Molengesenges er a Dios Me Mukngeltengat el okiu a Telbilel
Molengesenges er a Dios Me Mukngeltengat el okiu a Telbilel
“[A Dios a] di mle ngii el ousbech er a ngklel el olsiich a tekingel.”—HEBRU 6:13.
NGSEBECHEM EL ONGER?
Ngera me a telbilel a Dios a ulterekokl el mo tmaut?
Ngerang tilbir a Dios er a uriul er a lebo er a klengit a Adam me a Eva?
Ngera el klungiaol a dengai el okiu a telbilel a Dios el mo er a Abraham?
1. Ngerang a klekakerous er a telbilel a Jehovah me a telbilir a rechad?
A JEHOVAH EL DIOS a “blak a rengul e merang.” (Duteronomi 32:4) A rechad a diak el mecherrungel me a lebebil e ngdiak lulterekokl a tekingir, engdi a Dios a “diak lomulak.” (Hebru 6:18; monguiu er a Ulecherangel 23:19.) A Dios a blechoel el oltaut a telbilel el mo er a rechad. El ua tiang, a tekoi el ledilu el kmo ngmo meruul er sel taem er a lomeob er a beluulechad a lekiltmokl. Me ngar er a ulebengelel a ongelolem el sils er a omebelel, e a Dios a ulemes ‘a ikel bek el bla leruul e kmal mlo ungil a rengul.’—Genesis 1:6, 7, 30, 31.
2. Ngerang a ulengull el sils er a Dios? Ngera uchul me ngrirellii “el mo ngodech er a bek el sils”?
2 A Jehovah er a uriul er a lomes el kmo ngungil a rokui el blebelel, e ngdilu el kmo ngmla omuchel a ongeuid el sils e tiang a ulengull el sils. Tia el sils a diak di el 24 el sikang, e ngbai kemanget el taem el lolengull a Dios el diak el lomeob a ngii di el ngerang er tia el chutem. (Genesis 2:2) Me tia el ulengull el sils er a Dios a dirk melemolem. (Hebru 4:9, 10) A Biblia a diak el bleketakl a omesodel el kirel a uchelel tia el sils, engdi ngulterekokl el ulemuchel er a uriul er a lobeob a Eva el bechil a Adam, er a bekord el 6,000 el rak er a mla me mong. Ngdi kmedung e ngmo omuchel a ta el telael rak el omengederederel a Kristus el ngii a taem el Dios a mo otutii a moktek er ngii el kirel a paradis el delengcheklir a remecherrungel el chad el kiei el diak a ulebengelel. (Genesis 1:27, 28; Ocholt 20:6) Tiang a ulterekokl el omelatk! A Dios a “ulemekngeltengat er ongeuid el sils e ileklii el mo ngodech er a bek el sils,” e le moktek er ngii a ulterekokl el mo tmaut e diak a sebechel el torebengii.—Genesis 2:3.
3. (a) Ngera dilubech er a uchelel a ulengull el sils er a Dios? (b) Ngerang dilung a Jehovah el kirel a semecheklel tia el ultok?
3 A uriul er a lomuchel a ulengull el sils er a Dios e a rebebil el blebelel a mlo omtok er ngii. A Satan el mle ta er a rechanghel er a Dios a milengesuseu er a rebebil el mo mengull er ngii er a bai longull er a Dios. Ngdillii a kot el blulak e milengeblad er a Eva me bo lak lolengesenges er a Jehovah. (1 Timothy 2:14) A Eva a rirellii a bechil me ngdirrek el mlo omtok er a Jehovah. (Genesis 3:1-6) Tiang a kot el mekngit el ultok el mla meketmokl. Me alta e a Satan a uleltelechakl er a Jehovah el kmo ngbulak, engdi a Jehovah a dimlak lluut el olsiich a tekoi el kmo a moktek er ngii el kirel a beluulechad a ulterekokl el mo tmaut. Ngbai tilbir el mo sumecheklii a ultok, alta ngdimlak el bleketakl a belkul a tekingel er seikid el taem. Ngdilu er a Satan el kmo: “Kau ma redil a mo kauketui, ma ruldidellel a rsechem ma ruldidellel a rsechel a redil a di mo blechoel el kaucherarou. E a uldidellel a rsechel a mo rukemii a bdelum e kau a mo mengchii a kotel ochil.”—Genesis 3:15; Ocholt 12:9.
