HANUFUDETÜN san, kei ha híbiri gürigia, luéi máranina lan liwiye igaburi ani magumuchagunbei lan sunsuinagubei? Anhein ítara liña lubéi, gébunati hanufudedun. Lidan sun dan le sügühalibei hóuchaaña gürigia sun luwuyeri arúeihani le uágubei gayara lan lasaminarúniwa. Gama lumoun, mibihingiña hagidaruni liwiye igaburi sunsuinagubei. Gayarati funa san wagurabun lachülürün weyu lun úaragua hamá sun gürigia?

Ma wagundan ariñaga tan Bíbülia lachülürüba lan weyu ligía! Ariñagatu Bíbülia woun málühali lan Bungiu agumucha lau liwiye igaburi ubouagugiñe. Ida luba ladügüni? Layusurubei Larúeihan, aban agumadihani le siélubei le lunbei laranseruni Ubóu sunsuinagubei. Ligiaméme Arúeihani le uágubei lariñaga Hesusu houn lani disipulugu lun hamuriahani lun liabin lidan hafurieidun. Lidan furíeigi le subudiwabei kei Wáguchi Bungiu, ariñagati Hesusu: “Ñǘbuinla barúeihan; adügüwalá bugundan ya ubouagu” (Matéu 6:10).

Ariñagatu Bíbülia lidan aban profesía luagu Hesukrístu le urúeibei lidan Arúeihani le: “Lesefurubaña gudemetiña ha ayumuragubaña, hama giñe ha míderawagunbaña. Gudemehabubei houn ha gudemebaña, lesefurubei habagari gudemetiña. Lesefurubaña hawéi ha óuseragubaliña” (Sálumu 72:12-14). Según larufuduni bérusu le rúguati Hesusu lungua lidoun hafulasun gürigia ha asufurirubaña ladüga liwiye igaburi ani lagumuchuba lau óuserawaguni. Ma ruti wasubudiruni katei le dǘgüdaguaü woun?

Lau Arúeihani lúhaburugu urúei gudemehabuti ani gabafuti le, lagumuchuba Larúeihan Bungiu lau liwiye igaburi le aniheinbei lidan Ubóu le. Ida? Lau lagumuchun lau ǘrüwa katei le adügübei lun ñein lan liwiye igaburi.

Uguñe weyu, sun wagía mosu wageindagun luma figóu le wádanbei le ínchahabaliwa lun wawouguounrügü lan wasaminara (Rómana 7:21-23). Íbini ítara, añahein gürigia buítiña ha busenbaña hadügüni le buídubei. Ánhaña afiñera luagu gayara lan lesefuruniña lounwen Hesusu gayarati ferudunawa lan hafigoun (1 Huan 1:7, 9). * Gánibaña gürigia ha chansi lun hasagarun buiti lídangiñe katei wéiritimati le ladügübei Bungiu ladüga línsiñehabu, ítara kei waliihani lidan Huan 3:16: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha  afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi”.

Houn gürigia ha úaraguabaña, ladügüba Bungiu aban katei le chóuruti luagu hanarimebei lan lubuidun. Lidan iseri ubóu le yarafaalibei, lagidarubei figóu sunsuinagubei hawéi gürigia, ani murusun murusun lagidarubei figóu hawéi gürigia úaraguatiña adüga ligíame lun richagua hamá (Isaíasi 26:9; 2 Féduru 3:13). Úaañame óuserutiña lau aban igaburi wíyeti ladüga efekütu lani figóu. Lábugiñe Larúeihan Bungiu hesefurúba gürigia “lídangiñe asufuriruni luma agadeiruni le [gádanbaliña]” (Rómana 8:20-22).

Híruti añahein lan gürigia óuserutiña amu wuriba lau sun lichú hau. Óuseragua hamutiña ha gudemetimabaña ani ínchaha hamutiña amu gürigia óusera lau aban liwiye igaburi. Ariñagatu Bíbülia houn hawuyeri gürigia ha: “Ígiralei wügüri le wuribabei lagübüri lémeri, ígiraleime salufuriti luriban lisaminan”. Ánhañati asaküriha füramasetu Bíbülia ‘mánginbei lan Bungiu lun feruduna lániña’ (Isaíasi 55:7).

Gama lumoun, lagünrinchagubaña Bungiu ha mabusenrunbaña hasansirun. Layusurubei Bungiu Larúeihan lun lagunfuliruni füramasei tídangiñeti Bíbülia le: “Hemenigibá luagu Aburemei [Heowá], aganbabéi [...] barihubei hagünrinchawagun wuribatiña lau bagu!” (Sálumu 37:34). * Danme le úaaña lan afigouhatiña ha máraninaañabaña, masufurirunhañame lubúeingu Bungiu ladüga liwiye igaburi.

Satanásitima máraninabei hádangiñe sun ha gafigounbaña. Gayarati wateingirun saragu luagu málühali lan Heowá adaüragüdei Mafia, ítarati siñaalime gabafu lan hawagu gürigia. Lagumuhóun, lagünrinchagubei Bungiu Satanási sunsuinagubei. Madügündigialime lagübüri Mafia lun hóuserun gürigia lau liwiye igaburi.

Másiñati genege lan aban lan uénedü saminaü luagu lagumuchuba lan Bungiu lau sun katei le lébunabei liwiye igaburi. Gayarati álügüdagua wamá woungua anhein anirein lubéi le mégeiwabei luma Bungiu lun lagumuchun lau sun lébuna liwiye igaburi o anhein anihein lubéi luma ka lan uagu madügün lágili lubéi. Buiti álügüdahani burí le, ani rutu Bíbülia óunabagülei le aubei gufuruma wamá. * Amisuraha wamutün akutihei hungua ka lan tarufudahabei Bíbülia luagu le lunbei lasuseredun yarafa madise, danme le gumuguagüdawaali sun liwiye igaburi lun súnwandan.