YEHOVAH na wi „Gran Leriman” (Yes. 30:20). Lobi e meki taki a e gi leri. Fu eksempre, fu di Yehovah abi bigi lobi gi Yesus, meki a sori en „ala sani di en srefi e du” (Yoh. 5:20). Te wi e du ala muiti fu gi Yehovah grani èn fu yepi trawan, dan a o gi wi a „tongo fu den wan di kisi leri” fu di a lobi den Kotoigi fu en.​—Yes. 50:4.

A fasi disi fa Yehovah e sori lobi, na wan eksempre gi a Leri Komte fu a Tiri Skin. Dati meki den seti tin skoro di e gi Bijbel leri na den wan di wani du moro na ini a diniwroko èn di man du dati. Yu e si den skoro disi leki wan fasi fa Yehovah e sori taki a lobi wi?

Meki wi luku syatu san na den skoro disi èn san son sma di go na den skoro taki. Dan aksi yusrefi: ’Fa mi kan kisi wini fu a leri di Yehovah e gi na den skoro disi?’

Yehovah na „a Gado fu lobi” (2 Kor. 13:11). Dati meki a e leri wi fa fu abi wan moro bun libi, a e leri wi san fu du te problema e kon, èn a e yepi wi fu abi furu prisiri na ini a preikiwroko di wi e du. Neleki den disipel fu Yesus na ini a fosi yarihondro, wi kisi ala sani fu man yepi trawan ’fu du ala san Yesus taigi wi fu du’.​—Mat. 28:20.

Kande wi no man go na ala den skoro disi, ma toku wi kan kisi wini fu wán noso moro fu den. Wi kan gebroiki den Bijbel leri fu den skoro disi na ini wi libi. Boiti dati, wi kan du wi preikiwroko moro bun te wi e wroko makandra nanga den futuboi fu Yehovah di kisi bun leri na den skoro disi.

Aksi yusrefi: ’Te mi e luku a fasi fa mi libi de now, mi abi na okasi fu go na wan fu den skoro disi?’

Anbegiman fu Yehovah e si en leki wan grani te den man teki leri na den prenspari skoro disi èn te den man kisi wini fu den. Meki a de so taki a leri di yu kisi, yepi yu fu kon moro krosibei na Gado. Meki a yepi yu tu fu du yu wroko na ini na organisâsi moro bun, spesrutu a preikiwroko fu a bun nyunsu di de so prenspari na ini a ten disi.