Imakeranta i Nongo u Yehova U Ver La​—Ka Ikyav i Tesen Ér Se Doo Yehova Ishima

YEHOVA ka “Ortesen” wase “Uhemban.” (Yes. 30:20, NW) Er ior ve doo un ishima yô, ka a tese ve shi a tsaase ve. U tesen ikyav yô, dooshima yange mgbegha Yehova tese Yesu “akaa a A eren iyol Na la cii.” (Yoh. 5:20) Er se Mbashiada mba Yehova se doo un ishima, shi se lu nôngon kpoghuloo ser se na un icivir shi se wase mbagenev yô, a na se “nombor u ior mba henen kwagh.”—Yes. 50:4.

Kômatii u Tesen, u Mbahemenev mba Shin Itine ve ver la kpa ngu a imba dooshima u Yehova la. Nahan ngu eren tom a imakeranta pue, i nongo u Yehova u ver la, sha u tsaase mba i sar ve u zan mô ken imakeranta ne, shi mbamlu vev ve ne ve ian i zan la kpaa. U nengen imakeranta ne wer ka ikyav i tesen ér se doo Yehova ishima kpa?

Yô, ôr ase kwagh u imakeranta ne kua mkaanem ma mba ve ze i ve er la. Maa pine iyol you wer, ‘Me zua a iwasen ken ityesen i Yehova a lu tesen se la nena?’

 ZUA A IWASEN KEN ITYESEN I YEHOVA LA

Er Yehova a lu “Aôndo u dooshima” yô, ngu tesen se akaa a aa na uuma asev vea hemba doon yô, shi ngu wan se ago iyol sha er se tagher a mbamtaver kpa se hemba ve yô. Shi ngu wasen se u zuan a msaanyol ken tom wase u pasen kwagh la kpaa. (2 Kor. 13:11) Se kpa i tsaase se se kuma u wasen mbagenev, ‘tesen ve u kuran akaa’ a i we se kwagh sha mi la cii, er mbahenen mba Yesu mba tsuaa mbara nahan.—Mat. 28:20.

Shin er i lu u se fatyô u zan imakeranta ne cii ga nahan kpa, se fatyô u zan môm shin zan i imôngo je kpaa. Shi se fatyô u dondon kwaghwan u ken Bibilo u i we ken imakeranta ne la. Shi se hemba fan u eren tom u pasen kwagh la, sha u duen kwaghpasen vea mbacivir Yehova mba i tsaase ve la.

Pine iyol you wer, ‘Mlu wam nam ian i zan mô ken imakeranta nee?’

Mbacivir Yehova nenge ér ian i ve lu a mi i henen kwagh ken imakeranta ne shi suen imakeranta ne la, ka ian i civirigh kpen kpen. Yô, ityesen i u zua a mi la, i̱ wase u u̱ seer kporom hen Yehova, shi i wase u u̱ kuren ityom i a ne u la, hemban cii je yô, tom u pasen loho u dedoo la.

[Ngeren u kiriki/Foto u sha peeji 13-17]

FA IMAKERANTA I NONGO U YEHOVA U VER LA

Makeranta u Henen Tom u Hemen u Aôndo

Awashima u makeranta ne: Ka u tesen mbapasenkwagh sha u ve fa u pasen loho u dedoo shi tesen ior tsembelee.

Shighe u Henen u Been: Ngu a ikighir ga.

Ijiir i nyôron u: Ken Iyou i Tartor.

Mba ve kom u zan u yô: Hanma or u nan kohol a tiônnongo imôngo hanma shighe, shi nan lumun a atesen a Bibilo shi uma u nan a zough sha akaawan a Bibilo cii.

Gbenda u nyôron: Ka ortamen u a hemen Makeranta u Henen Tom u Hemen u Aôndo la ka a nger ior ati ken makeranta ne ye.

Anmgbian u kwase ugen u kpen alegh, u i yer un ér Sharon yô, kaa ér: “Makeranta u Henen Tom u Hemen u Aôndo la tesem u tôvon sha kwagh ken ityakerada yase shi pasen mbagenev kwagh shon wang. Shi m hen u veren ishima sha mbamgbe mba ken jijingi mba ior mbagenev, ka di mba av tseegh ga.”

