Zikolo Zyeendelezyegwa a Leza Zitondezya Luyando lwa Jehova

JEHOVA ‘Mwiiyi wesu Mupati.’ (Is. 30:20) Luyando ndolumukulwaizya kuyiisya bamwi. Mucikozyanyo, akaambo kaluyando, Jehova ulamutondezya Jesu “zyintu zyoonse nzyacita walo.” (Joh. 5:20) Akaambo kakuti Jehova ulatuyanda, watupa “lulimi lwabaiyide,” nitusolekesya kumulemeka alimwi akugwasya bamwi.—Is. 50:4.

Kwiiya cikozyanyo ca Jehova caluyando, Kkomiti Iilanganya Ziyiisyigwa iya Kabunga Keendelezya ibelesya zikolo zyeendelezyegwa a Leza izili kkumi kuyiisya baabo bayanda alimwi bajisi bukkale bubazumizya kulilembya. Sena zikolo eezyi muzibona kuti ncitondezyo caluyando lwa Jehova?

Mulakkomana kuzyiba zinji kujatikizya zikolo eezyi zyeendelezyegwa a Leza alimwi akumvwa bamwi mbobagwasyigwa. Mpoonya amulibuzye kuti, ‘Mbuti mbondikonzya kugwasyigwa alwiiyo oolu luzwa kuli Leza?’

 AMUGWASYIGWE ALWIIYO LUJANIKA MUCIKOLO CEENDELEZYEGWA A LEZA

Jehova, “Leza siluyando” ulatupa lwiiyo lutugwasya mubuumi bwesu, kutugwasya kumana buyumuyumu mbotujisi, alimwi akutugwasya kujana lukkomano mumulimo wesu. (2 Ko. 13:11) Mbubwenya mbuli basikwiiya bamumwaanda wamyaka wakusaanguna, andiswe tulijisi zyoonse ziyandika kugwasya bamwi, “kubayiisya kubamba zyintu zyoonse” nzyotwakalaililwa.—Mt. 28:20.

Nikuba kuti tatukonzyi kujanika kuzikolo zyoonse eezyi, tulakonzya kugwasyigwa acikolo comwe naa ziinda waawo. Kumane tulakonzya kwaabelesya malailile aamu Bbaibbele ngotwaiya. Alimwi tulakonzya kuyaambele mumulimo wakukambauka kwiinda mukubeleka antoomwe ababelesi ba Jehova ibakayiisyigwa kabotu.

Amulibuzye kuti, ‘Sena bukkale bwangu bulandizumizya kunjila cimwi akati kazikolo eezyi?’

Bakombi ba Jehova bacibona kuti ncoolwe cipati kugwasyilizya alimwi akuyiisyigwa kuzikolo eezyi. Lwiiyo ndomuyoojana alumugwasye kuswena kuli Leza alimwi akuzuzikizya mulimo ngwamupede, ikapati mulimo uuyandika kucitwa cakufwambaana wakukambauka makani mabotu.

[Kabbokesi/Zifwanikiso izili apeeji 13-17]

KULANGA-LANGA ZIKOLO ZYEENDELEZYEGWA A LEZA

Cikolo Camulimo Weendelezyegwa a Leza

Makanze: Kuyiisya basikumwaya kutegwa babe bakambausi alimwi abamayi bamakani mabotu bacibwene.

Bulamfwu Bwaciindi Cakwiiya: Cilazumanana. Busena: Ŋanda ya Bwami yakubusena ooko. Zyeelelo: Boonse bajanika lyoonse kumiswaangano yambungano, ibazizumina njiisyo zyamu Bbaibbele alimwi ibapona kweelana anjiisyo zya Bunakristo.

Mbomukonzya Kulilembya: Mulangizi wa Cikolo Camulimo Weendelezyegwa a Leza nguulemba basicikolo.

Sharon, uulebukide mubili akaambo kakuciswa bulwazi butegwa amyotrophic lateral sclerosis (ALS), waamba kuti: “Cikolo Camulimo Weendelezyegwa a Leza candiyiisya kuvwuntauzya alimwi akwaamba makani munzila iitobeleka. Alimwi ndaiya kubikkila maano nzyobayandika bamwi kumuuya—kutali zyangu zilikke.”

