Skunde mag Tij Nyasaye Nyiso Kaka Jehova Oherowa

JEHOVA e “Japuonjwa Maduong’.” (Isa. 30:20, New World Translation) Herane ema miyo opuonjo kendo otiego jomoko. Kuom ranyisi, nikech hera ma en-go, Jehova osenyiso Yesu “weche duto motimo owuon.” (Joh. 5:​20) Hera ma en-go kuomwa kaka Joneno mage emomiyo Jehova osemiyo wabedo gi “dho jo mopuonjore,” sama watimo kinda mar miyo nyinge duong’ kendo konyo jomoko.​—Isa. 50:4.

Ka giluwo yo ma Jehova nyisogo hera, Komiti Mochung’ne Puonjo e lo Bura Maduong’, tiyo gi skunde apar mag tij Nyasaye mondo otieg jogo ma nigi gombo kendo manyalo dhiye skundego. Be ineno skundegi kaka gik manyiso ni Jehova oherowa?

We wane ane e yo machuok skunde mag tij Nyasaye mantie sani, kod gik ma joma osedhi e skundego wacho. Kae to ipenjri niya, ‘Gin ber mage manyalo yudo kuom puonj ma Nyasaye chiwo?’

 YUD BER KUOM TIEGRUOK MA NYASAYE MIYOWA

Nikech en “Nyasach hera,” Jehova chiwo tiegruok mamiyo ngimawa medo bedo maber moloyo, tiegruok ma ikowa ne pek mwanyalo romogo, kendo makonyowa bedo gi mor e tijwa mar lendo. (2 Kor. 13:11) Mana kaka jopuonjre mag Yesu machon, iikowa maber mondo wakony jomoko, ‘kwapuonjogi rito weche duto’ ma nochikwa.​—Math. 28:20.

Kata obedo ni ok wanyal dhi e skundego duto, wanyalo yudo ber kuom dhi e achiel kata moko kuomgi. Kendo wanyalo tiyo gi puonj mabeyo mimiyowa kowuok e Muma. Bende, wanyalo medo lony marwa sama walendo gi jotich Jehova mosetieg maber.

Penjri ane niya, ‘Be chal mar ngimana nyalo yiena mondo atim kinda mar dhi e skul moro amora?’

Jotich Jehova neno ni en thuolo makende riwo lwedo skundego kendo yudo tiegruok kokalo kuomgi. Mad tiegruok ma iyudo e skundego okonyi sudo machiegni gi Nyasaye, kendo miyo ibed moikore chopo migepe ma Nyasaye omiyi, to ahinya wuon ote mar yalo wach maber.

[Sanduk/Picha e ite mar 13-17]

MOKO KUOM SKUNDE MAG TIJ NYASAYE

Skul mar Tij Nyasaye

Gimomiyo Itime: Mondo otieg jolendo olend kendo opuonj wach maber e yo molony.

Kinde Mokawo: En skul ma dhi nyime.

Kama Itimee: E Od Romo.

Gik Madwarore: Jogo duto matimo kinda e kanyakla, moyie gi puonj mag Muma kendo ma kit ngimagi owinjore gi chike mag Jokristo.

Kaka Ng’ato Donjoe: Jal marito Skul mar Tij Nyasaye ema konyo joma dwaro donjoe.

Sharon, ma nigi del mong’ol nikech tuwo miluongo ni amyotrophic lateral sclerosis (ALS), wacho niya: “Skul mar Tij Nyasaye osekonya ng’eyo kaka anyalo timo nonro kendo keto weche madwaro wacho e yo mochanore. Asepuonjora keto pacha, e jiwo winjruokna gi Nyasaye kendo konyo jomamoko madwaro ng’eyo wach Nyasaye.”

Arnie, mosebedo jarit-alwora kuom higini mang’eny wacho kama: “Nadongo ka an radwal kendo ne tekna ahinya ng’iyo wang’ jogo ma awuoyogo. Skundni osekonya bedo gi chir kendo miya neno ni ok an ng’at manono. Kokalo kuom tiegruok ma Jehova osemiya e skundni, aseng’eyo kaka anyalo gamo muya e yo maber seche ma asomo, kendo asepuonjora yore moko manyalo konya keto pacha e gima awacho. Aduoko erokamano kuom nyalo ma an-go mar pako Nyasaye e kanyakla koda e tija mar lendo.”

 Skul mar Jo Manyien e Bethel

Gimomiyo Itime: Mondo okony jo manyien e Bethel mondo ochop migepegi e yo makare.

Kinde Mokawo: Dakika 45 juma ka juma kuom jumbe 16.

Kama Itimee: Bethel.