A OSICHEL A TEKOI—A MEKETAKL A KLEMERANG
4, 5. Ngmilekerang a Abraham er a loruul a telbilel?
4 Seikid el taem e a rechad a dimlak a belkul el olsiich a telbilir, e le remecherrungel el chad el betik a rengrir er a Dios e oukerebai er ngii a di melekoi a klemerang er a bek el taem e kaumerang er a delongelir. Engdi tiang a mlengodech er a uriul er a lebo er a klengit tirke el kot el obekel. Cherengel a taem e a rechad a mlo blechoel el omulak, me a lebebil er a taem e ngmlo kirir el olsiich a telbilir el omeketakl a klemerang el tekoi.
5 A Abraham a ulsiich a tekoi el kesengil e ngmle edei el taem. (Genesis 21:22-24; 24:2-4, 9) El ua tiang, ngulelsiich a tekingel er sera bo lemesisiich er a king er a Elam me tirke el rokui el king el uluumekemad el obengkel. A king er a Salem me a Sodom a mlo olsiuekl er a Abraham. A Melkisedek el king er a Salem “el dirrek el prist er a Kot el Ngarbab el Dios” a ulemekngeltengat er a Abraham e uleldanges er a Dios el ngilsuir a Abraham el mo mesisiich er a recherrouel. (Genesis 14:17-20) E sel taem er a lolasem a king er a Sodom el omsang a omeksulel a Abraham e le ngulsebelterir a rechedal er a resoldau el uluumekemad er tir, e a Abraham a dilu el kmo: “Ak ulsiich a tekoi el ngar medal a RUBAK el Kot el Ngarbab el Dios, el rirellii a eanged ma chutem el kmo ng diak bo knguu a tal ngera er kau, el mo lmuut er a di telkib el rekodoll ma lechub e ng surel oeacher. Me lak bo luchul a tekingem el kmo, ‘A Abram a merau el ngak a uchul.’ ”—Genesis 14:21-23.
A JEHOVAH A ULELSIICH ER A TELBILEL EL MO ER A ABRAHAM
6. (a) Ngera el kerebai a lebilecherei a Abraham el kired? (b) Ngera el klungiaol a bo dengai el omerellel a Abraham a uchul?
6 A Jehovah el Dios a dirrek el ousbech a osichel a tekoi me bo el sebechir a rediak el mecherrungel el chad el mo oumerang a telbilel. Ngolsiich a tekingel el melekoi el kmo “A Rubak el DIOS a kmo, ‘Ngak a di ngar el Dios.’ ” (Esekiel 17:16) A Biblia a mesaod el kirel a betok er a 40 el taem el Jehovah a ulelsiich a tekingel. E a kot el merael a chisel el osichel a tekingel a mlo er a Abraham. Chelsel a klengar er a Abraham e a Jehovah a ulelsiich a telbilel el mo er ngii el betok el taem. Me ngokiu ngii el telbiil, e a Abraham a mlo medengei el kmo a Uldidellel a Rasech er a telbiil a mei el okiu a ngelekel el Isak. (Genesis 12:1-3, 7; 13:14-17; 15:5, 18; 21:12) E a uriul e a Jehovah a millasem er a klaumerang er a Abraham er a ledu er ngii me bo lolenget er a betik er a rengul el ngelekel. Me ngdi mle mereched el mo meruul er tia el tekoi. Engdi a uchei er a letengetengii a Isak, e a anghel a mlo merrob er ngii. Me a Jehovah a ulelsiich a tekingel el kmo: “Ak mo rullii a telbiil el oba ngklek e mo omdois a klengeltengetem ele uchul e ke rirellii tiang e dimlak mkiresii er ngak a di tal ngelekem. Ma telbilek a kmo a ruldidellel a rsechem a mo betok el mo ua ildisel a btuch er a eanged ma lechub e ng chelechol er a rriil. A ruldidellel a rsechem a mo mesisiich er a re cherrouir. Ma bek el beluu er a beluulchad a mo olengit er ngak el mo omekngeltengat er tir el ua kulemekngeltengat er a ruldidellel a rsechem, ele uchul e kullengesenges a tekingek.”—Genesis 22:1-3, 9-12, 15-18.
