Swikolo Swa Vutirheli—Vumbhoni Bya Rirhandzu Ra Yehovha

TLANGA

YEHOVHA i “Muleteri Lonkulu” wa hina. (Esa. 30:20) Rirhandzu ri n’wi susumetela ku dyondzisa ni ku letela van’wana. Hi xikombiso, hi ku susumetiwa hi rirhandzu ra yena lerikulu, Yehovha u kombisa Yesu “swilo hinkwaswo leswi a swi endlaka.” (Yoh. 5:20) Leswi Yehovha a hi rhandzaka hina Timbhoni ta yena, u hi nyika “ririmi ra lava dyondzisiweke,” loko hi ri karhi hi tikarhatela ku n’wi dzunisa ni ku pfuna van’wana.—Esa. 50:4.

Hi ku tekelela rirhandzu ra Yehovha, Komiti yo Dyondzisa ya Huvo leyi Fumaka yi tirhisa swikolo swa khume swa vutirheli bya le tilweni leswaku yi letela vanhu lava swi navelaka ku tsarisa ni lava swiyimo swi va pfumelelaka ku ya eka swona. Xana u teka swikolo leswi tanihi vumbhoni bya leswaku Yehovha wa hi rhandza?

Ha ku rhamba leswaku u kuma leswi engetelekeke malunghana ni swikolo leswi swa vutirheli bya le tilweni ni ndlela leyi van’wana va vuyeriweke ha yona eka swona. Kutani tivutise, ‘Ndzi nga vuyeriwa njhani eka dyondzo leyi ya Xikwembu?’

VUYERIWA EKA NDZETELO WA YEHOVHA

Tanihi leswi Yehovha a nga “Xikwembu xa rirhandzu,” u nyikela ndzetelo lowu endlaka leswaku hi va ni xikongomelo evuton’wini, wu hi endla hi lunghekela ku hlula swiphiqo wu tlhela wu hi pfuna ku va ni ntsako lowukulu entirhweni wa hina wa nsimu. (2 Kor. 13:11) Ku fana ni vadyondzisiwa va hi lembe-xidzana ro sungula, hi hlomisiwile leswaku hi pfuna van’wana, hi “va dyondzisa ku hlayisa swilo hinkwaswo” leswi hi lerisiweke swona.—Mat. 28:20.

Hambileswi hi nga ta ka hi nga swi koti ku ya eswikolweni leswi hinkwaswo, hi nga vuyeriwa eka xin’wana kumbe swin’wana swa swikolo leswi. Naswona hi nga tirhisa ndzetelo lowu sekeriweke eBibeleni lowu kumekaka eka swona. Hi nga tlhela hi endla leswaku swi hi fambela kahle ngopfu ensin’wini hi ku tirha swin’we ni malandza ya Yehovha lama leteriweke kahle.

Tivutise, ‘Xana swiyimo swa mina swi ndzi pfumelela ku ya eka xin’wana xa swikolo leswi?’

Vagandzeri va Yehovha va swi teka ku ri lunghelo ku hlanganyela ni ku dyondzisiwa eka swikolo leswi swa nkoka. Onge ndzetelo lowu u nga ta wu kuma wu nga ku endla u tshinela eka Xikwembu naswona wu ku endla u hetisisa vutihlamuleri bya wena eka xona, ngopfu-ngopfu ntirho wa xihatla wa ku chumayela mahungu lamanene.

NKATSAKANYO WA SWIKOLO SWA VUTIRHELI BYA LE TILWENI

Xikolo Xa Vutirheli Bya Le Tilweni

Xikongomelo: Ku letela vahuweleri leswaku va va vachumayeri lava humelelaka ni vadyondzisi va mahungu lamanene.

Nkarhi: Xi khomiwa vhiki na vhiki.

Ndhawu: EHolweni ya Mfumo ya kwalaho.

Lava Faneleke Va Tsarisa: Hinkwavo lava hlanganyelaka ni vandlha minkarhi hinkwayo, lava pfumelelanaka ni tidyondzo ta Bibele ni lava mahanyelo ya vona ma fambisanaka ni milawu ya Vukreste.

Ndlela Yo Tsarisa: Swichudeni swi tsarisa eka mulanguteri wa Xikolo xa Vutirheli bya le Tilweni.

