رشوتخوری ضرور ختم ہوگی!
رشوتخوری ضرور ختم ہوگی!
”[یہوواہ] کی آس رکھ اور اُسی کی راہ پر چلتا رہ . . .۔ جب شریر کاٹ ڈالے جائیں گے تو تُو دیکھے گا۔“ —زبور ۳۷:۳۴۔
آجکل بہت سے لوگ سوچتے ہیں کہ رشوتخوری کو ختم کرنا ممکن نہیں۔ کیا آپ کو بھی یہی ڈر ہے۔ اگر ایسا ہے تو آپ کے ڈر کی وجہ سمجھ میں آتی ہے۔ پوری تاریخ میں انسانوں نے ہر طرح کی حکومت کو آزما کر دیکھ لیا ہے۔ لیکن کوئی بھی حکومت رشوتخوری اور کرپشن کا خاتمہ نہیں کر سکی۔ کیا کبھی ایسا وقت آئے گا جب تمام انسان دیانتدار ہوں گے؟
آپ کو یہ جان کر خوشی ہوگی کہ بائبل میں ایک ایسے دَور کا ذکر کِیا گیا ہے جب سب لوگ دیانتدار ہوں گے۔ اِس میں بتایا گیا ہے کہ خدا بہت جلد زمین کو رشوتخوری سے پاک کر دے گا۔ خدا یہ کام کیسے کرے گا؟ وہ اپنی بادشاہت یعنی ایک آسمانی حکومت کے ذریعے زمین سے ہر طرح کی بُرائی کا نامونشان مٹا دے گا۔ یسوع مسیح نے اپنے شاگردوں کو سکھایا تھا کہ وہ اِس بادشاہت کے آنے کی دُعا مانگا کریں۔ بہت سے لوگ اِس دُعا کو خداوند کی دُعا یا دُعائےربانی کے نام سے جانتے ہیں۔ اِس میں یسوع مسیح نے کہا تھا: ’تیری بادشاہی آئے۔ تیری مرضی زمین پر پوری ہو۔‘—متی ۶:۱۰۔
اِس بادشاہت کے بادشاہ یسوع مسیح ہیں۔ اُن کے بارے میں بائبل میں لکھا ہے: ”وہ محتاج کو جب وہ فریاد کرے اور غریب کو جس کا کوئی مددگار نہیں چھڑائے گا۔ وہ غریب اور محتاج پر ترس کھائے گا۔ اور محتاجوں کی جان کو بچائے گا۔ وہ فدیہ دے کر اُن کی جان کو ظلم اور جبر سے چھڑائے گا۔“ (زبور ۷۲:۱۲-۱۴) غور کریں کہ یسوع مسیح اُن لوگوں کے ہمدرد ہیں جو رشوتخوری اور بددیانتی کے ستائے ہوئے ہیں۔ وہ لوگوں کو اِس طرح کی ناانصافیوں سے چھڑانے کے لئے کارروائی ضرور کریں گے۔ یہ بات واقعی بڑی تسلیبخش ہے!
یہ رحمدل اور طاقتور حکمران زمین سے رشوتخوری کا نامونشان سدا کے لئے مٹا دے گا۔ وہ یہ کیسے کرے گا؟ وہ رشوتخوری کے تینوں اسباب کو ختم کر ڈالے گا۔
گُناہ کا اثر
ہم سب کو اپنے اندر بسے ہوئے گُناہ کے خلاف لڑنا پڑتا ہے۔ گُناہ ہمیں خودغرضی سے کام لینے کی طرف مائل کرتا ہے۔ (رومیوں ۷:۲۱-۲۳) لیکن ابھی بھی ایسے لوگ ہیں جو نیکی سے زندگی بسر کرنا چاہتے ہیں۔ وہ یسوع مسیح کی قربانی پر ایمان لانے سے اپنے گُناہوں کی معافی حاصل کر سکتے ہیں۔ * (۱-یوحنا ۱:۷، ۹) ایسے لوگ یسوع مسیح کی قربانی سے ایک اَور فائدہ حاصل کریں گے۔ اِس سلسلے میں بائبل میں لکھا ہے: ”خدا نے دُنیا سے ایسی محبت رکھی کہ اُس نے اپنا اِکلوتا بیٹا بخش دیا تاکہ جو کوئی اُس پر ایمان لائے ہلاک نہ ہو بلکہ ہمیشہ کی زندگی پائے۔“—یوحنا ۳:۱۶۔
