Sukulu za Ciuta Nchilongolero Cakuti Yehova Wakutitemwa

YEHOVA ni “Msambizgi” withu. (Yes. 30:20) Wakusambizga ŵanji cifukwa ca citemwa. Mwaciyelezgero, cifukwa ca citemwa Yehova wakulongora Yesu ‘vinthu vyose ivyo iyomwene wakucita.’ (Yoh. 5:20) Cifukwa cakuti Yehova wakutitemwa ise Taŵakaboni ŵake, lekani wakutipa “lulimi lwa ŵakusambira,” apo tikuyezgayezga kuti timucindike na kovwira ŵanji.—Yes. 50:4.

Pakuyezga citemwa ca Yehova, Komiti Yakusambizga ya Wupu Wakulongozga, yili kunozga masukulu gha Ciuta ghakukwana khumi kuti yisambizge ŵanthu awo ŵali na khumbo kweniso awo vinthu pa umoyo wawo vikuŵazomerezga kuti ŵanjire sukulu izi. Kasi mukuwona kuti sukulu izi mbukaboni wakuti Yehova wakumutemwani?

Wonani masukulu agha kweniso ivyo ŵanji awo ŵali kusambirako ŵali kuyowoya. Kufuma apo, jifumbani kuti, ‘Kasi ningacita wuli kuti nisange candulo na masambiro gha Ciuta agha?’

 SANGANI CANDULO NA MASAMBIRO GHA CIUTA

Pakuti Yehova ni “Ciuta wa citemwa,” wakutisambizga vinthu ivyo vikutovwira kuti tiŵe na umoyo uwemi. Wakutovwira kuti tinozgekere umo tingatondera masuzgo, kweniso wakutovwira kuti tikondwenge comene na uteŵeti withu. (2 Kor. 13:11) Nga mbasambiri ŵakwambilira, tili ŵakukwana kovwira ŵanji, “kuŵasambizga kusungilira vinthu vyose” ivyo tili kulangurika.—Mat. 28:20.

Nangauli tingafiska yayi kusambirako masukulu ghose agha, kweni tingasanga candulo na masukulu agha. Ndiposo tingalondezga ulongozgi wa mu Baibolo uwo ulipo. Kweniso tingasazgirako luso lwithu mu uteŵeti para tikupharazgira lumoza na ŵateŵeti ŵa Yehova awo ŵasambizgika makora.

Jifumbani kuti, ‘Kasi vinthu pa umoyo wane vikunizomerezga kuti nane nisambireko yimoza mwa masukulu agha?’

Ŵanthu ŵa Yehova ŵakuwona kuti ni mwaŵi kukhozgera masukulu ghakuzirwa agha na kusambirako. Mphanyi masambiro agho mukusambira ghamovwirani kuti musendelere kwa Ciuta na kufiska milimo yake, comenecomene mulimo wa kupharazga makani ghawemi uwo ukukhumbikwira kucitika mwaluŵiro.

[Bokosi pa peji 13-17]

KUMANYA SUKULU ZA CIUTA

Sukulu ya Uteŵeti wa Ciuta

Cilato: Kovwira ŵapharazgi kuti ŵaŵe ŵasambizgi ŵaluso ŵa makani ghawemi.

Utali wa Nyengo: Yikulutilira waka.

Malo: Nyumba ya Ufumu.

Awo Ŵangasambirako: Wose awo ŵakuwungana na mpingo nyengo zose, ndipo ŵakugomezga ivyo Baibolo likusambizga na kuvilondezga mu umoyo wawo.

Kulembeska: Mulaŵiliri wa Sukulu ya Uteŵeti wa Ciuta ndiyo wakulemba mazina gha ŵasambiri.

Sharon uyo wali na nthenda iyo yikomizga viŵaro ya amyotrophic lateral sclerosis (ALS), wakati: “Sukulu ya Uteŵeti wa Ciuta yanisambizga kuti nipenjerezgenge nkhani kweniso kuti niyowoyenge nkhani mu ndondomeko yiwemi. Kweniso nasambira kuti niŵikenge mahara pa ivyo ŵanji ŵakusoŵerwa mwauzimu, kuti pa ivyo ine nkhusoŵerwa yayi.”