Sharon, loyi a lamaleke hileswi a nga ni vuvabyi bya ku tsana ni ku fa ka misiha (amyotrophic lateral sclerosis [ALS]), u ri: “Xikolo xa Vutirheli bya le Tilweni xi ndzi dyondzise ku endla ndzavisiso ni ku hlamusela rungula hi ndlela leyi twalaka. Ndzi tlhele ndzi dyondza ku dzikisa mianakanyo ya mina eka swilaveko swa moya swa van’wana—ku nga ri swa mina ntsena.”

Arnie, loyi a nga ni nkarhi wo leha a ri mulanguteri la famba-fambaka, u ri: “Ndzi kule ndzi ri ni manghanghamela naswona a swi ndzi tikela ku languta van’wana ematihlweni. Xikolo lexi xi ndzi pfunile leswaku ndzi titshemba ni ku titeka ndzi ri wa nkoka. Hi ku pfuniwa hi Yehovha hi ndzetelo lowu, ndzi dyondze ku lawula ndlela leyi ndzi hefemulaka ha yona ni ku dzikisa mianakanyo ya mina. Ndza byi tlangela swinene vuswikoti lebyi ndzi nga na byona bya ku dzunisa Xikwembu evandlheni ni le nsin’wini.”

Xikolo Xa Lava Ha Ku Fikaka eBethele

Xikongomelo: Ku pfuna lava ha ku fikaka eBethele leswaku va tolovela ntirho wa vona wa le Bethele.

Nkarhi: Xi teka mavhiki ya 16, xi khomiwa kan’we hi vhiki naswona xi teka 45 wa timinete.

Ndhawu: EBethele.

Leswi Lavekaka: U fanele u va u ri xirho xa ndyangu wa Bethele xa nkarhi hinkwawo kumbe u ri mutirhi wa nkarhinyana loyi a pfumeleriweke ku tirha eBethele loyi se a nga ni lembe kumbe ku tlula.

Ndlela Yo Tsarisa: Xi ngheniwa ntsena hi swirho leswintshwa swa ndyangu wa le Bethele.

Demetrius, loyi a yeke exikolweni lexi hi va-1980, u ri: “Xikolo lexi xi endle leswaku ndzi antswisa ndlela leyi ndzi dyondzaka ha yona naswona xi ndzi endle ndzi lunghekela ntirho wa le Bethele lowu se ndzi nga ni malembe ndzi wu endla. Valeteri va kona, leswi dyondzisiwaka ni ndzayo leyi nyikeriwaka swi ndzi khorwisile leswaku Yehovha wa ndzi rhandza ni leswaku u navela ku ndzi pfuna leswaku swilo swi ndzi fambela kahle entirhweni wa mina wa le Bethele.”

Kaitlyn u ri: “Ndzi pfuniwile leswaku ndzi dzikisa mianakanyo ya mina eka swilo leswi nga swa nkoka swinene—ku va munhu loyi a endlaka swilo hi ndlela leyi Yehovha a lavaka ha yona.

Xikolo Xa Lava Ha Ku Fikaka eBethele xi endle leswaku ndzi twisisa ndzi tlhela ndzi tlangela Yehovha, Bethele ni nhlengeletano ya yena.”

Xikolo Xa Vutirheli Bya Mfumo

Xikongomelo: Ku letela valanguteri lava famba-fambaka, vakulu minkarhi yin’wana ni malandza ya vutirheli leswaku va hetisisa vutihlamuleri lebyi va nga na byona evandlheni ni le nhlengeletanweni ya Yehovha. (Mint. 20:28) Ku vulavuriwa ni hi swiphiqo leswi nga kona ni swilaveko swa hi nkarhi wolowo swa mavandlha. Xikolo lexi xi va kona endzhaku ka malembe yo hlayanyana hi ku ya hilaha Huvo leyi Fumaka yi hleleke hakona.

Nkarhi: Emalembeni ya sweswinyana, xikolo lexi xi teka masiku mambirhi ku ya eka masiku mambirhi ni hafu eka valanguteri lava famba-fambaka, siku ni hafu eka vakulu kasi eka malandza ya vutirheli xi teka siku rin’we.

