Chanobvunetik sventa Dios: jaʼ te chvinaj ti chkʼanvan li Jeovae

LI Jeovae jaʼ «Jchanubtasvanej» kuʼuntik (Is. 30:20). Li kʼanelal oy ta stojolal spasbentake jaʼ chtijbat-o yoʼonton sventa chchanubtasan. Jech kʼuchaʼal liʼe, kʼalal laj yakʼbe yil skotol kʼusitik spasoj li Jesuse jaʼ svinajeb ti chkʼanvan li Diose (Juan 5:20). Jaʼ jun skʼelobil ti skʼanojutik ti tspʼijubtasutik leke, ti jaʼutik yajrextiko Jeovae, ti chkakʼtik persa ta yichʼel ta mukʼe xchiʼuk ta skoltael li krixchanoetike (Is. 50:4).

Li Komite sventa Chanubtasel li ta Jtsop Jbeiltasvanej eke, chchanbeik stalelal li Jeovae, jaʼ yuʼun tstunes lajuneb chanobvunetik sventa chchapan li buchʼutik oy ta yoʼontonik xchiʼuk ti xuʼ yuʼunike. ¿Mi mu jaʼuk te chavil ti toj echʼ noʼox chkʼanvan li Jeovae?

Chkalbotkutik ti akʼo xakʼel ti bu chalbe skʼoplal li chanobvunetik sventa Dios ti oy avi kʼakʼale xchiʼuk junantik sloʼil ermanoetik ti ayemik xa li ta chanunetike. Mi laje xi xajakʼbe abae: «¿Kʼusi sbalil ta jtabe li chanunetik chakʼ Diose?».

 SBALILTAK LI CHANUBTASEL CHAKʼ DIOSE

Li chanubtasel chakʼbutik li «Dios ti stalel chcʼanvane», jaʼ chakʼbe sbalil li jkuxlejaltike, yuʼun chchapanutik sventa xkuch kuʼuntik li vokoliletik ta jnuptantike xchiʼuk sventa xijmuyubaj noʼox li ta cholmantale (2 Cor. 13:11). Jech kʼuchaʼal li yajtsʼaklomtak Cristo ta baʼyel sigloe, jaʼ me jech chkichʼtik chapanel ek sventa jkoltatik yantik «ta xchʼunel scotol» li kʼusitik laj yal Jesús ti akʼo jpastike (Mat. 28:20).

Akʼo mi mu van xuʼ kuʼuntik xijbatutik ta skotol li ta chanobvunetike, xuʼ me jtabetik sbalil junuk li chanubtasel taje. Jech noxtok, xuʼ me xkakʼ ta jkuxlejaltik li chanubtasel ta Vivlia ti xuʼ jtatike. Mi la jchiʼintik ta cholmantal li buchʼutik echʼemik xa li ta chanunetik taje, xuʼ me mas jchantik xcholel li mantale.

Jaʼ yuʼun xuʼ xi xajakʼbe abae: «¿Mi xuʼ van kuʼun sventa xibat li ta junantik chanunetik taje?».

Li yajtunelutik Jeovae jaʼ jun mukʼta matanal chkiltik ti ta jkolta jbatik ta sventa li chanunetike xchiʼuk ti ep kʼusitik ta jchantik tee. Jmalaojkutik ti jaʼuk sventa xanopaj mas ta stojolal Dios xchiʼuk ti xchapanot ta spasbel yabtel li kʼusi chachane, mas to ta sventa li abtelal ta xcholel lekil aʼyej ti anil xa skʼan pasele.

[Rekuadro ta pajina 13 kʼalal ta 17]

YALBEL JUTUK SKʼOPLAL LI CHANOBVUNETIK SVENTA DIOSE

Chanobvun sventa Kabteltik yuʼun Dios

Kʼusi stu: Xchanubtasel jcholmantaletik sventa lekuk xchanubtasvanik xchiʼuk ti lekuk chapalik ta xcholel li lekil aʼyeje.

Kʼu sjalil: Jech-o chichʼ pasel.

Bu ch-echʼ: Ta salon sventa tsobobbailetik.