اپنے وفادار بندوں کی خاطر خدا ایک شاندار معجزہ کرے گا۔ وہ نئی دُنیا میں انسانوں کو گُناہ کے اثر سے پاک کر دے گا۔ آہستہآہستہ انسان ہر لحاظ سے بےعیب ہو جائیں گے اور خدا کی نظر میں راستباز ٹھہریں گے۔ (یسعیاہ ۲۶:۹؛ ۲-پطرس ۳:۱۳) پھر کوئی بھی انسان گُناہ کے اثر کی وجہ سے بددیانتی کرنے پر مائل نہیں ہوگا۔ خدا کی بادشاہت میں تمام وفادار لوگ رشوتخوری کے چنگل سے آزاد ہو جائیں گے۔
بدکار دُنیا کا اثر
افسوس کی بات ہے کہ بہت سے لوگ جان بوجھ کر ہیرا پھیری کرتے ہیں جس کی وجہ سے دوسروں کو نقصان پہنچتا ہے۔ وہ غریبوں کے حالات کا ناجائز فائدہ اُٹھاتے ہیں اور دوسروں کو بددیانتی کرنے پر اُکساتے ہیں۔ بائبل میں ایسے لوگوں کو نصیحت کی گئی ہے کہ ”شریر اپنی راہ کو ترک کرے اور بدکردار اپنے خیالوں کو۔“ بائبل میں بتایا گیا ہے کہ اگر ایسے بددیانت لوگ اپنی بُری روِش سے باز آ جائیں تو خدا اُنہیں ”کثرت سے معاف کرے گا۔“—یسعیاہ ۵۵:۷۔
لیکن جو لوگ اپنی بُری روِش پر ڈٹے رہتے ہیں، خدا اُنہیں ختم کر دے گا۔ خدا کی بادشاہت کے ذریعے یہ وعدہ پورا ہوگا: ”[یہوواہ] * کی آس رکھ اور اُسی کی راہ پر چلتا رہ . . .۔ جب شریر کاٹ ڈالے جائیں گے تو تُو دیکھے گا۔“ (زبور ۳۷:۳۴) جب بدکار لوگ ختم ہو جائیں گے تو پھر خدا کے وفادار بندے رشوتخوری اور بددیانتی سے پاک معاشرے میں رہیں گے۔
شیطان کا اثر
سب سے بڑا بدکار شیطان ہے۔ خوشی کی بات ہے کہ خدا اُسے قید کر دے گا اور پھر وہ کسی کو بھی گمراہ نہیں کر پائے گا۔ آخرکار خدا اُسے ہمیشہ کے لئے نابود کر دے گا۔ یہ بدکار ہستی کبھی بھی کسی کو بددیانتی کرنے پر اُکسا نہیں پائے گی۔
یہ بات شاید آپ کو ایک خواب معلوم ہو کہ خدا رشوتخوری کے تمام اسباب کو ختم کر دے گا۔ شاید آپ سوچیں کہ ”کیا خدا واقعی ایسا کرنے کی طاقت رکھتا ہے؟ اور اگر رکھتا ہے تو اُس نے ابھی تک ایسا کیوں نہیں کِیا؟“ یہ دلچسپ سوال ہیں اور بائبل میں اِن کے جواب پائے جاتے ہیں۔ * تو پھر کیوں نہ آپ بائبل کا مطالعہ کریں اور دیکھیں کہ بائبل اُس وقت کے بارے میں کیا بتاتی ہے جب ہمیشہ کے لئے رشوتخوری کا خاتمہ ہو جائے گا۔
[فٹنوٹ]
^ پیراگراف 8 یسوع مسیح کی قربانی کی اہمیت کے متعلق مزید جاننے کے لئے کتاب پاک صحائف کی تعلیم حاصل کریں کے باب ۵ کو دیکھیں۔ یہ کتاب یہوواہ کے گواہوں نے شائع کی ہے۔
^ پیراگراف 12 بائبل کے مطابق خدا کا ذاتی نام یہوواہ ہے۔
^ پیراگراف 15 مزید معلومات کے لئے کتاب پاک صحائف کی تعلیم حاصل کریں کے باب ۳، ۸ اور ۱۱ کو دیکھیں۔