Escuelas niku masiyakan xlakata Dios litasiya xtapaxkit Jehová

JEHOVÁ «Xatlan [ki]Makgalhtawakgana» (Is. 30:20). Xlakata lu xapaxkina kamasiyani xlakskujnin. Akgtum liʼakxilhtit, xlakata Dios paxkinan «masiyuniy [Jesús] xlipaks ntu xla ntlaway» (Juan 5:20). Chu xlakata paxkinan kinkamaxkiyan, «xtachuwin tiku lakgskgalalan», tiku liskujaw xlakata namalankiyaw chu nakamakgtayayaw amakgapitsi latamanin (Is. 50:4).

Comité de Enseñanza xla Lakgkgolotsin tiku pulalinkgo xTatayananin Jehová na tlawakgo la Dios tiku xapaxkina, maklakaskinkgo pulakkaw pukgalhtawakga xlakata nakamasiyanikgo tiku lakaskinkgo chu makgatsikgo tuku taskin. ¿Akxilha uma pukgalhtawakga la tuku Jehová limasiya pi kinkapaxkiyan?

Kalikgalhtawakga tuku tsinu lichuwinankan xlakata akgatunu escuelas niku masiyakan xlakata Dios nema tlawakan la uku chu tuku wankgo makgapitsi tiku ankgonit. Alistalh tlan natlawaya uma takgalhskinin: «¿Tuku tlan nakkatsini kʼuma escuelas niku masiyakan xlakata Dios?».

 LA KINKAMAKGTAYAYAN TUKU KINKAMASIYANIYAN DIOS

Tuku kinkamasiyaniyan «Dios xapaxkina» tlawa pi nalipaxuwayaw kilatamatkan, kinkamasiyaniyan la natayaniyaw taʼakglhuwit chu kinkamakgtayayan nalipaxuwayaw akxni lichuwinanaw Dios (2 Cor. 13:11, NM). Chuna la xapulana kstalaninanin Cristo, kinkamasiyanikanan la tlan nakamakgtayayaw amakgapitsin, “nakamasiyaniyaw mpi natlawakgoy xlipaks ntu” kinkawanikanitan Jesús (Mat. 28:20).

Maski nila naʼanaw putum umakgolh escuelas, tlan nalitamakgtayayaw maski kaj akgtum. Na tlan nalimaklakaskinaw tuku kinkamasiyanikanan xlakata Biblia. Komo kataʼanaw lichuwinanaw Dios amakgapitsin natalan tiku ankgonit kʼakgtum escuela, tlakg tlan nalichuwinanaw Dios.

Wa xlakata katlawa uma takgalhskinin: «¿Kmakgatsi tuku taskin xlakata tlan nakan kʼakgtum escuela?».

Xlakskujni Jehová lanka talakgalhaman akxilhaw naʼanaw kʼumakgolh escuelas chu lhuwa tuku nakatsiniyaw. Klakaskinaw pi putum tuku nakatsiniya natlawa pi tlakg natalakatsuwiniya Dios chu liwana natlawaya tuku lakgaya kcongregación chu tuku tlakg xlakaskinka nalichuwinana xalakwan xalaksasti tamakatsin.

[Recuadro chu dibujos xla páginas 13 asta 17]

TSINU NAKATSIYAW XLAKATA ESCUELAS NIKU MASIYAKAN XLAKATA DIOS

Niku Masiyakan xlakata la Lichuwinankan Dios

Tuku xlakata tatlawalh: Xlakata tiku lichuwinankgo Dios liwana nakatsinikgo masiyanikgo amakgapitsin.

La xlilhuwa makgapala: Nikxni sputa.

Niku tlawakan: Pukgalhtawakga xla xTatayananin Jehová.

Tiku ankgo: Putum tiku ankgo ktamakxtumit kcongregación, kanajlakgo tuku masiya Biblia chu lilatamakgo tuku katsinikgonit.

La tlan natanuya: Katachuwinanti tiku pulalin Niku Masiyakan xlakata la Lichuwinankan Dios.

