MI NO inap lusim tingting long Mande moning bilong Ogas 22, 2005 taim famili olgeta bilong mi ol i bung bilong kaikai. I luk olsem mi bai lusim laip bilong mi, long wanem, mi gat wanpela bikpela tiuma long kru bilong mi. Man bilong mi Krishna i beten na bihain mi toktok long famili.

Mi tok: “Mi bai go long haus sik long kisim wanpela bikpela operesen, olsem na yupela i mas redim tingting bilong yupela long wanem samting bai kamap long mi. Mi stretim rot pinis long ol samting bilong fiuneral bilong mi sapos mi dai. Yupela husat i lotuim Jehova, plis no ken givap long mekim olsem. Na yupela husat i no lotuim Jehova, mi laik bai yupela i stadi long Baibel na go long ol miting Kristen bilong mipela. Long dispela rot, yupela bai i gat wankain bilip olsem mi gat long nupela taim God bai kamapim we ol man i lotu tru long em ol bai i gat gutpela helt na ol bai stap laip oltaim long Paradais long graun.”

Paslain long mi stori long samting i kamap long operesen bilong mi, bai mi stori long sindaun bilong mi na olsem wanem mi bin kisim save long God tru.

Famili bilong mi i sindaun long wanpela traipela haus ol i wokim long diwai na ain na i stap antap long wanpela liklik maunten long biktaun Durban, long Saut Afrika. Mipela i save lusim bikrot i stap daunbilo long veli na wokabaut long 125 step bilong i go kamap long fran geit bilong haus. Bihain long mipela i bihainim dispela step, mipela i save wokabaut long wanpela sotpela bus rot i go kamap long ain geit. Long wanpela sait bilong dispela geit, tempel bilong bubu meri i stap we i gat planti piksa na imis bilong ol god bilong Hindu. Bubu meri i tokim mi olsem mi wanpela “pikinini bilong tempel” (mandir kī baccā, long tok Hindi) na mi mas tenkyu long ol god long mama i karim mi. Long narapela sait bilong tempel i gat retpela step i go antap long fran dua bilong haus. Em traipela haus i gat longpela korido, bikpela kitsen i gat stov bilong ston kol, 7-pela rum slip, na wanpela rum slip i stap long narapela haus i join long bikpela haus. Mipela 27 manmeri i stap long dispela haus—em tumbuna papamama, papa wantaim 3-pela liklik brata na liklik susa bilong em na famili bilong ol.

I no isi long lukautim kain bikpela famili olsem long ol samting ol i mas kisim. Tasol pasin bilong bikpela famili long sindaun wantaim long wanpela haus i mekim famili olgeta i pas gut wantaim na stap amamas. Mama bilong mi Gargee Devi em wanpela bilong ol 4-pela tambu meri em ol i save serim ol wok bilong haus. Ol i save senis senis long kukim kaikai na klinim haus. Bubu man bilong mi em i het bilong famili, olsem na em i save baim kaikai bilong famili olgeta. Long olgeta Trinde, tumbuna papamama bilong mi i save go long maket bilong baim abus, prut, na ol gaden kaikai samting bilong wanpela wik. Mipela i save sindaun aninit long wanpela diwai long arere bilong wanpela maunten na lukluk i go daun long veli na wetim ol long kam bek long maket. Taim mipela i lukim ol i kam ausait long bas wantaim ol bikpela basket bilong ol, mipela i save ran i kam daun long 125 step na helpim ol long karim ol samting i go long haus.

Long gaden bilong mipela i gat wanpela bikpela diwai pam we i gat ol pisin mynahs i wokim haus bilong ol. Mipela i save harim krai bilong ol taim ol i flai i go i kam. Bubu meri bilong mi i save sindaun long step long fran dua bilong haus na stori long mipela, i olsem em i tokim mipela long tok  em ol pisin i mekim. Mi gat planti gutpela memori long laip bilong mipela long dispela haus! Mipela i save lap, krai, pilai, smail, na serim samting wantaim—mipela i amamas long stap wantaim olsem wanpela bikpela famili. Tasol bikpela samting moa, em dispela hap we mipela i bin kirap long kisim save long Man Bilong Wokim yumi, Jehova, na Pikinini bilong em, Jisas Krais.

Paslain long mipela i kisim save long Jehova, long olgeta de mipela i save mekim lotu long ol god bilong Hindu. Na tu, planti taim mipela i save mekim ol bikpela bung bilong lotu we mipela i singautim ol manmeri i kam bilong lotuim ol god man na ol god meri. Sampela taim long ol dispela bung, bubu meri bilong mi i save lukim driman na toktok wantaim ol spirit, na long 12-klok nait stret em i save sakrifaisim ol animal bilong amamasim ol. Bubu man bilong mi i gat nem insait long komiuniti long pasin bilong givim ol samting long helpim wok bilong wokim na ronim ol pablik skul na ol tempel bilong Hindu.

Long 1972, bubu man bilong mi i sik na em i dai. Sampela mun bihain, wanpela anti bilong mi nem bilong em Indervathey, ol i kolim em tu olsem Jane, em i kisim nius Wastaua na Kirap! long tupela Witnes Bilong Jehova. Bel bilong em i gat tok long em i no bin singautim ol i kam insait long haus na toktok wantaim ol. Olgeta taim mipela i no save putim yau long tok bilong ol Witnes. Tasol long narapela taim ol i bin kam, anti bilong mi i singautim ol i kam na toktok wantaim ol long wanpela hevi long marit bilong em, dispela hevi em pasin bilong ankol bilong mi long dring oltaim. Ol neiba na wanblut bilong mipela i kirapim anti long brukim marit. Tasol ol Witnes i stori long tingting bilong God long marit. (Matyu 19:6) Anti bilong mi i amamas tru long ol skultok bilong Baibel long marit na long tok promis bilong en long gutpela sindaun bai kamap hia long graun. a Em i bin tingting long lusim ankol bilong mi, tasol nau em i senisim tingting bilong em, na em i kirap stadi long Baibel wantaim ol Witnes Bilong Jehova. Taim em i stap long living rum na stadi, ol narapela meri wan marit bilong em ol i save stap long rum bilong ol na putim yau long em.

