Kurapsion—Kasin Nagagawa ’ya ed Anggan Iner?
“Walay kontrata na kompanya mi ed sakey ya munisipyo. Tan mabetbet ya manalagar kami ni duara odino taloran bulan insan ira manbayar. Balet nen imbeneg labat et tinawagan ak na sakey ya empleyado ra. Imbaga ton naala min tampol so bayar no pasuksokan mi.”—JOHN. *
ASALIM lay abiktima na kurapsion? No asalim la, ompan dumad satay naeksperiensya nen John. Balet, seguradon aproblema ka met.
Imbaga na Transparency International’s (TI) 2011 Corruption Perceptions Index, * ya “maslak ed saray 183 a bansan sinurvey et ag-akasabi ed 5 so score da diad scale ya 0 (graben kurapsion) anggad 10 (anggapoy kurapsion).” Diad 2009 annual report na TI, oniay imbuking da: “Malinew ya anggan iner et walay kurapsion.”
“Say kurapsion et panangabuso ed inter ya pakayari pian onyaman. Kaskasian iray totoon akadepende so bilay, anapan, odino liket da ed katooran na saray walad autoridad.”—TRANSPARENCY INTERNATIONAL
No maminsan, teribli so resulta na kurapsion. Singa bilang, inreport na Time magazine ya “say kurapsion tan inkamakasarili” so rason no akin a dakel so inatey sanen yinmegyeg ed Haiti nen 2010. Onia ni inreport da: “Maslak ed saray building et impaalagey ya ag-inkonsultad saray engineer tan apasuksokan iray inspektor na gobierno.”
Wala kasi permanentin solusyon ed kurapsion? Pian naebatan itan, kaukolan tayo nin amtaen no antoy sengegan na kurapsion. Pantongtongan tayo iya ed sayay onsublay ya artikulo.