Ndhawu: Hakanyingi xi khomeriwa eHolweni ya Mfumo kumbe eHolweni ya Tinhlengeletano.

Leswi Lavekaka: U fanele u va u ri mulanguteri la famba-fambaka, nkulu kumbe nandza wa vutirheli.

Ndlela Yo Tsarisa: Vakulu ni malandza ya vutirheli va rhambiwa hi mulanguteri wa xifundzha. Valanguteri lava famba-fambaka va rhambiwa hi hofisi ya rhavi.

“Hambileswi exikolweni lexi ku buriwaka hi rungula ro tala hi nkarhi wo koma ngopfu, xi pfuna vakulu ku tshama va tsakile ni ku ‘ya emahlweni tanihi vavanuna’ entirhweni wa Yehovha. Vakulu lava ha ku bumabumeriwaka ni lava ku nga khale va bumabumeriwile va dyondza ku risa hi ndlela leyinene ni ku hlangana hilaha ku faneleke ‘endleleni yin’we ya ku ehleketa.’”—Quinn (la kombisiweke laha hansi).

“Ndzetelo lowu wu hi pfunile leswaku hi ti twisisa kahle timhaka leti khumbaka ripfumelo ra hina, wu hi lemuxa hi makhombo ni ku hi nyika swiringanyeto swo khathalela ntlhambi. Yehovha u ni tintswalo hikuva wa hi pfuna.”—Michael.

Xikolo Xa Ntirho Wa Vuphayona

Xikongomelo: Ku pfuna maphayona leswaku ma ‘hetisisa vutirheli bya wona hi xitalo.’—2 Tim. 4:5.

Nkarhi: Mavhiki mambirhi.

Ndhawu: Rhavi hi rona ri yi hlelaka; xi tala ku khomeriwa eHolweni ya Mfumo.

Leswi Lavekaka: U fanele u va u ri ni lembe kumbe ku tlula u ri phayona ra nkarhi hinkwawo. *

Ndlela Yo Tsarisa: Maphayona lama fanelekaka ma rhambiwa hi mulanguteri wa xifundzha.

Lily (la nga exineneni) u ri: “Xikolo lexi xi ndzi pfunile leswaku ndzi hlula swiphiqo ensin’wini ni le vuton’wini bya mina. Ndzi yi antswise swinene ndlela leyi ndzi dyondzaka ha yona, ndlela leyi ndzi dyondzisaka ha yona ni ndlela leyi ndzi tirhisaka Bibele ha yona. Ndzi tshama ndzi swi lunghekerile ku pfuna van’wana, ku seketela vakulu ni ku hoxa xandla eka ku kula loku vaka kona evandlheni.”

Brenda, loyi a yeke kambirhi exikolweni lexi u ri: “Xi ndzi pfune leswaku ndzi katseka hi ku helela evugandzerini bya mina, ndzi tiyisa ripfalo ra mina ni ku dzikisa mianakanyo ya mina eku pfuneni ka van’wana. Swi le rivaleni leswaku Yehovha u ni malwandla!”

^ par. 41 Loko ku nga ri na maphayona lamantshwa lama ringaneke ku vumba ntlawa, maphayona man’wana lawa ma nga yangiki exikolweni lexi emalembeni ya ntlhanu lama hundzeke ma nga ha rhambiwa leswaku ma tlhela ma ya eka xona.

Xikolo Xa Vakulu Va Vandlha

Xikongomelo: Ku pfuna vakulu leswaku va hetisisa vutihlamuleri bya vona evandlheni ni ku twisisa ku antswa leswi Yehovha a swi languteleke eka vona loko va n’wi gandzela.

Nkarhi: Masiku ya ntlhanu.

Ndhawu: Yi hlawuriwa hi hofisi ya rhavi; hakanyingi xi khomeriwa eHolweni ya Mfumo kumbe eHolweni ya Tinhlengeletano.

Leswi Lavekaka: U fanele u va u ri nkulu.

Ndlela Yo Tsarisa: Vakulu va rhambiwa hi hofisi ya rhavi.

Twana tinhlamuselo ta van’wana lava yeke eka ntlawa wa vu-92 le United States:

“Xikolo lexi xi ndzi vuyerise swinene, xi ndzi pfune ku ehleketa hi ndlela leyi ndzi nga ti pfunaka ha yona tinyimpfu ta Yehovha.”

