AUNKE nos imperfekshon, e mundu ku nos ta biba aden i Diabel ta pone hopi preshon riba nos, nos por resistí nan influensia. Kon asina? E klave ta pa hala serka Dios i apliká prinsipio bíbliko. Semper e prinsipionan akí a duna bon resultado. Laga nos konsiderá dos di nan.

PRINSIPIO BÍBLIKO: “Stòp di laga e mundu akí forma boso.”—Romanonan 12:2.

Eksperensia di bida real: Guilherme, un komersiante eksitoso na Brazil, ta atmití ku no ta fásil pa ta onesto. E ta bisa: “E preshon pa logra metanan di e kompania òf pa tene kabes riba awa den e mundu kompetitivo akí por pone un komersiante bira desonesto. Mayoria di hende ta mira pasamentu di plaka bou di mesa komo algu masha normal. No ta fásil pa ta onesto ora bo ta un komersiante ku tin ku kumpli ku obligashonnan finansiero pisá.”

Apesar di esei, Guilherme a logra resistí e preshon pa bira desonesto. E ta bisa: “Bo por ta onesto asta den un ambiente komersial kaminda korupshon ta na òrdu di dia. Bo mester tin balornan moral haltu. Beibel a yuda mi mira e balor di onestidat. Un persona ku ta onesto tin un konsenshi limpi, pas interno i outo-estima. E por tin un influensia positivo riba e hendenan rònt di dje.”

PRINSIPIO BÍBLIKO: “Hende ku ta determiná pa bira riku ta kai den tentashon, den trampa i den hopi deseo bobo i perhudisial ku ta hiba hende na destrukshon i ruina. Pasobra amor pa plaka ta rais di tur sorto di kos perhudisial.”—1 Timoteo 6:9, 10.

Eksperensia di bida real: André ta doño di un kompania ku ta instalá sistema di siguridat. Un di su klientenan ta un klup grandi di futbòl. Un biaha, despues di un partido importante, André a bai na ofisina di e klup pa entregá un faktura di un trabou ku el a hasi. Na e momento ei ainda nan tabata konta loke a drenta na benta di karchi. Komo ku ya a bira lat, e supervisor purá-purá a bira paga tur e hendenan ku a bin kobra, inkluyendo André.

André ta konta: “Riba kaminda pa kas mi a ripará ku mi a haña sèn di mas, i mi tabata sa ku e supervisor nunka lo por a saka afó ta ken el a paga di mas. Pero tambe mi tabata sa ku e pober hòmber lo mester a paga e diferensia for di su mes saku. Mi a disidí di bai bèk. Mi a logra pèrta pasa meimei di un grupo di fanátiko i entregá e sèn di mas. E supervisor a keda babuká, pasobra nunka niun hende no a yega di trese sèn ku nan a haña di mas bèk.”

 André ta sigui konta: “Mi onestidat a pone ku mi a gana rèspèt di e supervisor. Awe, un par di aña despues, di tur e kompanianan ku e klup tabatin kontrakt kuné e tempu ei, esun di mi ta e úniko ku te ainda e klup ta traha kuné. Mi ta kontentu ku mi ta apliká prinsipionan moral haltu di Beibel pasobra nan a yuda mi gana un bon reputashon.”

Ku yudansa di Dios nos tambe por resistí influensia negativo. Esei no ta un gran animashon? Ma esfuersonan individual nunka por kaba ku korupshon kompletamente. Sí, e raisnan di korupshon ta asina hundu ku hende imperfekto no por ranka nan riba nan mes forsa. Esaki ta nifiká ku hende lo tin ku siña biba ku korupshon? E último artíkulo di e seri akí lo resaltá e bunita speransa ku Beibel ta duna.