1. Edena dala ai Iehova ese ia karaia gwauhamata, bona taunimanima edia gwauhamata be idau?

 IEHOVA be “kara momokani ena Dirava” bona “ia koikoi diba lasi.” (Sal. 31:5; Heb. 6:18; Numera 23:19 duahia.) To, taunimanima be goevadae lasi taudia dainai, hanaihanai edia hereva ita hamomokania be auka. Dirava be nega ibounai ena gwauhamata taunimanima dekenai ia hagugurudia. Hegeregere, ia ese dina siks lalonai tanobada ai gau ibounai ia karaia. Unai dina ta ta edia lata be hora 24 lasi, to idia be lagani tausen momo. Unai dina ta ta ai do ia karaia gaudia ia gwauhamatalaia, bena ena gwauhamata hegeregerena ia karaia. Dina namba siks ena dokonai, “Dirava ese ia karaia vadaeni gaudia ibounai ia itaia, bona momokani idia be namo herea.”​—Gen. 1:6, 7, 30, 31.

2. Dirava ena laga-ani dinana be dahaka? Dahaka dainai unai dina ia hahelagaia?

² Iehova Dirava ia itaia ia karaia gaudia ibounai be namo herea murinai, dina namba seven ia matamaia. Unai dina be Dirava ena laga-ani dinana bona ena lata be hora 24 lasi, to lagani tausen momo. Unai dina namba seven ai, Dirava be tanobada dekenai ia karaia gaudia ena gaukara amo ia laga-ani. (Gen. 2:2) Unai nega amo ema bona hari, Dirava be ia laga-ani noho. (Heb. 4:9, 10) Baibel ia gwau lasi edena negai Dirava ena laga-ani dinana ia matamaia. To, ita diba unai be lagani 6,000 gunanai, Iehova ese Heva ia karaia murinai ia matamaia. Kahirakahira Keriso ena Lagani 1,000 Lohia Negana do ia matamaia, bona unai nega ai Dirava ese ena ura tanobada totona do ia hagugurua. Dirava ia ura tanobada be paradaiso ai do ia lao, bona unuseniai goevadae taudia do idia mauri hanaihanai. (Gen. 1:27, 28; Apok. 20:6) Vaira negana ai unai mauri namona oi moalelaia diba! Badina “Dirava ese dina namba 7 ia hanamoa, bona dina helaga ia halaoa.” Unai ese ia hamomokania, herevana dahaka ia vara, Dirava ena laga-ani dinana ia ore neganai, iena ura guba bona tanobada totona be do ia guguru.​—Gen. 2:3.

3. (a) Dirava ena laga-ani dinana ia matamaia murinai, dahaka ia vara? (b) Edena dala ai Iehova ia hahedinaraia unai gwau-edeede karana do ia hamaoromaoroa?

 ³ To Dirava ena laga-ani dinana ia matamaia neganai, Dirava ena natudia haida idia gwau-edeede. Satani be haida edia lalona ia veria ia idia tomadiho henia, bona Dirava idia dadaraia totona. Satani ese koikoi herevana ginigunana ia gwauraia bona Heva ia koia, bena Heva ese Iehova ia gwau-edeede henia. (1 Tim. 2:14) Unai murinai, Heva ese ena adavana ena lalona ia veria, bona ia danu be Iehova ia gwau-edeede henia. (Gen. 3:1-6) Unai be gwau-edeede karana dikana momokani. Ena be Satani ia gwau Iehova be koikoi tauna, to Iehova ia laloa unai be nega maorona lasi, gwauhamata ta amo do ia hamomokania iena ura tanobada totona be do ia hagugurua. To, unai gwau-edeede karana ia hamaoromaoroa totona, Dirava ese peroveta herevana ta ia gwauraia. Ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” Unai peroveta hereva ena anina be gabeai do ia hedinarai.​—Gen. 3:15, BHğ; Apok. 12:9.

4, 5. Aberahamo be dahaka gwauhamata ia karaia?

