1. Oinsá mak Jeová nia liafuan la hanesan ho ema sala-naʼin nian?

JEOVÁ mak “Maromak lia-loos nian”. (Sal 31:5) Tanba ema hotu sala-naʼin, ita la bele tau fiar ba buat hotu neʼebé sira hatete. Maibé ita bele tau fiar ba buat hotu neʼebé Maromak hatete tanba nia “Maromak [neʼebé] la bele bosok”. (Ebr 6:18; lee Números 23:19. *) Maromak sempre kumpre buat neʼebé nia promete. Porezemplu, kuandu loron kriasaun nian ida-idak komesa, Maromak hatete buat neʼebé nia sei halo iha loron neʼe, no nia halo duni. Ikusmai, iha loron neen nia rohan, “Maromak haree buat hotu neʼebé nia halo, no haree! neʼe diʼak tebes”.—Gên 1:6, 7, 30, 31.

2. Saida mak Maromak nia loron hakmatek? Tanbasá mak Maromak “halo loron neʼe sai sagradu”?

² Depois Maromak Jeová haree tiha katak ninia kriasaun hotu diʼak, nia fó sai katak loron hitu hahú. Loron neʼe laʼós loron baibain neʼebé iha oras 24 deʼit, maibé tempu kleur tebes neʼebé nia deskansa husi serbisu atu kria buat oioin iha mundu. (Gên 2:2) Toʼo ohin loron, Maromak nia loron deskansa ka hakmatek neʼe seidauk ramata. (Ebr 4:9, 10) Bíblia la fó-hatene bainhira loos mak loron hitu neʼe hahú. Maibé, ita hatene katak loron neʼe hahú liutiha tempu balu depois Maromak kria Eva, Adão nia feen, maizumenus tinan 6.000 liubá. Iha futuru, durante Kristu nia Ukun ba Tinan Rihun Ida, Maromak sei kumpre ninia hakarak hodi halo mundu neʼe sai fali jardín furak no nakonu ho ema perfeitu neʼebé sei moris ba nafatin. (Gên 1:27, 28; Apok 20:6) Ita bele fiar katak ita sei hetan futuru neʼebé furak hanesan neʼe ka lae? Bele! “Maromak haraik bensaun ba loron hitu neʼe  no halo loron neʼe sai sagradu” atu ita bele fiar katak iha loron hitu nia rohan, Maromak sei kumpre ninia hakarak maski mosu problema saida deʼit.—Gên 2:3.

3. (a) Depois Maromak nia loron hakmatek hahú, saida mak akontese? (b) Saida mak Jeová fó sai kona-ba oinsá atu rezolve problema neʼe?

³ Maibé, depois Maromak nia loron hakmatek hahú ona, Maromak nia kriatura balu kontra hasoru nia. Satanás, anju neʼebé uluk diʼak iha lalehan, nia hakarak halo kriatura seluk adora nia duké Maromak, tan neʼe nia hatoʼo lia-bosok primeiru ba Eva hodi lohi nia atu la halo tuir Jeová. (1 Tim 2:14) Tuirmai, Eva mós halo ninia laʼen la halo tuir Jeová. (Gên 3:1-6) Kuandu Satanás no Adão ho Eva kontra hasoru Jeová, ida-neʼe mak buat aat liu hotu neʼebé akontese. Maibé, maski Satanás duun Jeová mak bosok-teen, Jeová la hanoin katak nia presiza halo juramentu ruma atu hatudu katak nia sei kumpre duni ninia hakarak ba mundu neʼe. Duké halo nuneʼe, Jeová fó sai promesa ida neʼebé ema sei komprende iha tempu neʼebé loos, no hatete deʼit kona-ba oinsá atu rezolve problema neʼe, hodi dehan: “Haʼu sei halo ó [Satanás] odi feto neʼe, no ó-nia bei-oan no feto neʼe nia bei-oan sei odi malu. Nia [Bei-Oan neʼebé Maromak promete] sei harahun ó-nia ulun no ó sei hakanek ninia ain-tuban.”—Gên 3:15; Apok 12:9.

