¿MTSËˈK mjäˈäwëp mijts extëm mayë jäˈäy ko ninäˈä kyajäˈtëdë tiempë mä tijaty yajtunët tëyˈäjtën myëët? Pën duˈun, yajjaygyujkëp tiko mtsëˈëk mjawë. Nuˈun kujkë xëë tiempë nyaxy, të naxwinyëdë jäˈäy tjayajtundë oytyim diˈibëtyë gobiernë, per nituˈuk të tkapudëkë naxwinyëdë jäˈäy parë ttundët tijaty tëyˈäjtën myëët. Per ¿waˈan näˈä jyäˈtëdë tiempë mä tijaty yajtunët tëyˈäjtën myëët?

Tiko këdii, Biiblyë jyënaˈany ko jäˈtäämp ja tiempë. Xyˈanmäˈäyëm ko Dios tim tsojk dyajkutëgoyaˈany pënaty kyaj ttundë tijaty tëyˈäjtën myëët. ¿Wiˈix ttunäˈäny? Mët yëˈëgyëjxmë yˈAnaˈamën, tuˈugë gobiernë diˈib itäämp tsäjpotm diˈib yaˈˈajamëyaambyë tyäˈädë Naxwinyëdë. Jesus ojts tˈanëëmë yˈëxpëjkpëty ets tˈamdowdëdë tyäˈädë Anaˈamën mä padrenuestro: “Yajminë mˈanaˈamën. Waˈan dyajtuny ja mtsojkën, duˈun extëm jam tsäjpotm nanduˈun yä naxwiiny” (Mateo 6:10, TNM).

Mä Diosë yˈAnaˈamën, Jesukristë yëˈë diˈib tunäämp Rey, Biiblyë duˈun ojts tnaskäjpxë: “Yëˈë pyudëkëyaambyë ayoobë jäˈäy diˈib yˈamdoobyë naybyudëkë ets diˈib moon tujkp ets diˈib kyaj pën diˈib pudëkëdëp. Pyaˈˈayowaampy ja diˈib kyaj ti tmëdaty tjaygyepy ets ja diˈib ayoop, ets ja ayoobë jäˈäyë jyukyˈäjtën yaˈˈawäˈätspëtsëmaampy. Mä yajtëytyuny ets mä axëëk yajtuny dyaˈˈawäˈätspëtsëmäˈäny etsë nyëë nyeˈpynyë tyäˈädë jäˈäyëty mëj dyajnaxäˈäny” (Salmo 72:12-14). Extëm yä nˈijxëm, Jesus pyaˈˈayoopy pënaty kyuˈayoˈowëdëp ko tijaty kyayajtuny tëyˈäjtën myëët ets yëˈë diˈib yajjëgaˈagaampy mä jäˈäy yaˈˈaxëktundë. ¿Këdii xyjotkujkmoˈoyëm ko duˈun nnijäˈäwëm?

Ko nety yˈaneˈemy mä Diosë yˈAnaˈam Kyutujkënë tyäˈädë Rey diˈib pyaˈˈayoobyë jäˈäy ets myëdäjtypyë mëjää, ta tukëˈëyë yajtunäˈäny tëyˈäjtën myëët. ¿Wiˈix ttunäˈäny? Ko dyajjëgaˈagët tëgëk pëky diˈib xyˈaxëktuˈunëm.

Tsojkëp tyam nduˈunëmë mëjää parë njëjpkudijëm ja poky kaytyey diˈib xytyuktunäˈänëm tijaty jeˈeyë ntsojkëm (Romanʉs 7:21-23). Per ta oyjyaˈay diˈib tyunaampy tijaty oy, ets mbäät yajpokymyaˈkxtë pën myëbëjktëp ko Jesukristë yëˈë të kyuˈoogëdë (1 Fwank 1:7, 9). * Tyäˈädë jäˈäyëty yëˈë diˈib tyukˈoyˈatandëp ko Dios mëjwiin kajaa xytsyojkëm extëm jyënaˈanyë Fwank 3:16: “Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët”.

 Dios mëjwiin kajaa tijaty ttunäˈäny parë jäˈäy diˈib xëmë mëmëdoojëp. Mä ja jembyë jukyˈäjtën dyajjëptëgoyaˈany tukëˈëyë poky kaytyey ets wanaty wanatyë naxwinyëdë jäˈäy dyajjëmbitäˈäny wäˈäts (Isaías 26:9; 2 Peedrʉ 3:13). Ak tëyˈäjtën myëët tijaty yajtunäˈäny mët ko të nety xynyiwatsënë poky kaytyey. Etsë pënaty mëdoodëp, tpäädäˈändë “ja awäˈätstuuyˈäjtën es ja kunuˈxën” mä ja Diosë yˈAnaˈam Kyutujkën (Romanʉs 8:20-22).

Jotmaymyëët njënäˈänëm ko ta mayë jäˈäy diˈib tyim tuknibëjtakëp tˈaxëktunäˈänyë wiink jäˈäy, diˈib axëëk tyuundëp yëˈë diˈib jantsy ayoodëp ets nan tyuktuundëbë wiink jäˈäy tijaty kyaj tyëyˈäjtën myëëdëty. Biiblyë duˈun tˈanëëmë duˈumbë jäˈäy: “Mmastuˈudë axëkjäˈäyë nyëˈë tyuˈu, etsë axëkjäˈäyë jyot wyinmäˈäny”. Etsë Biiblyë twandaˈaky ko pën jodëmbijttëp, ta Dios “pyokymyaˈkxäˈänyëty mëjwiin kajaa” (Isaías 55:7).

Dios kuanë ko dyajkutëgoyaˈany pënaty kujuundaktëp ets kyaj nyayajtëgatsäˈänëdë. Diosë yˈAnaˈam Kyutujkën yëˈë diˈib yaˈˈadëwaambyë tyäˈädë wandakën: “Awixë Jyobaa ets kuytyunë nyëˈë tyuˈu [...]. Ko ja axëkjäˈäy nëjkx kyutëgoy, mijts nëjkxëp xyˈixy” (Salmo 37:34). * Ko nety të kyutëgooytyaˈay ja pokyjyaˈay diˈib kyaj të jyodëmbittë, ta Dios mëduumbë kyaj tnekykyuˈayowëyäˈändë ko jäˈäy tkatundë tijaty tëyˈäjtën myëët.

Mä niˈamukë pokyjyaˈay diˈib ninäˈä kyajodëmbity, yëˈë Satanás. Nmëjjäˈäwëm ko Jyobaa tim tsojk tpëjtäˈägäˈäny abëkyë Satanás ets kyaj tnekyyajtëgoyaˈanyë naxwinyëdë jäˈäy. Ok, ta net dyajkutëgoyaˈanyë Satanás diˈib mëk axëkjäˈäy. Ta ninäˈä nëjkxë jäˈäy tkanekytyuktunyë axëkˈäjtën.

Ko nnijäˈäwëm ko Dios dyajkutëgoyaˈany pënaty kyaj ttundë tijaty tëyˈäjtën myëët, mbäät nmëdoˈojëm extëmë tsuu kumäˈäy. Ets mbäädë net nnayajtëˈëwëm: “¿Mbäädëdaa Dios dyajtëgatsyë tyäˈädë jukyˈäjtën? Ets pën mbäät, ¿tiko duˈun tkatuungojy?”. Biiblyë yˈatsoojëmbijtypyë tyäˈädë yajtëˈëwën. * Pääty, oy ko këˈëm xyˈixët wiˈix tmaytyaˈaky ja tiempë diˈib miin këdakp, mä tukëˈëyë yajtunäˈäny tëyˈäjtën myëët.