“Ndzi swi lunghekerile ku va khutaza swinene vanhu hinkwavo hi ku kandziyisa tinhla-nkulu eMatsalweni.”

“Ndzi ta tshama ndzi ri ni ndzetelo lowu vutomi bya mina hinkwabyo.”

Xikolo Xa Valanguteri Va Swifundzha Ni Va Miganga Swin’we Ni Vasati Va Vona

Xikongomelo: Ku pfuna valanguteri va swifundzha ni va miganga leswaku va hambeta va pfuna mavandlha loko va “[tirha] hi matimba eku vulavuleni ni le ku dyondziseni.”—1 Tim. 5:17; 1 Pet. 5:2, 3.

Nkarhi: Tin’hweti timbirhi.

Ndhawu: Yi hleriwa hi hofisi ya rhavi.

Leswi Lavekaka: Makwerhu u fanele a va a ri mulanguteri wa xifundzha kumbe wa muganga.

Ndlela Yo Tsarisa: Valanguteri va swifundzha ni va miganga swin’we ni vasati va vona va rhambiwa hi hofisi ya rhavi.

“Ku tlangela ka hina vunhloko bya Yesu enhlengeletanweni leyi ku antswisiwile. Hi vone xilaveko xo khutaza vamakwerhu lava hi va tirhelaka ni ku tiyisa vun’we bya vandlha rin’wana ni rin’wana. Exikolweni lexi ku kandziyisiwe leswaku hambileswi mulanguteri la famba-fambaka a nyikelaka xitsundzuxo ni ndzulamiso minkarhi yin’wana, xikongomelo-nkulu xa yena i ku pfuna vamakwerhu ku vona leswaku Yehovha wa va rhandza.”—Joel, la yeke eka ntlawa wo sungula hi 1999.

Xikolo Xa Bibele Xa Vamakwerhu Lava Nga Tekangiki

Xikongomelo: Ku endla leswaku vakulu ni malandza ya vutirheli lava nga tekangiki va lunghekela ku byarha vutihlamuleri lebyi engetelekeke enhlengeletanweni ya Yehovha. Mathwasana yo tala ma averiwa ku ya tirha laha ku nga ni xilaveko etikweni ra rikwavo. Van’wana va nga ha averiwa ku ya tirha etikweni rin’wana loko va ta swi kota. Van’wana va nga ha tirha tanihi maphayona yo hlawuleka ya nkarhinyana leswaku va sungula ku chumayela ni ku yisa ntirho emahlweni etindhawini leti nga ekule ni leti nga ni vahuweleri vatsongo.

Nkarhi: Tin’hweti timbirhi.

Ndhawu: Yi hlawuriwa hi hofisi ya rhavi; hakanyingi xi khomeriwa eHolweni ya Mfumo kumbe eHolweni ya Tinhlengeletano.

Leswi Lavekaka: Ku laveka vamakwerhu va xinuna lava nga tekangiki lava nga exikarhi ka malembe ya 23 na 62, lava nga ni rihanyo lerinene, lava lavaka ku tirha kun’wana ni kun’wana laha ku nga ni xilaveko lexikulu. (Mar. 10:29, 30) Va fanele va va va ri ni malembe mambirhi kumbe ku tlula va ri maphayona ya nkarhi hinkwawo naswona va ri ni malembe mambirhi va ri vakulu kumbe malandza ya vutirheli.

Ndlela Yo Tsarisa: Ku va ni nhlangano wa lava tsakelaka ku ya eka xona enhlengeletanweni ya xifundzha.

Rick, loyi a yeke eka ntlawa wa vu-23 le United States u ri: “Ku dzikisa mianakanyo ya mina eka xikolo lexi swi pfumelele moya wa Yehovha leswaku wu endla ku cinca lokukulu eka mina. Loko Yehovha a ku nyika xiavelo, wa ku seketela loko u endla xiavelo xolexo. Ndzi dyondze leswaku loko ndzi dzikisa mianakanyo ya mina eku endleni ka ku rhandza ka Xikwembu ku nga ri ka mina, xi ta ndzi nyika matimba.”

