Ngöbö mikadre täte angwane tä dre käbämike ye rabai mäkwe

“[Ngöbö] arabe ja kukwei kitaninkä akwle, ñobätä ñan aune ni mada ñaka bäri kri niarabiti ta.” (HEB. 6:13, TNM)

¿KUKWE NE GARE MÄI?

¿Ñobätä nita tö ngwen kukwe käbämikata Ngöbökwe ye rabai bare metre?

¿Adán aune Eva ja mikani ngite ye bitikäre Ngöbökwe kukwe meden käbämikani?

¿Ngöbökwe ja kukwei kitaninkä Abrahán ie ye köböire dre kwin tä nemen nikwe?

1. ¿Ngöböta kukwe käbämike ye ñobätä ñaka ja erebe ni kä nebätä tä nuainne yebe?

JEHOVÁ, “Ngöbö [...] kukwe metre niekä” (Sal. 31:5). Ni ñaka raba tö ngwen ni kä tibienbätä yei, ñobätä ñan aune niaratre jökrä ngite, akwa “Ngöbö abko ñan raba ni ngökö jire chi” (Heb. 6:18; ñäkädre Números 23:19 yebätä). Niara törba dre kwin nuain ni kä tibienbätä kräke ye tä mike nemen bare. Ñodre, niara tö namani jondron sribei jatäri ye erere “namani bare” ie, ye medenbätä nieta niarakwe köbö dianinkä jondron sribekäre, niara tö namani dre dre nuain köbö kwatire kwatire kömikani yete ye erere nuainbare kwe aune köbö ti krütani ye ngwane “jändrän jökrä dätebare ne mikaninta ñäräre kwe angwane, namani tuen bäri nuäre ie” (Gén. 1:6, 7, 30, 31, JK).

2. ¿Köbö ja dükakäre Ngöbökwe ye dre gärätä, aune mikani deme kwe ye tä dre mike gare?

² Jondron sribebare ye mikani ñärärä kwe, ye bitikäre Jehová mikani gare niarakwe köbö kükükäre ye kömikani. Niara ñaka nämene blite köbö köböiti yebätä, ñakare aune nämene blite kä dianinkä raire kwe ja dükakäre yebätä, kä dianinkä yete niara ñaka jondron mada sribere kä tibienbätä (Gén. 2:2). “Köbö” ye jämi krüte (Heb. 4:9, 10). Ñongwane köbö ye kömikani ye Biblia ñaka mike gare metrere. Adán muko sribebare ye ngwane köbö ye kömikani nie raba, ye abokän kä nikanina 6.000 näre ta. Jesukristo gobrandi Kä Mil Krati ye ngwane Ngöbö töita ño ye mikai nemen bare kwe: kä tibien ne kwitai bä nuäre nünankäre kärekäre te (Gén. 1:27, 28; Apoc. 20:6). ¿Jondron kwin käbämikata ja känenkäre ye ie ni raba tö ngwen? Jän, ñobätä ñan aune “köbö kükü ne Ngöbökwe [...] mikani bäri ütiäte”. Kukwe yebiti mikani gare kukwe tare raba nemen bare, akwa köbö ja dükakäre ye krütai angwane niara  töita ño ye rabai bare metre täte (Gén. 2:3, JK).

3. a) ¿Ngöbökwe köbö ja dükakäre kömikani ye ngwane kukwe meden tare nakaninkä? b) ¿Nitre ja mikaka Jehová rüere ye gaite kwe ye mikani gare ño kwe?

³ Köbö ja dükakäre kömikani ye ngwane kukwe mada tare namani bare. Satana ja mikani Ngöbö rüere, Eva ngökani bätä töi mikani ni niara Sribekä ye ñaka kukwei mike täte (1 Tim. 2:14). Ye bitikäre, meri ye muko kwe töi mikani ja ngwen blo arato (Gén. 3:1-6). Kukwe tare namani bare, nitre ye ñäkäbare Ngöbö rüere, ye ngwane Jehovakwe ñaka ja kukwei kitaninkä mikakäre gare kukwe niebare kwe ye rabadi bare metre ie. Nitre ja mikaka niara rüere ye mikai krüte ño ye mikani gare kwe. Niebare kwe Satana ie: “Meri aune mä, tikwe mikai ja rüere kwärikwäri, aune mä monsoitre bätä meri monsoitre rabadi ja rüere arato. Niara [Meri Bükün] mä dokwä trekaite aune mäkwe niara kwetai ngoto üe yebätä” (Gén. 3:15, JK; Apoc. 12:9).