Bihain, olgeta dispela meri i kirap stadi long Baibel. Anti Jane i save stori wantaim mipela long ol samting em i lainim, na planti taim em i save ritim na stori long mipela long ol tok i stap long buk Harim Tok Bilong Bikpela Tisa. b Taim ol ankol bilong mi i save olsem ol anti bilong mi i stadi long Baibel, ol i kirap birua long mipela. Wanpela ankol bilong mi i kukim olgeta buk na nius na wanpela Baibel bilong mipela. Ol i toknogutim mipela na paitim mipela, long wanem, mipela i save go long ol miting Kristen. Papa bilong mi tasol i no bin mekim nogut long mipela, na em i no pasim mipela long kisim save long Jehova. Mama bilong mi wantaim olgeta anti ol i save go yet long ol miting na strongim pasin bilong ol long laikim God Jehova.

Long 1974, anti Jane i kisim baptais na kamap wanpela Witnes Bilong Jehova, na bihain mama bilong mi na ol narapela anti bilong mi tu i kisim baptais. I no longtaim, bubu meri bilong mi i lusim lotu Hindu na ol pasin bilong lotu. Inap planti yia mi save bihainim tasol ol narapela na go long olgeta miting Kristen. Orait long wanpela bikpela kibung bilong ol Witnes Bilong Jehova, wanpela Witnes nem bilong em Shameela Rampersad i askim mi olsem: “Wanem taim bai yu kisim  baptais?” Mi bekim tok bilong em olsem, “Mi no inap kisim baptais, long wanem, i no gat wanpela i stadi wantaim mi long Baibel.” Shameela i tok long stadi wantaim mi. Long wanpela kibung i kamap bihain long dispela, long Disemba 16, 1977, mi kisim baptais. Nau, namel long dispela 27 manmeri em mipela i sindaun wantaim, 18-pela i kisim baptais. Tasol long taim bilong mi long kisim operesen, papa bilong mi, Sonny Deva, i stap yet olsem wanpela Hindu.

Tok bilong Filipai 4:6, 7 i bin helpim mi na moa yet long taim dokta i painimaut olsem mi gat wanpela bikpela tiuma long kru. Dispela ves i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.” I hatwok long lusim pasin bilong “tingting planti” na moa yet sapos dokta i tokim yu olsem klostu nau bai yu dai. Pastaim mi krai tasol, na bihain mi beten long Jehova. Kirap long dispela taim na i kam, mi pilim tru “bel isi bilong God i winim tru tingting bilong man.”

I olsem God Jehova i sambai long mi na mi pilim olsem em i helpim mi long karim dispela hevi. (Aisaia 41:13) Em i helpim mi long strongim bel na stori gut long ol dokta na nes olsem mi gat strongpela tingting long bihainim tok bilong Baibel long sakim blut. (Aposel 15:28, 29) Long dispela as, dokta bilong katim man na dokta bilong mekim i dai tingting, tupela i orait long mekim operesen na ol i no inap givim blut. Bihain long operesen, dokta bilong katim man i tok operesen i kamap gut na ol i bin rausim tiuma olgeta. Em i tok tu olsem em i no bin lukim wanpela sikman i kamap orait hariap olsem, bihain long bikpela operesen bilong kru.

Tripela wik bihain, maski mi stap yet long bet, mi mekim fes Baibel stadi bilong mi. Bihain long 7-pela wik mi kirap gen long draiv, go autim tok, na go long ol miting bilong ol Witnes Bilong Jehova. Mi pilim tru pasin bilong ol brata na sista Kristen long helpim mi na wok wantaim mi long autim tok. Ol i save mekim olgeta samting ol inap mekim bambai mi no stap wanpis na mi go bek gut long haus. Mi pilim olsem pasin bilong harim rekoding bilong Baibel ritim na oltaim tingting long pasin bilong mi long lotuim Jehova, dispela i bin helpim mi long kamap orait hariap.

Mi bin amamas tu long kisim save olsem bihain long operesen bilong mi, papa bilong mi i orait long stadi long Baibel wantaim ol Witnes. Taim em i gat 73 krismas, em i kisim baptais na nau em i givim bel tru long mekim wok bilong Jehova. Nau winim 40 wanblut bilong mi ol i lotuim Jehova. Maski ai bilong mi long sait bilong han kais i bagarap, na ol i putim ain bilong holim ol bun bilong het bilong mi, mi bilip na wetim dispela taim em Jehova bai “mekim olgeta samting i kamap nupela” long Paradais bai kamap long graun.—Revelesen 21:3-5.

Mi amamas long gutpela man bilong mi husat i mekim wok olsem wasman Kristen, na naispela pikinini meri bilong mi, Clerista, i stap olsem helpim bilong mi taim mi mekim yet wok bilong autim tok fultaim. God Jehova i blesim tru wok autim tok bilong mi. I kam inap long nau, mi bin helpim planti Baibel sumatin bilong mi long pilim tru strong bilong Tok Bilong God long laip bilong ol. Winim 30 bilong ol dispela sumatin i dediketim laip bilong ol long God na kisim baptais.

Mi bilip tru na wetim ol gutpela samting bai kamap bihain, na mi wetim taim we God Jehova bai kisim bek yumi long ol pen na hevi bilong dispela graun na bringim yumi i go insait long Paradais bai kamap long graun.