Gik Madwarore: Nyaka ng’ato obed jakanyo mar jood Bethel kata joma osepwodhi e konyo tije mag Bethel kinde ka kinde kuom higa achiel kata mokalo kanyo.

Kaka Ng’ato Donjoe: Jood Bethel modonjo manyien ema dhiye.

Demetrius, ma ne odhi e skundni higini mag 1980, wacho kama: “Puonj ma nayudo e skundni nomiyo amedo lony e timo puonjruok ma mara awuon, kendo ne oika ne migepe mag Bethel ma ne atimo kuom higini mang’eny. Jopuonjwa e skundno kaachiel gi gik ma ne ipuonjowa, nomiyo abedo gadier ni Jehova ohera kendo ni odwaro ni atine gi mor e Bethel.”

Kaitlyn to wacho kama: “Skundno nokonya keto pacha kuom gimaduong’ie moloyo​—ma en bedo ng’at ma timo gik moko kaka Jehova dwaro. Skundno nokonya medo ng’eyo Jehova e yo maber moloyo, medo ng’eyo kaka Bethel chalo, kendo medo ng’eyo riwruok mar oganda mare.”

Skul mar Tij Pinyruoth

Gimomiyo Itime: Mondo otieg jorit malworo, jodong-kanyakla to bende seche moko jokony-tich, mondo ochop migepe koda ting’ momigi e riwruok mar oganda Nyasaye. (Tich 20:28) Chal kaachiel gi dwaro mag kanyakla bende inono e skundni. Skundno itimo bang’ higini matin kaluwore gi kaka Bura Maduong’ ochano.

Kinde Mokawo: E higini matin mosekalo, skundni osetim kuom odiechienge ariyo kata ariyo gi nus ne jorit malworo, odiecheing’ achiel gi nus ne jodong-kanyakla, kae to odiechieng’ achiel ne jokony tich.

Kama Itimee: Kinde mang’eny itime e Od Romo kata Od Chokruok mar Alwora mani machiegni.

Gik Madwarore: Nyaka ng’ato obed jarit malworo, jaduong’-kanyakla kata jakony-tich.

Kaka Ng’ato Dhiye: Jarit-alwora ema gwelo jodongo kaachiel gi jokony-tich. Ofis ema gwelo jorit malworo.

Quinn (monyis piny) wacho niya, “Kata obedo ni skundno odich gi gik mathoth mipuonjo, pod ojiwo ahinya jodong-kanyakla kendo konyogi, mondo gisik ka gimor sama ‘gidhi nyime bedo jochir ka chwo’ e tij Jehova. Jodongo machon kaachiel gi manyien puonjore rito rombe e yo maber kendo ‘giriwore kuom paro achiel.’”

Michael bende wacho niya, “Tiegruokni osekonyowa bedo gi lony kuom weche motudore gi yie marwa, ng’eyo gigo manyalo hinyowa, kendo konyowa gi rieko matiyo kuom kaka wanyalo rito rombe. Mano kaka Jehova osekonyowa e yo mang’won.”

 Skul mar Jopainia

Gimomiyo Itime: Mondo okony jopainia ‘chopo tich duto momigi.’​—2 Tim. 4:5.

Kinde Mokawo: Jumbe ariyo.

Kama Itimee: Ofis ema yiero; kinde mang’eny itime e Od Romo.

Gik Madwarore: Jogo mosebedo jopainia mapile kuom kinde maromo higa achiel kata mokalo kanyo. *

Kaka Ng’ato Donjoe: Jopainia mowinjore ema dhi e skundno, kendo jarit-alwora ema gwelogi.

Lily (man korachwich) wacho kama: “Skundno osekonya nyagore gi pek maromogo e tij lendo koda e ngimana. Lony mara osemedore kuom kaka atimo puonjruok ma mara awuon, kaka apuonjo jomoko, kod kaka atiyo gi Muma. Gie sani aikora maber mar konyo jomoko, riwo jodongo lwedo, kendo medo jiwo dongruok obedi e kanyakla.”

Brenda, mosedhi e skundno diriyo wacho niya: “Skundno nokonya keto pacha duto e migepe koda tije Nyasaye, kendo nojiwa mondo amed tego nyalona mar pogo ber gi rach, kendo keto pacha e konyo jomoko. Kuom adier, Jehova en jachiwo mang’won!”

[Footnotes]

Skul mar Jodong-Kanyakla

Gimomiyo Itime: Mondo okony jodongo ochop ting’ ma gin-go e kanyakla kendo mondo ging’e matut gik ma Jehova dwaro ni gitim e lamo mare.

Kinde Mokawo: Ndalo abich.

Kama Itimee: Ofis ema yiero; kinde mang’eny itime e Od Romo kata Od Chokruok mar Alwora.