4, 5. Dala ruma Abraão halo saida atu promete kona-ba buat ruma?

⁴ Toʼo tempu neʼebá, karik ema nunka presiza jura atu hatete katak buat neʼebé sira koʼalia mak tebes. Kriatura perfeitu neʼebé hadomi Maromak no halo tuir nia, sira la presiza halo juramentu tanba sira sempre koʼalia lia-loos no tau fiar tomak ba malu. Maibé depois feen-laʼen primeiru halo tiha sala no sai sala-naʼin, neineik-neineik ema sai toman atu koʼalia bosok. Tan neʼe, kuandu sira koʼalia kona-ba buat neʼebé importante, sira komesa halo juramentu nuʼudar dalan atu hatudu katak sira koʼalia lia-loos.

⁵ Bíblia hatudu katak Abraão halo juramentu atu promete kona-ba buat ruma iha situasaun tolu. (Gên 21:22-24; 24:2-4, 9) Porezemplu, kuandu Abraão fila fali husi funu neʼebé nia manán hasoru liurai husi Elam ho ninia maluk liurai sira seluk, nia halo juramentu ida. Iha tempu neʼebá, liurai sira husi Salem no Sodoma bá vizita Abraão. Liurai husi Salem mak naran Melquisedec, nia mós serbí nuʼudar “amlulik husi Maromak Aas Liu Hotu”, no nia fó bensaun ba Abraão no fó glória ba Maromak tanba Maromak mak ajuda Abraão atu manán inimigu sira. (Gên 14:17-20) Tuirmai, liurai husi Sodoma hakarak fó kolen ba Abraão tanba nia salva liurai neʼe nia povu husi inimigu sira, maibé Abraão halo juramentu hodi dehan: “Haʼu hasaʼe haʼu-nia liman hodi jura ba Jeová, Maromak Aas Liu Hotu, Ida neʼebé halo lalehan no rai, katak husi kabas lahan toʼo sandálias nia tali, haʼu sei la simu buat ida neʼebé ó-nian, atu ó labele hatete: ‘Haʼu mak halo Abrão sai riku.’”—Gên 14:21-23.

6. (a) Abraão fó ezemplu diʼak saida mai ita? (b) Buat neʼebé Abraão halo lori bensaun saida mai ita?

⁶ Maromak Jeová mós halo juramentu ba ema sala-naʼin atu sira bele tau fiar ba buat neʼebé nia promete, hodi uza liafuan hanesan: “‘Nuʼudar haʼu moris’, Naʼi Jeová Ukun-Naʼin Boot Liu Hotu hatete.” (Eze 17:16) Bíblia hatudu katak Jeová halo juramentu iha situasaun 40 liu. Situasaun ida neʼebé ita hatene mak kuandu nia halo juramentu ba Abraão. Jeová halo aliansa ka promesa balu ba Abraão iha ninia moris. Husi  buat neʼebé Maromak promete, Abraão hatene katak Bei-Oan neʼebé Maromak promete nanis ona sei moris mai husi ninia umakain, liuhusi ninia oan Isaac. (Gên 12:1-3, 7; 13:14-17; 15:5, 18; 21:12) Maibé loron ida, Jeová koko Abraão nia fiar hodi haruka nia atu hasaʼe ninia oan nuʼudar sakrifísiu. Abraão prontu halo tuir, no kuandu nia atu oho Isaac mak anju ida hapara nia. Tuirmai, Jeová halo juramentu ba Abraão hodi dehan: “Hodi haʼu-nia an rasik, haʼu jura katak tanba ó halo ida-neʼe no ó prontu atu fó ó-nia oan-mane, ó-nia oan mesak, haʼu sei haraik duni bensaun ba ó no haʼu sei halo duni ó-nia bei-oan sai barak hanesan fitun iha lalehan no hanesan rai-henek neʼebé iha tasi-ibun; no ó-nia bei-oan sei manán ninia inimigu sira-nia portaun sidade nian. Liuhusi ó-nia bei-oan nasaun hotu iha rai sei hetan duni bensaun, tanba ó rona tiha mai haʼu-nia lian.”—Gên 22:1-3, 9-12, 15-18.

