ABO tambe, mescos cu hopi otro hende, ta pensa cu no por evita corupcion y cu no por caba cu ne completamente? Tal sintimento ta comprendibel. A traves di tempo, hende a purba tur tipo di gobierno cu bo por imagina. Sinembargo, nunca nan no a logra elimina corupcion. Lo yega e dia cu tur hende lo ta honesto?

Bijbel ta bisa cu si. E ta splica cu pronto Dios lo dal e pasonan necesario pa elimina corupcion for di riba tera. E lo haci esaki pa medio di su Reino, un gobierno celestial cu lo transforma nos planeta Tera completamente. Esaki ta e mesun Reino cu Hesus a siña su siguidornan pidi p’e. Den e Oracion di Nos Tata, Hesus a bisa: “Laga bo reino bini; bo boluntat sea hasí na tera.”​—Mateo 6:10, BPK.

Encuanto e Rey di e Reino ey, Hesucristo, Bijbel ta profetisa lo siguiente: “E lo libra esun den necesidad ora cu e sclama pa yudansa, esun afligi tambe y esun cu no tin ningun hende pa yud’e. E lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia.” (Salmo 72:12-14) Tuma nota cu Hesus ta sinti pa e victimanan di corupcion, y e lo tuma medida pa libra nan for di opresion! Esaki no ta un consuelo?

E Reino di Dios den man di e Rey compasivo y poderoso ey lo caba cu corupcion. Lo e elimina e tres factornan cu ta causa corupcion.

Actualmente nos tur tin inclinacionnan pecaminoso cu ta pone nos actua na un manera egoista. (Romanonan 7:21-23) Pero, ainda tin bon hende cu kier haci loke ta corecto. Nan ta pone fe den e sacrificio di rescate di Hesus pa nan por ricibi pordon di nan picanan. * (1 Juan 1:7, 9) E personanan ey lo tin e oportunidad di beneficia di e acto di mas grandi di amor cu Dios a efectua, manera Juan 3:16 ta bisa: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.”

Dios lo haci algo berdaderamente maraviyoso pa hende cu ta keda fiel na dje. Den e binidero mundo nobo e lo kita tur lastro di pica  y percura pa gradualmente nan bira perfecto y haya un posicion aproba su dilanti. (Isaias 26:9; 2 Pedro 3:13) Nunca mas hende lo bira corupto pa motibo di pica. Bou di gobernacion di e Reino di Dios, hende fiel lo ser libra di sclavitud na corupcion.

Lamentablemente, hopi hende ta perhudica otronan pa malo. Nan ta probecha di e homber chikito y ta influencia otro hende pa nan tambe bira corupto. Bijbel ta spierta e tipo di hendenan ey: “Laga e malbado bandona su caminda, y e hende inhusto su pensamentonan.” Si nan arepenti, Bijbel ta priminti cu Dios “lo pordona [nan] abundantemente.”​—Isaias 55:7.

Pero si nan keda cabesura y nenga di cambia, no ta keda Dios nada otro di elimina nan. Pa medio di e Reino di Dios, loke Bijbel ta priminti lo bira un realidad: ‘Spera riba Jehova y sigui su caminda; ora cu e malbadonan wordo corta kita afo, abo lo mira esaki.’ * (Salmo 37:34) Ora e malbadonan cu no kier cambia no t’ey mas, e adoradornan fiel di Dios lo no bira victima mas di corupcion.

E pecador di mas sin gevoel cu ta existi ta Satanas e Diabel. Nos por ta contento cu pronto Jehova lo kita poder for di Satanas pa e no influencia hende mas. Na su debido tempo, Dios lo destrui Satanas completamente. Nunca mas e monster malbado ey lo por influencia hende pa bira corupto.

Ta berdad cu e idea di cu Dios lo caba cu tur loke ta causa corupcion por parce puro ilusion. Kisas bo ta puntra, ‘Dios realmente por trece tal cambio? Y si ta asina, dicon e no a hacie for di hopi tempo caba?’ E preguntanan ey ta na nan luga, y Bijbel ta contesta nan na un manera satisfactorio. * Nos ta anima bo pa analisa kico Bijbel ta siña hende tocante e futuro cercano, ora tur sorto di corupcion lo disparce pa semper.