Majika-kanwa Akapwa!

“Tengela Yehova, ulamate mu dishinda dyandi . . . Po bakatyibwako babi, nobe ukēmwenangapo.”—MITŌTO 37:34.

LELO, udi pamo bwa bantu bavule badi na moyo wa amba i bikomo kwepuka majika-kanwa ne amba keakatalulwa’kopo lonso? Shi i amo, wao moyo i mwendele’mo. Mu bula bwa mānga, bantu i batompe kwendeja maludiki a miswelo yonso. Inoko, kebābwenyepo nansha dimo kutalula’ko majika-kanwa lonso. Le kudi kikulupiji kya amba, mu kitatyi kampanda bantu bonso bakekala na bakwabo pampikwa budimbidimbi?

Mwanda usangaja i uno, Bible ulondolola amba kidi’ko! Witusapwila amba panopano ponka, Leza usa kulonga’po kintu mwanda wa kufundula’ko ino ntanda ya majika-kanwa yotwikele’mo. Le ukeifundula’ko namani? Kupityila ku Bulopwe bwandi, umbikalo wa mūlu, ukalamuna lonso ino ntanda yotwikele’mo. Buno bo Bulopwe bwāfundije Yesu balondi bandi kulombela. Mu milombelo yāityilwe kyaba kimo bu Lulombelo lwa Mfumwetu nansha bu lwa Tata Wetu, Yesu wānene amba: “Bulopwe bobe bufike. Kiswa-mutyima kyobe kilongeke pano pa nshi.”—Mateo 6:10, DD.

Bible ulaya pa mwanda utala Yesu Kidishitu, Mulopwe wa buno Bulopwe amba: “Ukanyongolola mupando pa kwita; Ne balanda ba kubulwa wakwibakwasha. Ukebafwila lusa balanda ne badi makasa, Kadi ne myuya ya badi makasa ukeīpandijanga. Ukakūla muya wabo ku bongojani ne bikungulu bya bulobo.” (Mitōto 72:12-14) Yuka amba Yesu wivwaninanga lusa boba basusuka na majika-kanwa, ne kadi ukatalula’ko masusu! Mwene kino i kintu kisenga?

Kupityila ku maboko a uno Mulopwe wa lusa kadi mukomokomo, Bulopwe bwa Leza bukafundula’ko majika-kanwa pa ntanda yotwikele’mo. Namani? Na kutalula’ko bintu bisatu bilengeja majika-kanwa.

Lupusa lwa Bubi

Pano’ko bidi, tufwaninwe batwe bonso kulwa na lupusa lwa bubi lwine lwitutonona tulonge bintu na kwisakila. (Loma 7:21-23) Inoko, kukidi bantu bayampe basaka kulonga byoloke. Betabije mu kikūlwa kya mvubu kya mashi a Yesu āmwangikile, kadi babwanya kulekelwa bubi bwabo. * (1 Yoano 1:7, 9) Bano bantu batengele kumwena mu kilongwa kikatakata kya buswe kya Leza, enka na motutangila mu Yoano 3:16 amba: “Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo,  ehe, poso batambule būmi bwa kulādila monka nyeke ne nyeke.”

Leza ukalongela bantu ba kikōkeji kintu kya kutendelwa’po kashā. Mu ntanda mipya iya’ko, ukatalula’ko bityebitye makeme a bubi, kufikija bantu ku bubwaninine ne kwikala’bo ke boloke. (Isaya 26:9; 2 Petelo 3:13) Muntu kakatyibwepo milomo monka mwanda wa lupusa lwa bubi. Mu buludiki bwa Bulopwe bwa Leza, bantu ba kikōkeji ‘bakakūlwa ku bupika bwa majika-kanwa.’—Loma 8:20-22.

Lupusa lwa Ntanda Mibi Yotwikele’mo

I kya bulanda, mwanda bavule dyalelo basusulanga bakwabo ku kusaka. Bamwenanga bantu ba munshi ne balanda, kadi basoñanya bakwabo balonge bibi. Bible udyumuna bano bantu amba: “Mupupakane azobolole dishinda dyandi, ne mukondame nandi ku mifwatakanyo yandi.” Shi bano bantu boneke besāse, Bible i mulaye amba Leza ‘ukebalekela byamwiko’tu.’—Isaya 55:7.

Inoko, kekudipo kintu kikwabo kikalonga Leza, poso’nka kutalula’ko boba bapela na kibengo kushinta mashinda abo. Kupityila ku Bulopwe bwa Leza, mulao wa mu Bible ukafikidila wa amba: “Tengela Yehova, ulamate mu dishinda dyandi . . . Po bakatyibwako babi, nobe ukēmwenangapo.” * (Mitōto 37:34) Kitatyi kikatukijibwa babi bapela kwalamuka, batōtyi ba Leza ba kikōkeji kebakasusukapo kadi monka na majika-kanwa.

Lupusa lwa Satana Dyabola

Muntu mubajinji mu banonga-bibi ba mutyima mūmu i Satana Dyabola. Tufwijanga’ko bininge pa kuyuka amba, panopano ponka Yehova usa kukankaja Satana, aleke kusomanya bantu. Mfulo mfulō, Leza ukonakanya Satana fututu. Uno mukishi mubi kakabwanyapo kadi monka kusomanya bantu balonge bya majika-kanwa.

Shako, mulangwe wa amba Leza ukatalula’ko byonso bilengeja majika-kanwa ubwanya kumweka bu mifwatakanyo bitupu. Ino ubwanya padi kwiipangula amba: ‘Le bine Leza udi na muswelo wakokeja kuleta kuno kushinta? Shi i amo, mwanda waka kaletele’ko?’ Bino i bipangujo biyampe, kadi Bible uleta malondololo asangaja. * Tubakulombe ubandaule abe mwine byobya bifundija Bible pa būmi bwa kumeso, kitatyi kekikekala’kopo lonso majika-kanwa.

[Kunshi kwa dyani]