ƆWƆ nuhua kɛ ɛtane mɔɔ bɛvale bɛwole yɛ, ewiade ne mɔɔ yɛwɔ nu nee Abɔnsam bahola ava ngyegyelɛ ara yɛ nwo zo ɛdeɛ, noko yɛbahola yɛagyinla ɔ nloa! Wɔ adenle boni azo? Ɔlua Nyamenle mɔɔ yɛbabikye ye na yɛava ngyinlazo mɔɔ ɛboa wɔ ɛvolɛ dɔɔnwo anu mɔɔ wɔ ye Edwɛkɛ Baebolo ne anu yɛali gyima la azo. Suzu neazo nwiɔ ɛhye mɔ anwo.

BAEBOLO NGYINLAZO: “Bɛmmamaa ewiade amaamuo di bɛ adwenle.”—Wulomuma 12:2.

Ɛbɛlabɔlɛ nu anwubielɛ: Guilherme le gualilɛnli mɔɔ ninyɛne kɔ boɛ maa ye mɔɔ ɔwɔ Brazil. Ɔdie ɔto nu kɛ ɔyɛ se kɛ awie kɛha nɔhalɛ. Ɔka kɛ: “Ɔnyɛ se kɛ awie mɔɔ di gua la babɔ ɔ bo abɔ adalɛ, ɔluakɛ bie a ɔkpondɛ kɛ ɔdwu kɔmpɛlɛ ne bodane nwo anzɛɛ ɔngulo kɛ ye gyima kɛzɛkye. Menli dɔɔnwo bu bɛsabowulalɛ nee ye ɛlielɛ kɛ debie mɔɔ nvonleɛ biala ɛnle nwo. Saa awie buke gyima fofolɛ na kakɛ kpole la ɔ nwo zo a, ɔyɛ se kɛ ɔbali nɔhalɛ.”

Noko akee, Guilherme ɛhola ɛgyinla nɔhalɛ mɔɔ bɛnli la anwo ngyegyelɛ nloa bɔkɔɔ. Ɔka kɛ: “Ɛbahola wɔali nɔhalɛ wɔ gyima mɔɔ bɛdie bɛto nu kɛ ɔnva nwo mɔɔ bɛbayɛ biala la menli bawua ninyɛne wɔ ɛkɛ la bɔbɔ anu. Ɔwɔ kɛ ɛnyia ɛbɛla kpalɛ nwo ngyinlazo mɔɔ ɔdi munli. Baebolo ne ɛboa me yemaa menwu nvasoɛ mɔɔ wɔ nɔhalɛlilɛ zo la. Awie mɔɔ di nɔhalɛ la lɛ adwenle mɔɔ anu te, anzondwolɛ nee ɛbulɛ. Ɔbahola yeaboa bɛdabɛ mɔɔ bɛbikye ye la kpalɛ.”

BAEBOLO NGYINLAZO: “Bɛdabɛ mɔɔ bɛkpondɛ bɛ nwo bɛanyia la tɔ ngyegyelɛ nu, na munzule atiakunluwɔzo mgbane mgbane mɔɔ sɛkye menli, minli bɛ bo zo la kye bɛ wɔ ye ɛhane nu. Ɔluakɛ ezukoa nwo anyebolo le munzule muala abo ndinli; bie mɔ anye ɛbolo ye ɛkpondɛlɛ somaa yemaa bɛvi diedi ne anwo mɔɔ akee nyane ala a bɛdi a.”—1 Temɔte 6:9, 10.

Ɛbɛlabɔlɛ nu anwubielɛ: André le gyima bie mɔɔ bɛyɛ banebɔlɛ nwo ngyehyɛleɛ la amenle. Bɔɔlo ɛbɔlɛ eku kpole bie boka menli mɔɔ bɛhyehyɛ ninyɛne bɛmaa bɛ la anwo. Kenle ko bie mɔɔ ɛnee bɛbɔ bɔɔlo kpole bie bɛwie la, André hɔle mgbanyima ne mɔ ɛkɛ na ɔvale ninyɛne mɔɔ bɛliele la anwo kɛlata ɔmanle bɛ amaa bɛanwu gyima mɔɔ ɔyɛle la. Ɛnee menli mɔɔ nea ezukoa zo la anye ɛbolo ɛlɛtia bɛ tikiti ne anwo ezukoa ne. Kɛmɔ ɛnee mekɛ ɛhɔ la ati, gyimazoneavolɛ ne duale André nee menli mɔɔ rɛlɛle bɛ ninyɛne la kakɛ ndɛndɛ.

André hanle kɛ, “Mɔɔ melua adenle zo melɛkɔ sua nu la, menwunle kɛ gyimazoneavolɛ ne ɛdua ezukoa ne yemaa yebo zolɛ. Ɛnee meze ye wienyi kɛ ɔnrɛnwu ahenle mɔɔ ye ezukoa ɛdeɛ ne bole zolɛ la. Noko ɛnee meze kɛ nrenya ɛhye mɔɔ ɛnze nwolɛ bie la bava ye  kodoku nu ezukoa a yeadua kakɛ ne a! Menzile kpɔkɛ kɛ mesia. Membɔle mɔdenle menwolole menli dɔɔnwo ne avinli na menvale ezukoa ne mɔɔ ɛbo zo la mengɔmanle ye. Ɔzinli gyimazoneavolɛ ne anwo kpole. Awie biala ɛtɛsianenle ezukoa ɛtɛmanle ye ɛlɛ.”

André doale zolɛ kɛ, “Nɔhalɛlilɛ ɛhye manle gyimazoneavolɛ ne bule me kpalɛ. Ɛvolɛ dɔɔnwo ɛze ɛhɔ, noko menli mɔɔ ɛnee bɛlɛ bɛ ninyɛne la, me ngomekye ala a me nee bɛ tɛyɛ gyima a. Me nye ɛlie kpole kɛ Baebolo ngyinlazo mɔɔ mefa mebɔ me ɛbɛla la ɛmaa menyia duma kpalɛ la.”

Ɔyɛ anyelielɛ kɛ yɛnwu ye kɛ, ɔlua Nyamenle moalɛ zo, yɛbahola yeakpo nzisi nwo sɔnea biala la. Noko akee, sonla mɔdenlebɔlɛ ɛnrɛhola ɛnrɛye nzisi ɛnrɛvi ɛkɛ bɔkɔɔ. Mɔɔ fa ba la anu yɛ se—alesama mɔɔ ɛnli munli la ɛnrɛhola ɛnrɛyɛ nwolɛ ɛhwee. Asoo ɛhye kile kɛ nzisi ɛnrɛra ye awieleɛ ɛlɛ ɔ? Edwɛkɛ mɔɔ li foa ɛhye awieleɛ la bamaa yeanwu Baebolo nu mualɛ mɔɔ kyekye yɛ rɛle la.