Arnie, mulangizi weendeenda iwabeleka kwaciindi cilamfwu waamba kuti: “Nindakali kukomena ndakajisi penzi lyakamaama alimwi ndakali kupenga kulanga bantu nindaambaula. Cikolo eeci candigwasya kulimvwa kuti ndilayandika. Kwiinda mukuyiisyigwa a Jehova, ndaiya nzila zikonzya kundigwasya kweendelezya mbondiyoya alimwi akubikkila maano. Ndilalumba kuti ndilakonzya kumutembaula Leza mumbungano alimwi amumulimo wangu wakukambauka.”

 Cikolo Cabaabo Ibatalika Mulimo waa Bbeteli

Makanze: Kugwasya bapya a Bbeteli kutegwa bazwidilile mumulimo wabo.

Bulamfwu Bwaciindi Cakwiiya: Maminiti aali 45 ansondo, kwansondo zili 16.

Busena: Bbeteli.

Zyeelelo: Beelede kuba banamukwasyi wa Bbeteli baciindi coonse naa aabo basikulisungula baciindi cisyoonto ibazumizyigwa kubelekela aa Bbeteli kwamwaka omwe naa kwiinda waawo.

Mbomukonzya Kulilembya: Banamukwasyi wa Bbeteli bapya balasalwa kakunyina kulembela.

Ba Demetrius, ibakanjila cikolo eeci muma 1980 baamba kuti: “Cikolo eeci cakandigwasya kuyaambele muciiyo cangu ndemwini alimwi cakandigwasya kulibambila mumulimo wangu waa Bbeteli. Bayi, iziyiisyigwa alimwi alulayo lugwasya zyakandigwasya kubona kuti Jehova ulandiyanda alimwi uyanda kundigwasya kuti ndizwidilile mumulimo wangu waa Bbeteli.”

Ba Kaitlyn baamba kuti: “Cikolo cakandigwasya kubikkila maano kuzyintu ziyandika kapati—kuba muntu uucita zyintu kweelana akuyanda kwa Jehova. Cikolo Cabaabo Ibatalika Mulimo waa Bbeteli cakandigwasya kumuzyiba kabotu alimwi akumuyanda kapati Jehova, ŋanda yakwe, alimwi ambunga yakwe.”

Cikolo Camulimo wa Bwami Makanze: Kuyiisya balangizi beendeenda, baalu, alimwi zimwi ziindi abakutausi kulanganya mulimo wabo wakweendelezya alimwi amikuli yambunga. (Mil. 20:28) Balayiisyigwa kujatikizya zyintu zicitika mazuba aano, zyintu zikonzya kutunyonganya kumuuya alimwi azyintu nzyoiyandika mbungano. Cikolo eeci cilacitwa kwainda buyo myaka misyoonto kweelana akusala kwa Kabunga Keendelezya.

Bulamfwu Bwaciindi Cakwiiya: Kwamyaka misyoonto yainda, cikolo eeci cali kucitwa kwamazuba obilo naa mazuba obilo acisela kubalangizi beendeenda, buzuba bomwe acisela kubaalu alimwi buzuba bomwe kubakutausi.

Busena: Kanji-kanji Ŋanda ya Bwami naa Ŋanda Yakucitila Miswaangano Mipati ilabelesyegwa.

Zyeelelo: Beelede kuba mulangizi weendeenda, mwaalu naa mukutausi.

Mbomukonzya kulilembya: Baalu alimwi abakutausi beelela balatambwa amulangizi wabbazu. Ofesi yamutabi ilatamba balangizi beendeenda.

“Cikolo eeci nikuba kuti nzinji ziyandika kuyiigwa muciindi cisyoonto buyo, cilabagwasya baalu kuzumanana kukkomana alimwi ‘akuzumanana kucita mbuli baalumi’ mumulimo wa Jehova. Baalu bakaindi alimwi abapya boonse balaiya mbobakonzya kucita bweembezi munzila iigwasya alimwi ‘[a]kukamantana ncobeni . . . amuzeezo omwe.’”

—Ba Quinn (ansi aawa).

“Lwiiyo oolu lulatugwasya kumvwisya makani aajatikizya lusyomo lwesu, kutucenjezya kuntenda ziliko, alimwi akutupa nzila zigwasya mbotukonzya kulanganya butanga. Eelo kaka Jehova ulatugwasya akaambo kaluzyalo lwakwe!”—Ba Michael.

