Obeir Bondye e benefisye avek son bann promes

“Annefe, . . . ti napa personn pli gran ki [Bondye] par ki i pou fer son serman, alor i ti fer en serman par limenm.”​—EBR. 6:13.

KI OU KAPAB REPONN:

Ki lasirans nou annan ki plan Bondye pou sirman vin vre?

Ki promes Bondye ti fer apre ki Adan ek Ev ti fer pese?

Ki byenfe nou gannyen atraver promes ki Bondye ti fer avek Abraam?

1. Ki mannyer parol Zeova i diferan avek sa ki pour imen enparfe?

ZEOVA i “sa Bondye laverite.” (Ps. 31:5) Imen i enparfe, alor nou pa kapab toultan met konfyans dan zot, me kant a Bondye, i “pa kapab manti.” (Ebr. 6:18; Lir Nonm 23:19. *) Bann byenfe ki i’n promet imen i toultan vin vre. Par egzanp, tou sa ki Bondye ti dir i pou fer o konmansman sak peryod kreasyon “ti arive.” Alor, a lafen sizyenm zour kreasyon, “Bondye ti vwar tou keksoz ki i ti’n fer e, gete! i ti tre bon.”​—Zen. 1:6, 7, 30, 31.

2. Ki savedir zour repo Bondye e akoz i ti “fer li vin sakre”?

² Apre ki Zeova ti revwar tou sa ki i ti’n kree, i ti anons konmansman setyenm zour. I pa ti en zour 24 erdtan, me plito en gran peryod letan kot Bondye pe repoze avek son travay kreasyon lo later. (Zen. 2:2) Zour repo Bondye pa ankor fini. (Ebr. 4:9, 10) Labib pa dir kan egzakteman sa zour ti konmanse, me nou konnen ki sa ti ariv en pe letan apre ki Ev, madanm Adan, ti’n ganny kree apepre 6,000 an pase. Tre byento Renny Mil An Zezi Kri pou konmanse. Dan sa peryod letan, promes Bondye pou sirman ganny akonplir, later pou vin en paradi e imen parfe pou reste lo la pour touzour. (Zen. 1:27, 28; Rev. 20:6) Eski ou kapab asire ki ou pou ganny sa lavenir ere? Byensir ki wi! Akoz “Bondye ti beni sa setyenm zour e fer li vin sakre.” Sa ti en garanti ki nenport ki problenm ki kapab arive, plan Bondye pou definitivman vin vre a lafen son zour repo.​—Zen. 2:3.

3. (a) Ki ti arive apre ki zour repo Bondye ti konmanse? (b) Ki mannyer Zeova ti fer konnen ki mannyer i ti pou rezourd sa problenm?

 ³ Apre ki zour repo Bondye ti konmanse, problenm osi ti konmanse. Satan, en lanz Bondye, ti deside pour opoz Bondye. I ti koz sa premye mansonz e tronp Ev pour ki i dezobeir Zeova. (1 Tim. 2:14) Apre, Ev ti fer son msye dezobeir Bondye li osi. (Zen. 3:1-6) Menm dan en peryod difisil dan listwar kan Zeova ti ganny akize konman en manter, i pa ti vwar li neseser pour konfirm son plan par fer en serman ki i pou tenir son parol. O kontrer i ti zis dir ki mannyer sa problenm pou ganny rezourd par dir sa parol ki imen ti pou konpran pli tar: “Mon pou met en laenn ant ou [Satan] ek sa madanm, ant ou desandans ek son desandans. I [sa Desandans ki’n ganny promet] pou kraz ou latet e ou pou kraz son talon.”​—Zen. 3:15; Rev. 12:9.

SERMAN I EN MWAYEN LEGAL

4, 5. Ki mwayen legal parfwa Abraam ti servi?

⁴ Pandan sa peryod letan dan listwar imen, i paret ki fer serman pour konfirmen ki en parol i vre pa ti en keksoz ki Bondye ti demann Adan ek Ev pour fer. Bann lanz ek imen parfe ki kontan Bondye e imit li pa bezwen fer serman akoz zot toultan koz laverite e zot annan konfyans total dan kanmarad. Me keksoz ti sanze kan imen ti fer pese e vin enparfe. Avek letan, kan imen ti’n abitye koz manti e anbet lezot, i ti neseser pour pret serman pour montre ki sa ki zot ti pe dir i vre.