Arnie, mulaŵiliri wakwendakwenda uyo wateŵetera kwa nyengo yitali wakati: “Apo nkhakulanga nkhaŵa na cikwikwi comene ndipo nkhasuzgikanga kulaŵiska ŵategherezgi. Sukulu iyi yanovwira kuti nimanye kuti ningacita vinthu vyamahara kweniso kuti nane ndine wakuzirwa. Yehova wanovwira kwizira mu sukulu iyi kuti nimanyenge umo ningathutira ndiposo kuti niŵikengepo mtima pa vinthu. Nili wakuwonga comene kuti sono nili na luso lwakulumbira Ciuta mu mpingo na mu uteŵeti.”

 Sukulu ya Awo Ŵiza Sono pa Beteli

Cilato: Cilato ca sukulu iyi nkhusambizga awo ŵiza sono pa Beteli kuti ŵateŵetere makora.

Utali wa Nyengo: Maminiti 45 sabata yiliyose kwa masabata 16.

Malo: Ku Beteli.

Awo Ŵangasambirako: Munthu wakwenera kuŵa wa pa Beteli panji muteŵeti wakujipeleka uyo wazomerezgeka kuteŵetera pa Beteli kwa caka cimoza panji kujumpha apa.

Kulembeska: Ŵateŵeti ŵaphya wose ŵa pa Beteli ŵakusambirako sukulu iyi.

Demetrius, uyo wakasambirako sukulu iyi m’ma 1980 wakati: “Sukulu iyi yikanovwira pa umo nkhucitira sambiro la namwene ndiposo yikanovwira kunozgekera uteŵeti wa pa Beteli uwo nacita kwa nyengo yitali. Ŵasambizgi, visambizgo, na ulongozgi wake, vikanovwira kumanya kuti Yehova wakunitemwa ndiposo kuti wakukhumba kunovwira kuti nicite makora uteŵeti wa pa Beteli.”

Kaitlyn wakati: “Nkhawovwirika kuti niŵikenge mahara pa cinthu cakuzirwa comene ico nkhuŵa munthu wauzimu. Sukulu iyi yanovwira kuti nimanye makora Yehova, nyumba yake, na gulu lake, ndiposo kuti niŵe wakuwonga.”

Sukulu ya Uteŵeti wa Ufumu

Cilato: Kusambizga ŵalaŵiliri ŵakwendakwenda, ŵalara ndiposo nyengo zinyake, ŵateŵeti ŵakovwira kuti ŵacitenge makora milimo yawo ya kulaŵilira na kwendeska vinthu mu mpingo. (Mil. 20:28) Vinthu ivyo vyacitika mu nyengo iyo, na ivyo vikukhumbikwa mu mipingo ndivyo vikusambizgika pa sukulu iyi. Wupu Wakulongozga ukunozga sukulu iyi para pajumpha vyaka vicoko waka.

Utali wa Nyengo: Mazuŵa ghano, pa sukulu iyi ŵalaŵiliri ŵakwendakwenda ŵakusambira mazuŵa ghaŵiri panji ghaŵiri na hafu, ŵalara ŵakusambira zuŵa limoza na hafu, ndipo ŵateŵeti ŵakovwira ŵakusambira zuŵa limoza.

Malo: Kanandi yikucitikira pa Nyumba ya Ufumu yapafupi, panji pa Malo gha Ungano gha Ŵakaboni ŵa Yehova.

Awo Ŵangasambirako: Ŵalaŵiliri ŵakwendakwenda, ŵalara na ŵateŵeti ŵakovwira.

Kulembeska: Ŵalara na ŵateŵeti ŵakovwira ŵakucemeka na mulaŵiliri wa dera. Ofesi ya munthavi ndiyo yikucema ŵalaŵiliri ŵakwendakwenda.

“Nangauli pa sukulu iyi tikusambira vinthu vinandi pa nyengo yicoko, kweni yikovwira kuti ŵalara ŵalutilire kuŵa na cimwemwe na ‘kucita nga mbanalume’ pakuteŵetera Yehova. Ŵalara awo ŵateŵetera kwa nyengo yitali na awo ŵamba sono wuwo, ŵakusambira umo ŵangacitira kuti ŵaliske makora mskambo kweniso umo ŵangacitira kuti ŵaŵe ŵakukolerana makoraghene mu ‘kaghanaghaniro kamoza.’”—Quinn (uyo wali musi).

“Masambiro agha ghakatovwira kuti tipulikiske vinthu vyakukhwaskana na cipulikano cithu, kuti timanye vinthu viheni ivyo tikwenera kucenjera navyo, ndiposo ghakatipa ulongozgi wa umo tingapwelelelera mskambo. Yehova walongora kuti ngwalusungu comene cifukwa cakuti wakutovwira.”—Michael.