JA KUKWEI KITAKATA KUKWE ÜKATEKÄRE

4, 5. ¿Abrahán käkwe dre nuainbare?

⁴ Ja kukwei kitadrekä kukwe metre niekäre ye ñan ribe nämene kenanbe. Nire abokän ñakare ngite, aune tä Ngöbö tarere bätä tä ja ngwen niara erere yei ñaka ribeta rabadre ja kukwei kitekä, ñobätä ñan aune niaratre tä käre kukwe metre niere aune tätre tö ngwen jai kwärikwäri. Akwa, ni kä nebätä ja mikani ngite aune töi ñan namani metre ye ngwane kukwe ye ñaka namanina bare. Ye bitikäre, ni ngöka aune nitre kukwe ngwarbe niekä ye jatani nirien bäri kä tibienbätä, ye medenbätä nitre jatani ja kukwei kitekä kukwe ütiätebätä mikakäre gare niaratre nämene blite metre.

⁵ Ye erere Abrahán nuainbare bämä (Gén. 21:22-24; 24: 2-4, 9). Bati, niarakwe rei Elam bätä nitre nänkä ben ganainbare ye ngwane ja kukwei kitaninkä kwe. Biblia tä mike gare rei Salem bätä rei Sodoma nikani niara ngäbiti. Kena, ni kädeka nämene Melquisedec “ni blitaka ni mda mda diäre Ngöbö Kri Kä Käinbtibe”, kukwe kwin rabadre bare Abrahanbätä niebare kwe aune Ngöbökwe Abrahán dimikani rüe ganainkäre yebätä käikitaninkä kwe (Gén. 14:17-20, JK). Rei Sodoma tö namani jondron kwin biain Abrahán ie niarakwe juta kwe mikani kwäre, akwa Abrahankwe niebare: “Ngöbö ti Dänkien Kri Kä Käinbti, Kä Käin Dätekä Btä Kä Temen Dätekä, se ngwärekri tikwe ñan jändrän makwe diandre jire chi jae, tikwe niebare. Mdakäre abko nin jändrän büre jänäin jire chi jae tikwe [...]. Tikwe ja kukwei biani kore [...] ñobtä ñan angwane ti jändrän bäkäne kabre abko, ma köböire makwe ñan niedre jire chi” (Gén. 14:21-23, JK).

JEHOVAKWE JA KUKWEI KITANINKÄ ABRAHÁN IE

6. a) ¿Abrahankwe kukwe meden bämikani? b) ¿Abrahán Ngöbö kukwei mikani täte ye köböire dre kwin rabai nikwe?

⁶ Jehová nämene töbike kwin ni kräke, yebätä ja kukwei kitaninkä kwe arato, ñodre niebare kwe: “Tita nire, yebätä tita ja kukwei kitekä muen, Jehová ni Däkien Kri tä niere” (Ezeq. 17:16). Jehovakwe ja kukwei kitaninkä gre ketebu biti bäri ye kädrieta Bibliabätä, aune ja kukwei kitaninkä kwe Abrahán ie ye gare nitre kwati yei. Kä nämene niken ta ye ngwane Ngöbökwe kukwe keta kabre käbämikani ie, aune kukwe yebiti mikani gare kwe Meri Bükün ye jatai Abrahán yekri ngobo kwe Isaac ye köböire (Gén. 12:1-3, 7; 13:14-17; 15:5, 18; 21:12). Ye bitikäre, ngobo tare kwe kukwadre ye Jehovakwe ribebare ie, aune ye ñaka namani nuäre kräke. Abrahán kukwe ye mikani täte, aune jababare monso kwe murie kete ye ngwane ángel käkwe niara  ketaninbätä. Ye bitikäre, Ngöbökwe ja kukwei kitaninkä aune niebare ie: “Ti bike kukwe ükete mabe. Ne erere rabadi bare tie abko krörö: Tikwe ja di biandi mae, aisete ma bkün däredi kwati ja täritäri ño muke kwati käinta amne üma kabre niken mren kräbare ñan tanre, ye kwrere jire ma bkün makri rabadi nüne kä nebtä. Erere arato, tikwe ja di biandi ietre rüe ganainkrä kwäräbe. Mdakäre abko, ma mräkä köböire ni kä jökräbti temen kä nebtä, ie tikwe ja di biandi, ñobtä ñan angwane, makwe ti kukwei miri täte” (Gén. 22:1-3, 9-12, 15-18, JK).

