ĠEĦOVA huwa “l-​Istruttur Grandjuż” tagħna. (Is. 30:20) L-​imħabba timmotivah biex jeduka u jħarreġ lil ħaddieħor. Pereżempju, imqanqal minn imħabba profonda, Ġeħova juri lil Ġesù “kulma jagħmel.” (Ġw. 5:20) L-​imħabba li għandu għalina, ix-​Xhieda tiegħu, tqanqal lil Ġeħova biex jagħtina “l-​ilsien taʼ wieħed li ġie mgħallem” waqt li nistinkaw biex nonorawh u ngħinu ’l ħaddieħor.—Is. 50:4.

Billi jimita lil Ġeħova f’li juri mħabba, il-​Kumitat tat-​Tagħlim tal-​Ġemgħa li Tiggverna jipprovdi għaxar skejjel teokratiċi biex iħarreġ lil uħud li għandhom kemm ix-​xewqa kif ukoll iċ-​ċirkustanzi biex japplikaw għalihom. Tqishom int dawn l-​iskejjel bħala evidenza tal-​imħabba taʼ Ġeħova?

Agħti ħarsa lejn l-​iskejjel teokratiċi li hemm bħalissa u lejn il-​kummenti minn uħud li attendewhom. Imbagħad staqsi lilek innifsek, ‘Kif nistaʼ nibbenefika minn din l-​edukazzjoni divina?’

 IBBENEFIKA MIT-​TAĦRIĠ TEOKRATIKU

Bħala “l-​Alla taʼ l-​imħabba,” Ġeħova jipprovdi taħriġ li jagħtina skop fil-​ħajja, jippreparana biex negħlbu l-​ostakli, u jgħinna nesperjenzaw ferħ kbir fil-​ministeru tagħna. (2 Kor. 13:11) Bħad-​dixxipli tal-​ewwel seklu, aħna armati sew biex ngħinu lin-​nies billi ‘ngħallmuhom josservaw dak kollu’ li ġejna ordnati.—Mt. 28:20.

Għalkemm għandu mnejn ma nkunux nistgħu nattendu dawn l-​iskejjel kollha, nistgħu nibbenefikaw minn waħda jew iktar minnhom. U nistgħu napplikaw it-​tagħlim ibbażat fuq il-​Bibbja li huwa disponibbli. Nistgħu nkunu iktar effettivi fil-​ministeru billi naħdmu spalla maʼ spalla maʼ qaddejja taʼ Ġeħova li huma mħarrġin sew.

Staqsi lilek innifsek, ‘Iċ-​ċirkustanzi tiegħi jippermettuli nirsisti biex nattendi xi waħda minn dawn l-​iskejjel?’

L-​aduraturi taʼ Ġeħova jqisuh bħala privileġġ li jappoġġaw dawn l-​iskejjel imprezzabbli u jitgħallmu minnhom. Jalla t-​taħriġ li tirċievi jressqek eqreb lejn Alla u jippreparak biex twettaq ir-​responsabbiltajiet tiegħek lejh, speċjalment il-​kmand urġenti biex tipprietka l-​aħbar tajba.

[Kaxxa/Stampi f’paġni 13-17]

ĦARSA LEJN L-​ISKEJJEL TEOKRATIĊI

L-​Iskola tal-​Ministeru Teokratiku

Skop: Tħarreġ lill-​pubblikaturi jkunu predikaturi u għalliema effettivi tal-​aħbar tajba.

Kemm Iddum: Kontinwa.

Post: F’Sala tas-​Saltna lokali.

Min Jikkwalifika: Dawk kollha li jassoċjaw regolarment mal-​kongregazzjoni, li jaqblu mat-​tagħlim tal-​Bibbja, u li ħajjithom tkun fi qbil mal-​prinċipji Kristjani.

Kif Tapplika: L-​istudenti jkellmu lill-​indokratur tal-​Iskola tal-​Ministeru Teokratiku jekk ikunu jixtiequ jinkitbu.

Sharon, li hi paralizzata bl-​amyotrophic lateral sclerosis (ALS), tgħid: “L-​Iskola tal-​Ministeru Teokratiku għallmitni kif għandi nagħmel riċerka u kif nistaʼ nippreżenta l-​informazzjoni b’mod loġiku. Tgħallimt ukoll niffoka fuq il-​bżonnijiet spiritwali taʼ ħaddieħor—mhux fuq tiegħi biss.”