⁴ Unai gwau-edeede karana ia do vara lasi neganai, Dirava bona taunimanima ese gwauhamata herevadia idia gwauraia be anina lasi. Momokani, Dirava idia lalokau henia bona tohotohoa goevadae taudia idia gwauhamata be anina lasi, badina idia be nega ibounai hereva momokani idia gwauraia, bona ta ta idia koia lasi. To, Adamu bona Heva idia kara dika bona goevadae lasi taudia ai idia lao murinai, taunimanima be hereva koikoi idia gwauraia matamaia. Unai dainai, gabeai taunimanima be mai anina bada herevana ta idia gwauraia neganai, namona be gwauhamata herevana ta amo unai idia hamomokania.

⁵ Aberahamo be nega toi bamona gwauhamata ia karaia. (Gen. 21:22-24; 24:2-4, 9) Hegeregere, Aberahamo ese Elama ena king bona ia idia durua king ma haida ia tuari henidia bona ia halusidia neganai, gwauhamata ta ia karaia. Unai nega ai, Salema bona Sodoma edia king taudia idia mai Aberahamo idia hedavari henia totona. Melekisedeka, Salema ena King, be “Ataiai Momokani Dirava ena helaga tauna,” bona ia ese Aberahamo ia hanamoa bona Dirava ena ladana ia abia isi, badina Dirava ese Aberahamo ia durua ena inai taudia ia halusia totona. (Gen. 14:17-20) To, Sodoma ena king ia ura Aberahamo dekenai kohu haida ia henia neganai, Aberahamo be inai gwauhamata ia karaia, ia gwau: “Lau ese Lohiabada, Ataiai Momokani Dirava, guba bona tanobada ia karaia Diravana ena vairanai hari lau gwauhamata metau henia, lau gwau, oiemu kohu ta do lau abia lasi, tamaka varo danu do lau abia lasi. Gabeai do oi gwau, ‘Aberamo ena kohu momo be lau dekena amo ia abia’ garina.”​—Gen. 14:21-23.

6. (a) Aberahamo be dahaka ia karaia? (b) Aberahamo ena haheitalai amo dahaka ita dibaia?

⁶ Iehova Dirava be gwauhamata ia karaia danu, unai amo taunimanima ese ia gwauraia gaudia idia abidadama henia diba. Iehova be gwauhamata ia karaia neganai, inai bamona hereva ia gaukaralaia: “Lau, mauri ena Dirava, egu ladana dekenai lau gwauhamata inai.” (Ese. 17:16) Baibel ese ia hahedinaraia Iehova be nega 40 bamona gwauhamata idauidau ia karaia. Dirava ese Aberahamo dekenai ia karaia gwauhamatana be haheitalai namona ta. Aberahamo ena mauri lalonai, Iehova ese kontraka o gwauhamata haida ia karaia. Unai kontraka amo, Aberahamo ia diba gwauhamata Garana be iena natuna Isako amo do ia vara. (Gen. 12:1-3, 7; 13:14-17; 15:5, 18; 21:12) Bena Iehova ese Aberahamo ia tohoa. Ia hamaoroa ena lalokau natuna do ia bouboulaia. Aberahamo be karaharaga unai oda ia badinaia. To Isako ia bouboulaia gwauraia neganai, aneru ta ese ia koua. Bena Dirava ia gwauhamata: “Lau sibona egu ladana dekenai gwauhamata metauna lau gwauraia inai:  Oiemu natuna mero tamona sibona, lau abia gwauraia neganai oi dogoatao lasi. Inai kara oi karaia dainai, lau ese oi do lau hanamoa bada herea. Lau gwauhamata inai, tubudia momo oi dekenai do lau henia, edia momo be guba dekenai noho hisiu, bona kone dekenai noho miri bamona. Oiemu tubuna taudia ese idia dekenai idia tuari taudia edia hanua ibounai do idia abia. Tanobada besedia ibounai ese lau dekenai do idia noinoi, idia do lau hanamoa, oiemu tubuna lau hanamodia vadaeni hegeregerena. Inai bamona do idia noinoi, badina be oi ese lauegu oda oi kamonai henia dainai.”​—Gen. 22:1-3, 9-12, 15-18.