Anmgbian ugen, u a lu ortamen u ningir sha ica i gbe, i yer un ér Arnie yô, kaa ér: “Shighe u m lu vesen a vese la, m eren mkeenem shi í taver mo u kenger mbagenev sha ishi shighe u m lu lamen a ve yô. Makeranta ne wasem u lun a vangertiôr shi nengen mer m gba kwagh. Ityesen i Yehova a nem ken makeranta ne la wasem m hen u ôôn doo doo shighe u m lu lamen yô, shi veren ishima sha kwagh zulee. M wuese Aôndo kpishi er a nem tahav mbu wuese un ken tiônnongo man ken tom u pasen kwagh la nahan.”

 Makeranta u Mba Eren Tom Shin Betel Mbahev

Awashima u makeranta ne: Ka u wasen mba ve ve u eren tom shin Betel hegh la u fan akaa a aa wase ve u kuren tom ve doo doo yô.

Shighe u Henen u Been: Miniti 45 hanma kasua zan zan ukasua 16.

Ijiir i nyôron u: Shin Betel.

Mba ve kom u zan u yô: Saa mba i lumun ve u eren tom shin Betel keke, shin i ne ve ian i eren tom shin Betel inyom i môm shin anyom imôngo la tseegh.

Gbenda u nyôron: Mba ve ve u eren tom shin Betel hegh cii, ka ve nyôr makeranta ne.

Anmgbian ugen u yange za makeranta ne ken inyom i 1980 yô, mba yilan un ér Demetrius; a kaa ér: “Makeranta ne yange u wasem m hemba fan igbenda i injaa i henen kwagh, shi ú wam ago iyol u eren tom shin Betel gbem. Mbatesen mbara man ityesen i ve tese se la, kua kwaghwan ve u injaa la wasem u fan mer m gba Yehova kwagh, shi a soo ér mo m kure tom wam shin Betel doo doo.”

Anmgbian u kwase ugen u i yer un ér Kaitlyn yô, kaa ér: “Yange i wasem u veren ishima sha kwagh u a hembe lun hange hange la, ka u lun or u eren kwagh er Yehova a soo la je la. Makeranta ne na yô, Yehova hemba doon mo ishima kua iyou na man nongo na.”

Makeranta u Tom u Tartor

Awashima u makeranta ne: Ka u tsaase mbakuran mba ningir sha man mbatamen mba ken tiônnongo, shi ashighe agen yô, udiakon kpaa, sha er vea nengen sha ityom i ken mcivir u Yehova yô. (Aer. 20:28) Ka i lam sha mbamlu kposo kposo man mbamgbe mba atôônanongo, kua akaa a ior ve gem eren la. Anyom ka a karen kpuaa yô, i er makeranta ne, shighe u Mbahemenev Mba Shin Itine ve tese ér i er u la.

Shighe u Henen u Been: Ken anyom a a sember karen ne, i gema eren makeranta ne ayange ahar shin ayange ahar man tiôn sha ci u mbakuran mba ningir sha, iyange i môm man tiôn di sha ci u mbatamen mba ken tiônnongo, man iyange i môm sha ci u udiakon.

Ijiir i nyôron u: Ka i hemba lun hen Iyou i Tartor shin Iyou i Mkohol.

Mba ve kom u zan u yô: Saa or a lu orkuran u ningir sha gayô ortamen u ken tiônnongo shin diakon ve nana za u ye.

Gbenda u nyôron: Ortamen u sôron atôônanongo ka a lôhô mbatamen man udiakon ér ve za u. Afishi a branci di ka a lôhô mbakuran mba ningir sha.

“Shin er ka i tese akaa kpishi ken makeranta ne sha anshighe kpuaa nahan kpa, ka u wase mbatamen u ‘taver iyol’ ken mcivir u Yehova. Mbatamen mba ve tse ken tom ve, kua mba ve sember hingir mbatamen kpaa, ka ve hen u eren tom ve tsembelee, shi lun a ‘mhen môm.”—Quinn (u a lu ken foto heen ne).

“Ityesen ne yange i wase se kpishi u seer fan akaa a sha kwagh u jighjigh wase u nan, shi i ta se icin shi i due a mbamhen mba vea wase se u nengen sha tiônnongo tsembelee yô. Iwasen i Yehova a ne se ne ka erdoo u kiriki ga.”—Michael.

 Makeranta u Henen Tom Pania

Awashima u makeranta ne: Ka u wasen upania sha u ve ‘kure tom ve doo doo.’—2 Tim. 4:5.

Shighe u Henen u Been: Kasua uhar.