Arnie, li ilu jaqdi bħala indokratur li jivvjaġġa għal żmien twil, jgħid: “Meta kont żgħir kont intemtem u kont insibha diffiċli nagħmel kuntatt bl-​għajnejn maʼ oħrajn. Din l-​iskola għenitni nikseb fiduċja fija nnifsi u ma nħossnix ma niswa għal xejn. Bl-​għajnuna taʼ Ġeħova permezz taʼ dan it-​taħriġ, tgħallimt tekniki taʼ kif nieħu n-​nifs u taʼ kif nikkonċentra. Jien grat ħafna għall-​abbiltà li nfaħħar lil Alla fil-​kongregazzjoni u fil-​ministeru.”

 L-​Iskola għad-​Dħul f’Betel

Skop: Tgħin lil Beteliti ġodda jkollhom suċċess fis-​servizz tagħhom.

Kemm Iddum: 45 minuta kull ġimgħa għal 16-​il ġimgħa.

Post: F’Betel.

Min Jikkwalifika: Trid tkun membru permanenti tal-​familja Betel jew volontier temporanju li jkun ġie approvat biex jaqdi f’Betel għal sena jew iktar.

Kif Tapplika: Membri tal-​familja Betel li jkunu jikkwalifikaw jinkitbu awtomatikament.

Demetrius, li attenda din l-​iskola fis-​snin 80, jgħid: “Dan il-​kors għenni ntejjeb id-​drawwiet taʼ studju tiegħi u għenni nipprepara għal karriera twila f’Betel. L-​għalliema, il-​kurrikulu, u l-​pariri prattiċi kkonvinċewni li Ġeħova jħobbni u jixtieqni nirnexxi fis-​servizz tiegħi f’Betel.”

Kaitlyn tgħid: “Ġejt megħjuna niffoka fuq dak li hu l-​iktar importanti—li nkun persuna spiritwali. Din l-​iskola żiditli l-​apprezzament tiegħi lejn Ġeħova, lejn id-​dar tiegħu, u lejn l-​organizzazzjoni tiegħu.”

L-​Iskola tal-​Ministeru tas-​Saltna

Skop: Tħarreġ lill-​indokraturi li jivvjaġġaw, l-​anzjani, u xi drabi l-​qaddejja ministerjali biex jieħdu ħsieb l-​indokrar u r-​responsabbiltajiet tagħhom fl-​organizzazzjoni. (Atti 20:28) Jiġu kkunsidrati sitwazzjonijiet kurrenti, tendenzi, u bżonnijiet immedjati tal-​kongregazzjonijiet. L-​iskola tinżamm kull ftit snin skont kif tkun iddeċidiet il-​Ġemgħa li Tiggverna.

Kemm Iddum: F’dawn l-​aħħar snin, din l-​iskola damet bejn jumejn u jumejn u nofs għall-​indokraturi li jivvjaġġaw, ġurnata u nofs għall-​anzjani, u ġurnata għall-​qaddejja ministerjali.

Post: Ġeneralment f’Sala tas-​Saltna jew f’Sala tal-​Assemblea.

Min Jikkwalifika: Trid tkun indokratur li jivvjaġġa, anzjan, jew qaddej ministerjali.

Kif Tapplika: L-​anzjani u l-​qaddejja ministerjali jirċievu stedina mingħand l-​indokratur tas-​circuit. L-​uffiċċju tal-​fergħa jistieden lill-​indokraturi li jivvjaġġaw.

“Għalkemm il-​kors hu konċiż u jkopri ħafna informazzjoni fi żmien qasir, isaħħaħ lill-​anzjani biex iżommu l-​ferħ tagħhom u ‘jkunu rġiel’ fis-​servizz taʼ Ġeħova. Kemm l-​anzjani ġodda kif ukoll dawk li jkunu ilhom, jitgħallmu jirgħu b’mod effettiv u jkunu magħqudin kif jixraq ‘bi ħsieb wieħed.’”​—Quinn (hawn taħt).

“Dan it-​taħriġ jilħaq bilanċ perfett għax iżidilna l-​apprezzament spiritwali, iwissina dwar il-​perikli, u jipprovdilna suġġerimenti prattiċi dwar kif għandna nieħdu ħsieb il-​merħla. Kemm hu qalbu tajba Ġeħova li jagħtina din l-​għajnuna!”​—Michael.