7, 8. (a) Dahaka dainai Dirava be Aberahamo dekenai gwauhamata ia karaia? (b) Edena dala ai “mamoe ma haida” be Dirava ese Aberahamo dekenai ia karaia gwauhamata bona hereva helagana amo, namo do idia abia?

⁷ Dahaka dainai Dirava ia gwau, Aberahamo dekenai ia karaia gwauhamata do ia hagugurudia? Badina ia ura Keriso ida do idia lohia taudia, “garana” ena kahana iharuana taudia unai, ia durua bona edia abidadama ia hagoadaia. (Heberu 6:13-18, BH duahia; Gal. 3:29) Aposetolo Paulo ia gwau, Iehova be “hereva helagana ma ta, metau bada gauna, ia gwauraia, helaga bada gauna. Vadaeni, inai Dirava ena hereva gaudia rua idia noho, gwauhamata bona hereva helagana, bona idia senisi diba lasi. Ita diba unai hereva ruaosi idia noho, bona ita diba Dirava ia koikoi diba lasi. . . . unai dainai, iseda abidadama do ita dogoatao noho, badina be ita diba ita naria noho davana namona, mauri hanaihanai, be do ita abia momokani.”

⁸ Horoa taudia sibona be Iehova ese Aberahamo dekenai ia henia gwauhamatana amo hahenamo do idia abia lasi. Iehova ia gwauhamata Aberahamo ena “garana” amo, “tanobada besedia ibounai” ese hahenamo do idia abia. (Gen. 22:18) Keriso idia badinaia “mamoe ma haida” be unai “tanobada besedia ibounai” amo, bona edia helaro be tanobada Paradaisona ai do idia mauri hanaihanai. (Ioa. 10:16) Herevana oi be horoa tauna o mamoe oreana tauna ta, to emu helaro oi “dogoatao noho” be namo. Anina be, oi gaukara goada oi karaia gaudia ibounai lalonai, Dirava oi badinaia ela bona unai helaro namona oi abia.​—Heberu 6:11, 12 duahia.

9. Aberahamo ena tubudia be Aigupito ai igui hesiai taudia bamona idia noho neganai, Dirava be dahaka gwauhamata ia karaia?

⁹ Aberahamo ia mase bona lagani handred momo murinai, Iehova ia hahedinaraia Aberahamo dekenai ia karaia gwauhamatadia do ia hagugurudia noho. Aberahamo ena tubudia be Aigupito ai igui hesiai taudia bamona idia noho neganai, Iehova ese idia dekenai Mose ia siaia bona ena gwauhamata herevana ia gwauraia lou. (Eso. 6:6-8) Gabeai, Dirava ese unai ia herevalaia neganai, ia gwau: “Idia dekenai lau gwauhamata,  Aigupito dekena amo idia do lau hakaua lao, bona idia totona lau abia hidi tano, rata bona hani dekenai ia honu tano dekenai idia do lau hakaua vareai.”​—Ese. 20:5, 6.

10. Dirava ese Israela taudia be Aigupito amo ia ruhaia murinai, edena gwauhamata ia karaia?

¹⁰ Iehova ese Israela taudia be Aigupito amo ia ruhaia murinai, gwauhamata ma ta ia karaia. Ia gwau: “Bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena. Lauegu helaga taudia do lau halaoa umui, bese helagana do umui lao.” (Eso. 19:5, 6) Israela besena dekenai unai be hahenamo badana ta! Anina be bema Iehova idia badinaia, dina ta ia ese unai bese taudia be helaga taudia ai do ia halaodia, bona idia ese taunimanima ibounai do idia hanamoa. Gabeai, Iehova ia gwau unai be “gwauhamata taravatuna” ta.​—Ese. 16:8.

