Eski i posib pour onnet dan en lemonn koronpi?

“Nou oule fer sa ki byen dan tou sirkonstans.”​—EBRE 13:18.

MALGRE nou lenperfeksyon, sa lemonn ki nou pe viv ladan, ek presyon ki Dyab i met lo nou, nou kapab reziste zot lenfliyans! Ki mannyer sa? Par apros avek Bondye e aplik bann prensip diny konfyans ki sorti dan son Parol. Annou egzamin de legzanp.

PRENSIP LABIB: “Pa swiv bann koutim sa monn konmela.”​—Romen 12:2.

En vre leksperyans: Guilherme i en Brezilyen ki son biznes i mars byen. I admet ki i pa fasil pour touzour onnet. I dir: “En biznesmenn i kapab fasilman konmans azir dan en fason malonnet, petet akoz presyon pour atenn bann lobzektif son lakonpannyen oubyen pour sirviv dan sa lemonn kot i annan bokou konpetisyon.” I azoute: “Pour en kantite dimoun, i normal pour resevwar e donn gous. Ler en dimoun i konmans son biznes, i annan en gro responsabilite lo kote finans, e i en defi pour onnet.”

Malgre sa, Guilherme ti reisi reste onnet. I dir: “Menm dan en lanvironnman biznes kot tou i permet, i posib pour reste onnet. Ou bezwen annan en bon valer moral. Labib in ed mwan vwar ki byenfe i annan pour reste onnet. En dimoun onnet i annan en konsyans kler, lape lespri, e respe pour son prop lekor. I kapab annan en bon lenfliyans lo bann dimoun dan son lantouraz.”

PRENSIP LABIB: “Bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler. Lanmour larzan i rasin tou lemal.”​—1 Timote 6:9, 10.

En vre leksperyans: André i ansarz en lakonpannyen ki enstal bann sistenm sekirite. Enn son kliyan i en gran klib foutbol. En fwa, apre en gran match, André ti al kot biro ladministrasyon e donn zot son bil pour travay ki i ti’n fer. Bann dimoun dan departman finans ti ankor pe kont larzan tiket. Vi ki i ti vreman tar, sa soupervayzer ti depese pour pey bann travayer, enkli André.

André i rakonte: “Ler mon ti pe al dan lakour, mon ti remarke ki sa soupervayzer ti’n pey mwan an plis. Mon ti konnen ki probableman i pa ti pou zanmen konnen lekel ki i ti’n donn larzan an plis. Me mon ti osi konnen ki sa zonm ti pou bezwen pey dan son pos sa larzan ki ti manke. Mon ti deside retournen. Mon ti arive pas parmi sa lafoul siporter e rann sa soupervayzer sa larzan an plis. I ti vreman etonnen. Zanmen en dimoun ti’n deza retournen pour rann li larzan.”

 André ti azoute: “Lefet ki mon ti azir onnet, sa soupervayzer ti montre respe pour mwan. En bon pe lannen in pase, me parmi tou bann ki ti travay pour sa klib, zis mwan ki ankor annan kontra avek sa klib. Mon vreman rekonesan ki prensip moral o nivo Labib in ed mwan pour annan en bon repitasyon.”

I ankourazan pour konnen ki nou kapab reziste bann move lenfliyans avek led Bondye. Me zis avek nou prop zefor nou pa pou zanmen kapab elimin koripsyon. Son lakoz i an deor kontrol bann imen enparfe, e zot pa pou zanmen kapab rezourd sa problenm zot tousel. Me eski sa i vedir ki koripsyon pa pou zanmen arete? Sa dernyen lartik dan sa seri pou donn larepons ankourazan sorti dan Labib.