Buchʼutik xuʼ xbatik: Skotol jcholmantaletik. Xuʼ xbatik ek li buchʼutik chkʼotilanik ta tsobajele, ti lek chaʼiik li chanubtaseletik ta Vivliae xchiʼuk ti chakʼ ta xkuxlejalik li beiltaseletik yichʼoj yajtsʼaklomtak Cristoe.

Kʼuxi ta tael: Jakʼbo li buchʼu sbainoj li Chanobvun sventa Kabteltik yuʼun Diose.

Sharon, ti ip chaʼi ta chamel ti kʼunkʼun ch-alub batel sbekʼtal ti esclerosis lateral amiotrófica sbie, xi chale: «Li Chanobvun sventa Kabteltik yuʼun Diose la xchanubtasun sventa jsabe lek skʼoplal xchiʼuk ti oyuk smelolal li mantal chketʼese, jech noxtok jaʼ chkakʼ ta koʼonton li kʼusi chtun yuʼunik ta mantal li krixchanoetike, maʼuk noʼox ta sventa li kʼusitik chtun kuʼune».

Li Arnie, jun jkʼelvanej ta sirkuito ti lek chaneme xi chale: «Kʼalal bikʼitun toʼoxe xmaklajet toʼox chikʼopoj xchiʼuk toj vokol chkaʼi ti jkʼelbe sat li krixchanoetike. Koliyal li Jeovae ta skoj li chanobvun taje mas xa ta jpat koʼonton ta jtojolal xchiʼuk muʼyuk xa chopol chkaʼi jba, jech xtok jchanoj xa kʼusitik xuʼ jpas sventa lek xkichʼ ikʼ xchiʼuk ti mu kʼusi xchʼay koʼontone. Ta jtoj ta vokol ti laj kichʼ chanubtasel sventa jmuyubta Dios ta tsobobbail xchiʼuk li ta cholmantale».

 Chanobvun sventa li buchʼutik Achʼik to ta Betele

Kʼusi stu: Li chanun taje jaʼ sventa tskoltaik li buchʼutik achʼ to chkʼotik ta Betele, taje jaʼ sventa ti lekuk skʼupinik ti te chtunike.

Kʼu sjalil: 45 minuto ta xemana, taje vaklajuneb xemana chjalij.

Bu ch-echʼ: Ta Betel.

Buchʼutik xuʼ xbatik: Ti teuk chtun ta Betele o ti naka noʼox chkoltavan kʼuk sjalile, jun jabil o mas.

Kʼuxi ta tael: Jaʼ tstʼuj Betel ti buchʼu xuʼ xbat li ta chanobvun taje.

Demetrius, ti echʼ li ta chanobvun te van ta 1980 xi chale: «Li chanun taje la skoltaun sventa xlekub batel ti kʼuyelan ta jchan li Vivliae xchiʼuk la xchapanun sventa xitun ep jabiletik li ta Betele. Li jchanubtasvanejetike, li mantaletik xchiʼuk li tojobtaseletik laj kichʼ tee laj yakʼbeikun jnaʼ ti skʼanojun li Jeovae xchiʼuk ti lekuk xbat jkuxlejal li ta Betele».

Kaitlyn xi chale: «Jaʼ la skoltaun ta yakʼel ta koʼonton li kʼusi mas tsots skʼoplale: ti lekuk oyun ta mantale. Li Chanobvun sventa li buchʼutik Achʼik to ta Betele laj yakʼbeikun kil ti skʼan jkʼuxubin xchiʼuk ti xkojtikin mas li Jeovae, li snae xchiʼuk li steklumale».

Chanobvun sventa Moletik xchiʼuk Yajkoltaobbatak

Kʼusi stu: Xchanubtasel jkʼelvanejetik, moletik ta tsobobbail, bakʼintik xtoke chichʼik chanubtasel li yajkoltaobbatake, taje jaʼ sventa spas yuʼunik lek li yabtelike, ti snaʼikuk lek xchapanel xchiʼuk skʼelel li kʼusitik ta steklumal Jeovae (Hech. 20:28). Chichʼ kʼelbel skʼoplal vokoliletik, kʼusitik nopem xaʼiik spasel xchiʼuk kʼusitik chtun noʼox yuʼunik li tsobobbailetike. Taje ch-echʼ jayibuk jabil sventa x-echʼ li chanun taje, jaʼ ti kʼuxi kʼot ta nopel yuʼun li Jtsop Jbeiltasvaneje.

