Umo Mazgu gha Ciuta Ghasinthira Mbumba ya Cihindu

Yakuyowoyeka na Nalini Govindsamy

NIZAMULUWA yayi ivyo vikacitika pa Mande, 22 Ogasiti, 2005 pa nyengo ya cakurya ca mulenji apo nkhaŵa na mbumba yakwithu. Umoyo wane ukaŵa pa ngozi cifukwa nkhaŵa na cakutupa cikuru ku wongo. Pamasinda pakuti mfumu wane Krishna walomba, nkhayowoya ku mbumba yose.

Nkhaŵaphalira kuti: “Nkhuluta ku cipatala ndipo ŵamunicita opareshoni yakofya comene, ntheura muŵe ŵakunozgeka pa cilicose ico cingakacitika. Nanozgerathu ndondomeko ya nyifwa yane, usange ndimo vingakaŵira. Kwa imwe mukusopa Yehova lutilirani kucita nthena. Kweni mwaŵanji mose nkhumupemphani kuti mwambe kusambira Baibolo ndipo mulutenge ku maungano ghithu Ghacikhristu. Para mucitenge nthena tizamuŵa na cipulikano cimoza mu caru ciphya umo Ŵakhristu ŵaunenesko ŵazamukhala kwamuyirayira na umoyo uwemi.”

Pambere nindalongosore vyakukhwaskana na opareshoni yane, lekani nimuphalirani za umoyo wane kweniso umo vikendera kuti nimanye Ciuta waunenesko.

Nkhakulira mu Mbumba ya Cihindu

Mbumba yithu yikakhalanga mu nyumba yikuru yamathabwa iyo yikaŵa ya malata ndipo yikaŵa pacanya pa phiri mu msumba wa Durban ku South Africa. Kuti tikafike pa geti la ku maso kwa nyumba, tikakweranga masitepu 125 kufuma ku msewu ukuru. Masitepu agha ghakaŵa mu kanthowa kamuswaswayira. Kumphepete kwa geti ili kukaŵa tempele la ŵabuya ilo mukaŵa vithuzithuzi na vikozgo vya ŵaciuta Ŵacihindu. Granny wakaniphalira kuti nkhaŵa “mwana wa mu tempele” ndiposo kuti ŵaciuta awo tikasopanga ndiwo ŵakawovwira kuti ine nibabike. Pafupi na tempele ili pakaŵa masitepu ghakuphakika polishi mucesamu agho ghakakafikanga ku mulyango wa kumaso kwa nyumba. Nyumba iyi yikaŵa yikuru comene ndipo yikaŵa na korido, khicini likuru, vipinda vyakugona 7 na nyumba yinyake yicoko ya cipinda cimoza iyo yikaŵa kuwaro. Mu nyumba iyi mukakhalanga taŵanthu 27. Asekuru, abuya, adada, ŵanung’una ŵawo ŵatatu, na ankhazi. Wose aŵa ŵakaŵa na mbumba zawo.

Cikaŵa cipusu yayi kupwelelera mbumba yikuru nthena. Kweni kukhala pamoza kukawovwira kuti mbumba yiŵe yakukolerana ndipo pali vinthu vinandi vyakukondweska ivyo tizamuviluwa yayi. Ŵamama ŵane ŵacoko ŵatatu, pamoza na amama ŵakawovwirananga milimo ya pa nyumba. Ŵakapokerananga kuphika na kutozga vinthu. Asekuru ndiwo ŵakaŵa mutu wa mbumba, ndipo ndiwo ŵakaguranga cakurya ca mbumba yose. Pa citatu cilicose, asekuru na abuya ŵakalutanga ku musika kukagura nyama, vipambi na mphangwe vya sabata yose. Pakulindilira kuti ŵawereko, tikatemwanga kukhala musi mwa khuni la payina ilo likaŵa pa malo agho ku msewu kukawonekanga. Para tawona waka kuti ŵakhira basi na vimabasiketi vikuru, tikaŵacimbiliranga kuti tikaŵapokelere.

Mu munda withu mukaŵa khuni litali la mkama ndipo mukaŵa tuyuni tunyake uto tukazengamo vivwimbo. Ndipo tikatuwonanga tukudukaduka na kupoma vyongo. Abuya ŵakatemwanga kukhala pa masitepu na kutiphalira tunkhani twakukhwaskana na tuyuni utu. Para ŵakulongosora, ŵakaŵanga nga ŵakung’anamulira mazgu gha tuyuni utu. Nkhukumbukira vinthu vinandi vyakukondweska vya  umo tikakhaliranga mu nyumba iyi. Tikasekanga, kulira, kuseŵera, na kugaŵana vinthu. Tikasangwanga kuŵa pamoza. Kweni cakuzirwa comene nchakuti mu nyumba iyi ndimo tikambira kusambira za Mlengi withu Yehova, na Mwana wake, Yesu Khristu.

