JEHOVA unguMfundzisi wetfu Lomkhulu. (Isa. 30:20) Lutsandvo lumenta afundzise aphindze aceceshe bantfu. Sibonelo saloku kutsi lutsandvo lwamenta wakhombisa Jesu “konkhe lakwentako yena.” (Joh. 5:20) Lutsandvo Jehova lanalo ngatsi njengaboFakazi bakhe lumenta asinike “lulwimi Iolufundzisiwe,” njengobe senta imetamo yekumdvumisa nekusita labanye.—Isa. 50:4.

Ikomidi Yekufundzisa yeSigungu Lesibusako ilingisa lutsandvo lwaJehova ngekusebentisa tikolwa temaKhristu letilishumi kute iceceshe labo labanesifiso kanye netimo letibavumela kutsi baye kuto. Letikolwa utitsatsa njengebufakazi bekutsi Jehova uyasitsandza yini?

Fundza ngaletikolwa tebuKhristu uphindze ujabulele nekuva loko lokushiwo ngulabanye labaye kuto. Ngemuva kwaloko, tibute: ‘Ngingazuza njani kulemfundvo levela kuNkulunkulu?’

‘NjengaNkulunkulu welutsandvo,’ Jehova usilungiselele kuceceshwa lokwenta kuphila kwetfu kube nenjongo, kusente sikwati kumelana nekulingwa futsi kusisite sijabule emsebentini wetfu wekushumayela. (2 Khor. 13:11) Njengebafundzi bangelikhulu lekucala, sikulungele kahle kusita labanye, ngekutsi ‘sibafundzise kugcina konkhe’ lesiyalwe ngako.—Mat. 28:20.

Nanobe singeke sikwati kuya kuto tonkhe letikolwa, singazuza kusinye nome kuletimbalwa tato. Singasebentisa neticondziso letisekelwe eBhayibhelini lesiniketwa tona. Singaphindze sitfutfukise indlela lesishumayela ngayo ngekutsi sisebente netinceku taJehova leticeceshwe kahle.

Tibute: ‘Timo tami tiyangivumela yini kutsi ngiye kulesinye saletikolwa?’

Tikhonti taJehova tikutsatsa njengalokujabulisako kusekela letikolwa nekufundza kuto. Shengatsi kuceceshwa lokutfolako kungakwenta usondzele kuNkulunkulu kuphindze kukwente ulungele imisebenti loniketwa yona, ikakhulukati umsebenti lophutfumako wekushumayela tindzaba letimnandzi.