 Sukulu ya Uteŵeti wa Upayiniya

Cilato: Kovwira ŵapayiniya kuti ‘ŵafiske uteŵeti wawo mwakukwana.’—2 Tim. 4:5.

Utali wa Nyengo: Masabata ghaŵiri.

Malo: Ofesi ya munthavi ndiyo yikusankha ndipo kanandi pakuŵa pa Nyumba ya Ufumu.

Awo Ŵangasambirako: Ŵapayiniya ŵanyengozose awo ŵamara caka cimoza panji kujumpha apa. a

Kulembeska: Ŵapayiniya ŵanyengozose awo mbakwenelera kusambirako sukulu iyi ŵazamuphalirika na mulaŵiliri wa dera.

Lily (kumalyero) wakati, “Sukulu iyi yanovwira kuti nimarane na masuzgo mu uteŵeti na mu umoyo wane. Sono nkhucita makora sambiro la namwene, nkhusambizga makora, na kuligwiliskira nchito makora Baibolo. Sono nili wakunozgeka kovwira ŵanji, kovwira ŵalara na kovwira kuti mpingo ukure.”

Brenda, uyo wali kusambira kaŵiri sukulu iyi wakati: “Yikanovwira kuti niŵikenge mtima wane wose pa vinthu vyauzimu, kuti nikhozge njuŵi yane, ndiposo kuti niŵikenge mtima pa kovwira ŵanji. Nadi, Yehova ngwakupa.”

[Mazgu ghamusi]

Sukulu ya Ŵalara ŵa Mpingo

Cilato: Kovwira ŵalara kuti ŵacitenge makora milimo yawo mu mpingo na kukhozga umoyo wawo wauzimu.

Utali wa Nyengo: Mazuŵa ghankhondi.

Malo: Ofesi ya munthavi ndiyo yikusankha; kanandi pakuŵa pa Nyumba ya Ufumu panji pa Malo gha Ungano gha Ŵakaboni ŵa Yehova.

Awo Ŵangasambirako: Ŵalara.

Kulembeska: Ofesi ya munthavi ndiyo yikucema ŵalara kuti ŵasambire sukulu iyi.

Wonani ivyo ŵanji awo ŵakaŵa mu kilasi la nambara 92 ku United States ŵakayowoya:

“Nasanga candulo cikuru comene na sukulu iyi. Yanovwira kuti nijisande na kuwona umo ningapwelelelera mberere za Yehova.”

“Nili wakunozgeka kukhozga waliyose mwa kudidimizga fundo zikuru mu Malemba.”

“Ivyo nasambira apa nivisungenge umoyo wane wose.”

Sukulu ya Ŵalaŵiliri Ŵakwendakwenda na Ŵawoli Ŵawo

Cilato: Kovwira ŵalaŵiliri ŵa cigaŵa na ŵalaŵiliri ŵa dera kuti ŵacitenge makora comene para ŵakwendera mipingo na para “ŵakufukafuka mu kuyowoya na kusambizga.”—1 Tim. 5:17; 1 Pet. 5:2, 3.

Utali wa Nyengo: Myezi yiŵiri.

Malo: Ofesi ya munthavi ndiyo yikusankha.

Awo Ŵangasambirako: Ŵalaŵiliri ŵa dera na ŵa cigaŵa.

Kulembeska: Ŵalaŵiliri ŵakwendakwenda na ŵawoli ŵawo ŵakucemeka na ofesi ya munthavi.

“Tikamba kuwonga comene kuti Yesu ni mutu wa gulu. Tikawona kuti nchakukhumbikwa kukhozga ŵabali awo tikateŵeteranga na kukuzga umoza mu mpingo uliwose. Sukulu iyi yikatovwira kumanya kuti nangauli mulaŵiliri wakwendakwenda wakupeleka ulongozgi nanga nkhucenya para mphakukhumbikwa, kweni cilato cake cikuru nkhovwira ŵabali kumanya kuti Yehova wakuŵatemwa.”—Joel, wa mu kilasi lakwamba, mu 1999.

 Sukulu Yakusambizga Baibolo ya Ŵabali Ŵambura Kutora

Cilato: Kovwira ŵalara na ŵateŵeti ŵakovwira ŵambura kutora kuti ŵacitenge milimo yakusazgikira mu gulu la Yehova. Ŵanandi awo ŵasambira sukulu iyi ŵakutumika mu caru cawo ku malo agho ŵapharazgi mbacoko. Ŵanyake ŵakutumika ku vyaru vinyake usange ŵayowoya kuti ŵangakwaniska. Ŵanyake awo ŵamalizga masambiro agha, ŵangacita upayiniya wapadera wa nyengo yicoko ku vigaŵa vyakutali ivyo kulijirethu ŵapharazgi panji uko ŵapharazgi mbacoko.