7, 8. a) ¿Ñokäre Jehovakwe ja kukwei kitaninkä Abrahán ie? b) ¿Ngöbökwe ja kukwei kitaninkä ye köböire dre kwin rabai “obeja mda mda” yekwe?

⁷ ¿Ñobätä Ngöbökwe niebare Abrahán ie kukwe käbämikani kwe ye erere rabadi bare? Nitre gobrandi Kristobe dimikakäre aune tödeka kwe mikakäre dite, nitre ye “Monso Bükün” käbämikani (ñäkädre Hebreos 6:13-18 yebätä; Gál. 3:29). Apóstol Pablo käkwe mikani gare Jehovakwe “ja kukwei mikadre täte era metre abko niebare ja käbti [...] kukwe ketebu niebare [jondron käbämikani kwe aune ja kukwei kitaninkä kwe], ñobtä ñan angwane Ngöbö abko ñan raba ni ngökö jire chi. Ngöbökwe [...] jändrän kuin köböi mikani kwe rabadre nikwe, ye käi rabadre nuäre nuäre nibtä abkokäre”.

⁸ Nitre dianinkä nänkäre kä kwinbiti ye ñan aibe kwe jondron kwin tä nemen. Jehovakwe ja kukwei kitaninkä mikakäre gare Abrahán “mräkä” yekri “ni kä jökräbti temen kä nebtä” yekwe jondron kwin rabai arato (Gén. 22:18, JK). Nitre ye “obeja mda mda” Kristokwe, niaratre nünain kärekäre Kä tibien nebätä yei tätre tö ngwen (Juan 10:16). Nikwe nünain kä kwinbiti o Kä tibienbätä “ye käi rabadre nuäre nuäre nibtä”, o nikwe ketadrete dime aune Ngöbö mikadre täte kukwe jökrä yebätä (ñäkädre Hebreos 6:11, 12 yebätä).

NGÖBÖKWE JA KUKWEI KITANINKÄ ABRAHÁN IE YE BITIKÄRE KUKWE MADA KÄBÄMIKANI

9. ¿Abrahán mräkätre nämene klabore Egipto ye ngwane Ngöbökwe ja kukwei kitaninkä kukwe meden käbämikakäre?

⁹ Siklo nikani ta ye bitikäre, Jehovakwe Moisés juani kukwe niere Abrahán mräkätre yei ye ngwane blitabare bobukäre kukwe käbämikani kwe yebätä, niaratre ye nämene klabore juta Egipto yete (Éx. 6:6-8). Ngöbökwe kukwe ne niebare: “Tikwe juta Israel dianinkä jakri ye ngwane [...] tikwe kise kaninkä kwin ja kukwei kitakakäre, niaratre diankakäre mento kä Egipto  yebätä aune jänrikakäre kä dianinkä tikwe niaratre kräke yete, kä yekänti leche aune munköi ere” (Ezeq. 20:5, 6).

10. ¿Ngöbökwe juta Israel mikani kwäre Egipto kisete ye bitikäre dre käbämikani kwe ietre?

¹⁰ Jehovakwe nitre Israel mikani kwäre nitre Egipto kisete ye ngwane kukwe madabätä ja kukwei kitaninkä kwe ietre: “Tita kukwe niere ye erere munkwe mikai täte bätä kukwe ükaninte tikwe ye munkwe mikai täte metre angwane, erametre mun rabai juta jeñe tikwe nitre jökrä juta madate yebiti ta, ñobätä ñan aune kä tibien jökrä ye tikwe. Aune mun arabe rabai ti kräke sacerdotere gobranka aune juta deme” (Éx. 19:5, 6). ¡Kukwe ütiäte nämene kwetre! Juta ye käkwe Ngöbö kukwei mikadre täte angwane Ngöbökwe niaratre diandrekä sacerdotere jondron kwin nuainkäre ni kä tibienbätä kräke. Ye bitikäre Jehovakwe kukwe niebareta ietre: “Dän tikwe ti kitaba mäbiti mä butie jue mikakäre bätä tikwe ja kukwei kitaninkä mäi aune tikwe kukwe ükaninte mäbe” (Ezeq. 16:8).

