Maka a Bhita Nau o Ahatu

“Kioso ki ngi mona o ima ia iibha iene mu bhanga ku ahatu, ki ngi mesena ku kula phala ku kala ué ngi muhatu.” —ZAHRA, UALA NI 15 DIA MIVU, a mu tange mu kadivulu GEO, mu dimi dia França.

O IZUELU ia kilumba kiki, iala ku mbandu ia kadilu, ilondekesa o ima ia iibha iene mu bhita na-iu o ahatu—ku mundu uoso, o usuéia ni ku kamba ku a bhana valolo. Di longe o kidi kiki:

● Ku a zemba. Mu ixi ia Ásia, o jitata a uabhela dingi o an’a mala, an’a ahatu ndenge. Ku muvu ua 2011 o jurnale ia ONU iambe kuma 134 a mazunda ku mundu uoso, bhenge-bhenge an’a ahatu a mu fuá bhu pholo ia athu, ni kua selula, ni ujibhangânga ua tuana, ni ku kamba o ku a suua.

● Ulongelu. Ku mundu uoso, saí ahatu adiakimi ni ilumba, a di longo ngó bhofele mu ji xikola.

● Ku jijidika ku zeka ni muhatu. Kuene mazunda a iiadi ni samanu ndenge, a ahatu ene mu a jijidika ku mala mâ ku zeka kumoxi, mu jixi muenio-mo kuene athu amba kuila ki kituxi.

● Sauidi. Saí jixi, mu ithangana iiadi, muhatu uemita ufuá, mba ufuá mu kithangana kia ku vuala mukonda dia ku kamba dotolo phala ku mu kuatekesa.

● O ima ia ahatu. Sumbala o ahatu a kuna kiavulu dingi o idima ku mundu, maji né kiki, mu jixi javulu, o ahatu kala ni kijingu kia a tokala phala ku kala ni ima iâ, mba ku lundula o idima iâ mba o mábhia mâ.

Mukonda diahi o ahatu ene mu a katula o kijingu kia a tokala? Saí madiembu a kaiela o ilongesu ia jingeleja ni ijila i suínisa o ku talesa hadi ku ahatu. Saí kadivulu ka França, ka tange ia lungu ni mufundixi mukua India, a mu ixana Chandra Rami Chopra, muéne uambe: “O jingeleja joso jala ni kitumu kála kiki: “O jingeleja jene mu suínisa o ukexilu ua ku kamba ku bhana valolo ku ahatu.”

Eie u xikina o milongi íii? O kuila o Bibidia ki i bhana valolo ku ahatu kala kia londekesa o madivulu a jingeleja? Saí athu a banza kuila saí jivelusu ja Bibidia ji suínisa o ukexilu iú. Maji kiebhi Nzambi ia Bibidia, kia mona o ahatu? Sumbala, saí athu ejiia o maka enhá, maji o ku di longa ihi i zuela o Bibidia ia lungu ni maka enhá, kua-nda tu kuatekesa ku sanga o itambuijilu.

[Foto Muxinda ua tokala ku bandu 3]

© G.M.B. Akash/Jifoto ja Panos