DARO asaagaadan, neenikka mussinnay awudenne muleera xayana danddayenna gaada qoppay? Gidikko, hegaadan qoppiyoogee wottin deˈiyaaba. Hanno gakkanau, asaa naati banttau koyiyo ayso ubbaa mali beˈidosona. Yaatikkonne, mussinnaa muleera xayssibookkona. Asay issoy issuwau xillobaa oottiyo wodee yaaneeshsha?

Hegaa mala wodee yaanaagaa Geeshsha Maxaafay yootiyoogee ufayssiyaaba. Geeshsha Maxaafay Xoossay mata wode mussinnaa saˈaappe xayssanaagaa yootees. I waatidi hegaadan oottanee? Saˈaa kumetta hanotan laammana, saluwan deˈiya ba Kawotettaa baggaara i hegaadan oottana. Xoossay ehaanaadan woossana mala, Yesuusi bana kaalliyaageeta tamaarissidoy ha Kawotettaa. Issi issitoo Godaa Woosaa woykko Nu Aawau geetettiya he woosan Yesuusi, “Ne kawotettai yo; ne shenee . . . sa7ankka hano” yaagiis.—Maa. 6:10.

He Kawotettaa Kawuwaa, Yesuus Kiristtoosabaa Geeshsha Maxaafay hagaadan gees: “A xeesiya hiyyeesata, naaqettidaageetanne maaddiyaabi bainnaageeta i ashshees. Hiyyeesatussinne manqqotussi i qarettees; hiyyeesatu shemppuwaa ashshees. Eta naaquwaappenne makkalaappe i wozees.” (Maz. 72:12-14) Yesuusi mussinnaa gaasuwan qohettidaageetussi qarettiyoogaanne naaquwaa xayssanaagaa akeeka! Hegee minttettiyaaba gidennee?

He qarettiya, wolqqaama Kawuwaa baggaara Xoossaa Kawotettay saˈaappe mussinnaa xayssana. Waatidi? Mussinnau gaaso gidiya heezzubata xayssiyoogaana.

Ha wodiyan, nuuni ubbay yaaretidi issibaa oottanaadan denttettiya nagaraa eqettana koshshees. (Roo. 7:21-23) Gidikkokka, suurebaa oottanau koyiya loˈˈo asati deˈoosona. Eti Yesuusa suuttaa wozuwan ammaniyo gishshau, eta nagaray atto geetettees. * (1 Yoh. 1:7, 9) He asati Xoossaa gita siiquwaa bessiya, Yohaannisa 3:16n xaafettidaban goˈettoosona. He xiqisee hagaadan gees: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.”

Ammanettiya asau Xoossay tumuppe maalaaliyaabaa oottana. Matan yaana ooratta alamiyan, Xoossay leddan leddan asaa naata polonne xillo oottananne nagaray kaalettido ubbabaa xayssana. (Isi. 26:9; 2 PHe. 3:13) Hegaappe guyye ooninne bessennabaa oottanaadan nagaray denttettenna. Xoossaa Kawotettaa haaruwan, ammanettida asay mussinnaa aylletettaappe kiyana.

Ha wodiyan daroti eriiddi harata qohiyaabaa oottiyoogee azzanttiyaaba. Eti banttau goˈettanau giidi hiyyeesatanne manqqota qohoosona, qassi harati bessennabaa oottanaadan denttettoosona. Geeshsha Maxaafay hegaa mala asata, “Iitai ba oosuwaa, nagaranchchaikka ba qofaa aggo” yaagidi zorees. Bessennabaa oottiya hegaa mala uri ba nagaraappe simmikko, ‘Xoossay ayyo coo atto gaanaagaa’ Geeshsha Maxaafay yootees.—Isi. 55:7.

SHin, issoti issoti bantta iita oosuwaappe simmennan ixxidi zozzikko, Xoossay eta xayssiyoogee attenna. Geeshsha Maxaafay, “GODAN ufaissaa wottada, a ogiyaa naaga. . . . Iita asati xoqollettidi xayishin, neeni be7ana” yaagiyoogee, Xoossaa Kawotettaa baggaara polettana. (Maz. 37:34) Iitabaa oottiyoogan zozzidaageeti xayi simmin, Xoossau ammanettidi goynniyaageeta mussinnay qohiyoogee attana.

Simmennan ixxidi zozzida nagaranchatuppe waannatiyaagee Seexaanaa Dabloosa. Yihooway matan a qachidi, i asaa qohennaadan teqqiyoogaa eriyoogee ufayssiyaaba. Wurssettan, Xoossay a muleera xayssana. Hegaappe simmin, he pala iitay bessennabaa oottanaadan asaa denttettana danddayenna.

Xoossay mussinnau gaaso gidida ubbabaa xayssanaagee coo amo xalla milatana danddayees. Geella neeni, ‘Xoossay tumuppe hegaadan laammana danddayii? Danddayikko, ayssi laamiichibeennee?’ gaada oychana danddayaasa. Hegee loˈˈo oysha; qassi hegau Geeshsha Maxaafan aliya zaaroy deˈees. * Mata wode, mussinna ubbay merinau xayanaagaa xeelliyaagan Geeshsha Maxaafay yootiyoobaa pilgganaadan nena minttettoos.