Kʼu sjalil: Oy xa ta jayibuk jabil yechʼel talele, chib kʼakʼal o chib kʼakʼal xchiʼuk oʼlol ta sventa li jkʼelvanejetike, jun kʼakʼal xchiʼuk oʼlol li chanun sventa moletike, pe li yajkoltaobbatake jaʼ jun kʼakʼal.

Bu ch-echʼ: Jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik.

Buchʼutik xuʼ xbatik: Jkʼelvanejetik, moletik ta tsobobbail o yajkoltaobbatak.

Kʼuxi ta tael: Jaʼ tstʼuj li jkʼelvanej ta sirkuito li moletik xchiʼuk li yajkoltaobbatak ti xuʼ xbatik li ta chanobvun taje. Li jkʼelvanejetike jaʼ tstʼuj li Betele.

«Akʼo mi ep kʼusitik chchanik ta jutuk noʼox yorail jaʼ chkoltaatik sventa xmuyubajik noʼox li moletike xchiʼuk ti lekuk yijik ta mantal —jech kʼuchaʼal chal Vivlia— li ta yabtel Jeova tspasbeike. Akʼo mi achʼik to o voʼone xa chtunik ta mol ta tsobobbail, chchanik skʼelel lek li xchijtak Jeovae xchiʼuk sventa jun noʼox me chaʼi sbaik ta skotolik.» (Quinn, ta olon.)

«Li chanubtasel taje jaʼ tskoltaunkutik sventa jkʼuxubinkutik mas li kʼusitik ta sventa mantale, chkichʼkutik pʼijubtasel li ta kʼusitik xibalik sbae xchiʼuk li mantaletik chkichʼkutike jaʼ sventa jkʼelkutik li chijetike. Toj echʼ noʼox lek yoʼonton li Jeovae.» (Michael.)

 Chanobvun sventa Abtelal ta Prekursor

Kʼusi stu: Chichʼ chanubtasel li prekursoretik sventa «[spas yuʼun li abtelal] ta spuquel Lequil Aʼyeje» (2 Tim. 4:5).

Kʼu sjalil: Chib xemana.

Bu ch-echʼ: Jaʼ tstʼuj li Betele xchiʼuk jutuk mu skotoluk veltae ta Salon sventa Tsobobbail.

Buchʼutik xuʼ xbatik: Prekursor regularetik ti jun xa jabil yakal chtunike o mas. *

Kʼuxi ta tael: Li buchʼutik xuʼ xbatik li ta chanun taje, jaʼ tstʼuj li jkʼelvanej ta sirkuitoe.

«Li chanun taje jaʼ skoltaojun sventa jtsal li vokoliletik ta jta ta cholmantale xchiʼuk li ta jkuxlejale —xi chal Lily (ta batsʼikʼob)—. Mas lekub ti kʼuyelan ta jchan li Jvivliae, ta xchanubtasel yantik xchiʼuk stunesel li Vivliae. Mas xa lek chapalun chkaʼi jba ta skoltael li yantike, ti jkolta li moletik xchiʼuk li ta xchʼiesel li tsobobbaile.»

Brenda, ti ayem xa chib velta ta chanun taje, xi chale: «Jaʼ la skoltaun sventa jaʼuk xkakʼ ta koʼonton mas li kʼusitik ta sventa mantale, ti jtsatsubtas li jol koʼontone xchiʼuk ti jkolta li yantike. ¡Toj echʼ noʼox lek yoʼonton li Jeovae!».

[Tsʼib ta yok vun]

Chanobvun sventa Moletik ta Tsobobbail

Kʼusi stu: Skoltael sventa spas lek yuʼun yabtelik li moletik ta tsobobbaile xchiʼuk ti xaʼibeikuk lek smelolal li mantale.

Kʼu sjalil: Voʼob kʼakʼal.

Bu ch-echʼ: Jaʼ tstʼuj li Betele xchiʼuk jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik.