7, 8. (a) Tanbasá mak Maromak halo juramentu ba Abraão? (b) Oinsá mak Maromak nia juramentu ba Abraão bele lori bensaun ba Jesus nia “bibi seluk”?

⁷ Tanbasá mak Maromak halo juramentu ba Abraão katak buat neʼebé nia promete sei sai loos duni? Nia halo nuneʼe hodi ajuda ema kose-mina sira neʼebé sai parte segundu husi “bei-oan” no ukun hamutuk ho Kristu hodi sira bele tau fiar ba promete neʼe. (Lee Ebreu 6:13-18; Gal 3:29) Hanesan apóstolu Paulo hatete, Jeová fó “buat rua” neʼebé ajuda ema kose-mina sira “hetan kbiit atu laran-metin ba esperansa”. Neʼe mak promesa no juramentu husi Maromak neʼebé “la bele bosok”.

⁸ Maibé, Maromak nia juramentu ba Abraão lori bensaun laʼós ba ema kristaun kose-mina deʼit. Jeová jura katak liuhusi Abraão nia “bei-oan”, ema husi “nasaun hotu iha rai” sei hetan bensaun. (Gên 22:18) Ema husi “nasaun hotu” neʼe inklui mós “bibi seluk”, neʼebé halo tuir Kristu, neʼebé iha esperansa atu moris ba nafatin iha mundu foun. (Joao 10:16) Maski ita-nia esperansa mak atu bá lalehan ka moris iha mundu foun, diʼak atu ita hotu “laran-metin” ba esperansa neʼe hodi hakaʼas an atu moris tuir Maromak nia hakarak.—Lee Ebreu 6:11, 12.

9. Kuandu Abraão nia bei-oan sira sai atan ba ema Egiptu sira, Maromak halo juramentu kona-ba saida?

⁹ Liutiha tinan atus ba atus husi Abraão nia tempu, Jeová halo juramentu dala ida tan hodi promete katak nia sei kumpre buat neʼebé nia hatete ona ba Abraão. Ida-neʼe akontese kuandu nia haruka Moisés atu  koʼalia ba Abraão nia bei-oan sira neʼebé sai atan ba ema Egiptu sira. (Êx 6:6-8) Kona-ba tempu neʼe, Maromak hatete: “Haʼu hasaʼe haʼu-nia liman hodi jura ba sira atu lori sira sai husi rai-Egiptu ba rai neʼebé haʼu hafuhu tiha ona ba sira, rai neʼebé nakonu ho susu-been no bani-been.”—Eze 20:5, 6.

10. Depois Jeová lori tiha nasaun Israel sai husi rai-Egiptu, saida mak nia promete ba sira?

¹⁰ Depois Jeová lori tiha nasaun Israel sai husi rai-Egiptu, nia halo juramentu ida seluk tan hodi promete: “Se imi halo tuir ho loloos haʼu-nia liafuan no kaer metin ba haʼu-nia aliansa, imi sei sai duni povu neʼebé espesiál mai haʼu iha povu sira seluk nia leet, tanba mundu tomak haʼu-nian. No imi rasik sei sai reinu amlulik nian no nasaun neʼebé santu ba haʼu.” (Êx 19:5, 6) Maromak fó oportunidade espesiál ba nasaun Israel! Se sira halo tuir Jeová, nia sei halo ema husi nasaun neʼe sai reinu amlulik nian neʼebé lori bensaun ba ema seluk hotu iha mundu. Liutiha tempu balu, Jeová esplika katak kuandu nia halo aliansa neʼe ho nasaun Israel, nia halo “deklarasaun juramentu nian”.—Eze 16:8.