11. ¿Ngöbökwe kukwe ükaninte juta Israel yebe angwane niaratre dre nuainbare?

¹¹ Juta Israel käkwe Jehová mikadre täte ye bämikakäre rabadre ja kukwei kitekä ye niarakwe ñaka ribebare ietre. Ja töi jeñebiti niaratre niebare: “Jehovakwe kukwe niebare ye nunta juto biarebe nuainkäre jökrä” (Éx. 19:8). Köbö köbömä ye bitikäre juta kwe ye rabadre dre nuainne Jehovakwe niebare ietre. Kena, Kukwe Keta jätä biani ietre ye kukwe nuabare kwetre, ye bitikäre Moisekwe kukwe mada niebare ietre nuainkäre (Éx. 20:22–23:33). ¿Kukwe ye kani ngäbiti ño kwetre? “Nitre jökrä käkwe niebare ja dibiti: ‘Kukwe jökrä niebare Jehovakwe ye erere nunkwe nuaindi’.” (Éx. 24:3.) Ye bitikäre, “täräbätä kukwe ükaninte” yebätä Moisekwe kukwe tikani aune ñäkäbare kukwe yebätä kwe ja dibiti, ne kwe juruadre nitre jökrä juta yete yei. Aune, juta Israel käkwe ja kukwei kitaninkä bämäkäre aune niebare kwetre: “Jehovakwe kukwe niebare ye nunta juto biarebe nuainkäre jökrä aune mikakäre täte” (Éx. 24:4, 7, 8).

12. ¿Kukwe ükaninte ye ngwane Jehová aune juta kwe käkwe dre nuainbare?

¹² Jehovakwe ja kukwei kitaninkä ye erere nuainbare kwe. Niarakwe kukwe ükaninte ju sribekäre niara mikakäre täte bätä sacerdote mikani, ne kwe nitre ja mikaka ngite rökradre niara ken. Akwa nitre Israel käkwe kukwe käbämikani ye käi kwitaninkä jabiti kwetre. Kukwe nuain nämene kwetre yebiti “nämene Ngöbö Deme juta Israelkwe ye mike ulire” (Sal. 78:41). Ñodre, ngutuä Sinaí yekänti Ngöbö nämene kukwe niere Moisés ie angwane Moisekwe niaratre tuaninmetre namani ruin ietre, yebätä niaratre namani ja töibikare krubäte aune ñaka jatani tödeke Ngöböi. Ye bitikäre, niaratre nibi ngäbä sribebare orore aune namani niere: “Juta Israel ne Ngöbö munkwe abokän mun dianinkä kwe juta Egipto yekänti” (Éx. 32:1, 4). Niaratre niebare nämene “bieta nuain[ne] Jehovai”, aune namani nemen ngükodokwäbiti jondron ye ngwärekri aune jondron kukwe ie. Jehovakwe ye tuani angwane niebare kwe Moisés ie: “Niaratre rikadre ji kwin yebiti tikwe nieba ietre akwa nikani ji ye bäre” (Éx. 32:5, 6, 8). Ye ngwane ja känenkäre juta Israel nämene ja kukwei kitekä biti ñaka nämene nuainne erere (Núm. 30:2).

JA KUKWEI KITANINKÄ KUKWE MADA KETEBUBÄTÄ

13. ¿Ngöbökwe dre käbämikani rei David ie, aune ye tä dre mike gare “Meri bükün” käbämikani yebätä?

¹³ David nämene gobrane ye ngwane Jehovakwe kukwe mada ketebubätä ja kukwei kitaninkä ne kwe nitre niara mikaka täte yekwe jondron kwin rabadre. Kena, ja  kukwei kitaninkä kwe David ie mikakäre gare David mräkä ye gobrandi käre (Sal. 89:35, 36; 132:11, 12). Kukwe yebiti mikani gare Meri Bükün käbämikani ye jatadi niara yekri aune kädekai “Jrei David [...] mräkä” (Mat. 1:1; 21:9). Rei David käkwe mräkä kwe ye kädekani “Dänkien” aune yebiti mikani gare kwe Kristo rabadi gobrane bäri kri niara täte (Mat. 22:42-44).