7, 8. (a) Ngera uchul me a Dios a rirellii a telbiil el obengkel a Abraham? (b) Te mekerang tirke el ‘kuk bebil el sib’ er a Kristus e ngmai a klungiolir er a telbilel me a osichel a tekingel a Dios?
7 Ngera uchul me a Dios a tilbir el mo er a Abraham el kmo a Telbilel a ulterekokl el mo tmaut? Ngulelsiich a tekingel e le ngmle soal el melisiich a klaumerang er tirke el mo chedal a “uldidellel a rasech” e mo mengedereder el obengkel a Kristus. (Monguiu er a Hebru 6:13-18; Galatia 3:29) A apostol el Paulus a milsaod el kmo a Jehovah a “ulelsiich er a telbilel.” Me ngmla er ngii a eru el tekoi el diak el sebechel el mengodech el melisiich er a rengellitel el mo ‘meduch a rengrir el orekedii sel omelatk’ el kirir. Aika el eru el tekoi a telbilel me a osichel a tekingel a Dios el ngii a “diak lomulak.”
8 Ngdiak di el rengellitel a mo ngmai a klungiolir er a osichel a tekingel a Dios el mo er a Abraham. A Jehovah a tilbir el mo er a Abraham el kmo ngokiu a “ruldidellel a rsechem” e a “bek el beluu er a beluulchad” a mo mukngeltengat. (Genesis 22:18; Rellir 3:25) A rechad er a “bek el beluu” a uldimukl er a ‘kuk bebil el sib’ el tir a oba omelatk el mo kiei er a Paradis el chutem el diak a ulebengelel. (Johanes 10:16) Me kau, bo lemeduch a rengum “el orekedii sel omelatk” el mobang, alta e ke ngellitel me a lechub e ke ta er a rengodech el sib. Me ngbelkul a kmo ngkirem el meringel el oureor el olengesenges er a Dios er a bek el tekoi me bo mnguu tia el omelatk.—Monguiu er a Hebru 6:11, 12.
BEBIL EL OSICHEL A TELBILEL A DIOS EL MO ER A ABRAHAM
9. Ngera el osichel a telbiil a ledillii a Dios el mo er a rengelekel a Abraham er a lesibai er a Ekipten?
9 Betok el rak er a uriul er a temel a Abraham, e a Jehovah a liluut el olsiich er a otutel a telbilel el mo er ngii. Tiang a dilubech er sera lodureklii a Moses el mo mengedecheduch er a rechad er a Israel el tir a mle sibai er a Ekipten. (Exodus 6:6-8) E a uriul e a Dios a silodii el kmo: “Isel sils e a kulsiich a tekoi el mor tir el kmo ak mo ngoititerir el otobedeterir er a beluu er a Ekipten el mor a beluu el bla kngiltii el kirir, el ungil a dbechel a dellomel er ngii.”—Esekiel 20:5, 6.
10. Ngera el telbiil a lerirellii a Dios el mo er a rechad er a Israel er a uriul er a lotebedeterir er a Ekipten?
10 A uriul er a lotebedeterir a rechad er a Israel er a beluu er a Ekipten e a Jehovah a rirellii a kuk ta er a telbiil el mo er tir el kmo: “A lsekum kom mo olengesenges er ngak e olab a telbilek, e kom mo meral chedak. A beluulchad el rokir a kloklek, e ngdi kemiu a mo ngellitel chedak. Kom mo chimol beluu el prist el mo mesiou er ngak, el cheledaol el di kirek.” (Exodus 19:5, 6) Tiang a kmal mle ileakl el telbiil el mo er tir! Ngmle kirir el olengesenges er a Jehovah me bo el sebechel el toketekii a chimo el beluu el prist el tir a mo uchul a klengeltengat el mo er a klechad. Ngliluut el ‘ulsichii a tekingel’ er a ldelii tia el telbiil.—Esekiel 16:8.