⁵ Fer serman ti en mwayen legal e Abraam ti fer sa dan omwen trwa lokazyon. (Zen. 21:22-24; 24:2-4, 9) Par egzanp, i ti fer en serman apre ki i ti’n defet lerwa Elam ek son bann alye. Letan Abraam ti retournen, lerwa Salenm ek Sodonm ti vin zwenn li. Lerwa Salenm, Melkisedek, ti osi “pret Bondye Tre O.” Konman pret, i ti beni Abraam e rann glwar Bondye pour donn Abraam laviktwar lo son bann lennmi. (Zen. 14:17-20) Apre, kan lerwa Sodonm ti anvi donn Abraam en rekonpans pour sov son pep dan lanmen zot bann lennmi, Abraam ti fer sa serman: “Mon lev mon lanmen pour fer serman avek Zeova sa Bondye Tre O, sa Enn ki’n kre lesyel ek later, ki, ni en difil ni en lase sandal, non, mon pa pou pran okenn ou keksoz ki pour ou, pour ou pa dir, ‘Mwan ki ti fer Abram ris.’”​—Zen. 14:21-23.

PROMES KI ZEOVA IN FER AVEK ABRAAM

6. (a) Ki legzanp Abraam in kite pour nou? (b) Ki byenfe nou kapab gannyen lefet ki Abraam ti obeisan?

⁶ Pour byennet bann imen enparfe, Zeova in osi fer bann serman par servi bann lekspresyon parey: “Souvren Senyer Zeova in dir: ‘Tan ki mon vivan.’” (Ezek. 17:16) Labib i dekrir plis ki 40 fwa kot Zeova in fer serman. Petet legzanp pli familye i relasyon ki Bondye ti annan avek Abraam. I ti fer bann lalyans oubyen promes avek Abraam pour plizyer lannen e letan nou met zot tou ansanm, zot montre ki sa Desandans ki ti’n ganny promet ti pou en desandans Abraam, par son garson Izaak. (Zen. 12:1-3, 7; 13:14-17; 15:5, 18; 21:12) Apre Zeova ti donn Abraam en tes difisil. I ti demann Abraam pour sakrifye son garson byenneme. San tarde, Abraam ti obeir Zeova e zis  o moman ki i ti pe al sakrifye Izaak, en lanz Bondye ti aret li. Apre sa, Bondye ti fer sa serman: “Wi, par mwan menm mon promet . . . akoz lefet ki ou’n fer sa e ou pa’n ezite donn ou garson, ou sel garson, mon pou vreman beni ou e mon pou vreman fer ou desandans vin bokou parey zetwal dan lesyel e parey gren disab o bor lanmer; e ou desandans pou pran lavil son bann lennmi. Atraver ou desandans tou nasyon lo later pou sirman ganny beni, parski ou’n ekout mwan.”​—Zen. 22:1-3, 9-12, 15-18.

7, 8. (a) Akoz Bondye ti fer en serman avek Abraam? (b) Ki mannyer “lezot mouton” Kris pou benefisye avek promes ek serman Bondye?

⁷ Akoz Bondye ti fer en serman avek Abraam pour montre li ki Son bann promes ti pou vin vre? Bondye ti fer sa serman pour reasir bann ki pou dirize ansanm avek Kris e pour fer zot lafwa vin pli for. Zot dezyenm parti sa “desandans” ki ti’n ganny promet. (Lir Ebre 6:13-18; Gal. 3:29) Zis parey zapot Pol ti eksplike, Zeova “ti konfirm li [son promes] par en serman. Sa de keksoz [son promes ek serman] pa zanmen kapab sanze e Bondye pa kapab manti. Alor nou . . . [annan] en gran lankourazman pour sezi sa lesperans ki i’n propoz nou.”

⁸ Pa zis bann Kretyen swazir ki benefisye atraver sa serman ki Bondye in fer avek Abraam. Atraver “desandans” Abraam, Zeova ti pret serman ki “tou nasyon lo later pou sirman ganny beni.” (Zen. 22:18) I annan “lezot mouton” Kris ki obeisan parmi sa bann ki pou ganny beni e zot annan lespwar pour viv pour touzour dan paradi lo later. (Zan 10:16, NW) Ki swa ou annan lespwar pour viv dan lesyel oubyen lo later, “sezi” sa lespwar par kontinyen obeir Bondye tou ou lavi.​—Lir Ebre 6:11, 12.