 Cikolo Camulimo Wabupainiya

Makanze: Kugwasya bapainiya ‘kuzuzikizya mulimo wabo cakumaninina.’—2 Ti. 4:5.

Bulamfwu Bwaciindi Cakwiiya: Nsondo zyobilo.

Busena: Bulasalwa aofesi yamutabi; kanji-kanji Ŋanda ya Bwami njiibelesyegwa.

Zyeelelo: Aabo ibabeleka kabali bapainiya kwamwaka omwe naa kwiinda waawo. *

Mbomukonzya Kulilembya: Bapainiya beelela balasalwa kakunyina kulembela alimwi mulangizi wabbazu ulabazyibya kuti basalwa.

Ba Lily (kululyo) baamba kuti: “Cikolo candigwasya kumana buyumuyumu mumulimo wakukambauka alimwi amubuumi bwangu. Ndayaambele kapati muciiyo cangu, kuyiisya alimwi ambondilibelesya Bbaibbele. Lino ndilacikonzya kugwasya bamwi, kugwasyilizya baalu, alimwi akugwasya mbungano kutegwa iyaambele.”

Ba Brenda balo ibajanika mucikolo eeci ziindi zyobilo baamba kuti: “Cikolo cakandigwasya kutola lubazu cakumaninina mubukombi bwangu, kuyumya manjezeezya aangu, alimwi akubikkila maano kugwasya bamwi. Cakutadooneka Jehova mwaabi.”

[Bupanduluzi buyungizidwe]

Cikolo Cabaalu Bambungano

Makanze: Kugwasya baalu kuti bacikonzye kulanganya mikuli yabo mumbungano alimwi akumvwisya ncocaamba kukomba Jehova kulimbabo.

Bulamfwu Bwaciindi Cakwiiya: Mazuba osanwe.

Busena: Bulasalwa aofesi yamutabi; kanji-kanji Ŋanda ya Bwami naa Ŋanda Yakucitila Miswaangano Mipati njiibelesyegwa.

Zyeelelo: Beelede kuti kabali baalu.

Mbomukonzya Kulilembya: Baalu beelela balatambwa aofesi yamutabi.

Amumvwe nzyobakaamba bamwi ibakali mukkilasi yanamba 92 ku United States:

“Cikolo candigwasya kapati, kundigwasya kulilingula akubona mbondikonzya kulanganya mbelele zya Jehova.”

“Ndililibambilide kapati kubakulwaizya boonse kwiinda mukukankaizya twaambo tupati-pati twamu Magwalo.”

“Ndiyoozumanana kulubelesya lwiiyo oolu mubuumi bwangu boonse.”

Cikolo ca Balangizi Beendeenda Alimwi a Bamakaintu Babo

Makanze: Kugwasya balangizi bamabazu alimwi abalangizi bazyooko kuzwidilila mumulimo wabo wakuswaya mbungano alimwi akubagwasya “[ku]beleka canguzu mukukanana akuyiisya.”—1 Ti. 5:17; 1 Pe. 5:2, 3.

Bulamfwu Bwaciindi Cakwiiya: Myezi yobilo.

Busena: Bulasalwa aofesi yamutabi.

Zyeelelo: Beelede kuti kabali balangizi bamabazu naa bazyooko.

Mbomukonzya Kulilembya: Balangizi beendeenda antoomwe abamakaintu babo balatambwa aofesi yamutabi.

“Kulumba kwesu kujatikizya busilutwe bwa Jesu kumbunga kwakayumizyigwa. Twakabona mbociyandika kukulwaizya bakwesu alimwi akuyumya lukamantano lwambungano. Cikolo cakatugwasya kubona kuti nikuba kuti mulimo wamulangizi weendeenda ngwakupa lulayo alimwi ziindi zimwi kululamika, makanze aakwe ngakugwasya bakwesu kuzyiba kuti Jehova ulabayanda.”—Ba Joel, kkilasi yakusaanguna, 1999.

Cikolo Cakwiiya Bbaibbele ca Bakwesu Batakwete

Makanze: Kugwasya baalu alimwi abakutausi batakwete kutegwa batambule mikuli iiyungizyidwe mumbunga ya Jehova. Bunji bwabaabo bakamanizya cikolo eeci balatumwa kuyoobelekela kumasena aabulide basikumwaya ba Bwami mucisi cabo. Bamwi balakonzya kutumwa kuyoobelekela mucisi cimbi ikuti kabalibambilide kucita oobo. Bamwi ibamanizya cikolo eeci balakonzya kubeleka kabali bapainiya baalubazu baciindi cisyoonto kutegwa bakatalisye alimwi akutola ambele mulimo kumasena aakulamfwu.