11. Kuandu Maromak fó oportunidade ba nasaun Israel atu sai ninia povu, saida mak sira halo?

¹¹ Iha tempu neʼebá, Jeová la obriga nasaun Israel atu halo juramentu katak sira sei halo tuir nia. Nia mós la obriga sira atu simu oportunidade espesiál neʼebé nia atu fó. Maibé ho sira-nia hakarak rasik, sira promete: “Buat hotu neʼebé Jeová hatete ona, ami prontu atu halo tuir.” (Êx 19:8) Liutiha loron tolu, Maromak Jeová hatete ba povu Israel kona-ba buat neʼebé nia hakarak sira atu halo nuʼudar ninia povu. Primeiru, nia fó Ukun-Fuan Sanulu ba sira no depois nia haruka Moisés atu fó-hatene kona-ba ukun-fuan sira seluk, neʼebé ikusmai hakerek iha Êxodo 20:22 toʼo 23:33. Kuandu ema Israel sira rona kona-ba ukun-fuan sira-neʼe, sira hatete saida? “Povu hotu hatán ho lian ida deʼit no hatete: ‘Liafuan hotu neʼebé Jeová hatete ona, ami prontu atu halo tuir.’” (Êx 24:3) Tuirmai, Moisés hakerek ukun-fuan sira-neʼe iha “livru aliansa nian” no lee ba sira ho lian makaʼas hodi povu hotu bele rona fali. Depois neʼe, ba dala tolu, povu promete filafali: “Buat hotu neʼebé Jeová hatete ona, ami prontu atu halo tuir.”—Êx 24:4, 7, 8.

12. Depois Jeová halo tiha aliansa ho nasaun Israel, nia halo saida? Maibé, saida mak povu Israel halo?

¹² Depois Jeová halo tiha aliansa ho nasaun Israel, nia komesa kedas atu halo tuir buat neʼebé nia promete ona iha aliansa neʼe. Jeová organiza atu halo tenda espesiál ba adorasaun, no nia mós hili amlulik sira neʼebé atu serbí iha tenda neʼe hodi ajuda ema sala-naʼin atu bele hakbesik ba nia. Maibé, ema Israel haluha lalais katak sira dedika ona sira-nia an ba Jeová no “hakanek Ida neʼebé Santu ba Israel”. (Sal 78:41) Porezemplu, kuandu Moisés saʼe ba Foho Sinai hodi simu tan Jeová nia matadalan sira, ema Israel komesa lakon pasiénsia no sira-nia fiar ba Maromak sai fraku hodi hanoin katak Moisés husik tiha sira. Tan neʼe, sira balu halo estátua karau-oan husi osan-mean no hatete ba povu: “Oh, Israel, neʼe mak ó-nia Maromak, ida neʼebé lori ó sai husi rai-Egiptu.” (Êx 32:1, 4) Depois, sira komesa hakruʼuk no hasaʼe sakrifísiu ba estátua neʼe hodi dehan katak ida-neʼe mak adorasaun ba Jeová. Kuandu Jeová haree ida-neʼe, nia hatete ba Moisés: “Sira hasees an lalais husi dalan neʼebé haʼu haruka ona ba sira atu laʼo.” (Êx 32:5, 6, 8) Hahú husi tempu neʼebá, ema Israel halo juramentu beibeik ba Maromak maibé sira la kumpre buat neʼebé sira jura atu halo.—Núm 30:2.

13. Jeová halo juramentu saida ba Liurai David? Oinsá mak ita bele hatene katak juramentu neʼe mak kona-ba Bei-Oan neʼebé promete nanis ona?

¹³ Iha Liurai David nia tempu, Jeová halo  juramentu rua tan neʼebé lori bensaun ba ema hotu neʼebé halo tuir nia. Primeiru, nia halo juramentu ba David katak ninia bei-oan sira mak sei ukun iha ninia kadunan ba nafatin. (Sal 89:35, 36; 132:11, 12) Neʼe katak Bei-Oan neʼebé promete nanis ona, ka Kristu, mak sei hanaran “David nia Oan”. (Mt 1:1; 21:9) Ho haraik-an, David bolu Bei-Oan neʼe nuʼudar ninia “Naʼi” tanba Kristu iha pozisaun aas liu fali nia.—Mt 22:42-44.