Utali wa Nyengo: Myezi yiŵiri.

Malo: Ofesi ya munthavi ndiyo yikusankha; kanandi pakuŵa pa Nyumba ya Ufumu panji pa Malo gha Ungano gha Ŵakaboni ŵa Yehova.

Awo Ŵangasambirako: Ŵabali ŵambura kutora ŵa vyaka vya pakati pa 23 na 62 awo mbankhongono, ndipo ŵakunweka kuteŵetera ŵabali na kucita milimo ya Ufumu kulikose uko ŵapharazgi mbacoko. (Mrk. 10:29, 30) Ŵaŵe ŵalara panji ŵateŵeti ŵakovwira awo ŵateŵetera kwa vyaka viŵiri panji kujumpha apa kwambura kulekapo ndiposo ŵacita upayiniya wanyengozose kwa vyaka viŵiri panji kujumpha apa kwambura kulekapo.

Kulembeska: Pa ungano wa dera pakuŵa ungano wa awo ŵakukhumba kukasambira sukulu iyi. Vinandi vikulongosoreka pa ungano uwu.

Rick, wa mu kilasi la nambara 23, ku United States wakati: “Cifukwa cakuti nkhaŵikangapo mtima comene pa masambiro agha, mzimu wa Yehova ukanovwira kuti nisinthe vinthu vinyake pa umoyo wane. Para Yehova wakupa mulimo wakukuwovwira kuti ucite makora mulimo uwo. Nkhasambira kuti usange nkhuŵika mahara pa khumbo la Ciuta, pa namwene cara, iyo wanikhozgenge.”

Andreas, uyo wakuteŵetera ku Germany wakati: “Nkhamanya kuti umo gulu la Ciuta likucitira vinthu ni munthondwe. Masambiro agha ghakanovwira kuti ninozgekere mulimo uwo ukanilindiliranga munthazi. Kweniso, viyelezgero vinandi vya mu Baibolo vikanisambizga sambiro lakuti: Wamunthu ukukondwa comene para ukuteŵetera ŵabali na Yehova.”

Sukulu Yakusambizga Baibolo ya Ŵakhristu Ŵakutorana

Cilato: Kusambizga ŵakutorana mwakuti ŵacite vinandi mu gulu la Yehova. Ŵanandi awo ŵasambira sukulu iyi ŵakutumika uko kukukhumbikwa wovwiri mu caru cawo. Ŵanji ŵangatumika ku caru cinyake usange ŵayowoya kuti ŵangafiska kukateŵetera mu caru ico. Awo ŵamalizga masambiro agha, ŵangacita upayiniya wapadera wa nyengo yicoko ku vigaŵa vyakutali ivyo kulijirethu ŵapharazgi, panji uko ŵapharazgi mbacoko.

Utali wa Nyengo: Myezi yiŵiri.

Malo: Sukulu iyi yikucitika mu United States, ndipo kwambira mu Seputembala 2012, yicitikenge mu malo agho ofesi za munthavi zakusankhika zisankhenge, kanandi pazamuŵanga pa Nyumba ya Ufumu panji pa Malo gha Ungano gha Ŵakaboni ŵa Yehova.

Awo Ŵangasambirako: Ŵakutorana ŵa vyaka vya pakati pa 25 na 50, ŵankhongono, ndipo ŵangateŵetera kulikose uko wovwiri ukukhumbikwa. Kweniso ŵaŵe na mzimu wa kujipeleka wa “Ndine pano; nditumani!” (Yes. 6:8) Ŵaŵe ŵakutorana kwa vyaka viŵiri panji kujumpha apa, ndipo ŵacita uteŵeti wanyengozose vyaka viŵiri panji kujumpha apa kwambura kulekapo. Mfumu wakwenera kuŵa mulara panji muteŵeti wakovwira uyo wateŵetera kwa vyaka viŵiri panji kujumpha apa kwambura kulekapo.

Kulembeska: Pa ungano wa cigaŵa pakuŵa ungano wa awo ŵakukhumba kukasambira sukulu iyi. Vinandi vikulongosoreka pa ungano uwu. Usange pa ungano winu wa cigaŵa paŵavya ungano uwu, ndipo imwe mukukhumba kusambira sukulu iyi, mungalemba kalata ku ofesi yinu ya munthavi kuti mupulike vinandi.