 L-​Iskola tas-​Servizz taʼ Pijunier

Skop: Tgħin lill-​pijunieri ‘jwettqu bis-​sħiħ il-​ministeru tagħhom.’—2 Tim. 4:5.

Kemm Iddum: Ġimagħtejn.

Post: Jiddeċiedi l-​uffiċċju tal-​fergħa; ġeneralment f’Sala tas-​Saltna.

Min Jikkwalifika: Trid tkun ilek taqdi bħala pijunier regulari għal sena jew iktar. a

Kif Tapplika: Pijunieri li jkunu jikkwalifikaw jinkitbu awtomatikament mill-​indokratur tas-​circuit tagħhom u jinformahom hu.

“Din l-​iskola għenitni niffaċċja l-​isfidi fil-​ministeru u f’ħajti,” tgħid Lily (lemin). “Il-​mod kif nistudja, ngħallem, u nuża l-​Bibbja tjieb ġmielu. Ninsab iktar ippreparata biex ngħin lil oħrajn, nappoġġa lill-​anzjani, u nikkontribwixxi għat-​tkabbir tal-​kongregazzjoni.”

Brenda, li attendiet l-​iskola darbtejn, tgħid: “Għenitni nkun medhija għalkollox f’affarijiet spiritwali, insaħħaħ il-​kuxjenza tiegħi, u niffoka fuq li ngħin lil oħrajn. Bla dubju, Ġeħova huwa ġeneruż!”

[Nota ta’ taħt]

L-​Iskola għall-​Anzjani tal-​Kongregazzjoni

Skop: Tgħin lill-​anzjani jieħdu ħsieb ir-​responsabbiltajiet tagħhom fil-​kongregazzjoni u jkabbru l-​ispiritwalità tagħhom.

Kemm Iddum: Ħamest ijiem.

Post: Jiddeċiedi l-​uffiċċju tal-​fergħa; ġeneralment f’Sala tas-​Saltna jew f’Sala tal-​Assemblea.

Min Jikkwalifika: Trid tkun anzjan maħtur.

Kif Tapplika: L-​anzjani jiġu mistidnin mill-​uffiċċju tal-​fergħa.

Innota l-​kummenti taʼ xi wħud li attendew it-​92 klassi fl-​Istati Uniti:

“L-​iskola kienet taʼ benefiċċju kbir għalija għax għenitni neżamina lili nnifsi biex nara kif nistaʼ nieħu ħsieb in-​nagħaġ taʼ Ġeħova.”

“Issa ninsab iktar lest u determinat li nuża l-​Iskrittura biex ninkuraġġixxi ’l ħaddieħor.”

“Dan it-​taħriġ se ngħożżu tul għomri kollu.”

L-​Iskola għall-​Indokraturi li Jivvjaġġaw u n-​Nisa Tagħhom

Skop: Biex l-​indokraturi tas-​circuit u tad-​distrett ikunu iktar effettivi f’li jaqdu lill-​kongregazzjonijiet hekk kif “jaħdmu iebes biex jitkellmu u jgħallmu.”—1 Tim. 5:17; 1 Pt. 5:2, 3.

Kemm Iddum: Xahrejn.

Post: Jiddeċiedi l-​uffiċċju tal-​fergħa.

Min Jikkwalifika: Il-​ħu jrid ikun indokratur tas-​circuit jew tad-​distrett.

Kif Tapplika: L-​uffiċċju tal-​fergħa jistieden lill-​indokraturi li jivvjaġġaw u n-​nisa tagħhom.

“L-​apprezzament tagħna għal Ġesù bħala l-​kap tal-​organizzazzjoni kiber. Rajna l-​ħtieġa li ninkuraġġixxu lill-​aħwa li naqdu u li nsaħħu l-​unità f’kull kongregazzjoni. Il-​kors naqqax f’moħħna l-​fatt li għalkemm l-​indokratur li jivvjaġġa jagħti pariri u kultant anke twiddib, il-​mira prinċipali tiegħu hi li jgħin lill-​aħwa jaraw li Ġeħova jħobbhom.”—Joel, l-​ewwel klassi, 1999.