14. ¿Jehovakwe dre käbämikani “Meri Bükün” yebätä aune ye köböire dre kwin tä nemen nikwe?

¹⁴ Ketebukäre, Jehovakwe David mikani mike gare Rei ütiäte ye rabai Sacerdote Bäri Kri ni jökrä kräke. Juta Israel yete, rei bätä sacerdote ye mika nämene tuin ütiäte. Nitre sacerdote nämene kite Leví yekri aune nitre reire Judá yekri. David kukwe ne mikani gare niara mräkä yebätä: “Jehová kukwe ne niebare ti Däkien ie: ‘Täke ti kise ruinkri tikwe mä rüe mikadi mä ngoto täni ye ngübakäre’. Jehovakwe ja kukwei kitaninkä (biti ñaka tä ja töi kwite): ‘¡Mä abokän sacerdote kärekäre Melquisedec ye erere!’” (Sal. 110:1, 4). Jehovakwe kukwe käbämikani ye erere mikani nemen bare, “Meri Bükün”, Jesukristo niena gobrane kä kwinbiti Ngöbö kise ruinkri. Arato, niara abokän Sacerdote bäri kri ni kräke, aune nitre tä ja töi kwite ye niarata dimike ne kwe rabadre ja mäke kwin Ngöböbe (ñäkädre Hebreos 7:21, 25, 26 yebätä).

ISRAEL ÜAIRE NGÖBÖKWE YEBE KUKWE ÜKANINTE MRÄ

15, 16. a) ¿Juta Israel meden ketebu kädrieta Bibliabätä, aune meden kani ngäbiti Ngöbökwe? b) ¿Jesukwe dre niebare nitre ja tötikaka kwe yei ja kukwei kitakata yebätä?

¹⁵ Juta Israel ñaka Jesús kani ngäbiti, ye medenbätä kukwe ütiäte nämene kwetre ye Ngöbökwe dianinkä kän aune niaratre ñaka namani “sacerdotere gobranka”. Jesukwe niebare ietre: “Ngöbökwe ñan gobrandre munbti amne juta mda käkwe sribidre era metre Ngöbökrä, ye abko bti Ngöbö rabadi gobrane” (Mat. 21:43). Juta mrä ye nükani Pentecostés kä 33, ye ngwane nitre 120 ja tötikaka Jesube nämene ja ükaninkrö Jerusalén, niaratre yebiti üai deme namani. Juta mrä ye kädekani “Israel üaire Ngöbökwe”, ye bitikäre nitre kristiano kwati krubäte kä jene jene känti namani nitre ye ngätäite (Gál. 6:16).

¹⁶ Ngöbökwe juta Israel dianinkä kena ye ñaka nämene kukwe kwin nuainne, akwa juta mrä dianinkä ye tä nirien kwin ja käne aune tä Ngöbö mike täte jankunu. Nitre ye tä ja kukwei kitekä ye ngwane tä ye erere mike nemen bare. Jesús näire nitre nämene ja kukwei kitekä kukwe ñan ütiätebätä (Mat. 23:16-22). Jesús abokän niebare nitre nänkä jiebiti yei: “Munkwe ñan ja kukwei bian jändrän käbti. Ne aisete, munkwe “jän” nie ne ngwane, munkwe “jän” nie kwatibe; munkwe “ñakare” nie ne ngwane munkwe “ñakare” nie kwatibe arato. Yebti munkwe kukwe mda niedre ne ngwane, munkwe ja mikadre ngite” (Mat. 5:34, 37).

17. ¿Kukwe medenbätä ja tötikai ja käne?

¹⁷ Kukwe ne kätä mike gare, ¿ni ñan rabadre jire ja kukwei kitekä? ¿Jän nieta kwatibe ye dre gärätä? Kukwe ngwantarita ye mikai gare ja tötika mada yebätä. Nikwe ja tötikai käre Ngöbö kukwei yebätä ye käkwe ni töi mikai Ngöbö mike täte jankunu, aune niarata ja kukwei kitekä ye erere, niarakwe jondron kwin mikai nemen bare ni kräke

[Kukwe ngwantarita]

[Jondron üai bämikani página 22]

[Jondron üai bämikani página 24]

Jehovakwe kukwe käbämikani ye Abrahán köböra tuin

[Kukwe nieta página 26]

Jehovata kukwe käbämike ye tä mike nemen bare