11. Dirava ese Israela taudia ia abia hidi iena bese helagana ai do idia lao neganai, idia be dahaka idia gwau?

¹¹ Iehova ese Israela taudia ia doria lasi, gwauhamata do idia karaia ia idia badinaia totona. Bona ia doridia lasi iena bese helagana ai do idia lao ena hahenamo idia abia dae totona. To idia sibona idia ura gwauhamata idia karaia, Iehova idia badinaia totona. Idia gwau: “Ai be Lohiabada ena hereva ibounai do ai karaia.” (Eso. 19:8) Dina toi murinai, Iehova Dirava ese ena abia hidi Israela besena dekenai ia ura do idia karaia gaudia ia hadibaia. Gau ginigunana be idia dekenai Taravatu Ten ia henia, bena Mose ese Esodo 20:22 ia lao Esodo 23:33 dekenai idia noho taravatu ma haida ia gwauraia. Israela taudia be unai taravatu idia kamonai murinai, dahaka idia gwau? Idia “ibounai be nega tamona idia haere, idia gwau, ‘Ai be Lohiabada ena hereva ibounai do ai karaia.’” (Eso. 24:3) Bena Mose ese taravatu ibounai be “gwauhamata taravatuna ena buka” lalonai ia torea, bona ia duahia badabada Israela taudia idia kamonai totona. Unai murinai, Israela taudia be nega ihatoina idia gwauhamata, idia gwau: “Lohiabada ena oda hereva ibounai do ai karaia, bona do ai kamonai henia.”​—Eso. 24:4, 7, 8.

12. (a) Iehova ia gwauhamata Israela taudia be iena bese helagana ai do idia lao murinai, dahaka ia karaia? (b) Israela taudia be Dirava dekenai idia gwauhamata murinai, dahaka idia karaia?

¹² Karaharaga Iehova be Israela besena dekenai ia karaia kontraka ia hagugurua matamaia. Ia ese hahelaga taudia haida ia abia hidi palai dubuna ai idia gaukara totona. Unai hahelaga taudia ese goevadae lasi taudia idia durua, Dirava do idia tura henia lou totona. Ena be Israela taudia ese Dirava idia gwauhamata henia, to karaharaga idia gwau-edeede. Edia gwauhamata idia badinaia lasi dainai, “Israela edia Helaga Dirava idia habadua.” (Sal. 78:41) Hegeregere, Mose be Sinai Ororona ai Iehova ena hadibaia herevadia ia abia noho lalonai, Israela taudia idia hesiku dainai edia abidadama ia manoka. Idia laloa Mose be idia ia rakatania vadaeni. Unai dainai, idia ese golo amo boromakau natuna ena kaivakuku ta idia karaia, bona idia gwau: “Israela taudia e, iseda dirava be inai, Aigupito dekena amo ita ia hakaua vadaeni!” (Eso. 32:1, 4) Unai kaivakuku vairanai idia tui diho bona boubou gaudia idia henia. Idia gwau idia be Iehova idia tomadiho henia noho. Iehova be unai ia itaia neganai, Mose dekenai ia gwau: “Lau oda henidia dalana be idia rakatania haraga vadaeni.” (Eso. 32:5, 6, 8) Unai murinai, Israela taudia be Dirava dekenai gwauhamata momo idia karaia, to idia makohia.​—Num. 30:2.

13. Iehova ese Davida dekenai edena gwauhamata ia karaia? Edena dala ai ita diba unai be gwauhamata Garana ia herevalaia?

¹³ King Davida ena lohia negana ai, Iehova be gwauhamata herevadia ma rua ia gwauraia. Dirava idia badinaia taudia ibounai dekenai unai be mai anina bada. Gwauhamata ginigunana be, Dirava ese Davida ia hamaoroa, iena natudia be iena terona ai do idia lohia ela bona hanaihanai. (Sal. 89:35, 36; 132:11, 12) Gwauhamata  Garana o Keriso be Davida ena bese amo ia vara, bona idia gwauraia “Davida ena natuna.” (Mat. 1:1; 21:9) Davida be mai manau ida gwauhamata Garana ia gwauraia iena “Lohiabada,” badina Keriso ena dagi be bada.​—Mat. 22:42-44.

14. Gwauhamata Garana totona Iehova be edena gwauhamata ia karaia? Edena dala ai unai gwauhamata amo hahenamo ita abia diba?