14. Jeová halo juramentu saida kona-ba Bei-Oan neʼebé promete nanis ona? Juramentu neʼe lori bensaun saida mai ita?

¹⁴ Segundu, Jeová mós fó-hatene nanis ba David katak Bei-Oan espesiál neʼe sei serbí laʼós nuʼudar Liurai deʼit, maibé mós nuʼudar Amlulik Boot ba ema hotu. Tuir Ukun-Fuan, ema ida la bele kaer knaar rua neʼe iha tempu hanesan, tanba amlulik mak ema husi suku Levi no liurai mak ema husi suku Judá. Maibé kona-ba Liurai iha futuru, David dehan: “Jeová hatete ba haʼu-nia Naʼi: ‘Tuur iha haʼu-nia sorin kuana toʼo tempu neʼebé haʼu tau ó-nia funu-balun sira iha ó-nia ain okos.’ Jeová jura tiha ona (no nia sei la arrepende an): ‘Ó amlulik ba nafatin iha dalan hanesan ho Melquisedec!’” (Sal 110:1, 4) Hanesan David hatete, nuʼudar Bei-Oan neʼebé promete nanis ona, Jesus Kristu agora ukun daudauk iha lalehan. Nia mós serbí nuʼudar Amlulik Boot hodi ajuda ema neʼebé arrepende an atu iha relasaun diʼak ho Maromak.—Lee Ebreu 7:21, 25, 26.

15, 16. (a) Bíblia temi kona-ba nasaun Israel oin rua saida? Nasaun ida-neʼebé mak simu Maromak nia bensaun ohin loron? (b) Kona-ba halo juramentu, Jesus fó mandamentu saida ba ninia dixípulu sira?

¹⁵ Tanba ema Israel nuʼudar nasaun ida la simu Jesus Kristu, ikusmai sira lakon oportunidade espesiál atu sai “reinu amlulik nian”. Jesus hatete ba ulun-naʼin judeu sira: “Maromak nia reinu sei hasai tiha husi imi hodi fó fali ba povu ida neʼebé sei fó fuan.” (Mt 21:43) Povu ka nasaun foun neʼe hahú iha loron Pentekostes iha tinan 33 kuandu Maromak haraik espíritu santu ba Jesus nia dixípulu sira naʼin-120 neʼebé halibur iha Jerusalém. Nasaun neʼe bolu “Israel Maromak nian” no ema rihun ba rihun neʼebé mai husi rai oioin sai parte iha nasaun neʼe.—Gal 6:16, MF.

¹⁶ La hanesan ho nasaun Israel uluk nian neʼebé la halo tuir Maromak, nasaun foun neʼe kontinua halo tuir Maromak. Mandamentu ida neʼebé sira halo tuir mak kona-ba halo juramentu. Kuandu Jesus iha rai, ema iha toman atu jura kona-ba buat neʼebé la loos no buat neʼebé la importante. (Mt 23:16-22) Tan neʼe, Jesus hatete ba ninia dixípulu sira: “Imi labele jura kona-ba buat naran ida. . . . Maibé imi sei koʼalia hanesan neʼe: Nuneʼe, nuneʼe; la nuneʼe, la nuneʼe. Liu fali neʼe, mai husi ida neʼebé aat.”—Mt 5:34, 37.

17. Iha lisaun tuirmai, ita sei koʼalia kona-ba pergunta saida deʼit?

¹⁷ Neʼe dehan katak sempre sala atu jura kona-ba buat ruma ka lae? Kuandu Jesus hatete: “Imi sei koʼalia hanesan neʼe: Nuneʼe, nuneʼe”, neʼe katak sá? Iha lisaun tuirmai, ita bele hetan resposta ba pergunta sira-neʼe. Se ita hanoin kleʼan kona-ba Maromak nia Liafuan, ida-neʼe sei book ita atu nafatin halo tuir Jeová. Kuandu ita halo nuneʼe, Jeová sei haraik bensaun mai ita ba nafatin hanesan nia promete ona ho juramentu.