L-​Iskola tal-​Bibbja Għal Aħwa Rġiel Mhux Miżżewġin

Skop: Tipprepara lill-​anzjani u l-​qaddejja ministerjali mhux miżżewġin għal iktar responsabbiltajiet fl-​organizzazzjoni taʼ Ġeħova. Ħafna minn dawk li jiggradwaw jiġu inkarigati biex jaqdu fejn ikun hemm il-​bżonn f’pajjiżhom. Oħrajn għandhom mnejn jingħataw inkarigu f’pajjiż ieħor jekk jagħmlu lilhom infushom disponibbli. Xi gradwati jkunu jistgħu jaqdu bħala pijunieri speċjali b’mod temporanju biex jagħtu bidu u jespandu x-​xogħol fi nħawi remoti u iżolati.

Kemm Iddum: Xahrejn.

Post: Jiddeċiedi l-​uffiċċju tal-​fergħa; ġeneralment f’Sala tas-​Saltna jew f’Sala tal-​Assemblea.

Min Jikkwalifika: Aħwa rġiel mhux miżżewġin li jkollhom bejn it-​23 u t-​62 sena, ikollhom saħħa tajba, u jkunu jixtiequ jaqdu kull fejn il-​bżonn ikun ikbar. (Mk. 10:29, 30) Iridu jkunu ilhom jaqdu bħala pijunieri regulari minn tal-​inqas sentejn u jkunu qed jaqdu bħala qaddejja ministerjali jew anzjani minn tal-​inqas sentejn kontinwi.

Kif Tapplika: Tinżamm laqgħa fl-​assemblea tas-​circuit għal dawk li jkunu interessati.

“Peress li kont medhi f’dan il-​kors, l-​ispirtu taʼ Ġeħova setaʼ jagħmel tibdil fil-​fond taʼ qalbi,” jgħid Rick, mit-​23 klassi tal-​Istati Uniti. “Meta Ġeħova jagħtik inkarigu, hu jappoġġak fih. Tgħallimt li jekk niffoka fuq ir-​rieda t’Alla u mhux fuqi nnifsi, hu se jsaħħaħni.”

“Tgħallimt napprezza li l-​organizzazzjoni t’Alla hi bħal miraklu fi żmienna,” jgħid Andreas, li jaqdi fil-​Ġermanja. “It-​taħriġ għenni nipprepara għax-​xogħol li hemm quddiemi. Barra minn hekk, ħafna eżempji mill-​Bibbja għallmuni din il-​verità bażika: Li naqdi lil ħuti u lil Ġeħova jwassal għall-​ferħ veru.”

L-​Iskola tal-​Bibbja Għal Koppji Kristjani

Skop: Tagħti taħriġ speċjalizzat lil koppji miżżewġin sabiex ikunu jistgħu jintużaw iktar bis-​sħiħ minn Ġeħova u l-​organizzazzjoni tiegħu. Ħafna minn dawk li jiggradwaw jiġu inkarigati biex jaqdu fejn ikun hemm bżonn ikbar f’pajjiżhom. Oħrajn għandhom mnejn jingħataw inkarigu f’pajjiż ieħor jekk jagħmlu lilhom infushom disponibbli. Il-​gradwati jistgħu jaqdu bħala pijunieri speċjali b’mod temporanju biex jagħtu bidu u jespandu x-​xogħol fi nħawi remoti u iżolati.

Kemm Iddum: Xahrejn.

Post: Din l-​iskola tinżamm fl-​Istati Uniti u, b’seħħ minn Settembru 2012, se tinżamm ukoll fit-​territorju taʼ fergħat magħżula madwar id-​dinja, ġeneralment f’Sala tas-​Saltna jew f’Sala tal-​Assemblea.

Min Jikkwalifika: Koppji miżżewġin li jkollhom bejn il-​25 u l-​50 sena, b’saħħa tajba, b’ċirkustanzi li jippermettulhom jaqdu kull fejn ikun hemm bżonn ikbar, u b’attitudni: “Hawn jien! Ibgħat lili.” (Is. 6:8) Iridu jkunu ilhom miżżewġin minn tal-​inqas sentejn u ilhom jaqdu fis-​servizz full-​time minn tal-​inqas sentejn kontinwi. Ir-​raġel irid ikun anzjan jew qaddej ministerjali għall-​inqas sentejn kontinwi.

Kif Tapplika: Tinżamm laqgħa fil-​konvenzjoni distrettwali biex tipprovdi informazzjoni lil dawk li jkunu interessati li japplikaw. Jekk ma tinżammx laqgħa fil-​konvenzjonijiet f’pajjiżek u tkun tixtieq tapplika, ikteb lill-​uffiċċju tal-​fergħa tiegħek għal iktar informazzjoni.