11. Te milekerang a rechad er a Israel er sel taem el Dios a tilbir el meruul er tir el mo ileakl el chedal?
11 A Jehovah a dimlak lorrimel er a rechad er a Israel el mo olengesenges er ngii, me a ka lulerrimel er tir el kongei el mo ileakl el chedal. Engdi tir a mle sorir el meruul a telbilir el mo olengesenges er ngii, me te dilu el kmo: “Aki mor a ikel rokui el bla ledu RUBAK.” (Exodus 19:8) Edei el klebesei er a uriul e a Jehovah a silebedeterir a Rechisrael el tir a ngellitel el chedal er aike el soal a bo loruul. Me a kot e ngmilsterir a Teruich el Llach e dilu er a Moses me ngmesubed er tir er a lmuut el bebil er a llach el medung er a Exodus 20:22 el mo er a 23:33. Me ngera te dilung a Rechisrael er a uriul er a lerenges aika el tekoi? “A rokui el chad a dilak el melekoi el kmo, ‘Aki mo meruul a ikel bek el bla ledu RUBAK.’ ” (Exodus 24:3) Me a Moses a liluches a llach er a “babier er a telbiil” e milenguiu el klou a ngerel me bo el sebechir el lmuut el remenges aika el tekoi. E a rechad a liluut er a ongedei el taem el melib el kmo: “Aki mo meruul a ikel rokui el bla le dung a RUBAK; aki mo olengesenges er ngii.”—Exodus 24:4, 7, 8.
12. Ngera ngmirruul a Jehovah er a uriul er a letibir el mo er a Rechisrael el kmo te mo ileakl el chedal? E ngera te mirruul a rechad er a uriul er a leruul a telbilir el mo er a Dios?
12 Me a Jehovah a di mle mereched el oltaut a telbilel el mo er a rechad er a Israel. Ngmillilt er a reprist el mo mesiou er a ileakl el tento el kirel a omengull, e dirrek el mo olengeseu er a rediak el mecherrungel el chad el mo er ngii a deleuill er tir el obengkel a Dios. Engdi a rechad er a Israel a di mle mereched el obes a telbilir e “ulemekringel er ngiil Chedaol Dios er a Israel.” (Psalm 78:41) El ua tiang, sel taem el Moses a dirk mla er a Rois el Sinai el melai a lmuut el bebil er a ulekrael er a Jehovah, e a rechad er a Israel a mlo seselk a rengrir el mengiil me ngmlo mechitechut a klaumerang er tir er a Dios, e mlo omdasu el kmo a Moses a mla choititerir. Me te rirellii a bleob el kolt el ngelekel a kerbou e dilu er a rechad el kmo: “Israel, tiakid a chedum el chiltikikau el otebedau er a Ekipten.” (Exodus 32:1, 4) Me te mocha mengull e melenget el mo er ngika el bleob e melekoi el kmo te mengull er a Jehovah. Me a Jehovah er a leseterir el mengull er ngika el bleob e ngdilu er a Moses el kmo: “Te di mle mereched el choitii sel rael el kdilu er tir el kmo te mo oltirakl er ngii.” (Exodus 32:5, 6, 8) Cherengel a taem e a rechad er a Israel a di millemolem el meruul a telbilir el mo er a Dios e dimlak loltirakl.—Ulecherangel 30:2.
LMUUT EL ERU EL OSICHEL A TELBIIL
13. Ngera el telbiil a lerirellii a Jehovah el mo er a David? Kede mekerang e medengei el kmo tia el tekoi a melutk er a uldidellel a rasech?
13 Sel taem er a leking er a Israel a David e a Jehovah a liluut el olsiich a eru el telbiil el mo uchul a klungiolir tirke el olengesenges er Ngii. A kot, e ngdilu er a David el kmo a ruldidellel a rsechel a mo mengedereder el mo cherechar. (Psalm 89:35, 36; 132:11, 12) Me a uldidellel a rasech el ngii a Kristus a mei el okiu a klengelakel er a David e mo okedongall el “ngelekel a David.” (Mateus 1:1; 21:9) Me a David a uleba omengull el omekedong er a uldidellel a rasech el kmo “Rubak” e le Kristus a kuk ngarbab er ngii.—Mateus 22:42-44.
14. Ngerang a mesisiich el telbilel a Jehovah el kirel a Uldidellel a rasech? E tiang ngmo uchul a ngera el klungiaol el kired?