Andreas, loyi a tirhelaka eJarimani u ri: “Ndzi dyondze ku twisisa leswaku ndlela leyi nhlengeletano ya Xikwembu yi tirhaka ha yona namuntlha yi fana ni singita. Ndzetelo lowu wu ndzi pfunile leswaku ndzi lunghekela ntirho lowu a ndza ha ta wu endla. Nakambe, swikombiso swo tala swa le Bibeleni swi ndzi dyondzise ntiyiso lowu wa nkoka: Ku tirhela vamakwerhu na Yehovha swi tisa ntsako lowukulu.”

Xikolo Xa Bibele Xa Mimpatswa Leyi Nga Vakreste

Xikongomelo: Ku nyika mimpatswa leyi tekaneke vuleteri byo hlawuleka leswaku yi ta tirhisiwa swinene hi Yehovha ni hi nhlengeletano yakwe. Mathwasana yo tala ma averiwa ku ya tirha laha ku nga ni xilaveko lexikulu etikweni ra rikwavo. Yin’wana yi nga ha averiwa ku ya tirha etikweni rin’wana loko yi ta swi kota. Mimpatswa leyi thwaseke yi nga ha va maphayona yo hlawuleka ya nkarhinyana leswaku yi sungula ku chumayela ni ku yisa ntirho emahlweni etindhawini leti nga ekule ni leti nga ni vahuweleri vatsongo.

Nkarhi: Tin’hweti timbirhi.

Ndhawu: Xikolo lexi xi khomiwa eUnited States, naswona ku sukela hi September 2012, xi ta khomiwa emarhavini yo karhi emisaveni hinkwayo, hakanyingi xi ta khomeriwa eHolweni ya Mfumo kumbe eHolweni ya Tinhlengeletano.

Leswi Lavekaka: Ku laveka mimpatswa leyi tekaneke leyi nga exikarhi ka malembe ya 25 na 50, leyi nga ni rihanyo lerinene, leyi swiyimo swa yona swi yi pfumelelaka ku ya tirha kun’wana ni kun’wana laha ku nga ni xilaveko lexikulu naswona yi tiyimiseleke ku landzela marito lama nge: “Hi mina loyi! Ndzi rhume.” (Esa. 6:8) Yi fanele yi va yi ri ni malembe mambirhi kumbe ku tlula yi tekanile naswona yi ri ni malembe mambirhi kumbe ku tlula yi ri entirhweni wa nkarhi hinkwawo handle ko kavanyetiwa. Nuna wa kona u fanele a ri ni malembe mambirhi kumbe ku tlula a ri nkulu kumbe nandza wa vutirheli.

Ndlela Yo Tsarisa: Ku khomiwa nhlangano wa lava tsakelaka ku ya eka xona entsombanweni wa muganga. Loko nhlangano lowu wu nga vi kona emintsombanweni ya le tikweni ra ka n’wina naswona mi swi lava ku tsarisa, mi nga ha tsalela ehofisini ya rhavi ya ka n’wina leswaku mi kuma rungula leri engetelekeke.

“Mavhiki ya nhungu lawa hi ma heteke exikolweni lexi ma hundzule vutomi bya hina naswona ma nyike mimpatswa leyi lavaka ku endla leswi engetelekeke entirhweni wa Yehovha lunghelo lerikulu! Hi tiyimisele ku ringanisela evuton’wini bya hina leswi nga ta endla leswaku hi tirhisa nkarhi wa hina hi vutlhari.”—Eric na Corina (lava kombisiweke laha hansi), lava yeke eka ntlawa wo sungula hi 2011.

Xikolo Xa Bibele Xa Giliyadi Xa Watchtower

Xikongomelo: Ku letela swichudeni leswaku swi va varhumiwa lava nga le nsin’wini etindhawini leti nga ni vanhu vo tala swinene, ku va valanguteri lava famba-fambaka kumbe vatirhi va le Bethele. Xikongomelo xa kona i ku tiyisa nsimu ni ndlela leyi rhavi ri tirhaka ha yona.

Nkarhi: Tin’hweti ta ntlhanu.

Ndhawu: Xi khomeriwa eNtsindza wa Dyondzo wa Watchtower ePatterson le New York eU.S.A.