¹⁴ Gwauhamata iharuana be, Iehova ese Davida dekenai ia hahedinaraia gwauhamata Garana be King ta sibona lasi, to ia be taunimanima ibounai edia Hahelaga Tauna Badana danu. Unai be hahenamo idauna ta. Badina Dirava ese Israela taudia dekenai ia henia Taravatu ese ia hahedinaraia, hahelaga taudia be Levi ena iduhu amo bona king taudia be Iuda ena iduhu amo do idia mai. Unai nega ai, ta ese king bona hahelaga tauna ena gaukara be nega tamona ia karaia diba lasi. To, Davida ese gabeai do ia mai king ia perovetalaia, ia gwau: “Lohiabada ese egu Lohiabada dekenai ia hamaoroa, ia gwau, ‘Lauegu idiba kahana dekenai do oi helai, ela bona oi dekenai idia tuari henia taudia, be oiemu aena atoa gauna dohore lau halaoa.’ Lohiabada ese gwauhamata metau momokani ia karaia vadaeni, bona do ia haidaua lasi, ia gwau, ‘Oi be hahelagaia tauna, Melekisedeka hegeregerena do oi lao, bona inai dagi do oi dogoatao ela bona hanaihanai.’” (Sal. 110:1, 4) Davida ia peroveta bamona, gwauhamata Garana, Iesu Keriso, be hari guba ai ia lohia noho. Danu, ia be taunimanima edia Hahelaga Tauna Badana bona helalo-kerehai taudia ia durua, edia hetura karana Dirava ida idia hanamoa lou totona.​—Heberu 7:21, 25, 26 duahia.

15, 16. (a) Baibel ese edena Israela besedia rua ia herevalaia? Hari, edena Israela besena be Dirava ese ia hanamoa noho? (b) Iesu ese ena murinai idia raka taudia dekenai dahaka sisiba ia henia?

¹⁵ Israela besena ese Iesu Keriso idia dadaraia dainai, Iehova ese idia ia dadaraia danu, bona “hahelaga taudia” ai do idia lao ena hahenamo idia haboioa. Iesu ese Iuda tomadiho gunalaia taudia dekenai ia gwau: “Dirava ese ena Basileia be umui amo do ia kokia bena huahua ia atoa besena dekenai do ia henia.” (Mat. 21:43) Iesu ese ia herevalaia bese matamatana be Pentekoste 33 C.E. ai ia hedinarai. Unai negai, Iesu ena hahediba taudia 120 be Ierusalema ai idia hebou bona Dirava ese ena lauma helaga be edia latanai ia bubua. Idia be ‘bese’ matamatana ai idia lao bona edia ladana idia gwauraia, “Dirava ena Israela.” Daudau lasi murinai, bese ma haida amo taunimanima tausen momo be Dirava ena Israela bese matamatana lalonai idia vareai.​—Gal. 6:16.

¹⁶ Unai bese matamatana be Israela bese korikorina bamona lasi; idia gwau-edeede lasi to Dirava idia badinaia noho. Iesu ese Dirava ena Israela dekenai hereva helagadia ena taravatu ia henia danu. Ia be tanobada ai ia noho neganai, taunimanima be hereva koikoidia, bona anina lasi hereva helagadia idia gwauraia. (Mat. 23:16-22) Iesu ese ena murinai idia raka taudia ia hamaorodia gwauhamata do idia karaia lasi. Ia gwau: “Namona be emui ‘oibe’ be oibe bona emui ‘lasi’ be lasi, to bema hereva ma haida umui gwauraia, unai be Dika Tauna amo.”​—Mat. 5:34, 37.

17. Wiki vaira ai edena henanadai edia haere do ita tahua?

¹⁷ Unai ena anina be gwauhamata ita karaia be kerere, a? Danu inai hereva, emui “Oibe” be Oibe, ena anina be dahaka? Wiki vaira ena stadi ai haere do ita abia. Dirava ena Hereva ita laloa dobu neganai, namona be ita dibaia gaudia ese ita idia doria Dirava ita badinaia hanaihanai totona. Bena ena gwauhamata bona hereva helagadia hegeregerena, ita do ia hanamoa ela bona hanaihanai.