14 Ongerung, a Jehovah a silodii el mo er a David el kmo Ngike el uldidellel a rasech a mo King e dirrek el mo Ngarbab el Prist er a klechad, e tiang a kmal ileakl el tekoi. Me a doltirakl a Llach el Dios a milsterir a Rechisrael e a reprist a mlengilt er a kebliil er a Levi, e a reking a mlengilt er a kebliil er a Juda. Me sel taem e ngdimlak el sebechel a chad el mo king e prist er a osisiu el taem. Engdi a David a ulemlaoch el kirel a merekung el King el kmo: “A RUBAK a dilu er a rubak er ngak el king el kmo, ‘Bo mdengchokl er a kadekmek, el dimerkmo kngititerir a re cherrouem el mor eungel ochim.’ A RUBAK a mirruul er a kmal mesisiich el telbiil, me ng diak lolutii a tekingel el kmo: ‘Kau a mo prist el mo cherechar, el ngar a deruchellel a Melkisedek!’ ” (Psalm 110:1, 4) Me chelechang e a Jesus Kristus el Uldidellel a rasech a mengedereder el ngar er a eanged el oltirakl a ulochel a David. Ngdirrek el mesiou el Ngarbab el Prist el olengeseu er a rechad el mo sumecheklii a deleuill er tir me a Dios.—Monguiu er a Hebru 7:21, 25, 26.
A BECHES EL ISRAEL ER A DIOS
15, 16. (a) Ngerang a eru el Israel el medung er a Biblia? E ngera el Israel a oba kengei er a Dios er chelechang? (b) Ngerang dilu a Jesus el mo er a ruleltirakl er ngii el kirel a osichel a telbiil?
15 Cherengel a taem e a Jehovah a ultngeklii a renged er a Israel e le tir el ultngeklii a Jesus Kristus, me ngmlo diak a techellir el mo “chimol beluu el prist.” A Jesus a dilu er a remengeteklir a Rechijudea el kmo: “A Rengedel a Dios a bo le nguu er kemiu el mesterir a re bebil er a re chad el tirkel mo ourodech a ungil rodech.” (Mateus 21:43) Sel beches el renged el lulsaod er ngii a Jesus a ulemuchel er a Pentekost er a rak er a 33. Seikid el taem e a rebekord el 120 el disaiplo er a Jesus a mle kldibel el ngar er a Jerusalem e a Dios a milsterir sel oureor el klisichel. Tirkang a mlo chedal a beches el renged el okedongall el “Israel ra Dios.” Telkib el taem er a uriul e a rebetok el telael el chad er a bebil el beluu a mlo chedal tia el beches el Israel er a Dios.—Galatia 6:16, BT.
16 Tia el beches el Israel a melemolem el olengesenges er a Dios el diak el ua renged er a Israel er a irechar el dimlak lolengesenges. Me a rechedal a Israel er a Dios a oltirakl a ta er a llechul a Dios el kirel a osichel a tekoi. Sera lengar er a chutem a Jesus e a rechad a ulumulak e ulelsiich a tekingir, e dirrek el ulelsiich a diak a ultutelel el tekoi. (Mateus 23:16-22) Me a Jesus a dilu er a ruleltirakl er ngii el kmo: “Lak molsiich a tekoi sel moruul a telbiil. . . . Di mdu el kmo ‘Choi’ ma lechub e mdu el kmo ‘Ng diak’, a ngodech el tekoi el bo molekoi a ngar ngikel Mekngit el mei.”—Mateus 5:34, 37.
17. Ngera el ker a mo monger er a ongingil el suobel?
17 Me tiang belkul a kmo ngmekngit a dolsiich a telbiil? A lmuut el klou a ultutelel el ker a kmo, ngera belkul a “di mdu el kmo ‘Choi’ ”? Kede metik a nger er aika el ker er a ongingil el suobel. Me sel dolemolem el melebedebek er a Tekingel a Dios e ngsmisichid el mo olengesenges er Ngii. Me ngmo omekngeltengat er kid el diak a ulebengelel el oltirakl a telbiil el lulelsiich.
[Aike el Ker er a Suobel]
[Blurb el ngar er a 27 el llel]
A telbilel a Jehovah a blechoel el mo tmaut
[Siasing el ngar er a 25 el llel]
Ngdi kmedung e a Abraham a mo mesa otutel a telbilel a Jehovah