“Kienu tmien ġimgħat li jbiddlulek ħajtek u opportunità mill-​aqwa għal koppji li jridu jagħmlu iktar fis-​servizz taʼ Ġeħova! Aħna determinati li nżommu ħajja bilanċjata li tippermettilna nużaw il-​ħin tagħna bil-​għaqal.”—Eric u Corina (hawn taħt), l-​ewwel klassi, 2011.

L-​Iskola taʼ Gilegħad

Skop: Tħarreġ studenti biex jaqdu bħala missjunarji fis-​servizz tal-​għalqa fi nħawi fejn ikun hemm popolazzjoni kbira ħafna, biex ikunu indokraturi li jivvjaġġaw, jew biex ikunu Beteliti. L-​iskop hu li jsaħħu u jistabbilizzaw l-​organizzar tat-​territorju u tal-​fergħa.

Kemm Iddum: Ħames xhur.

Post: Watchtower Educational Center, Patterson, New York, l-​Istati Uniti tal-​Amerika.

Min Jikkwalifika: Koppji miżżewġin li diġà jkunu qed jaqdu f’xi forma taʼ servizz speċjali full-​time—jiġifieri, bħala missjunarji fis-​servizz tal-​għalqa li ma jkunux attendew din l-​iskola, pijunieri speċjali, indokraturi li jivvjaġġaw, jew Beteliti. Iridu jkunu ilhom f’dan is-​servizz flimkien għal imqar tliet snin mingħajr waqfien. Iridu jkunu jafu jitkellmu, jaqraw, u jiktbu tajjeb bl-​Ingliż.

Kif Tapplika: Il-​koppji jistgħu jiġu mistidnin mill-​Kumitat tal-​Fergħa tagħhom biex japplikaw.

Lade u Monique mill-​Istati Uniti issa jaqdu fl-​Afrika. “L-​Iskola taʼ Gilegħad ħejjietna biex immorru fi kwalunkwe post fid-​dinja, inxammru l-​kmiem, u naħdmu mal-​għeżież ħutna,” jgħid Lade.

Monique iżżid tgħid: “Meta napplika dak li tgħallimt mill-​Kelma t’Alla, insib ferħ liema bħalu fl-​inkarigu tiegħi. Inqis dan il-​ferħ bħala iktar evidenza tal-​imħabba taʼ Ġeħova.”

L-​Iskola għall-​Membri tal-​Kumitati tal-​Fergħa u n-​Nisa Tagħhom

Skop: Tgħin lil dawk li jaqdu fil-​Kumitati tal-​Fergħa biex jieħdu ħsieb id-​djar taʼ Betel, biex jagħtu attenzjoni lil kwistjonijiet tas-​servizz li jeffettwaw lill-​kongregazzjonijiet, u biex jieħdu ħsieb is-​circuits u d-​distretti. Jitgħallmu wkoll dwar it-​traduzzjoni, l-​istampar, u d-​distribuzzjoni tal-​letteratura.

Kemm Iddum: Xahrejn.

Post: Watchtower Educational Center, Patterson, New York, l-​Istati Uniti tal-​Amerika.

Min Jikkwalifika: Il-​ħu għandu jkun membru taʼ Kumitat tal-​Fergħa jew Kumitat tal-​Pajjiż jew ikun se jiġi inkarigat bħala tali.

Kif Tapplika: Aħwa rġiel li jikkwalifikaw u n-​nisa tagħhom jiġu mistidnin mill-​Ġemgħa li Tiggverna.

Lowell u Cara, mill-​25 klassi, jaqdu fin-​Niġerja. “Jien ġejt imfakkar li jkolli kemm ikolli x’nagħmel jew ikun xi jkun ix-​xogħol li ningħata, is-​sigriet biex nogħġob lil Ġeħova huwa li nagħmel l-​affarijiet kif irid hu,” jgħid Lowell. “Il-​kors għallimna wkoll kemm hu importanti li nimitaw l-​imħabba li Ġeħova juri lejn il-​qaddejja tiegħu.”

Cara tgħid: “Kumment li mmeditajt fuqu hu dan: Jekk ma nkunx nistaʼ nispjega xi ħaġa b’tali mod li tiġi mifhuma mill-​ewwel, għandi nistudja s-​suġġett qabel ma nipprova ngħallmu ’l ħaddieħor.”