LEZOT SERMAN KONSERNAN PROMES BONDYE AVEK ABRAAM

9. Ki serman Bondye ti fer kan bann desandans Abraam ti dan lesklavaz Lezip?

⁹ Plizyer syek pli tar, Zeova ti ankor enn fwa fer en serman konsernan sa promes ki nou’n fek mansyonnen. I ti fer sa kan i ti anvoy Moiz pour koz avek bann desandans Abraam ki ti dan lesklavaz Lezip. (Egz. 6:6-8) Plitar Bondye ti eksplike ki i ti pe fer en serman sa letan. I ti dir: “Kan mon ti  swazir Izrael, . . . mon ti lev mon lanmen pour fer en serman avek zot pour tir zot Lezip e anmenn zot dan en pei ki mon’n vwar pour zot, enn ki koul dile ek dimyel.”​—Ezek. 20:5, 6.

10. Ki promes Bondye ti fer avek Izrael apre ki zot ti’n ganny delivre Lezip?

¹⁰ Plitar, apre ki Izrael ti’n ganny delivre Lezip, Zeova ti fer sa lot promes avek zot: “Aprezan si zot fer tou sa ki mon’n dir e ki zot vreman gard mon lalyans, alor zot pou sirman vin mon propriyete spesyal parmi tou lezot pep, akoz later antye i pour mwan. Zot pou vin en rwayonm pret ek en nasyon sen pour mwan.” (Egz. 19:5, 6) Pa sa ti en gran privilez ki Zeova ti’n ofer pep Izrael! Savedir si zot ti obeisan, sak dimoun dan sa nasyon ti pou kapab annan lespwar pour ganny servi par Bondye pour vin en rwayonm pret ki ti pou beni larestan imen. Plitar, ler pe dekrir sa ki i ti’n fer pour pep Izrael, Zeova ti dir: “Mon ti . . . fer en serman avek ou e fer en lalyans avek ou.”​—Ezek. 16:8.

11. Ki mannyer nasyon Izrael ti reakte kan Bondye ti envit zot pour vin son pep swazir?

¹¹ Zeova pa ti obliz bann Izraelit pour pret serman ki zot ti pou obeisan anver li. I pa ti ni menm fors zot pour annan sa relasyon spesyal avek li. O kontrer, bann Izraelit ti volonterman dir: “Tou sa ki Zeova in dir nou pare pour fer.” (Egz. 19:8) Trwa zour pli tar, Zeova ti dir avek nasyon Izrael sa ki i ti ekspekte avek zot konman sa nasyon ki i’n swazir. Premyerman, zot ti ganny sa Dis Komannman e apre Moiz ti dir zot lezot komannman ki’n ganny rikorde dan Egzod 20:22 ziska Egzod 23:33. Ki mannyer nasyon Izrael ti reakte? “Tou dimoun ti reponn avek en sel lavwa e dir: ‘Tou parol ki Zeova in dir nou pare pour fer.’” (Egz. 24:3) Apre Moiz ti ekrir sa bann lalwa dan “liv lalyans” e ti lir zot for pour tou pep tande. Apre sa, pour en trwazyenm fwa, sa pep ti fer sa serman: “Tou sa ki Zeova in dir nou pare pour fer e obeir.”​—Egz. 24:4, 7, 8.

12. Ki mannyer Zeova ek son pep swazir ti azir anver sa lalyans ki zot ti’n fer avek kanmarad?

¹² Deswit Zeova ti konmans fer sa ki i ti promet pour fer dan lalyans Lalwa par fer laranzman pour annan en tabernak pour ador li ek en group pret ki ti pou ed bann imen enparfe apros li. De lot kote, Izrael ti’n bliy vitman dedikasyon ki zot ti’n fer avek Bondye e “Sen Izrael ti dan lapenn akoz zot.” (Ps. 78:41) Par egzanp, kan Moiz ti pe resevwar lenstriksyon lo Montanny Sinai, bann Izraelit ti vin enpasyan e zot ti konmans perdi lafwa dan Bondye an krwayan ki Moiz ti’n abandonn zot. Zot ti fer stati en pti bef annor e dir avek lepep: “Sa i ou Bondye, O Izrael, ki ti fer ou sorti Lezip.” (Egz. 32:1, 4) Apre zot ti fer sa ki zot ti apel “en lafet pour Zeova,” ofer sakrifis, e ador sa stati ki zot ti’n fer. Kan Zeova ti vwar sa ki ti pe arive, i ti dir avek Moiz: “Zot in taye pour kit sa semen ki mon’n konmann zot pour mars lo la.” (Egz. 32:5, 6, 8) Malerezman, depi sa zour, nasyon Izrael ti konmans kas ve ki zot ti fer avek Bondye.​—Nom. 30:2.

