Odudu Ikọ Abasi ke Ubon Hindu

Nte Nalini Govindsamy obụkde

T UTU amama ndifreke usenubọk Monday, August 22, 2005, emi ofụri ubon nnyịn ẹketiede ntre ẹdia udia usenubọk. N̄kada ke mben udi sia akamba mbufụt okofụtde mi ke mfre. Krishna ebe mi ama ọbọn̄ akam, ekem ndọhọ mbonubon nnyịn nte:

“Mmọn̄ n̄ka ufọkibọk man ẹkesiak mi mfre, ndien ana kpukpru mbufo ẹben̄e idem ndusụk n̄kpa. Mmetetịn̄ nte ẹdibụkde mi edieke n̄kpade. Mben̄e mbufo emi ẹkponode Jehovah nte ẹka iso ẹkpono enye. Amaedi mbon eken, mbọk ẹdọhọ Mme Ntiense Jehovah ẹdikpep mbufo Bible ẹnyụn̄ ẹtiene mmọ ẹdụk mme mbono esop mmọ. Edieke ẹnamde emi, mbufo ẹyetiene ẹdu ke obufa ererimbot emi ikọt Abasi mîdidọn̄ọke aba ke nsinsi nsinsi.”

Yak ntịn̄ kan̄a mban̄a idemmi ye nte n̄kasan̄ade ndifiọk ata Abasi. Ama ekem nyetịn̄ se iketịbede ke mma n̄kesịm ufọkibọk.

Ikedi Mbon Hindu

Ufọk nnyịn ekedi ufọkitiat ke esụk obio Durban ke South Africa. Nnyịn ikenyene ndidọk udịghi-ukot 125 nnyụn̄ nsan̄a mbe ekpri ọtọwọk ikọt mbemiso isịmde inuaotop ufọk nnyịn. Temple emi eka eka mi okobonde mme ndise ye mme mbiet abasi Hindu ama odu ekpere inuaotop oro. Eka eka mi ọkọdọhọ mi ke ndi “eyen abasi,” ye nte ke abasi emi isikponode ke temple emi ọkọnọ mi ndimana. Anyan ndatndat udịghi-ukot emi isisan̄ade ikesịm enyịnusụn̄ ufọk nnyịn okodu nsakiso temple emi. Ufọk nnyịn ama okpon etieti, enyene anyan kọridọ, akamba otụn̄ikan̄, ye ubet itiaba. Ẹma ẹnyụn̄ ẹbọp ubet kiet en̄wen ẹkpere akamba ufọk emi. Nnyịn owo 27 ikodụn̄ mi, oro edi, ete ete ye eka ete mi, ete mi ye nditọeka esie irenowo ita, udun̄wan eka esie, ye mme ubon mmọ.

Ikememke utom ndise mban̄a utọ ediwak owo emi, edi ndidụn̄ ntre ama anam nnyịn idiana kiet onyụn̄ anam ikop inemesịt. Eka mi ye iban nditọeka ete mi ẹma ẹsidiana kiet ẹnam utom ke ufọk. Iban emi ẹkesinam ufọk asana ẹnyụn̄ ẹtem udia ndien mmọ ẹkesinam emi ke adiana ke adiana. Ete ete mi ekedi ibuotufọk, enye ekesinyụn̄ edep udia emi kpukpru nnyịn idiade. Ete ete ye eka ete mi ẹkesika urua kpukpru Wednesday ẹkedep unam, mfri, ye ikọn̄ emi ididade item udia ke urua kiet. Nnyịn ikesitie ke idak eto emi odude ke mben ebeden̄ emi odude ekpere ufọk nnyịn ibet mmọ ẹnyọn̄ urua ẹdi. Ke ndondo oro idade ikụt mmọ ẹkamade ikpọ akpasa ẹwọrọ ke bọs, ima isifehe isụhọde udịghi-ukot 125 oro ikọbọ mmọ ibiom inyọn̄ ufọk.

Ima inyene anyan eyop kiet emi inuen ẹbọpde efọk ke esa nnyịn. Ekesidi mmọ ẹfefe ẹdọk ẹfefe ẹsụhọde ẹnyụn̄ ẹnam uyom. Eka ete mi ama esitie ke udịghi-ukot etehe nnyịn obụk mbụk ọnọ nnyịn. Ekesitie nte enye etịn̄ ọnọ nnyịn se mme inuen oro ẹtịn̄de. Ufọk ama esinem etieti. Ima isisak imam, itua eyet, ibre mbre, inyụn̄ inam kpukpru n̄kpọ nte ubon. Se inemde mi ikan  edi nte ke mi ke n̄kọtọn̄ọ ndikpep n̄kpọ mban̄a Andibot, kpa Jehovah Abasi ye Jesus Christ Eyen esie.

