ÍBINI gabafu lan figóu wawagu, ubóu le ídanbei wawinwanda ani gabafu ligía Mafia, gayarati wararamun lun ǘrüwagubei ubafu le. Ida? Lau wayarafadun lun Bungiu luma lau wafalaruni adundehani tídangiñeti Bíbülia le arihúalibei luagu saragu sígulu barǘ lan buiti. Akutiha wamá bián hénpulu.

ADUNDEHANI TÍDANGIÑETI BÍBÜLIA: “Máyeiha huméi igaburi ni échuni le lídanbei ubóu le” (Rómana 12:2; Nueva Traducción Viviente [NTV]).

Sügǘ inarüniti: Guilherme, aban wügüri súdiniti ani awanseti lidan bísinisi lidan ageiraü Brasil, ariñagati hénrengu lan larufudúniwa aban igaburi harumati: “Kamaniti lagumeserun aban gürigia lánina bísinisi íweruha, gayarati ladüga lan héredun luagu lun lagunfulirun lau le tamuriahabei kónpeni o lun meferidirunlani luádigimari ladüga hanarime lan hásügüragun gürigia lánina bísinisi lidan ubóu le. Maribanti harihini saragu gürigia híchugun o herisibirun idewesei lun magunfulirúniwa lan lúrudu. Dan le labureme ban bísinisi ani gíbeti bani buligasion hénrenguti lun bóuserun lau úaraguni”.

Lau sun lira, anihamémegua Guilherme óusera lau úaraguni. Ariñagati: “Íbini tidan aban kónpeni le ñein lubéi ligirúa furumiñeguarügü gürigia lun ladügüni le labusenrubei, gayarati larufudúniwa aban laruman igaburi. Lun gayara lan ladügǘniwa katei le, mosu lafalaruni gürigia lúrudu le arufudubalin ka lan buídubei lidan ibagari. Íderagua táadina Bíbülia asubudirei ka lan buiti lanügübei louserúniwa lau úaraguni: aban saminaü darangilati, ñuruguaü luma inebesei le wasandirubei wawougua. Gayarati giñe gani lan gürigia le óuserubei lau úaraguni lubuidun efekütu hawagu gürigia ha geyegubaña lau”.

ADUNDEHANI TÍDANGIÑETI BÍBÜLIA: “Ánhaña ha busenbaña harisidun, mawandun hamuti óuchawaguni, aba hábürühan tidoun lisadaraana saragu lagübüri aritaguni le anügübaliña gürigia lidoun günringuaü luma asiadirúni. Línsiñegu seinsu ligía lílagülebei sun luwuyeri wuribani” (1 Timotéu 6:9, 10).

Sügǘ inarüniti: André tabureme aban kónpeni to awadigimariduboun lidan lafidihóuniwa katei burí le adügübei lun gayarabei lan hawinwandun gürigia chóuruñu, ani hadan gürigia ha únbaña hawadigimarida anihein aban óundaruni wéiriti lánina táhurerun bali. Lidan aban ókaasion, lárigiñebei aban áhureruni súdiniti, aba lidin André tidoun áfisi to ñein lubéi hafayeirúa gürigia ani aba lederegerunu lani resiwu luagu le ladügübei. Lídanti fulasu le ñein lubéi gamanihari hamá lau seinsu bereseguñanu abahüdei seinsu le habihibei lídangiñe talugurahóun boletu. Keiti tárühali lubéi, aba lóufudahan le arihibei lau léibugun sun katei afayeihaña ha íchahabalin katei burí le hemegeirubei, André ligía aban hádangiñe gürigia hagía.

Ariñagati André: “Danbei le nagiribudun múnadoun aba níchugun fe luagu rúhali lan buga arihiti tau áfisi lóugiñe seinsu le yebe lunbei lafayeiruni nun. Gunfunranda numuti luagu ibidiñebei lan lun kátima lan un líchugei seinsu ligía, subudi numuti giñe luagu mosu  lanme lafayeiruni fugiabu wügüri ligía seinsu lídangiñe lubuseedun, ábati desidírü nan nagiribudun. Áfaaguatina nebelurun haganaguagiñe bürübünu gürigia ha ñǘdünbaña arihei tahurerun bali lun nagiribudagüdüni seinsu le úabei yu lan nun. Aba taweiridun lanigi arihiti tau áfisi ladüga magiribudunñahagiña lan gürigia seinsu lun”.

Aba lasigirun André ariñaga: “Adügati nóuserun lau úaraguni lun inebe nan lun ábuti le. Sügühali fiú irumu, ani hádangiñe sun meha ha nadagimeinbaña furumiñe luma óundaruni hánina áhurerutiña bali tuguya, áurügaadina nadagimein houn. Seremei nafalaruni adundehani lánina laruman ibagari le tídanbei Bíbülia, buiti ladimurehóun nuagu”.

Ruti iderebugu woun wasubudirun gayara lan líderaguniwa Bungiu lun wararamun lun katei burí le gayarabei ladügün lun múaran wamá. Gama lumoun, maweiyasunbaña gürigia agidarei múarani sunsuinagubei lau sun áfaaguni le hadügübei. Hanarime buriti katei le ñéingiñe lubéi liabin múarani, ligía siñá lubéi hagumuchun gürigia gafigountiña lau liwiye igaburi láurügü habafu. Mini lan san katei le magumuchunbei lan liwiye igaburi? Arufuda lumuti lagumuhóun arütíkulu óunabagülei luáguti emenigini le tíchugubei Bíbülia.