Sharon tiku nila tatsuwi xlakata kgalhi esclerosis lateral amiotrófica, wan: «Niku Masiyakan xlakata la Lichuwinankan Dios kimasiyaninit la naklakputsanan, la liwana wi tuku naklichuwinan, naklakpuwan la nakkamakgtaya amakgapitsin nakatsikgo xlakata Dios chu ni kaj naklakpuwan tuku akit kmaklakaskin».

Arnie, tiku akglhuwata kata superintendente viajante litaxtu wan: «Akxni aktsinajku xakwanit nila liwana xakchuwinan chu na nila xakkalakaʼakxilha latamanin. Kpaxtikatsini Jehová xlakata uma escuela kimakgtayanit ni nakpekuan, naklakpuwan wi tuku tlan ktlawa, na kkatsininit la liwana nakjaxanan chu la kuenta naktlawa tuku wankan. Lu kpaxtikatsini pi kimasiyanika la nakmalanki Dios kcongregación chu akxni klichuwinan xtukuwani».

 Escuela nema kgalhikgo Xalaksasti Betelitas

Tuku xlakata tatlawalh: Xlakata nakamakgtaya xalaksasti betelitas tlan natlawakgo xtaskujutkan.

La xlilhuwa makgapala: Tipuxumakitsis minutos akgatunu semana asta namakgatsikan akgkuchaxan semana.

Niku tlawakan: Anta kBetel.

Tiku ankgo: Talakaskin betelita nawana o akglhuwa papaʼ anta naskuja akgtum kata o liwaka.

La tlan natanuya: Betel kamakatsini tiku naʼan kʼuma escuela.

Demetrius, tiku kilalh kʼuma escuela kata 1980, wan: «Uma takgalhtawakga kimakgtayalh xlakata tlakg liwana xakkgalhtawakgalh chu kimakgtayalh xlakata tlakg lhuwa kata nakskuja kBetel. Makgalhtawakgananin, tuku likgalhtawakgaw chu tastakyaw nema kimaxkika kimakgtayakgolh nakkanajla pi Jehová kinkapaxkiyan chu lakaskin tlan nakitaxtuyaw kBetel».

Kaitlyn kinkawaniyan: «Kimakgtayalh xlakata nakaʼakxilha tuku tlakg xlakaskinka: nakmatliwakglha kintakanajla. Escuela nema kgalhikgo Xalaksasti Betelitas kimakgtayalh tlakg xlakaskinka chu tlakg tlan naklakgapasa Jehová, xchik chu xkachikin».

Escuela niku ankgo putum Lakgkgolotsin chu Siervos Ministeriales

Tuku xlakata tatlawalh: Xlakata nakamasiyanikan lakgkgolotsin chu siervos ministeriales tlakg tlan natlawakgo xtaskujutkan, la pulalinkan xkachikin Jehová chu la nakuentajtlawakgo congregación (Hech. 20:28). Akxilhkan tukuya taʼakglhuwit anankgo kcongregaciones, tuku tlawamakgolh chu tuku maklakaskinkgo. Uma escuela tlawakan chuna la lakkaxwilikgo Lakgkgolotsin tiku Pulalinkgo xTatayananin Jehová.

La xlilhuwa makgapala: Nina lhuwa kata titaxtukgonit, akgtum kilhtamaku aitat ankgo lakgkgolotsin, chu siervos ministeriales kaj akgtum kilhtamaku.

Niku tlawakan: Atsinu ni putum kilhtamaku tlawakan kPukgalhtawakga xla xTatayananin Jehová o Salón de Asambleas.

Tiku ankgo: Superintendentes viajantes, lakgkgolotsin chu siervos ministeriales.

La tlan natanuya: Superintendente de circuito kawani tiku naʼankgo. Superintendentes de circuito wa sucursal kawani akxni naʼankgo.

«Maski lhuwa tuku masiyakan kʼaktsu kilhtamaku, kamakgtayakan lakgkgolotsin xatapaxuwan natawilakgo chu kamakgtayakgo nalikatsikgo la lakchixkuwin tiku skujnimakgo Jehová chuna la wan Biblia. Tiku aku kalaksakkanit xlakata lakgkgolotsin nawankgo chu tiku lhuwa kilhtamaku chuna skujmakgo katsinikgo nakuentatlawakgo xkachikin Jehová chu akxtum tawilakgo “kʼakgtum tapuwan kgalhikgo”.» (Quinn, tutsu.)