DE LEZOT SERMAN

13. Ki serman Bondye ti fer avek Lerwa David e ki mannyer i relye avek sa Desandans ki ti’n ganny promet?

¹³ Pandan renny Lerwa David, Zeova ti fer de lezot serman pour benefisye tou bann ki obeir li. Premyerman i ti pret serman avek David ki son tronn ti pou dire pour touzour. (Ps. 89:35, 36;  132:11, 12) Sa Desandans ki ti’n ganny promet ti pou ganny apele “Garson David.” (Mat. 1:1; 21:9) Avek limilite, David ti adres son fitir desandans konman son “Senyer” akoz Kris ti pou annan en pozisyon pli siperyer ki li.​—Mat. 22:42-44.

14. Ki serman Zeova ti fer konsernan sa desandans ki ti’n ganny promet e ki mannyer nou benefisye?

¹⁴ Dezyenmman, Zeova ti enspir David pour predir ki sa Lerwa inik ti pou osi servi konman Gran Pret pour limanite. An Izrael, bann pret ti sorti dan tribi Levi e bann lerwa dan tribi Zida. Zot pa ti pou kapab fer tou le de fonksyon an menm tan. Me konsernan son zeritye spesyal, David ti predir: “Zeova i dir avek mon Senyer: ‘Asiz lo mon kote drwat ziska ki mon fer ou bann lennmi vin en marspye pour ou lipye.’ Zeova in fer en serman (e i pa pou regrete): ‘Ou en pret pour en letan endefini menm fason avek Melkisedek!’” (Ps. 110:1, 4) Zis parey David ti’n profetize, Zezi Kri, sa Desandans ki ti’n ganny promet, pe aprezan rennyen dan lesyel. I pe osi servi konman Gran Pret pour limanite par ed bann ki’n repantir pour ganny en bon relasyon avek Bondye.​—Lir Ebre 7:20, 21, 25, 26.

NOUVO IZRAEL BONDYE

15, 16. (a) Ki sa de Izrael ki Labib i koz lo la e lekel ki Bondye pe beni ozordi? (b) Ki Zezi ti ansenny son bann disip lo pret serman?

¹⁵ Akoz nasyon Izrael ti rezet Zezi Kri, zot ti perdi sa relasyon spesyal avek Bondye ek lespwar pour vin en “rwayonm pret.” Parey Zezi ti dir avek bann sef relizye Zwif: “Zot pou ganny arase Rwayonm Bondye, e [i pou] ganny donnen a en lot nasyon ki pou prodwi son fri.” (Mat. 21:43) Sa nouvo nasyon ti vin an egzistans zour Lapannkot lannen 33 N.L. kan lespri sen Bondye ti ganny verse lo sa 120 disip Zezi ki ti’n rasanble Zerizalenm. Zot ti ganny apele “Izrael Bondye.” Pa tro lontan apre, i ti annan plizyer mil dimoun ki ti form sa nasyon, sorti dan plizyer parti lemonn sa letan.​—Gal. 6:16, NW.

¹⁶ Kontrerman avek nasyon Izrael, sa nouvo nasyon spirityel Bondye in kontinyen prodwir fri par kontinyen obeir Bondye. Enn bann komannman ki son bann manm i obeir i konsernan serman. Kan Zezi ti lo later, dimoun ti pe pret serman an bonnavini. Zot ti pe fer bann fo serman oubyen fer serman lo bann keksoz ki pa ti neseser. (Mat. 23:16-22) Zezi ti ansenny son bann disip: “Pa zanmen fer serman. . . . Dir wi kan i wi, oubyen non kan i non. Tou sa ki zot dir an plis i sorti kot dyab.”​—Mat. 5:34, 37.

17. Ki kestyon nou pou egzaminen dan lot lartik?

¹⁷ Eski sa i vedir i toultan mal pour fer en serman? Pli enportan ankor, kwa ki enplike dan sa lekspresyon dir wi kan i wi? Nou pou egzamin sa bann kestyon dan lartik ki swiv. Anmezir ki nou kontinyen medit lo Parol Bondye, annou toultan reste motive pour obeir Zeova e Zeova pou kontan pour beni nou pour touzour dapre son bann promes.

[Not anba lo paz]

[Kestyon]

[Ekstre lo paz 27]

Bann promes Zeova i toultan vin vre

[Portre lo paz 25]

Tre byento Abraam pou vwar promes Zeova vin vre