¿TIKONNEMILIA, ijkon kemej miakej taltikpakneminij, ke kisentokas onkas tein amo melauak uan amo keman senkis tamis? Komo ijkon, moajsikamati keyej ijkon tiontanemilia. Itech xiujmej tein panouanij, taltikpakneminij kitalianij nochi taman tekiuajyomej tein kinemilianij ke tapaleuis. Sayoj ke, amo keman uelinij kitamianij tein amo melauak. ¿Uelis tikchiaskej maj se tonal nochin taltikpakneminij melaujkanemikan?

Semi techyolpaktia tikmatiskej ke Biblia kinextia ke kemaj. Techiluia ke Dios amo uejkaua kichiuas maj tami tein amo melauak nikan taltikpak. ¿Keniuj kichiuas? Ika iTekiuajyo, oso itaixyekanalis tein moajsi iluikak, kichiuas maj senkis motachipaua nikan taltikpak. Nejin yejua Tekiuajyot tein Jesús kinmachtij itatojtokakauan maj tajtanikan. Itech netataujtil tein moajsi itech Mateo 6:9-13, Jesús kijtoj: “Maj uiki motekiuajyo. Maj mochiua motanejnekilis [...] nikan taltikpak” (Mateo 6:10, TNM).

Biblia kijtoua tein kichiuas Jesucristo, taixyekankej itech nejon Tekiuajyot: “Yejua kimakixtis akin moajsi itech tatasojtilis uan tajtani maj kipaleuikan, no akin tayokoxtok uan akin amo kipia akoni kipaleuis. Kiiknelis akin amo kipia keniuj moixpanoltis uan akin moajsi itech tatasojtilis, uan ininnemilis akin moajsij itech tatasojtilis kinmakixtis. Kinmakixtis akin ininka mauiltiaj uan kinteuiaj” (Salmo 72:12-14). Kemej tikitaj, Jesús kiniknelia akin tajyouiaj porin oksekin amo melaujkanemij, uan kichiuas maj tami teikamauiltilis. ¿Melauj ke semi techyolseuia tikmatiskej nejon?

ITekiuajyo Dios tein moajsi imako nejon taixyekankej teiknelijkej uan tel chikauak, kitamis tein amo melauak nikan taltikpak. ¿Keniuj kichiuas? Kiixpolos eyi taman tein kichiua maj onka tein amo melauak.

Axkan, tinochin timoixnamikij ika tajtakol tein techuika maj tiknekikan tikchiuaskej totanejnekilis (Romanos 7:21-23). Sayoj ke moajsij taltikpakneminij akin yolkualmej uan kinekij kichiuaskej tein kuali. Komo takuaujtamatij itech ipatiuj tein kipia imikilis Jesús tein temakixtia, Dios ueli kintapojpoluia inintajtakoluan (1 Juan 1:7, 9). * Uan no, ika okachi ueyi netasojtalis tein Dios kinextiani, kiseliskej tein kijtoua Juan 3:16: “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa”.

 Dios kichiuas maj kiselikan tein tel kualtsin akin amo kikauaj. Keman Dios tachipauasya nikan taltikpak, senkis kitamis nochi tein tajtakol kiualkui, uan akin tatakamatij, yolik kinijkuanilijtiyas tajtakol uan sayoj kichiuaskej tein melauak (Isaías 26:9; 2 Pedro 3:13). Amo akinok kichiuas tein amo melauak porin amo onkasok tajtakol. Keman taixyekantos iTekiuajyo Dios, taltikpakneminij amo kinyekantosok inintajtakolnemilis (2 Pedro 2:19).

Semi tetayokoltij tikmatiskej ke moajsij taltikpakneminij akin kitemouaj kinkajkayauaskej oksekin. Ininka mauiltiaj akin kipanotokej tatasojtilis uan kitemouaj kichiuaskej maj oksekin amo no melaujkanemikan. Biblia kinyolmajxitia nejon taltikpakneminij: “Akin amo yolkuali maj kikaua ojti tein kitojtokatok, uan akin taijtakoua maj kikaua itanemililuan”. Uan komo moyolnonotsaj, Biblia kijtoua ke Dios ‘senkis kintapojpoluis’ (Isaías 55:7).

Sayoj ke komo amo kichiuaj, Dios kinixpolos akin senkis amo kinekiskej mopataskej. Ika iTekiuajyo Dios mochiuas tein Biblia kijtoua: “Xikchia Jiova uan xiksentoka itech ojti tein iaxka [...]. Keman akin amo yolkualmej ixpoliuiskej, tejua tikitas” (Salmo 37:34). * Keman ixpoliuiskejya tajtakolchiuanij tein amo moyolnonotsaskej, itekitikauan Dios tein amo kikauaj amo tajyouiskejok porin amo akinok kichiuas tein amo melauak.

Satanás yejua akin okachi ueyi tajtakolchiujkej. Uelis timoteltasojkamatiskej porin Jiova amo uejkaua kitsakuas, uan ijkon amo kisentokas kitemos maj taltikpakneminij kichiuakan tein yejua kineki. Satepan, Dios senkis kiixpolos Satanás. Nejon tel amo yolkuali amo kisentokas kitemos keniuj kichiuas maj taltikpakneminij amo monejnemiltikan melaujkej.

Xa uelis tiknemiliskej ke sayoj se takochitalis keman Dios kijtoua ke kiixpolos nochi tein kinuika taltikpakneminij maj amo melaujkanemikan. Xa timotajtaniaj ox Dios yekmelauj uelis kichiuas nejon tein kijtoua, uan komo kemaj, keyej ayamo kichiua. Semi kuali komo timotajtaniaj nejon, uan Biblia kuali kinankilia nejon netajtanilmej. * Timitsonyoleuaj xikonita toni tamachtia Biblia ke mochiuas amo uejkaua, keman senkis tamis tein amo melauak.