«Uma escuela kinkamakgtayayan lu xlakaskinka naʼakxilhaw tuku xla Dios, skgalalh natawilayaw xlakata tuku nitlan lama chu kinkawanikanan la tlan nakuentajtlawayaw congregación. Jehová lu tlan likatsi.» (Michael.)

 Escuela xla Precursores

Tuku xlakata tatlawalh: Kamasiyanikan precursores la tlakg tlan natlawakgo xtaskujutkan (2 Tim. 4:5).

La xlilhuwa makgapala: Akgtiy semana.

Niku tlawakan: Betel laksaka niku natatlawa, chu atsinu ni putum kilhtamaku tlawakan kPukgalhtawakga xla xTatayananin Jehová.

Tiku ankgo: Tiku akgtum kata o liwaka precursor regular litaxtu. *

La tlan natanuya: Tiku makgatsikgo akgtum kata, superintendente de circuito nakamakatsini xlakata naʼankgo uma kʼescuela.

Lily wan: «Uma escuela kimasiyaninit la naklakkaxtlawa taʼakglhuwit nema kkgalhi akxni lichuwinan Dios chu kkilatamat. Tlakg tlan la kkgalhtawakga, la kmasiyaninan chu la klimaklakaskin Biblia. Kmakgkatsi pi tlakg kkatsini la nakkamakgtaya latamanin, nakkataskuja lakgkgolotsin chu nakmakgtayanan xlakata tlakg nastaka congregación».

Brenda tiku makgtiya kilanit wan: «Lu kimakgtayanit kuenta naktlawa tuku xla Dios, nakmatliwakglha kintalakapastakni chu nakkamakgtaya kintalatamanin. ¡Jehová lu lhuwa tuku masta!».

[Nota nema wi kpágina]

Escuela xla Lakgkgolotsin xalak Congregación

Tuku xlakata tatlawalh: Xlakata nakamakgtayakan lakgkgolotsin namakgantaxtikgo xtaskujutkan kcongregación chu namatliwakglhkgo xtakanajlakan.

La xlilhuwa makgapala: Akgkitsis kilhtamaku.

Niku tlawakan: Betel laksakka niku natatlawa chu atsinu ni putum kilhtamaku tatlawa kPukgalhtawakga xla xTatayananin Jehová o Salón de Asambleas.

Tiku ankgo: Lakgkgolotsin.

La tlan natanuya: Betel kawani tiku naʼankgo.

Kaʼakxilhwi tuku wankgolh makgapitsi tiku ankgolh kclase 92 kʼEstados Unidos:

«Escuela lu kimakgtayanit, nakaʼakxilha la klima kilatamat chu la nakkuentajtlawa xlakskujni Jehová.»

«La uku tlan nakkamakgtaya amakgapitsin akxni naklichuwinan tuku xlakaskinka xlakata Biblia.»

«Tuku kkatsininit nakimakgtaya putum kilatamat.»

Escuela xla Superintendentes Viajantes chu xLakpuskatinkan

Tuku xlakata tatlawalh: Xlakata nakamakgtayakan superintendentes de circuito chu distrito nakatsikgo la tlakg tlan namakgtayakgo congregaciones “tlakg xaliwaka naʼakgchuwinankgoy, chu namakgalhtawakganankgoy” (1 Tim. 5:17; 1 Ped. 5:2, 3).

La xlilhuwa makgapala: Akgtiy papaʼ.

Niku tlawakan: Betel laksaka niku natatlawa

Tiku ankgo: Superintendentes de circuito o distrito.

La tlan natanuya: Betel kawani superintendentes viajantes chu xlakpuskatin.

«La uku tlakg xlakaskinka akxilha pi Jesús xakgxakga xkachikin Dios. Akxilhaw tuku xlakata xlakaskinka nakamatliwakglhaw kinatalankan chu tlan nalatalalinkgo kcongregación. Tuku lu lakgatiw wa pi maski superintendente viajante masta tastakyaw, tuku tlakg xlakaskinka xlitlawat wa nakamasiyani natalan pi Jehová kapaxki.» (Joel, xapulana clase, 1999.)