Buchʼutik xuʼ xbatik: Moletik ta tsobobbail.

Kʼuxi ta tael: Jaʼ tstʼuj Betel ti buchʼu xuʼ xbat li ta chanobvun taje.

Kalbetik skʼoplal jun chibuk kʼusi laj yalik li buchʼutik ayik li ta chanun 92 ta Estados Unidose:

«Li chanune toj ep la skoltaun; la skoltaun sventa jkʼel jba ti kʼu kelane xchiʼuk ti kʼuxi jchabi li xchijtak Jeovae.»

«Li avie xuʼ xa jpatbe yoʼonton yantik sventa jaʼ xkal li kʼusi mas tsotsik skʼoplal chal ta Vivliae.»

«Li Kʼusi jchanoje te oy-o ta skotol jkuxlejal.»

Chanobvun sventa Jkʼelvanejetik ta Sirkuito o Distrito xchiʼuk Yajnilik

Kʼusi stu: Taje jaʼ chichʼik koltael li jkʼelvanejetik ta sirkuito o distrito sventa skʼelik lek li tsobobbailetike, ti «[xakʼ ta] yoʼntonic ta xcholel scʼop Diose, xchiʼuc [ti] xchanubtasvanique» (1 Tim. 5:17; 1 Ped. 5:2, 3).

Kʼu sjalil: Chib u.

Bu ch-echʼ: Jaʼ tstʼuj li Betele.

Buchʼutik xuʼ xbatik: Jkʼelvanejetik ta sirkuito o distrito.

Kʼuxi ta tael: Jaʼ tstʼuj Betel ti buchʼu xuʼ xbat li ta chanobvun taje xchiʼuk li yajnilike.

«Li avie mas xa oy ta koʼontonkutik ti kʼuyelan yichʼoj yabtel li Jesucristo ti jaʼ li Jolil ta s-organisasion Jeovae. Xkaʼibekutik smelolal ti skʼan jpatbekutik yoʼonton li kermanotakutike xchiʼuk ti jtsatsubtaskutik li jujun tsobobbailetike. Li kʼusi laj kaʼibekutik lek smelolale, akʼo mi oy bakʼintik chal mantal li jkʼelvanejetike xchiʼuk ti tstukʼibtasvanike, li kʼusi oy ta sbaike jaʼ ti skoltaik li ermanoetik sventa xakʼbeik ta ilel ti kʼanbilik yuʼun li Jeovae.» (Joel, ta baʼyel chanun ta 1999.)

 Chanobvun ta Vivlia sventa Ermanoetik ti Chʼabal Yajnilike

Kʼusi stu: Xchanubtasel moletik ta tsobobbail xchiʼuk li yajkoltaobbatak sventa spas yuʼunik lek li yabtelike. Jutuk mu skotoluk li buchʼu chnel yuʼunik li chanobvune chtakatik batel te noʼox ta slumalik ti bu chtun mas jcholmantaletike. Jlome xuʼ van xtakatik batel ta yan lum mi laj yalik ti xuʼ yuʼunike. Li jlome xuʼ x-abtejik kʼuchaʼal prekursor espesialetik ta kʼuk noʼox sjalil sventa sjamik batel yan yosilal cholmantal xchiʼuk xepajesik batel li cholmantal ta namal lumetike xchiʼuk ti bu vokol chijkʼote.

Kʼu sjalil: Chib u.

Bu ch-echʼ: Jaʼ tstʼuj li Betele xchiʼuk jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik.

Buchʼutik xuʼ xbatik: Viniketik ti muʼyuk yajnilike xchiʼuk ti yichʼojikuk 23 o 62 sjabilalike, ti mu masuk snaʼ x-ipajike xchiʼuk ti oyuk ta yoʼonton chbatik ti bu chtun mas jcholmantaletike (Mar. 10:29, 30). Skʼan ti oyuk xa ta chib jabil chtunik ta prekursor regulare xchiʼuk ti oyuk xa ta chibuk jabil jech-o yakal chtun ta mol ta tsobobbail o ta yajkoltaobba mole.