Mbemiso ikekpepde iban̄a Jehovah, enyene mme n̄kpọ emi ikesinamde kpukpru usen sia ikedide mbon Hindu. Ima isisịn usọrọ ke ini ke ini, ikot mme owo ẹditiene ẹkpono nsio nsio abasi nnyịn. Eka ete mi ama esikụt n̄kukụt ndusụk ini usọrọ emi onyụn̄ enyene nneme ye mme spirit, ndien ima isiwa uwa ufọt okoneyo mbak mme spirit emi idiyat esịt. Ẹma ẹnen̄ede ẹkpono ete ete mi ke obio sia enye ama esitiene ọnọ okụk ẹda ẹbọp ufọkn̄wed ye mme temple Hindu.

Nte Ikedide Idifiọk Jehovah

Udọn̄ọ ama owot ete ete mi ke 1972. Ke ọfiọn̄ ifan̄ ẹma ẹkebe, Jane n̄wan eyeneka ete mi ama ọbọ Mme Ntiense Jehovah Enyọn̄-Ukpeme ye Awake! Esịt ama amia enye ufen sia enye mîkayakke mmọ ẹdụk ufọk ẹdikwọrọ ikọ. Nnyịn ikesiyakke mmọ ẹdụk ufọk nnyịn. Edi ke ini mmọ ẹkefiakde ẹdi, n̄wan eyeneka ete mi oro ama okot mmọ ẹdụk ẹdi, onyụn̄ ọdọhọ ke nte ebe imọ esin̄wọn̄de n̄kpọ afịna imọ etieti. Mbọhọidụn̄ ye mme iman ẹma ẹdọhọ enye ọwọrọ ndọ. Mme Ntiense emi ẹma ẹnam enye ọfiọk nte Abasi esede ndọ. (Matthew 19:6) Enye ama enen̄ede ama se Bible etịn̄de aban̄a ndọ ye nte uwem edinemde ke obufa ererimbot emi Bible ọn̄wọn̄ọde. * Enye ikoyomke ndiwọrọ ndọ, edi ama ọtọn̄ọ ndikpep Bible kpukpru ini ye Mme Ntiense Jehovah. Ke ini mmọ ẹsụk ẹtiede ke etehe ufọk nnyịn ẹkpep n̄kpọ, iban nditọeka ete nnyịn eken ẹma ẹsitie ke esịt ubet mmọ ẹkpan̄ utọn̄.

Ekem, kpukpru mmọ ẹma ẹtiene ẹkpep Bible. Jane ama esimen se enye ekpepde etịn̄ ọnọ nnyịn onyụn̄ okot n̄wed Edikpañ Utöñ nö Aqua Andikpep * ọnọ nnyịn. Ke ini nditọeka ete mi ẹkedide ẹdidiọn̄ọ ke iban mmọ ke ẹkpep Bible, mmọ ẹma ẹkọbọ iban emi. Owo mmọ kiet ama akam atan̄ kpukpru n̄wed Mme Ntiense oro nnyịn ikenyenede ye Bible ọfọp. Mmọ ẹma ẹsisụn̄i ẹnyụn̄ ẹmịgha nnyịn ke ini idụkde mbono esop Mme Ntiense Jehovah. Ete mi kpọt mîkọbiọn̄ọke nnyịn, enye ikonyụn̄ ikpanke nnyịn ndikpep n̄kpọ mban̄a Jehovah. Iban nditọeka ete mi ẹma ẹka iso ẹdụk mbono esop Mme Ntiense ẹnyụn̄ ẹka iso ẹma Jehovah Abasi.

Jane ama ana baptism ke 1974 nte kiet ke otu Mme Ntiense Jehovah, ndien ikebịghike, eka mi ye iban nditọeka ete emi ẹma ẹna n̄ko. Nte ini akakade, eka ete mi ama etre ido ukpono mbon Hindu. Edi ami n̄kesinyụn̄ ntetiene ntre n̄ka mbono esop. Ke ini ikodụkde akamba mbono Mme Ntiense Jehovah, eyenete an̄wan kiet emi ekerede Shameela Rampersad ama edibụp mi ete: “Ini ewe ke afo edina baptism?” Mma mbọrọ enye nte: “Ndikemeke ndina sia mîdụhe eke esikpepde mi Bible.” Enye ama ọdọhọ ke  iyesikpep mi. Ntre, mma nna baptism ke December 16, 1977. Ekem, owo 18 ẹma ẹna baptism ke otu iman nnyịn 27 emi ikodụn̄de ntre. Edi ete mi okosụk edi owo Hindu ke ini emi n̄kakade ufọkibọk.