Escuela niku kamasiyanikan xalak Biblia Lakchixkuwin tiku Ni tamakgaxtokgkgonit

Tuku xlakata tatlawalh: Kamasiyanikan lakgkgolotsin chu siervos ministeriales tiku ni tamakgaxtokgkgonit xlakata tlakg nakamaxkikan taskujut kxkachikin Jehová. Lhuwa tiku ankgo kʼuma escuela kamalakgachakan antiya kxpaískan pero niku tlakg talakaskin tiku nalichuwinan Dios. Makgapitsi kamalakgachakan alakatanu país komo xlakan matlanikgo. Makgapitsi kaj ni lhuwa kilhtamaku kamalakgachakan la precursores especiales xlakata natsukukgo lichuwinankgo Dios niku lu lakgamakgat.

La xlilhuwa makgapala: Akgtiy papaʼ.

Niku tlawakan: Betel laksaka niku natatlawa chu atsinu niputum kilhtamaku tlawakan kPukgalhtawakga xla xTatayananin Jehová o Salón de Asambleas.

Tiku ankgo: Tiku ni tamakgaxtokgkgonit, chu kgalhikgo 23 asta 62 kata, ni lu natatatlakgo chu namakgtayanamputunkgo niku ni anan lhuwa tiku lichuwinankgo Dios (Mar. 10:29, 30). Talakaskin pi akgtiy kata liskujma nawan la precursor regular chu akgtiy kata la liskujma kgolotsin xalak congregación o siervo ministerial.

La tlan natanuya: Akxni tawila lanka tamakxtumit xaʼakgtiy kilhtamaku tlawakan tamakxtumit xlakata nakawanikan tuku kaskinikan tiku amputun uma kʼescuela.

Rick tiku alh kclase 23 kʼEstados Unidos wa: «Akxni putum kilhtamaku klimaklakaskilh xlakata nakkgalhtawakga, xʼespíritu Jehová lakgpalilh kilatamat. Akxni Jehová maxkiyan akgtum taskujut makgtayayan namakgantaxtiya. Komo kaj nalilakapastaka natlawaya xtalakaskin Dios chu ni tuku wix lakaskina, xla namaxkiyan litliwakga».

Andreas, tiku skujni Dios kʼAlemania wan: «Kkatsilh pi xkachikin Dios akgtum milagro. Tuku kkatsinilh kimakgtayalh xlakata tlan xaktlawalh katuwa taskujut nema xtalakaskilh. Nachuna, lhuwa liʼakxilhtit xalak Biblia kimasiyanilh tuku lu xlakaskinka: kgalhiyaw xaxlikana tapaxuwan akxni kaskujnaniyaw kinatalankan chu Jehová».

Escuela niku kamasiyanikan xalak Biblia tiku Tamakgaxtokgkgonit

Tuku xlakata tatlawalh: Xlakata nakamasiyanikan tiku tamakgaxtokgkgonit tlakg liwana naskujnanikgo Jehová chu xkachikin. Atsinu ni putum tiku ankgo kʼuma escuela kamalakgachakan niku ni anan lhuwa tiku lichuwinankgo Dios anta kxpaískan chu amakgapitsi kamalakgachakan kʼatanu país komo wankgo pi tlan naʼankgo. Makgapitsi kaj ni lhuwa kilhtamaku kamalakgachakan la precursores especiales xlakata natsukukgo lichuwinankgo Dios niku lu lakgamakgat.

La xlilhuwa makgapala: Akgtiy papaʼ.

Niku tlawakan: Anta kʼEstados Unidos chu kseptiembre kata 2012, na natlawakan kʼatanu países chu natlawakan kPukgalhtawakga xla xTatayananin Jehová o kSalón de Asambleas.

Tiku ankgo: Tiku tamakgaxtokgkgonit chu kgalhikgo 25 asta 50 kata, ni lu xatatatlanin nawankgo, tlan naʼankgo skujnikgo Dios niku tlakg talakaskin tamakgtay chu xlilakapastakatkan la Isaías tiku wa: «¡Unu kwi! Akit kimalakgacha» (Is. 6:8). Talakaskin akgtiy kata tamakgaxtokgkgonit nawan chu akgtiy kata liskujmakgolh nawan la precursores regulares. Xachixku talakaskin pi akgtiy kata nalitaxtu la kgolotsin xalak congregación o Siervo Ministerial.

