Ounkhembi Maukapuako!

“Kevelela ku Jeova, endela mondyila yae . . . Tyina onondingavivi mbamanyimuako, ove motyimono.”—SALMO 37:34.

OKUTI noove una owoma wokuti ovanthu kavetyivili okulityilika ounkhembi iya mautualako apeho? Inkha ongotyo usoka, katyapengele. Mokonda tunde kohale ovanthu vaovolale ononkhalelo ononyingi mbokutumina. Mahi, kavetyivilile okumanako ounkhembi. Okuti tupondola okukevelela okuti nthiki imwe ovanthu kamavekelikemba vali?

Tuhambukwa unene mokonda Ombimbiliya ikumbulula okuti, eenga! Itupopila okuti apa katutu Huku makamanako ounkhembi auho pano pohi. Oñgeni metyilingi? Nouhamba wae, outumini ukahi keulu, maukapilulula oohi yetu. Ouhamba oo, oyouna Jesus alongesile ovalanduli vae okuita melikuambelo. Melikuambelo pamwe liihanwa okuti Elikuambelo lia Tatekulu ine Elikuambelo lia Tate Yetu, Jesus wati: “Ouhamba wove uye, yeka ehando liove lilingwe pano pohi ngetyi lilingwa keulu.”—Mateus 6:10, Nova Tradução na Linguagem de Hoje.

Ombimbiliya yaula konthele ya Jesus Kristu, Omutumini Wouhamba oo, okuti: “Mayovola omuhepi uliyava okuita ombatelo, na una umona ononkhumbi, na kese umwe uhena omuvateli. Makalingila okankhenda una uhena tyae, nomuhepi, nokukayovola omienyo viovahepi. Makayovola ohande yavo ilingwa onya no moungangala.” (Salmo 72:12-14) Tala okuti Jesus una okankhenda navana valingwa onya, iya mekevekuatesako! Tyotyili, otyo tyitupameka unene!

Pomaoko Omutumini oo wepondolo, Ouhamba wa Huku maukamanako ounkhembi auho pano pohi. Ñgeni? Pokumanako ovipuka vitatu vihongiliya ounkhembi.

Onkhali

Hono, atuho tulwa neyembelo liokulinga onkhali, lituhongiliya okukala nelungavi. (Romanos 7:21-23) Mahi, nkhele kuna ovanthu ovawa vahanda okulinga etyi tyaviuka. Pokati kononkhia mba Jesus, Huku waikula ondyila opo tuevelwe ononkhali mbetu. a (1 João 1:7, 9) Vana vakala nekolelo mu Jesus mavakapola ouwa omunene kelekeso olio enene liohole ya Huku, ngetyi tutanga mu João 3:16: “Huku una oluembia olunene novanthu, waava Omona wae wongunga, opo  kese omunthu ukala nekolelo mwe ahakanyimueko, mahi akakale nomuenyo uhapu.”

Huku makalingila ovipuka oviwa ovanthu vekolelo. Mouye omupe ukahi nokuya, Huku makamanako ononkhali ambuho, nokukuatesako katutu katutu ovanthu okukala tyehena onkhali, avakala ovaviuki. (Isaías 26:9; 2 Pedro 3:13) Onkhali kamaikahongiliya vali ovanthu okukemba. Mouhamba wa Huku, ovanthu aveho vekolelo kamavakakala vali ‘ovapika vovivi.’—Romanos 8:20-22.

Ouye Wovivi Omu Tukahi

Tyinumanesa unene, mokonda hono ovanthu ovanyingi vamonesa vakuavo emone. Haunene vetyilinga vokuahatumina, novokuahepa, nokuhongiliya vakuavo okulinga ovivi. Ombimbiliya ilondola ovanthu ovo okuti: “Ondingavivi iyekepo ondyila yayo, iya omunthu wokulinga ovivi ayekepo omalusoke ae.” Moluotyo inkha ovanthu ovo ononkhembi velivela, Ombimbiliya ilaa okuti Huku ‘meveevela.’—Isaías 55:7.

Mahi, vana vahahande okupiluluka, Huku mekevehanyako. Pokati Kouhamba wa Huku, omulao ou Wombimbiliya maukafuiswapo: “Kevelela ku Jeova endela mondyila yae . . . Tyina onondingavivi mbamanyimuako, ove motyimono.” b (Salmo 37:34) Tyina onondingavivi mbahahande okupiluluka mbamapoluako, ovafendi vekolelo va Huku kamavakakembwa vali.

Satanasi Eliapu

Satanasi Eliapu wavilapo kuaveho valinga onkhali. Tupandula unene mokonda apa katutu Jeova makapaka Satanasi mokaleya, emutyilika okuhongiliya ovanthu. Konyima, Huku makahanyako Satanasi. Ondingavivi oyo onene, kamaikahongiliya vali ovanthu okukemba.

Tyotyili, olusoke luokuti Huku makamanako atyiho tyihongiliya ovanthu okulinga ovivi, pamwe lumoneka ngoti ondyoi. Hamwe ulipula: ‘Okuti Huku una umwe atyiho tyesukisa pala okutyilinga? Inkha una, omokonda yatyi nkhele ehenetyilinge?’ Omapulo oo omawa, iya Ombimbiliya yava omakumbululo ahambukiswa. c Tukukonga opo ulitaleleko ove muene etyi Ombimbiliya ilongesa konthele yetyi matyikeya komutwe, tyina ovivi aviho viamapuko.

[Onondaka Poutoi]