Koripsyon pou fini!

“Met lespwar dan Zeova e swiv son semen . . . Ou pou vwar kan bann mesan i ganny detrir.”​—PSONM 37:34.

PAREY bokou dimoun, eski ou per ki koripsyon pou touzour egziste e ki i pa pou zanmen ganny konpletman eliminen? Si i le ka, i normal ki ou santi koumsa. Tou dilon listwar, bann imen in esey tou sort kalite gouvernman. Me zot pa’n zanmen kapab arive elimin koripsyon dan en fason permanan. Eski i annan lespwar ki en zour tou dimoun pou azir onnet anver kanmarad?

Erezman Labib i dir wi! I dir ki byento Bondye pou fer disparet koripsyon lo later. Ki mannyer i pou fer sa? I pou konpletman transform later antye par mwayen son Rwayonm, en gouvernman ki dan lesyel. I sa menm Rwayonm ki Zezi ti ansenny son bann disip pour priy lo la. Dan sa lapriyer ki souvan ganny apele Notreper, Zezi ti dir: “Ki ou rwayonm i vini. Ki ou lavolonte i ganny fer lo later.”​—Matye 6:10, King James Version.

Konsernan Zezi Kri ki Dirizan dan sa Rwayonm, Labib i dir: “I pou delivre sa enn pov ki pe kriy o sekour, osi sa enn ki pe soufer e nenport ki ki napa personn pour vin ed li. I pou pran lapenn pour sa dernyen dimoun ek sa enn pov, e i pou sov lavi bann ki pov. I pou liber zot avek vyolans ek lopresyon.” (Psonm 72:12-14) Remarke ki Zezi i annan konpasyon pour bann ki viktim koripsyon e i pou fer keksoz konsernan lopresyon! Eski sa pa i rekonfortan?

Dan lanmen sa Dirizan pwisan ki annan konpasyon, Rwayonm Bondye pou elimin tou koripsyon lo later. Ki mannyer? Par elimin sa trwa lakoz koripsyon.

Lenfliyans pese

Pour lemoman nou tou nou bezwen lalit avek sa tandans fer pese, ki fer nou azir dan en fason egois. (Romen 7:21-23) Me i ankor annan bon dimoun ki anvi fer sa ki byen. Zot demontre lafwa dan valer disan ki Zezi in verse, e zot kapab ganny pardonnen zot pese. * (1 Zan 1:7, 9) Sa bann dimoun i benefisye avek sa pli gran akt lanmour ki Bondye in fer, parey nou kapab lir dan Zan 3:16: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”

 Bondye pou fer en keksoz vreman ekstraordiner pour bann dimoun fidel. Dan sa lemonn ki pe vini, i pou efas tou tras pese, e ptitapti bann imen fidel pou vin parfe e ganny laprouvasyon Bondye. (Izai 26:9; 2 Pyer 3:13) Lenfliyans pese pa pou zanmen fer okenn dimoun azir dan en fason koronpi ankor. Anba dominasyon Rwayonm Bondye, bann imen fidel “pou ganny libere en zour” avek lesklavaz koripsyon.​—Romen 8:20-22.

Lenfliyans sa move lemonn ki nou ladan

Malerezman, en kantite dimoun ozordi i viktimiz lezot ekspre. Zot abiz bann dernyen dimoun ek bann ki pov, e zot osi ankouraz lezot pour fer parey. Labib i averti bann dimoun koumsa: “Ki sa zonm move i kit son fason fer e sa zonm ki fer ditor i kit son fason panse.” Si sa enn koronpi i repantir, Labib i promet ki Bondye pou pardonn li “dan en gran fason.”​—Izai 55:7.

Me, Bondye pou bezwen retir tou bann ki refize sanz zot fason fer. Par mwayen Rwayonm Bondye, sa promes Labib pou vin vre: “Met lespwar dan Zeova e swiv son semen . . . Ou pou vwar kan bann mesan i ganny detrir.” * (Psonm 37:34) Kan bann ki pa oule repantir i ganny tire, bann serviter fidel Bondye pou nepli viktim koripsyon.

Lenfliyans Satan oubyen Dyab

Satan i sef parmi bann ki kontinyelman fer pese. Pa nou vreman rekonesan ki byento Zeova pou restrikte aktivite Satan e anpes li enfliyans imen! Finalman, Bondye pou detrir Dyab enn fwa pour tou. Zanmen ankor Satan pou kapab enfliyans dimoun pour fer okenn koripsyon.

Sa lide ki Bondye pou retir tou lakoz koripsyon i kapab paret zis en rev. Ou kapab demande: ‘Eski Bondye pou kapab fer sa? Si wi, akoz i pa ankor fer li?’ Sa i bann kestyon enportan e Labib i donn larepons satisfezan pour sak sa bann kestyon. * Nou envit ou egzamin pour ou menm ki Labib i dir lo sa letan kan koripsyon pou’n disparet pour touzour.

[Not anba lo paz]