Bulamfwu Bwaciindi Cakwiiya: Myezi yobilo.

Busena: Bulasalwa aofesi yamutabi; kanji-kanji Ŋanda ya Bwami naa Ŋanda Yakucitila Miswaangano Mipati ilabelesyegwa.

Zyeelelo: Bakwesu batakwete bajisi myaka yakuzyalwa iili akati ka 23 a 62 bataciswi-ciswi ibayanda kutola ambele zyintu zya Bwami kufwumbwa nkobakonzya kuyandika. (Mk. 10:29, 30) Beelede kuti kabali bapainiya baciindi coonse kwamyaka yobilo alimwi kabali baalu naa bakutausi kwamyaka yobilo iitobelene.

Mbomukonzya Kulilembya: Kuli muswaangano uucitwa ciindi camuswaangano wabbazu kutegwa aabo ibayanda kulilembya baambilwe makani manji.

Ba Rick ibakali mukkilasi yanamba 23 ku United State bakaamba kuti: “Kubikkila kapati maano kulwiiyo oolu kwakapa kuti muuya wa Jehova ucince bube bwangu bwamukati. Ikuti Jehova wakupa mulimo umwi, ulakugwasyilizya mumulimo ooyo ngwaakupa. Ndakaiya kuti ikuti ndabikkila maano kukucita kuyanda kwa Leza kutali kukucita kuyanda kwangu, uyoondiyumya.”

Ba Andreas, ibabelekela ku Germany bakaamba kuti: “Ndakaiya kumvwisya kuti mboibeleka mbunga ya Leza mazuba aano cili mbuli maleele. Lwiiyo ndondakapegwa lwakandigwasya kulibambila mulimo iwakali kuboola kumbele. Alimwi zikozyanyo zinji zyamu Bbaibbele zyakandigwasya kwiiya kasimpe aaka kayandika kapati kakuti: Kubelekela bakwesu a Jehova ciletela lukkomano lwini-lwini.”

Cikolo Cakwiiya Bbaibbele ca Banabukwetene Banakristo

Makanze: Kupa banabukwetene lwiiyo lwaalubazu kutegwa kababelesyegwa kapati mumbunga ya Jehova. Bunji bwabaabo banoomanizya cikolo eeci banootumwa kuyoobelekela kumasena aabulide basikumwaya ba Bwami mucisi cabo. Bamwi balakonzya kutumwa kuyoobelekela mucisi cimbi kuti kabalyaabide kucita boobo. Bamwi balakonzya kutumwa kuyoobelekela kumasena aakulamfwu kabali bapainiya baalubazu baciindi cisyoonto kutegwa bakatalisye alimwi akutola ambele mulimo wabwami.

Bulamfwu Bwaciindi Cakwiiya: Myezi yobilo.

Busena: Eeci cikolo cilacitwa ku United States, alimwi kutalikila mu September 2012 cinoocitwa amuzilawo zyamutabi zisalidwe nyika yoonse, kanji-kanji Ŋanda ya Bwami naa Ŋanda Yakucitila Miswaangano Mipati njiinoobelesyegwa.

Zyeelelo: Banabukwetene balaamyaka yakuzyalwa iili akati ka 25 a 50 alimwi bataciswi-ciswi ibacikonzya kubelekela kubusena kubulide alimwi bajisi muuya wa: “Mpendi! Unditume mebo!” (Is. 6:8) Kuyungizya waawo, beelede kuti kabakwetene kwamyaka yobilo alimwi kabali mumulimo waciindi coonse kwamyaka yobilo iitobelene. Mwaalumi weelede kuti kali mwaalu naa mukutausi iwabeleka kwamyaka yobilo iitobelene.

Mbomukonzya Kulilembya: Muswaangano ulacitwa ciindi camuswaangano wacooko kutegwa baambilwe makani aayandika aabo ibayanda kulilembya. Ikuti muswaangano ooyu tiiwacitwa ciindi camuswaangano wacooko mucisi canu, alimwi muliyandide kulilembya, mulakonzya kulembela kuofesi yamutabi kutegwa bamwaambile makani aayandika.