Ijiir i nyôron u: Ka afishi a branci ka a tese ape a nyôr u ye; mba hembe nyôron u hen Iyou i Tartor i i lu ikyua yô.

Mba ve kom u zan u yô: Saa or a lu pania u keke a kuma inyom i môm shin a hemba nahan. *

Gbenda u nyôron: Ortamen u sôron atôônanongo ka a lôhô upania mba ve kom yô.

Anmgbian u kwase ugen u i yer un ér Lily yô, (ken iyan), a kaa ér: “Makeranta la yange u wasem u nôngon a mbamtaver ken uma wam man ken tom wam u pasen kwagh la. Hegen m hemba fan igbenda i henen Bibilo shi tesen ior shi pasen ve Bibilo kpaa. M hemba keghen iyol hegen u wasen mbagenev shi suen mbatamen shi eren akaa a aa va a mvese ken tiônnongo yô.”

Anmgbian u kwase ugen u yange za makeranta ne kwa har yô, mba yer un ér Brenda, a kaa ér: “Makeranta ne wasem u uven ityough ken mcivir, shi tsaase imo i ken ishima yam, shi veren ishima sha u wasen mbagenev. Mimi je, Yehova ka Aôndo u a ne kwagh wuee yô!”

[Ngeren u shin kpe]

Makeranta u Mbatamen Mba ken Tiônnongo

Awashima u makeranta ne: Ka u wasen mbatamen u eren ityom ve ken tiônnongo doo doo, shi hemban fan kwagh u Yehova a soo ér ve er la.

Shighe u Henen u Been: Ayange ataan.

Ijiir i nyôron u: Ka afishi a branci ka a tese ape a nyôr u ye; kpa ka hembe lun hen Iyou i Tartor, shin hen Iyou i Mkohol.

Mba ve kom u zan u yô: Ka mba i tsough ve ve lu mbatamen la tseegh.

Gbenda u nyôron: Afishi a branci ka a lôhô mbatamen mba vea za u yô.

Ôr mkaanem ma mbagenev mba yange ve nyôr klase u sha 92, ken tar u Amerika ve er ne:

“Makeranta ne ngum a iwasen kpishi, u wasem u gbidyen kwar sha mlu wam, nahan fan er me fatyô u nengen sha iyôngo i Yehova la.”

“M kegh iyol mer me hemba taver ior cii asema, sha u pasen ve atôakaa a vesen a ken avur a Ruamabera.”

“Sha ayange a uma wam cii, ityesen ne ia hungur mo ga.”

Makeranta u Mbakuran Mba Ningir Sha kua Kasev Vev

Awashima u makeranta ne: Ka u wasen mbatamen mba sôron atôônanongo man mbatamen mba nengen sha haregh sha er vea hemba fan u sôron atôônanongo, er ve “lu pasen kwaghaôndo shi ve lu tesen” atôônanongo kpaa la.—1 Tim. 5:17; 1 Pet. 5:3, 3.

Shighe u Henen u Been: Iwer ihiar.

Ijiir i nyôron u: Ka afishi a branci ka a tese ape a nyôr u ye.

Mba ve kom u nyôron yô: Ka mba ve lu mbatamen mba sôron atôônanongo man mbatamen mba nengen sha haregh tseegh.

Gbenda u nyôron: Afishi a branci ka a lôhô mbakuran mba ningir sha man kasev vev.

“Makeranta ne wase se, se hemba mban a iwuese sha hemen u Yesu a lu hemen nongo na la. Se nenge er i lu hange hange u se taver anmgbianev mba se sôron ve la asema shi se taver mzough u ken tiônnongo yô. Makeranta ne wase se u fan ser, er mbakuran mba ningir sha ve we anmgbianev kwagh shi ashighe agen ka ve kôôm ve nahan kpa, gba u awashima ve jighilii yô, a lu u wasen ve u fan ér ve doo Yehova ishima.”—Joel, Klase u hiihii, 1999.

 Makeranta u Henen Bibilo Ú Anmgbianev mba Nomso mba Lun Kwav

Awashima u makeranta ne: Ka u tsaase udiakon man mbatamen mba lun kwav sha er vea seer eren ityom ken nongo u Yehova yô. Mba vea bee makeranta ne kpishi, a tindi ve hen ma haregh u ken tar ve, sha er vea za na iwasen yô. Mbagenev yô, a tindi ve ken ityar igen, aluer ve soo yô. Mbagenev di a tindi ve vea za hila lu ikpur pania sha anshighe kpuaa ken agar a ken toho, vea hii tom wase ken agar shon shi vea gbanger a u kpaa.