Gik Madwarore: Nyaka ng’ato bed jaduong’-kanyakla.

Kaka Ng’ato Donjoe: Ofis ema gwelo jodong-kanyakla.

Ne ane weche ma owete moko ma ne odhi e klas mar 92, e piny Amerka nowacho:

“Skundno osekonya ahinya mondo anonra awuon kendo ng’eyo kaka anyalo rito rombe Jehova.”

“Aikora mar jiwo jomoko kuom lero e yo makare thuond weche mayudore e Ndiko.”

“Abiro tiyo gi puonj mayudo e tiegruokni e ngimana duto.”

Skul mar Jorit-Alwora kod Mondegi

Gimomiyo Itime: Mondo okony jorit-alwora gi jorit-distrikt omed lony e tiyo ne kanyakla kod “tiyo matek tich mar yalo kendo puonjo.”​—1 Tim. 5:​17; 1 Pet. 5:​2, 3.

Kinde Mokawo: Dweche ariyo.

Kama Itimee: Ofis ema yiero.

Gik Madwarore: Nyaka ng’ato obed jarit-alwora kata jarit-distrikt.

Kaka Ng’ato Dhiye: Ofis ema gwelo jorit malworo kaachiel gi mondegi.

Joel, ma ne ogwel e klas mokwongo e higa 1999 wacho kama: “Ne wamedo ng’eyo kaka Yesu tayo riwruok mar oganda Nyasaye. Ne waneno kaka dwarore ni wajiw owete ma watiyonegi kendo jiwo winjruok mantie e kanyakla ka kanyakla. Skundno nomedo jiwowa ni sama jarit malworo ng’ado paro kata chiwo puonj moro marieyo kanyakla, gombone maduong’ en konyo owete mondo one kaka Jehova oherogi.”

 Skund Muma ne Owete Maok Nie Kend

Gimomiyo Itime: Mondo oik jodong-kanyakla kod jokony-tich maok nie kend ne migepe momedore. Ng’eny joma odhi e skundni ibiro mi migawo mar konyo e alwora ma jolendo dwarore e piny ma giwuokie. Matin kuomgi to nyalo yudo migawo mar dhi konyo e piny machielo kapo ni ginyiso ofis ni mano nyalore. Moko kuomgi nyalo tiyo kaka jopainia makende kuom kinde e gwenge maboyo mondo gikony tij lendo kuonde ma ne pok olendie.

Kinde Mokawo: Dweche ariyo.

Kama Itimee: Ofis ema yiero; kinde mang’eny itime e Od Romo kata e Od Chokruok mar Alwora.

Gik Madwarore: Owete maok nie kend ma hikgi nie kind 23 kod 62 maok jo midekre kendo madwaro keto dwaro mag owetegi kod mag Pinyruoth obed motelo. (Mari. 10:29, 30) Nyaka gibed ni ne gisebedo jopainia mapile kuom higini katin to ariyo, kendo gisebedo jokony-tich kuom higini ariyo moluwore kata jodong kanyakla.

Kaka Ng’ato Dhiye: Romo mar jogo ma diher dhi e skundni itimo e chokruok mar alwora, kama gibiro yudoe weche momedore.

Rick, ma nodhi e klas mar 23 e piny Amerka wacho niya: “Bedo modich e skundni nochiwo thuolo mondo roho mar Jehova okonya timo lokruok moko madongo. Seche ma Jehova omiyi migawo moro, okonyi chopo migawono. Napuonjora ni kaketo pacha e timo dwaro mar Nyasaye to ok kuoma awuon, Nyasaye biro miya teko.”

Andreas, matiyo ne Jehova e piny Jerman wacho kama:“ Napuonjora ma aneno ni kaka riwruok mar oganda Nyasaye tiyo e kindegi chalo hono. Tiegruok ma nayudono nokonya bedo moikore ne migepe ma ne ni nyime. E wi mano, ranyisi mang’eny mayudore e Muma nopuonja adiera moro makende: Tiyo ne owete kaachiel gi Jehova miyo ng’ato mor madier.”

Skund Muma ne Jokristo Mokendore

Gimomiyo Itime: Mondo jogo mokendore oyud tiegruok makende mondo Jehova kod riwruok mare oti kodgi e okang’ malach. Ng’eny joma odhi e skundni ibiro mi migawo mar konyo e alwora ma jolendo dwarore e piny ma giwuokie. Matin kuomgi to nyalo yudo migawo mar dhi konyo e piny machielo kapo ni ginyiso ofis ni mano nyalore. Moko kuomgi nyalo tiyo kaka jopainia makende kuom kinde e gwenge maboyo mondo gikony e tij lendo kuonde ma ne pok olendie.