“Nsondo zili lusele nzyotwakali kucikolo, cakali ciindi cikkomanisya, icigwasya kucinca buumi alimwi cipa coolwe kubanabukwetene ibayanda kubelesyegwa mumbunga. Tulikanzide kuzumanana kuzilanga kabotu zyintu kutegwa tucikonzye kubelesya kabotu ciindi cesu.”—Ba Eric aba Corina (ansi aawa), bakali mukkilasi yakusaanguna mu, 2011.

Cikolo ca Gileadi

Makanze: Kuyiisya basicikolo kutegwa bakabeleke kabali bamisyinali ibabelekela mumuunda mumasena imujanika bantu banji, kuba balangizi beendeenda, naa kuyoobelekela ku Bbeteli. Makanze ngakuyumya akukkazikizya mulimo wamumuunda alimwi amulimo uucitwa mumitabi.

Bulamfwu Bwaciindi Cakwiiya: Myezi yosanwe.

Busena: Watchtower Educational Center ku Patterson mudolopo lya New York mucisi ca U.S.A.

Zyeelelo: Banabukwetene ibali mumulimo waciindi coonse—mbuli, bamisyinali ibali mumuunda ibatananjila cikolo eeci, bapainiya baalubazu, balangizi beendeenda, naa aabo ibabelekela ku Bbeteli. Beelede kuti kabali mumulimo ooyu antoomwe kwamyaka yotatwe iiccililene. Beelede kuti kabacizyi kwaambaula, kubala alimwi akulemba Cingisi.

Mbomukonzya Kulilembya: Banabukwetene balakonzya kutambwa a Kkomiti ya Mutabi kutegwa balembele kunjila cikolo eeci.

Ba Lade aba Monique ibakazwa ku United States lino babelekela mu Africa. Ba Lade bakaamba kuti: “Cikolo ca Gileadi cakatugwasya kulibambila kuunka kucisi cili coonse, kulibambila kuyoobeleka abakwesu bayandwa.”

Ba Monique bakayungizya akwaamba kuti: “Kubelesya nzindakaiya mu Jwi lya Leza kundiletela lukkomano lunji mumulimo ngondipedwe. Lukkomano luli boobu ndilubona kuti ncitondezyo caluyando lwa Jehova.”

Cikolo ca Bamukkomiti ya Mutabi Alimwi a Bamakaintu Babo

Makanze: Kugwasya baabo bali Mumakkomiti aa Mitabi kutegwa bacikonzye kwiicita kabotu milimo yabo yakulanganya Bbeteli, kulanganya makani aajatikizya mbungano, kulanganya mabazu alimwi azyooko. Alimwi balaiya mbobakonzya kulanganya mulimo wakusandulula, kusimba, alimwi awakutola mabbuku kumbungano.

Bulamfwu Bwaciindi Cakwiiya: Myezi yobilo.

Busena: Watchtower Educational Center ku Patterson mudolopo lya New York mucisi ca U.S.A.

Zyeelelo: Beelede kuti kabali mu Kkomiti ya Mutabi naa Kkomiti Yamucisi naa aabo bayoopegwa mulimo ooyu baakumanizya cikolo.

Mbomukonzya Kulilembya: Bakwesu abamakaintu babo beelela balatambwa a Kabunga Keendelezya.

Ba Lowell aba Cara ibakali mukkilasi yanamba 25, babelekela ku Nigeria. Ba Lowell bakaamba kuti: “Ndakayeezyegwa kuti kufwumbwa naa ndajata bubi buti mumulimo, kufwumbwa mulimo ngondipedwe, cintu ciyandika kapati, nkucita zyintu munzila njayanda Jehova kutegwa tumukkomanisye. Lwiiyo oolu alimwi lwakandigwasya kubona kuti mbondibalanganya bamwi kweelede kutondezya luyando lwa Jehova ndwajisi kubabelesi bakwe.”

Ba Cara bakayungizya akwaamba kuti: “Kaambo kamwi ikandipa kukkala aansi akuzinzibala kuyeeya nkaaka, ikuti kanditacikonzyi kupandulula kaambo kamwi munzila ngubauba, ndeelede kukakkalila aansi kaambo aako akukaiya kanditanayiisya bamwi.”