Leswi Lavekaka: Ku laveka mimpatswa leyi tekaneke leyi se yi nga le ka ntirho wo hlawuleka wa nkarhi hinkwawo—hileswaku yi va yi ri varhumiwa lava nga le nsin’wini lava nga si yaka exikolweni lexi, maphayona yo hlawuleka, valanguteri lava famba-fambaka kumbe vatirhi va le Bethele. Yi fanele yi va yi ri ni malembe manharhu kumbe ku tlula yi ri entirhweni wolowo yi ri swin’we handle ko kavanyetiwa. Yi fanele yi kota ku xi vulavula kahle Xinghezi, ku xi hlaya ni ku xi tsala.

Ndlela Yo Tsarisa: Mimpatswa yi nga ha rhambiwa hi Komiti ya Rhavi ya le tikweni ra rikwavo.

Lade na Monique va huma eUnited States naswona sweswi va tirhela eAfrika. Lade u ri: “Xikolo xa Giliyadi xi hi endle hi lunghekela ku ya kun’wana ni kun’wana emisaveni, hi lunghekela ku tirha ni vamakwerhu lava rhandzekaka.”

Monique u ya emahlweni a ku: “Loko ndzi tirhisa leswi ndzi swi dyondzeke eRitweni ra Xikwembu, ndzi xi tsakela swinene xiavelo xa mina. Ntsako wolowo ndzi wu teka wu ri vumbhoni lebyi engetelekeke bya leswaku Yehovha wa ndzi rhandza.”

Xikolo Xa Swirho Swa Komiti Ya Rhavi Ni Vasati Va Swona

Xikongomelo: Ku pfuna swirho swa Komiti ya Rhavi leswaku swi ma khathalela kahle makaya ya Bethele, swi khathalela swilaveko swa mavandlha ni ku langutela swifundzha ni miganga. Swi tlhela swi dyondza hi ku hundzuluxela, ndlela yo kandziyisa ni ku rhumela minkandziyiso.

Nkarhi: Tin’hweti timbirhi.

Ndhawu: Xi khomeriwa eNtsindza wa Dyondzo wa Watchtower, ePatterson, le New York eU.S.A.

Leswi Lavekaka: Makwerhu u fanele a va a ri xirho xa Komiti ya Rhavi kumbe xirho xa Komiti ya Tiko kumbe loko a komberiwile ku ya kona.

Ndlela Yo Tsarisa: Vamakwerhu volavo swin’we ni vasati va vona va rhambiwa hi Huvo leyi Fumaka.

Lowell na Cara, va ye eka ntlawa wa vu-25, naswona va tirhela eNigeria. Lowell u ri: “Ndzi tsundzuxiwe leswaku ku nga khathariseki leswaku ndzi khomeke ku fikela kwihi kumbe ndzi nyikiwe ntirho wihi, hi fanele hi endla swilo hi ndlela ya Yehovha leswaku hi n’wi tsakisa. Xikolo lexi xi tlhele xi hi dyondzisa leswaku i swa nkoka leswaku hi tekelela rirhandzu leri Yehovha a ri kombaka malandza ya yena.”

Cara yena u ri: “Nhlamuselo yin’we leyi ndzi anakanyisiseke ha yona hi leyi nge, loko ndzi tsandzeka ku hlamusela mhaka yo karhi hi ndlela leyi twisisekaka hi ku olova, ndzi fanele ndzi dyondza hi mhaka yoleyo ndzi nga si ringeta ku dyondzisa van’wana.”

U Nga Ha Tsakela

SWIENDLAKALO SWO HLAWULEKA

https://assetsnffrgf-a.akamaihd.net/assets/ct/46e9307b0a/images/syn_placeholder_sqr.png

Timbhoni Ta Yehovha

Swikolo Swa Vutirheli—Vumbhoni Bya Rirhandzu Ra Yehovha

VUYERIWA EKA NDZETELO WA YEHOVHA

U Nga Ha Tsakela

Ku Thwasa Ka Ntlawa Wa Vu-136 Wa Xikolo Xa Bibele Xa Giliyadi Xa Watchtower

Ku Thwasa Ka Ntlawa Wa Vu-135 Wa Xikolo Xa Bibele Xa Giliyadi Xa Watchtower