Pambere tindambe kusambira za Yehova, cisopa cithu ca Cihindu cikaŵa na tumitheto uto tikacitanga zuŵa lililose. Kanandi tikaŵangaso na viphikiro vikuru. Pa viphikiro ivi tikacemerangapo ŵalendo mwakuti tipeleke nchindi ku ŵaciuta ŵakupambanapambana. Pa viphikiro vinyake, abuya ŵakakolekanga na mizimu ndipo ŵakayowoyeskananga nayo. Usiku pakati tikayitheteleranga kuti yitune. Asekuru ŵakamanyikwanga pa nkhani yakucita vinthu vyalusungu nga nkhuzenga na kwendeska masukulu ndiposo matempele gha Cihindu.

Umo tikamanyira Unenesko wakukhwaskana na Yehova

Mu 1972, asekuru wakalwara comene ndipo ŵakafwa. Myezi yicoko waka yikati yajumphapo, amama ŵane ŵanyake zina lawo Indervathey awo ŵakamanyikwangaso kuti Jane, ŵakapoka Gongwe la Mulinda na Galamukani! ku Ŵakaboni ŵa Yehova ŵaŵiri. Amama aŵa ŵakadandawura cifukwa ca kuleka kuŵanjizga mu nyumba kuti ŵadumbiskane. Nyengo zose tikaŵacimbizganga Ŵakaboni. Kweni ulendo unyake ŵakaŵanjizga mu nyumba. Ndipo ŵakaŵalongosolera masuzgo agho ghakaŵapo mu nthengwa cifukwa cakuti adada ŵacoko ŵakamwanga comene phere. Ŵazengezgani na ŵabali ŵanji ŵakakhuŵilizganga amama ŵacoko kuti ŵapatane na adada. Kweni Ŵakaboni aŵa ŵakalongosora umo Ciuta wakuwonera nthengwa. (Mateyu 19:6) Amama ŵacoko ŵakacontheka comene na ulongozgi wa mu Baibolo kweniso ivyo likulayizga pa nkhani ya umoyo uwemi pa caru capasi. a Ŵakasintha maghanoghano ghakuti ŵalekane na adada, ndipo ŵakamba kusambira Baibolo mwakukhazikika na Ŵakaboni. Apo ŵakasambiranga Baibolo pa khonde, ŵamama ŵanji ŵacoko ŵakategherezganga ku vipinda vyawo.

Paumaliro, ŵamama ŵacoko wose ŵakamba kusambira Baibolo. Amama a Jane ŵakaphalirangako ŵanji ivyo ŵakasambiranga kweniso ŵakatemwanga kutiŵazgira na kutilongosolera nkhani za mu buku lakuti Kumamumvetsera Mphunzitsi Wamkuru’yo. b Adada ŵacoko wose pamoza na a mulamu ŵakati ŵamanya kuti ŵawoli ŵawo na ine tikusambira Baibolo, ŵakamba kutisuska. Dada wane munyake wakatora mabuku ghithu ghose pamoza na Baibolo na kocha. Ŵakatikalipiranga na kutitimba cifukwa ca kuluta ku maungano. Adada ŵekha ndiwo ŵakaŵavya maghanoghano gha nthena, ŵakatikanizgapo yayi kusambira vya Yehova. Ŵamama wose ŵatatu pamoza na amama ŵakunibaba, ŵakalutilira kuwungana ndipo ŵakamba kutemwa comene Yehova Ciuta.

Mu 1974, amama a Jane ŵakabapatizika kuŵa Ŵakaboni ŵa Yehova ndipo pamasinda amama na ŵamama ŵanyake wose. Nyengo yikati yajumphapo, abuya ŵakaleka kucita mitheto ya cisopa ca Cihindu. Kwa vyaka vinandi, nane nkhalutanga ku maungano gha Ŵakaboni. Pa ungano unyake ukuru wa Ŵakaboni ŵa Yehova, Kaboni munyake zina lake Shameela Rampersad wakanifumba kuti, “Kasi uzamubapatizika pawuli?”  Nkhazgora kuti: “Nkhumanya yayi cifukwa palije uyo wali kusambirapo nane Baibolo.” Wakajipeleka kuti wanisambizgenge. Pa ungano wakulondezgapo uwo ukacitika pa Disembala 16, 1977, nkhabapatizika. Paumaliro, pa ŵanthu 27 ŵa mu mbumba yithu, 18 ŵali kubapatizika. Kweni pa nyengo iyo ŵakanicitanga opareshoni, adada ŵane a Sonny Deva ŵakaŵa kuti ŵacali ku cisopa ca Cihindu.