“Ẹkûtịmede Esịt ke Baba N̄kpọ Kiet”

Ikọ n̄wed Philippi 4:6, 7 ama enen̄ede ọdọn̄ mi esịt, akpan akpan ke abiausọbọ ama ọkọdọhọ mi ke mmenyene akamba mbufụt ke mfre. Itien̄wed oro ọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere ke Christ Jesus.” Imemke owo nditre ‘nditịmede esịt’ akpan akpan ke ini ẹdọhọde owo ke enye ekeme ndikpa ini ekededi. Ke nsonso oro, n̄katatua, ekem mbọn̄ akam nnọ Jehovah. Ọtọn̄ọde ke ini oro ka iso, mma nnyene “emem Abasi emi akande kpukpru ekikere,” enye ikayakke ntịmede esịt aba.

Eketie nte n̄kpọ emi Jehovah Abasi omụmde mi ubọk nnasia, ndien mma ndiọn̄ọ ke enye ekere aban̄a mi. (Isaiah 41:13) Enye akan̄wam mi nnyene uko nnyụn̄ ndọhọ mbiausọbọ ke mmebiere ndibet iyịp nte Bible ọdọhọde. (Utom 15:28, 29) Ke ntak emi, ete asiak-owo-idem ye enye oro esikịmde owo ibọk ibikpai ẹma ẹnyịme ndisiak mi mbufụt oro nnyụn̄ ntre ndisịn iyịp. Ke oro ebede, asiak-owo-idem oro ama ọdọhọ ke imokụre, ke ima ision̄o se ikofụtde mi ke mfre. Enye ama ọdọhọ n̄ko ete ke akananam imọ ikwe owo emi idem ọsọpde ọsọn̄ ntem ke ẹma ẹkesiak enye idem.

Ke urua ita kpọt ẹma ẹkebe, mma n̄keme ndina ke bed mi nnịm ukpepn̄kpọ Bible. Ke urua itiaba ẹma ẹkebe, mma n̄keme ndifiak n̄wat ubomisọn̄, n̄ka ukwọrọikọ, nnyụn̄ ndụk mbono esop Mme Ntiense Jehovah. Mma n̄kop inemesịt etieti nte nditọete ẹkesin̄wamde mi ke ini ukwọrọikọ. Mmọ ẹma ẹsisan̄a ye ami ẹnyụn̄ ẹmen mi ẹkesụk ke ufọk. Mma nsikpan̄ utọn̄ n̄kop nte ẹkotde Bible ke ọkpọ umụmikọ nnyụn̄ nnam kpukpru se anade nnam nte asan̄autom Abasi. Mme n̄kpọ emi ẹkenam idem ọsọp ọsọn̄ mi.

Ama enem mi ndikop nte ke ete mi ama ọtọn̄ọ nditiene Mme Ntiense Jehovah n̄kpep Bible ke ẹma ẹkesiak mi mfre ẹma. Enye ama ana baptism ke ini edide isua 73; enye ke onyụn̄ esịn ifịk anam n̄kpọ Jehovah idahaemi. Mbon mi emi ẹtienede mi ẹkpono Jehovah ẹwak ẹbe owo 40 idahaemi. Kpa ye oro enyịn mi ufien mîfọnke, ẹnyụn̄ ẹdade waya ẹbọp mi n̄kpọkpọrọ, nsụk ntie mbet ini emi Jehovah edinamde “kpukpru n̄kpọ ẹdi mbufa” ke ini ẹdinamde ofụri isọn̄ edi Paradise ke ini iso.—Ediyarade 21:3-5.

Mmenyene eti ebe emi onyụn̄ edide ebiowo ke esop, nnyụn̄ nnyene ediye eyenan̄wan kiet, Clerista, emi esinyụn̄ an̄wamde mi n̄ka iso n̄kwọrọ ikọ kpukpru ini. Jehovah enen̄ede ọdiọn̄ utom ukwọrọikọ mi. Kan̄a ke emi, mman̄wam ediwak owo ẹdikụt nte Bible enyenede odudu ke uwem mmọ. Se ibede owo 30 ke otu mmọ ẹyak idem ẹnọ Abasi ẹnyụn̄ ẹna baptism.

Ami nnen̄ede ntie mbet ini emi Jehovah Abasi edinyan̄ade nnyịn isio ke idiọk ererimbot emi inyụn̄ inam nnyịn idu ke Paradise isọn̄.

[Mme Ikọ Idakisọn̄]

[Ndise ke page 10]

Ami ke eka mi akama emi

[Ndise ke page 10]

Ufọk nnyịn edi emi

[Ndise ke page 10]

Ami nda emi n̄kpere ọyọhọ udịghi-ukot 125

[Ndise ke page 11]

Ami ye ebe mi (ufien), adiaha mi, ye ete ye eka mi