Kinde Mokawo: Dweche ariyo.

Kama Itimee: Skundni itimo e piny Amerka, to kochakore Septemba 2012, ibiro time bende e bwo ofise mopogore opogore moyier e piny mangima, to thothne ibiro time e Od Chokruok mar Alwora kata e Od Romo.

Gik Madwarore: Jogo mokendore ma hikgi nie kind 25 kod 50 maok nigi midekre, manyalo dhi lendo kamoro amora ma jolendo dwarore kendo ma nigi chuny moyie kama: “An ka; ora.” (Isa. 6:8) E wi mano, onego gibed joma osekendore kuom higini katin to ariyo kendo gisebedo e tij Nyasaye e thuologi duto kuom higini ariyo maok giweyo. Onego bed ni dichwo osebedo jaduong’-kanyakla kata jakony tich e kanyakla kuom higini ariyo maluwore.

Kaka Ng’ato Dhiye: Romo mar jogo ma diher dhi e skundni itimo e chokruog-distrikt. Kapo ni ok timga romono e chokruoge mag distrikt e pinyu to diher dhi e skundno, inyalo ndiko ne ofis maru mondo iyud weche momedore.

Eric kod Corina, (monyis piny kae)ma ne odhi e klas mokwongo e higa 2011 wacho kama: “To mano kaka jumbe aborogo nomiyo watimo lokruok maduong’ e ngimawa, kendo ne en thuolo maber ne jogo manie kend ma diher timo mathoth e tij Jehova! Wang’ado e chunywa mar tiyo gi ngimawa e yo maber chuth mondo wati gi thuolowa e yo mariek.”

Skul mar Gilead

Gimomiyo Itime: Mondo otieg joma dhi e skundno ne tije kaka bedo jomisonari moikore tiyo kuonde ma ji mang’eny odakie, bedo jorit malworo, kata bedo Jo-Bethel. Gimaduong’ en ni mondo oteg tije mag lendo koda tije matimore e ofisewa.

Kinde mokawo: Dweche abich.

Kama Itimee: Watchtower Educational Center, Patterson, New York, Amerka.

Gik madwarore: Onego gibed joma nie kend, kendo matiyone Nyasaye kuom thuologi duto e migepe machalo kaka, jomisonari mapok odhi e skundno; jopainia makende, jorit malworo; koda jood Bethel. Nyaka gibed joma nosetiyo kanyachiel e migepego kuom higini katin to adek maluwore. Onego gibed joma nyalo wacho, somo kendo ndiko dho-Ingresa e yo maber.

Kaka Ng’ato Dhiye: Komiti matayo ofis ema gwelo joma owinjore odhi e skundno.

Lade kod Monique mawuok Amerka sani tiyo ne Nyasaye e Afrika. Lade wacho niya:“Skul mar Gilead oseikowa ne dhi kamoro amora e piny mangima, kendo tiyo kanyachiel gi owete gi nyiminewa.”

Monique medo niya: “Kaka amedo tiyo kod puonj mayudo kowuok kuom Wach Nyasaye, e kaka amedo yudo mor e migawona. Aneno adier ni mor en gima medo nyiso ni Jehova oherowa.”

Skul mar Jokomiti Matayo Bad Ofis kod Mondegi

Gimomiyo Itime: Mondo okony Jokomiti ong’e tayo tije mag Bethel, tayo weche motudore gi tij lendo e kanyakla, rito alwora kod distrikt. Bende gipuonjore kaka iloko buge e dhok mamoko, goyogi, koda terogi kuonde mopogore opogore.

Kinde Mokawo: Dweche ariyo.

Kama Itimee: Watchtower Educational Center, Patterson, New York, Amerka.

Gik Madwarore: Jogo manie Komiti Matayo Ofise kata manie Komiti mar Piny kata jogo ma ibiro ket e migepego bang’ wuok e skundno.

Kaka Ng’ato Dhiye: Bura Maduong’ ema gwelo owete gi mondegi.

Lowell kod Cara, ma ne odhi e klas mar 25, sani tiyo ne Nyasaye e piny Nigeria. Lowell wacho niya: “Skundno noparona ni kata adich maromo nade, kata bed ni en tich mane momiya, gimaduong’ mamoro Jehova en rito winjruok maber kode. Skundno bende nojiwo ahinya ni kaka watimo ne jomoko onego obed machalre gi yo ma Jehova nyisogo jotichne hera.”

Cara medo wacho niya:“Wach moro achiel masebedo ka aparo en ni, ka ok anyal lero wach moro e yo mawinjore maber, to onego akwong atim nonro kapok apuonjo jomoko wachno.”