi wami. Neyi Yehova yakwinka mudimu nidi wuzati, wukukukwasha kuwuzata. Nadizili nami neyi nisha maana hakwila nkeñelu yaNzambi, wukanyinka ñovu.”

Andreas wazatilaña muGermany nindi: “Nelukili nami kuloñesha kwaNzambi kwamakonu kwazatikaña muchihayamisha. Kudiza iyi shikola kwankwashili kuzata chiwahi nyidimu yakumbidi. Cheñi nawa yakutalilahu yayivulu yamuBayibolu yandizishili chikuma chalema chakwila nawu: Kukalakela amana kwami niYehova kwaletaña muzañalu walala.”

Shikola Yakudiza Bayibolu YawakwaKristu Adisumbula

Nkeñelu yaniyi shikola: Yakudizisha chikupu antu adisumbula kulonda ayizatishi chikupu kudi Yehova nikuloñesha kwindi. Amana kwetu amavulu ahita dehi muniyi shikola akayitemeshaña kudi kukaankila mwituña dawu. Amakwawu niwena neyi anadihani anateli kuyitemesha kwituña dacheñi. Amana kwetu amakwawu ahita dehi muniyi shikola anateli kuzata neyi apayiniya adimena hampinji yantesha kulonda atachiki nikutwala hambidi mudimu wakushimwina mumaluña mwabula akwakushimwina nawa ekala kwakulehi.

Kuleha kwampinji: Tukweji tuyedi.

Iluña: Chayinu mpinji iyi shikola yidi muUnited States nawa kutachika muSeptember 2012, yikatachika munyitayi yinatonduwu yamukaayi kejima, sweje-e dinu Hetala daWanta hela Hetala Deneni Dakupompela.

Atela kwikala muniyi shikola: Adisumbula adi nayaaka hakachi ka 25 ni 50 akola kumujimba, adi nachihandilu chikuyiteja kuzatila kudi kukaankila kweneni nawa akweti muchima wakwila nawu: “Yamonu, ntemeshami.” (Isa. 6:8) Chiña anashakami mumaluwi hadi yaaka yiyedi nawa anazati mumudimu wampinji yejima hadi yaaka yiyedi chakadi kuleka. Iyala watela kwikala eluda hela nkoñi wakuzatila wunazati hadi yaaka yiyedi.

Chakusonekesha: Kwekalaña mitiñi hakupompa kwankambi kulonda anakukeña kusonekesha ayileji jakeñekaña. Neyi mudana mitiñi hakupompa kwankambi mwituña denu ilaña munakukeña kusonekesha, mwatela kusonekela kukasanji kamutayi wenu kulonda ayileji nsañu jikwawu.

Eric niCorina, adiña mushikola yatachi mu 2011 nawu: “Hanyilungu yitanu nayisatu twadizili yuma yahimpili chihandilu chetu nawa hikukooleka kweneni kudi adisumbula anakukeña kukalakala chikupu mumudimu waYehova! Tunafuukuluhu kushakama chihandilu chapela kulonda tuzatisheña mpinji yetu munjila yayiwahi.”

Shikola yaWatchtower Yakudiza Bayibolu yaGileyadi

Nkeñelu yaniyi shikola: Yakudizisha atudizi amuniyi shikola kulonda azateña mudimu wamwiha wawumishonali mumaluña mwekala antu amavulu, kwikala ankoñi endaña hela kuzatila haBeteli. Nkeñelu yaniyi shikola yidi yakuwahisha nyidimu yamwiha nintanjikilu yahamutayi.

Kuleha kwampinji: Tukweji tutanu.

Iluña: Hamutayi, haWatchtower Educational Center, Patterson, New York, U.S.A.

Atela kwikala muniyi shikola: Antu adisumbula adi dehi mumudimu wadimena wampinji yejima, chidi neyi, amishonali achidi kanda ahiti muniyi shikola, apayiniya adimena, ankoñi endaña hela akaBeteli. Wonsu wawu atela kwikala antu anazati iwu mudimu hadi yaaka yisatu chakadi kuleka. Chiña eluka kuhosha, kutaña nikusoneka Engilishi chiwahi.

Chakusonekesha: Adisumbula anateli kuyileja nawu asonekeshi kudi Komiti yaMutayi.

Lade niMonique amuUnited States chayinu mpinji anakuzatila muAfrica. Lade nindi: “Shikola yaGileyadi yatukwashili kuya nakushimwina kudi kwejima mwituña nikudiloñesha kuzatila hamu nawamana kwetu.

Monique wabombeleluhu nindi: “Neyi nizatisha yuma yinadiza Mwizu daNzambi, nazañalalaña chikupu hakuzata mudimu wami. Namonaña nami iwu muzañalu hiwunsahu wakukeña kwaYehova.”

Shikola Yawamamembala Amukomiti Yamutayi niAñodijawu

Nkeñelu yaniyi shikola: Yakukwasha adi Mukomiti yaNyitayi alomboleña nyikala yajiBeteli, kutala nyidimu yinakundami kuyipompelu, jiñinza nijinkambi. Eluka cheñi nyidimu yidi neyi yakubalumuna, kupulinta nikutwala nyikanda kuyipompelu.

Kuleha kwampinji: Tukweji Tuyedi.

Iluña: Hamutayi, haWatchtower Educational Center, Patterson, New York, U.S.A.

Atela kwikala muniyi shikola: Mana kwetu watela kwikala membala Wamukomiti yaMutayi hela membala Wamukomiti Yetuña hela diwu mudimu wukutachikayi.

Chakusonekesha: Izaza Dalombolaña datambikaña amana kwetu niañodijawu.

Lowell niCara, ahitili mushikola yanaambala 25, anakuzatila muNigeria. Lowell nindi: “Nadizili nami hela chakwila nidana mpinji hela ananyinki nyidimu yayivulu, wuspiritu wetu dichuma cheneni chamuzañaleshaña Yehova. Mushikola twadizili cheñi chichalemena kwimbujola kukeña kwaYehova kwamwekeshañayi kudi ambuñindi.”

Cara nindi: “Mazu inatoñojokañahu chikupu awa, neyi nakañanyi kulumbulula chikuma munjila yapela, natela kwiluka oyu nsañu henohu kanda niyi nakudizisha muntu wacheñi.”