Kʼuxi ta tael: Li ta Mukʼta Tsobajeletik ta chib kʼakʼale, te chichʼ alel ti xuʼ xbatik ta tsobajel li buchʼu oy ta yoʼontonike, ti jaʼ te chichʼ albel mas skʼoplale.

Xi chal Rick ti ay li ta chanun 23 ta Estados Unidose: «Kʼalal laj kakʼ ta koʼonton li chanun taje, li xchʼul espiritu Jeovae la sjelbun li jkuxlejale. Kʼalal oy kʼusi chakʼ apas li Jeovae, tskoltaot ta spasel. Mi jaʼ laj avakʼ ta avoʼonton spasbel li kʼusi tskʼan yoʼonton Jeova ti maʼuk li kʼusi chakʼan atuke, li Jeovae jaʼ chakʼbot avipal».

Li Andreas ti te chtun ta Alemaniae, xi chale: «Laj kaʼibe smelolal ti jaʼ jun skʼelobil juʼelal avi kʼakʼal li s-organisasion Jeovae. Li kʼusi te la jchane, jaʼ te la xchapanun ta spasel skotol li abtelal skʼan pasele. Jech noxtok, li skʼelobiltak ta Vivliae jaʼ te la xchanubtasun li kʼusi toj tsots skʼoplale: sventa jtatik li melel muyubajele jaʼ ti xijtun ta stojolal li kermanotaktike xchiʼuk ta stojolal li Jeovae».

Chanobvun ta Vivlia sventa Yajtsʼaklomtak Cristo ti Nupunemike

Kʼusi stu: Jaʼ ti xichʼik chapanel lek li nupultsʼakaletik sventa lek xtunik ta stojolal Jeova xchiʼuk ti xichʼik tunesel yuʼun li s-organisasione. Jutuk mu skotoluk li buchʼu chnel yuʼunik li chanune chtakatik batel te noʼox ta slumalik ti bu tskʼanik mas koltaele. Jlome xuʼ van xtakatik batel ta yan lum mi laj yalik ti xuʼ yuʼunike. Li jlome xuʼ x-abtejik kʼuchaʼal prekursor espesialetik ta kʼuk noʼox sjalil sventa sjamik batel yan yosilal cholmantal xchiʼuk xepajesik batel li cholmantal ta namal lumetike xchiʼuk ti bu vokol chijkʼote.

Kʼu sjalil: Chib u.

Bu ch-echʼ: Ta Estados Unidos, pe li ta septiembre ta 2012 chlik echʼuk ta junantik lumetik, jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik.

Buchʼutik xuʼ xbatik: Nupultsʼakaletik ti 25 o 50 sjabilalike, ti mu masuk snaʼ x-ipajike, ti xuʼ yuʼunik chbat tunikuk ti bu mas chtun jcholmantaletike xchiʼuk ti jechuk stalelalik kʼuchaʼal li Isaías ti xi laj yale: «Liʼ oyun vuʼune, tacun batel» (Is. 6:8). Jech noxtok, skʼan ti oyuk xa ta chib jabil snupunelike xchiʼuk ti chibuk xa jabil jech-o yakal chtunik ta tsʼakal orae. Li malalile skʼan ti oyuk xa ta chib jabil jech-o yakal chtun ta mol ta tsobobbail o ta yajkoltaobba.

Kʼuxi ta tael: Li ta Mukʼta Tsobajeletik ta oxib kʼakʼale, chichʼ alel ti xuʼ chbatik ta tsobajel li buchʼu oy ta yoʼontonike, ti jaʼ te chichʼ albel mas skʼoplale. Mi muʼyuk ch-echʼ li tsobajeletik ta alumal taje, pe oy ta avoʼontonik chabatik li ta chanune, xuʼ xatsʼibajik batel ta Betel.

«Li vaxakib xemana taje, chjelbat xkuxlejalik li nupultsʼakaletik sventa jaʼ xtunik mas ta stojolal li Jeovae. Oy ta koʼontonkutik ti oyuk noʼox smelolal xkichʼ batel li jkuxlejalkutike xchiʼuk ti lek jtuneskutik li jujun kʼakʼal ch-echʼe.» (Eric xchiʼuk Corina, ta olon; ta baʼyel chanun ta 2011.)

