Kruked Fasin—?I Kam Antap Olsem Wanem?
Kruked Fasin—?I Kam Antap Olsem Wanem?
“Kampani we mi wok long hem, i mekem sam wok blong wan haeman blong gavman long ples blong mi. Plante taem mifala i mas wet tu no tri manis blong hem i pem mifala. Be i no longtaem i pas, wan man blong gavman i ring long mi mo i talem se sipos mifala i givim mane long hem, hem i save mekem se haeman ya i pem mifala hareap.”—JON. *
?OLSEM wanem? ?Wan man i mekem kruked fasin long yu finis? Maet kruked fasin we yu kasem i no olsem hemia we yumi tokbaot antap, be ating yu harem nogud from samting we i kamaot from kruked fasin we man i mekem.
Wan ogenaesesen we nem blong hem Transparency International (TI), i mekem wan ripot we oli kolem Corruption Perceptions Index. * Ripot blong hem blong 2011 i talem se, “bighaf blong ol 183 kantri mo teritori oli fulap long kruked fasin.” Ogenaesesen ya i talem se ripot blong 2009 i soemaot se kruked fasin i kam antap bigwan. Hem i talem se: “Kruked fasin i kasem olgeta ples long wol.”
Samtaem, kruked fasin i save spolem laef blong plante man. Magasin ya Time, i talem se plante man we oli ded taem bigfala graon i seksek long Haiti long 2010, hemia from “kruked fasin mo fasin ya we man i no kea.” Hem i talem se: “Ol man oli givim mane long ol man blong gavman, blong oli no jekem sipos ol bigfala haos we oli wokem oli strong no nogat.”
?I gat rod blong finisim kruked fasin blong olwe? Blong kasem ansa blong kwestin ya, yumi mas kasem save stamba blong kruked fasin. Bambae yumi tokbaot samting ya long haf we i kam biaen.
[Ol futnot]
^ par. 2 Mifala i jenisim nem blong hem.
^ par. 4 “Corruption Perceptions Index i tokbaot ol kantri mo kruked fasin we oli ting se i kamaot long ol ofis blong gavman.”—Transparency International.
[Tok blong makem poen long pej 3]
“Man we i gat kruked fasin, hem i yusum haenem blong hem blong kasem samting we hem wan i wantem. Ale fasin ya i spolem laef blong ol man we oli trastem hem, nao oli no moa glad.”—TRANSPARENCY INTERNATIONAL