La tlan natanuya: Ktamakxtumit xaʼakgtutu kilhtamaku tlawakan akgtum tamakxtumit xlakata nakawanikan tuku talakaskin tiku amputunkgo. Komo kmimpaís ni tatlawa uma tamakxtumit chu wixin pimputunatit kʼuma escuela, tlan natsokgnanatit kBetel.

«¡Uma akgtsayan semanas kalakgpalinikgo xlatamatkan tiku tlakg skujniputunkgo Jehová! Liwana klakapastaknitaw nalakkaxwiliyaw la nalinaw kilatamatkan chu liwana nalimaklakaskinaw kinkilhtamakujkan.» (Eric chu Corina, tutsu; xapulana clase, 2011.)

Escuela Bíblica de Galaad xla Watchtower

Tuku xlakata tatlawalh: Nakamasiyanikan natalan la tlan naskujkgo la misioneros kkachikinin niku lhuwa lamakgolh latamanin, naliskujkgo la superintendentes viajantes o betelitas. Chuna tlawakan xlakata namatliwakglhkgo chu namakgtayanankgo tlan natalichuwinan Dios chu sucursales.

La xlilhuwa makgapala: Akgkitsis papaʼ.

Niku tlawakan: Centro Educativo xla Watchtower, (Patterson, Nueva York).

Tiku ankgo: Tiku tamakgaxtokgonita nema xliputum kilhtamaku skujmakgolh la misioneros tiku nina ankgonit kʼuma escuela, precursores especiales, superintendentes viajantes o betelitas. Talakaskin pi xchatiykan akgtutu kata xliskujatkan nawan xliputum kilhtamaku chu xlikatsinitkan inglés, tlan nakgalhtawakgakgo chu natsokgkgo.

La tlan natanuya: Comité xla sucursal laksaka tiku tlan ankgo.

Lade chu Monique, xalak Estados Unidos, tiku la uku skujnanimakgolh Dios kʼÁfrica. Lade wan: «Escuela de Galaad kinkamasiyanin xlakata xanikuta xlikalanka katiyatni tlan xakaw, xtakaxwi chu akxtum xakkataskujwi kinatalankan tiku kapaxkiyaw».

Monique na wan: «Akxni kmakgantaxti tuku kkatsini kxTachuwin Dios kimakgtaya nakpaxuwa niku nakimalakgachakan. Kintapaxuwan klimasiya pi kpaxki Jehová».

Escuela niku ankgo Tiku Pulalinkgo Betel chu xLakpuskatinkan

Tuku xlakata tatlawalh: Xlakata kamakgtayaputunkan Tiku Pulalinkgo Betel xlakata tlakg tlan napulalinkgo taskujut nema lakgayakgo anta chu na tlan napulalinkgo taskujut xla congregaciones, circuitos, distritos, departamento xla traducción, impresión chu niku kamalakgachakan likgalhtawakga.

La xlilhuwa makgapala: Akgtiy papaʼ.

Niku tlawakan: Centro Educativo xla Watchtower (Patterson, Nueva York).

Tiku ankgo: Talakaskin pi xachixku napulalin taskujut kBetel o Comité xla País o wanika pi anta naskuja.

La tlan natanuya: Lakgkgolotsin tiku Pulalinkgo xTatayananin Jehová kawanikgo natalan tiku naʼankgo chu xlakpuskatinkan.

Lowell chu Cara, tiku ankgolh kclase 25, skujkgo kNigeria. Lowell wan: «Escuela kimalakapastakalh pi maski lhuwa taskujut nakkgalhi, xlakata tlan namakgapaxuwayaw Jehová talakaskin tliwakga nakgalhiyaw kintakanajlakan. Na kimalakapastaka pi talakaskin na napaxkinanaw chuna la Jehová kapaxki xlakskujnin».

Cara na kinkawaniyan: «Lhuwa klakapastaknit tuku kinkawanikan: komo nila wi tuku nalichuwinanaw, talakaskin pulana nalikgalhtawakgaya chu alistalh nakamasiyaniya amakgapitsin».