Shighe u a za makeranta ne a kighir yô: Iwer ihiar.

Ijiir i nyôron u: Ka afishi a branci ka a tese ape a nyôr u ye, mba hembe nyôron u hen Iyou i Tartor shin Iyou i Mkohol.

Mba ve kom u nyôron yô: Anmgbianev mba nomso mba ve yen anyom 23 ga, shi ve hembe anyom 62 ga, ve lu gbong gbong, shi ve kegh iyol u za eren tom hen ape a tindi ve cii yô. (Marku 10:29, 30) A gba u vea er tom u pania u keke a yina anyom ahar ga, shi vea er tom u diakon shin u mbatamen anyom ahar, a u hôron shio.

Gbenda u nyôron: Ka i nyôr mkombo sha mkohol u ningir, sha u pasen mba i sar ve u zan makeranta shon la kwagh u vea er yô.

Anmgbian ugen u yange za klase u sha 23 u makeranta ne ken tar u Amerika yô, mba yer un ér Rick, a kaa ér: “Er m dondo hanma kwagh u i tesem ken makeranta ne yô, jijingi u Yehova wasem u geman uma wam sha gbenda u vesen. Yehova ka una na or tom yô, a sue nan ken tom la. M kav mer, aluer m hemba veren ishima sha awashima u Yehova, ka sha iyol yam ga yô, una nam agee a eren un tom.”

Anmgbian ugen u a eren tom ken tar u Jamani yô, mba yer un ér Andreas, a kaa ér: “Makeranta ne wasem u kaven mer gbenda u nongo u Yehova u eren tom la ngu er ka ivande nahan. Ityesen i í nem la wasem u wan iyol sha tom u u lu u me va er la. Shi akav a ken Bibilo kpishi tesem kwagh u mimi ne, ér: U eren Yehova tom, shi eren akaa sha ci u anmgbianev av la ve a msaanyol u mimi.”

Makeranta u Henen Bibilo Ú Mbakristu Mba Ve Vese Ayol a Ve Yô

Awashima u makeranta ne: Ka u tsaase noov man kasev tsembelee sha er Yehova man nongo na ua hemba eren tom a ve yô. Mba vea bee makeranta ne kpishi, a tindi ve hen ma haregh ken tar ve, ape i gbe u vea za na iwasen yô. Mbagenev yô, a tindi ve ken ityar igen, aluer ve soo yô. A tindi mbagenev vea za hila lu ikpur pania sha anshighe kpuaa ken agar a ken toho, vea hii tom wase ken agar shon shi vea gbanger a u kpaa.

Shighe u Henen u Been: Iwer ihiar.

Ijiir i nyôron u: Ka ken tar u Amerika i nyôron makeranta ne ye, kpa a kôron ken uwer u Setemba, 2012 yô, a gema nyôron u hen uharegh mba ubranci mbagenev sha tar. A hemban nyôron u hen Iyou i Tartor shin hen Iyou i Mkohol.

Mba ve kom u zan u yô: Ka noov man kasev mba ve yen anyom 25 ga, shi ve hembe anyom 50 ga, ve lu gbong gbong shi mbamlu vev ve ne ve ian i eren tom hanma ijiir i kwagh a gbe sha a ve cii, shi ve lu a imba ishima i Yesaia kpa lu a mi ve, kaa ér: “Mo ne, tindim” la. (Yes. 6:8) A gba u vea lu mba ve er tom pania i kom anyom ahar, a u hôron ga yô. Nom la nana lu ortamen shin diakon i kuma anyom ahar, a u hôron shio.

Gbenda u nyôron: Ka i nyôr mkombo sha mkohol u vesen, sha u pasen mba i sar ve u zan la kwagh u vea er yô. Aluer i nyôr mkombo ne ken tar wou ga, man u soo u ngeren pinen yô, u fatyô u ngeren afishi a branci a ken tar wou sha er a pase u kwagh u ú er yô.

Anmgbian ugen u i yer un ér Eric, u yange za makeranta ne, klase u hiihii, vea kwase na Corina, ken inyom i 2011 la yô, kaa ér: “Ukasua anigheni mba se za makeranta ne la gema uma wase shi ka ian i civirigh, sha ci u noov man kasev mba ve soo u seer eren tom ken mcivir u Yehova la. Kwagh ne na yô, se kange ishima ser se eren akaa ken uma wase akuma akuma, sha er se hemba eren kwagh a shighe wase sha kwaghfan yô.”—Ka Eric vea kwase na Corina je ve lu ken foto ne ye.