Chanobvun sventa Vivlia ta Galaad yuʼun Watchtower

Kʼusi stu: Jaʼ sventa chichʼik chapanel jchanunetik sventa xtunik ta misioneroal ti bu oy ep jnaklejetike, jech kʼuchaʼal jkʼelvanejetik o betelitaetik. Jaʼ sventa tspatik oʼontonal xchiʼuk ch-abtejik ta cholmantal o ta Beteletik.

Kʼu sjalil: Voʼob u.

Bu ch-echʼ: Ta Smeʼ Chanubtasel yuʼun Watchtower, ta Patterson (Nueva York).

Buchʼutik xuʼ xbatik: Nupultsʼakaletik ti chtunik xa ta tsʼakal orae, jaʼ xkaltik, ti yakal xa chtunik ta misioneroetik ti muʼyuk to ayemik ta chanune, prekursor espesialetik, jkʼelvanejetik o betelitaetik. Skʼan oxibuk xa jabil jech-o chtunik ta tsʼakal ora xchaʼvoʼalik xchiʼuk skʼan lekuk snaʼik xkʼopojik, skʼelik xchiʼuk stsʼibaik li inglese.

Kʼuxi ta tael: Li Komite sventa Betele jaʼ oy ta sba chalbe nupultsʼakaletik sventa xbatik li ta chanun taje.

Li Lade xchiʼuk Monique ta Estados Unidose, li avie te xa chtunik ta África. Xi chal li Lade: «Li Chanobvun ta Galaade la xchapanunkutik sventa xibatkutik ta buyuk noʼox xchiʼuk la xchapanunkutik sventa jmoj xi-abtejkutik xchiʼuk li kermanotakutike».

Xi to chal li Monique: «Kʼalal chkakʼ ta jkuxlejal li kʼusi ta jchan ta Skʼop Diose jaʼ tskoltaun sventa ximuyubaj noʼox ti bu tstakikun batele. Li muyubajel chkaʼie jaʼ sprevail ti chkʼanvan li Jeovae».

Chanobvun sventa Buchʼutik Sbainojik Betel xchiʼuk Yajnilik

Kʼusi stu: Taje jaʼ chichʼik koltael li Komite sventa Betel sventa snaʼikuk xchapanel li abtelaletik te ta Betele, ti snaʼikuk kʼusi xuʼ spasik li ta tsobobbailetike, ta sventa li jkʼelvanejetik ta sirkuito o distritoe, ta sventa li sjelubtasel ta yan kʼopetik li vunetike, spasel imprimir vunetik xchiʼuk stakel batel li vunetike.

Kʼu sjalil: Chib u.

Bu ch-echʼ: Ta Smeʼ Chanubtasel yuʼun Watchtower, ta Patterson (Nueva York).

Buchʼutik xuʼ xbatik: Ti jaʼuk Komite sventa Betel o mi jaʼ Komite ta Mukʼta lum o mi laj yichʼ akʼbel li yabtelik jech kʼuchaʼal taje.

Kʼuxi ta tael: Jaʼ tstʼuj li Jtsop Jbeiltasvanej ti buchʼu xuʼ xbat li ta chanobvun taje xchiʼuk li yajnilike.

Lowell xchiʼuk Cara, ti chanunajik ta numero 25, ti chtunik ta Nigeriae. Xi chal li Lowelle: «Li chanune jaʼ la svulesbun ta jol akʼo mi mu kʼusi xkutik o kʼusiuk abtelal xakʼbeikun, sventa lekuk xil Jeova li kʼusi ta jpastike, jaʼ ti lekuk oyutik ta mantale. Jech xtok, laj yakʼ jnaʼ ti tsots skʼoplal ti jchanbetik ti kʼuyelan chakʼbe ta ilel kʼanelal yajtuneltak li Jeovae».

Xi to chal li Carae: «Ep kʼusitik la jnop ta sventa li kʼusi laj yalbeikune: mi mu x-albe avuʼun lek smelolale, skʼan xachan baʼyel kʼalal muʼyuk to chachanubtas li yantike».

[Lokʼol ta pajina 13]

[Lokʼol ta pajina 14]

[Lokʼol ta pajina 15]

[Lokʼol ta pajina 16]