“Mungenjerwanga Cara na Kanthu Kalikose”

Mazgu agho ghali pa Ŵafilipi 4:6, 7 ghakanovwira comene, comene pa nyengo ya opareshoni yikuru iyi. Mavesi agha ghakuti: “Mungenjerwanga cara na kanthu kalikose kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Ciuta, ndipo mtende wa Ciuta uwo ukuluska ghanoghano lililose, usungilirenge mitima yinu na maghanoghano ghinu kwizira mwa Khristu Yesu.” Nchakusuzga kuleka kwenjerwa “na kanthu kalikose,” comenecomene para waphalirika kuti nyengo yiliyose ufwenge. Pakwamba nkhaliranga waka, kufuma apo nkhalomba kwa Yehova. Nati nalomba nkhaŵa na “mtende wa Ciuta uwo ukuluska ghanoghano lililose.”

Yehova Ciuta wakaŵa nga wanikora ku woko la malyero, ndipo nkhawonanga kuti wakaŵa nane nyengo yose iyi. (Yesaya 41:13) Wakanovwira kuti niŵe na cikanga kulongosolera ŵadokotala kuti nkhukhumba kupulikira dango la mu Baibolo lakuti tikwenera kuziŵizga ndopa. (Milimo 15:28, 29) Nati naŵaphalira, ŵadokotala ŵakazomera kucita opareshoni kwambura kuniŵika ndopa. Pamasinda, dokotala wakaniphalira kuti opareshoni yikenda makora comene ndipo cakutupa cose cili kuwuskikapo. Wakatiso wandawonepo kuti munthu uyo ŵamucita opareshoni yikuru ya ku wongo wacire luŵiro nthena.

Masabata ghatatu ghakati ghajumphapo, nkhasambira Baibolo na munthu uku nili pa bedi. Masabata ghankhondi na ghaŵiri ghakati ghajumphapo, nkhambaso kwendeska galimoto, kuluta kukapharazga ndiposo kuwungana na Ŵakaboni ŵa Yehova. Nkhuwonga ŵabali na ŵadumbu cifukwa ca kunovwira apo tikapharazgiranga lumoza. Ŵakawoneseskanga kuti nileke kuŵa nekha kweniso kuti nafika makora ku nyumba. Nkhughanaghana kuti kutegherezga matepi gha Baibolo kweniso kuŵika umoyo wane wose pa vinthu vyauzimu vikawovwira kuti nicire luŵiro.

Nkhakondwaso kupulika kuti adada ŵakazomera kusambira Baibolo na Ŵakaboni, opareshoni yane yikati yacitika. Ŵakabapatizika apo ŵakaŵa na vyaka 73, ndipo sono ŵakuteŵetera Yehova mwamwamphu. Ŵanthu ŵakujumpha 40 pa mbumba yithu sono nawo Mbakaboni ŵa Yehova. Nangauli jiso limoza nkhulaŵiska makora yayi kweniso ku mutu wane ŵali kuŵikako cisulo kuti ukorane pamoza, kweni nkhulindilira nyengo iyo Yehova wazamuzgora “vinthu vyose kuŵa viphya” mu caru ca Paradiso ico cikwiza.—Uvumbuzi 21:3-5.

Yehova wali kunitumbika na mwanalume wacitemwa uyo ni mulara mu mpingo kweniso nili na mwana msungwana wakutowa zina lake Clerista. Clerista wakunovwira apo nkhulutilira kupharazga. Yehova Ciuta watumbika comene uteŵeti wane. Nakuti nawovwirapo ŵasambiri ŵa Baibolo ŵanandi kuti ŵawone kuti Mazgu gha Ciuta nga nkhongono comene. Ŵasambiri ŵakujumpha 30 ŵali kujipatulira kwa Ciuta ndipo ŵali kubapatizika.

Na cigomezgo cose nkhulindilira nyengo iyo Yehova Ciuta wazamutiponoska ku mgonezi wakuŵinya uwu, na kutilongozgera mu caru ciphya ca paradiso.

[Mazgu ghamusi]

[Cithuzithuzi pa peji 9]

[Cithuzithuzi pa peji 10]

Nili mu mawoko gha kwa mama

[Cithuzithuzi pa peji 10]

Nyumba ya kwithu

[Cithuzithuzi pa peji 10]

Pafupi na masitepu 125

[Cithuzithuzi pa peji 11]

Na mfumu wane (kumazere), mwana wane msungwana na ŵapapi ŵane