Corruption A Tâwp Dâwn!

“LALPA chu nghâk la, a kawng chu zawh rawh . . . Mi suaksualte tihborala an awm lai chu i la hmu ang.”—SAM 37:34.

MI TAM takte hlauh ang bawkin,corruption hi pumpelh theih loh leh nuaibo ṭhak theih loh a nih i hlau ve em? I hlau a nih chuan, a hriatthiamawm hle a ni. Hun kal tawhahte khân mihringte chuan sawrkâr din theih apiang an lo din tawh a. Mahse, corruption nuai bo lamah chuan an la hlawhtling ngai lo a ni. Mite dik taka an incheibâwl tawn hun a lo thlen theih a beiseiawm em?

A beiseiawm, tih chu Bible chhânna hlimawm tak a ni! Bible chuan Pathianin he kan khawvêla corruption tibo tûra hma a rawn lâk thuai tûr thu min hrilh a. Engtin nge chu chu a rawn tih ang? Vân lam sawrkâr, a Lalram hmangin kan lei hi a rawn siam danglam vek dâwn a ni. Chu Lalram chu Isua’n a hnungzuitute hnêna dîl tûra a tih kha a ni a. Lal Ṭawngṭainaah Isua chuan heti hian a sawi a: “I ram lo thleng rawh se. I duhzâwng . . . leia mi’n ti rawh se,” tiin.—Matthaia 6:10.

Chu Lalrama Rorêltu, Isua Krista chungchângah Bible chuan heti hian a lo sawi lâwk a: “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a, pachhiate nunna chu a chhandam ang. An nunna chu hnehchhiahna leh nunrâwnna lak ata a tlan ang,” tiin. (Sâm 72:12-14) Isua chuan corruption avânga tuartute a khawngaih tih leh inhnehchhiahna chungchângah thil engemaw tak a ti dâwn tih lo chhinchhiah ang che! Chu thu hriat chu a thlamuan thlâk hle lâwm ni?

Chu Rorêltu chak leh hmangaihna ngah tak awpna hnuaia Pathian Ram chuan he khawvêla corruption hi a nuai bo vek tawh ang. Engtin nge? Corruption awm chhan ber thil pathumte tihboralna hmangin a ni ang.

Sual Thununna

Tûnah hi chuan kan za hian mahni hmasial taka chêt duhna min neihtîrtu, rilru put hmang sual kan neih hi kan buan reng a ngai a. (Rom 7:21-23) Mahse, thil ṭha tih duh mi ṭhate an la awm ve reng tho a ni. Chûng mite chuan Isua tlanna thisen chhuah hlutnaah chuan rinna lantîrin, an sualte ngaihdamna an dawng thei a. * (1 Johana 1:7, 9) Pathian hmangaihna lan chhuahtîrna ropui ber Johana 3:16-a kan chhiar: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tih chu hlâwkpui theihna hun ṭha an nei dâwn a ni.

Pathian chuan ami rinawmte tân thilmak ropui tak a tihsak dâwn a. Ani chuan khawvêl thar lo  thleng tûrah chuan sualnain hnu hma a neih zawng zawng chu a nuai bo vek ang a, mi rinawmte chu zawi zawiin a tiṭhafamin, mi felah a siam chho zêl ang. (Isaia 26:9; 2 Petera 3:13) Tichuan, sualna thununna chuan tumah dik lo takin a chêttîr leh ngai tawh lo vang. Pathian Ram awpna hnuaiah chuan, mi rinawmte chu corruption bawih ata tihchhuahin an awm tawh ang.

Kan Chênna Khawvêl Thununna

Lungchhiat thlâk takin, tûn laia mi tam tak chuan tum rêng avângin mi dangte an tina a. Mi hnuaihnung leh mi retheite an rapbetin, mi dangte pawh dik lo taka thil ti tûrin an thunun a ni. Chutiang mite chu Bible-in hetiang hian a fuih a ni: “Mi suaksual chuan a awm dân chu bânsan sela, mi fel lo chuan a ngaihtuahte chu bânsan bawk rawh se,” tiin. Chutianga dik lo taka thil titute chu an inlamlêt chuan Pathianin “a ngaidam nasa khawp dâwn si a” tih Bible chuan a tiam a ni.—Isaia 55:7.

Mahse, Pathian chuan luhlul taka an kawng thlâk duh lo tute tihboral mai loh chu duhthlan tûr dang a nei lo vang. Pathian Ram hmangin, he Bible thutiam hi a lo thleng famkim dâwn a ni: “LALPA chu nghâk la, a kawng chu zawh rawh, . . . Mi suaksual tihborala an awm lai chu i la hmu ang,” tih hi. (Sâm 37:34) Chutianga mi suaksualte an awm tawh loh hnu chuan, Pathian chibaibûktu rinawmte chuan corruption avânga tawrhna chu an tawng leh ngai tawh dâwn lo a ni.

Diabol-Setana Thununna

Thil sualtihnaa hmahruaitu ber chu Diabol-Setana hi a ni a. Ani chu mihringte thunun thei lo tûra Jehova’n a khuahkhirh thuai dâwn avângin kan lâwm hle thei a ni. A tâwpah chuan, Pathianin Setana chu chatuan atân a tiboral ang a. Chu ramhuai suaksual tak chuan mite chu dik lo taka thil ti tûrin a thunun leh ngai tawh lo vang.

Pathianin corruption awmtîrtu zawng zawng a tiboral dâwn tih ngaih dân chu duhthusâm thil a ang mai thei a. Heti hian i ngaihtuah mai thei: ‘Pathian chuan chutiang inthlâkthlengna thlentîr theihna chu a nei tak tak em? A neih chuan engatinge a tih daih tawh loh?’ tiin. Chûngte chu zawhna ṭha tak a ni a, a chhânna lungawithlâk tak Bible chuan min pe a ni. * Kan hma lawka, corruption a bo hlen vang vang tawh hun tûr chungchânga Bible zirtîrna hi nangmah ngeia lo enfiah ve tûrin kan sâwm a che. (w12-E 10/01)

[Footnote-te]

[Phêk 7-naa milem]