“Masabata ghankhondi na ghatatu ghakasintha comene umoyo withu, ndipo ni mwaŵi ukuru comene ku mbumba izo zikukhumba kucita vinandi mu gulu la Yehova. Taŵikapo mtima kuti tiŵe na umoyo wambura kukhumba vinandi mwakuti tigwiliskire nchito nyengo yithu mwavinjeru.”—Eric na Corina (awo ŵali musi), ŵa mu kilasi lakwamba, ilo likaŵako mu 2011.

Sukulu Yakusambizga Baibolo ya Giliyadi

Cilato: Kusambizga ŵasambiri kuti ŵaŵe ŵamishonale mu vigaŵa ivyo vili na ŵanthu ŵanandi, ŵaŵe ŵalaŵiliri ŵakwendakwenda, panji kuti ŵateŵetere pa Beteli. Cilato ncha kukhozga na kovwira ŵanthu mwauzimu ndiposo kwendeska makora vinthu pa munthavi.

Utali wa Nyengo: Myezi yinkhondi.

Malo: Watchtower Educational Center, Patterson, New York, U.S.A.

Awo Ŵangasambirako: Ŵakutorana awo ŵali kale mu uteŵeti wanyengozose. Ŵanthu aŵa mbamishonale awo ŵandasambire sukulu iyi, ŵapayiniya ŵapadera, ŵalaŵiliri ŵakwendakwenda, panji awo ŵakuteŵetera pa Beteli. Ŵaŵe kuti ŵacita uteŵeti wanyengozose kwa vyaka viŵiri panji kujumpha apa kwambura kulekapo. Ŵakwenera kuyowoya, kuŵazga na kulemba Cingelezi makora ghene.

Kulembeska: Komiti ya Munthavi yingaphalira ŵakutorana kuti ŵapemphe sukulu iyi.

Lade na Monique ŵa ku United States sono ŵakuteŵetera mu Africa. Lade wakuti: “Sukulu ya Giliyadi yikatovwira kuti tiŵe ŵakunozgeka kuluta kulikose mu caru, kuvwara zikhore, na kuteŵeta na ŵabali ŵithu ŵakutemweka.”

Monique wakasazgirapo kuti: “Apo nkhulondezga ivyo nkhasambira ndipo nkhuŵa na cimwemwe cikuru pa mulimo wane. Nkhuwona kuti cimwemwe nchilongolero cakuti Yehova wakunitemwa.”

Sukulu ya Awo Ŵali mu Komiti ya Munthavi na Ŵawoli Ŵawo

Cilato: Kovwira awo ŵakuteŵetera mu Komiti ya Munthavi kuti ŵacitenge makora mulimo wawo wa kulaŵilira mbumba za Beteli, vinthu vyakukhwaskana na uteŵeti mu mipingo, kulaŵilira madera na vigaŵa. Kweniso ŵakusambira vinthu vyakukhwaskana na mulimo wa kung’anamura, kusindikizga, na kutumizga mabuku.

Utali wa Nyengo: Myezi yiŵiri.

Malo: Watchtower Educational Center, Patterson, New York, U.S.A.

Awo Ŵangasambirako: Mubali wakwenera kuŵa mu Komiti ya Munthavi panji mu Komiti ya Caru, panyake uyo wimikika kuteŵetera pa mulimo uwu.

Kulembeska: Ŵabali pamoza na ŵawoli ŵawo ŵakucemeka na Wupu Wakulongozga.

Lowell na Cara, awo ŵakasambira mu kilasi la nambara 25, ŵakuteŵetera ku Nigeria. Lowell wakati: “Nkhakumbuskika kuti nanga ningaŵa kuti nili wakutangwanika wuli, kwali napika mulimo wuli, kweni kuti nikondweske Yehova nkhwenera kuŵa munthu wauzimu. Sukulu iyi yikasambizgaso kuti pakucita vinthu na ŵanji tikwenera kuyezga citemwa ico Yehova wakulongora ŵateŵeti ŵake.”

Cara wakasazgirapo kuti: “Fundo yimoza iyo naghanaghanirapo njakuti, usange ningalongosora mwakupulikikwa makora yayi nkhani yinyake, nkhwenera kuyiŵazga dankha makora nkhani iyo pambere nindasambizge ŵanji.”

[Cithuzithuzi pa peji 13]

[Cithuzithuzi pa peji 14]

[Cithuzithuzi pa peji 15]

[Cithuzithuzi pa peji 16]