Makeranta u Henen Bibilo u Watchtower u Gileadi

Awashima u makeranta ne: Ka u tsaase mba ve ze u la sha u ve lu mbamishen sha ugar mba vesen, shin ve lu mbakuran mba ningir sha gayô ve eren tom shin Betel. Awashima u kwagh ne yô, ka u veren ishima sha tom u pasen kwagh la sha er ua za vough shi akaa a afishi a branci a we ishima u eren la kpa aa zaan vough vough yô.

Shighe u a za makeranta ne a kighir yô: Iwer itian.

Ijiir i nyôron u: Ijiir yase i ken gar u Patterson, kpentar u New York, ken tar u Amerika, i í yer ér Watchtower Educational Center la.

Mba ve kom u zan yô: Noov man kasev mba ve vanden eren ma tom u pasen kwagh hanma shighe yô, er mbamishen mba ve lu pasen kwagh, kpa ve lu a vande zan makeranta ne ga nahan, man ikpur pania, man mbakuran mba ningir sha kua mba eren tom shin Betel. Ka mba ve lu eren tom u pasen kwagh hanma shighe la i kom anyom atar, a mmem shio yô. Shi gba u vea fa u lamen zwa Buter tsembelee shi ôron shi ngeren u kpaa.

Gbenda u nyôron: Ka Kômatii u Nengen sha Branci una lôhô noov man kasev mba vea nger apelekeshen u zan la ye.

Nom ugen ken tar u Amerika, mba yer un ér Lade. Un vea kwase na, Monique, mba pasen kwagh ken Afrika. Lade kaa ér: “Makeranta u Gileadi yange u wa se ago iyol u yemen hanma ijiir sha tar cii, shi kohol iyol i eren tom vea anmgbianev asev mba doon se ishima imôngo.”

Monique di kaa ér: “M ngu eren akaa a m hen ken mkaanem ma Aôndo la, nahan saan mo iyol ken tom wam kpen kpen. Msaanyol u m zough a mi ne shi wasem u fan mer m doo Yehova ishima.”

Makeranta u Anmgbianev Mba ken Kômatii u Nengen sha Branci kua Kasev Vev

Awashima u makeranta ne: Ka u wasen anmgbianev mba ve lu ken Kômatii u Nengen sha Branci la u nengen sha afishi a branci kposo kposo, shi veren ishima sha mzehemen u tom u pasen kwagh u atôônanongo a eren la, shi nengen sha uningir man uharegh. Shi ka ve hen kwagh sha kwagh u tom u geman kwagh, man tom u gberen ityakerada shi tindin a mi ken won.

Shighe u a za makeranta ne a kighir yô: Iwer ihiar.

Ijiir i nyôron u: Ijiir yase i ken gar u Patterson, kpentar u New York, ken tar u Amerika, i í yer ér Watchtower Educational Center la.

Mba ve kom u zan u yô: Saa anmgbian u nan lu ken Kômatii u Nengen sha Branci shin Kômatii u Nengen sha Tom ken Ma Tar, gayô anmgbian u i gbe u nana lu môm ken kômatii ne yô.

Gbenda u nyôron: Ka Mbahemenev Mba Shin Itine ka ve lôhô anmgbianev mba vea za makeranta ne ye.

Anmgbian ugen, mba yer un ér Lowell, un vea vea kwase na Cara, ve za makeranta ne, klase u sha 25 la. Mba pasen kwagh ken tar u Najeria. Lowell kaa ér: “Makeranta ne yange u wasem u fan mer, aluer mea uve ityough ken tom u i nem la nan nan kpa, saa me eren kwagh er Yehova a tese la ve, a doo un a mo ye. Shi makeranta ne tese se ér gba u se eren kwagh a ior sha dooshima er Yehova a eren kwagh a mba ve civir un la sha dooshima nahan.”

Cara di kaa ér: “Kwagh môm u m henen sha mi hanma shighe yô, ka kwagh u yange i tese se ér, aluer m kanshio u pasen or kwagh sha gbenda u nana kav kwagh la fele yô, a gba u me tôv sha kwagh shon tsembelee cii ve me tese orgen ye.”