Sipos Yu Talem Se ‘Yes’, Yu Mas Talem ‘Yes’ Nomo

“Sipos yu talem se ‘Yes’, yu mas talem ‘Yes’ nomo. Mo sipos yu talem se ‘No’, yu mas talem ‘No’ nomo.”—MAT. 5:37.

YU TRAEM LUK SIPOS YU SAVE ANSA:

?Jisas i talem wanem long fasin we man i mekem tok blong hem i strong?

?Wanem i soemaot se Jisas i holem ol promes blong hem?

?Wanem sam samting we oli soemaot se taem yumi talem “Yes” yumi minim Yes?

1. ?Jisas i talem wanem long fasin we man i mekem tok blong hem i strong? ?From wanem?

OL TRU Kristin oli no nid blong talem nem blong God no nem blong wan narafala samting, blong pruvum se tok blong olgeta i tru. Oli obei long tok blong Jisas se: “Sipos yu talem se ‘Yes’, yu mas talem ‘Yes’ nomo.” Ol tok ya blong Jisas oli soemaot se yumi mas tok tru, mo taem yumi talem se bambae yumi mekem wan samting, yumi mas mekem. Jisas i talem se: “Yu no save talem nem blong wan samting blong mekem tok blong yu i strong.” Hem i talem samting ya from we plante man oli talem nem blong wan samting blong mekem tok blong olgeta i strong, be tingting blong olgeta i no strong blong mekem samting we oli talem. ?Olsem wanem sipos wan man i promes blong mekem wan samting mo i mekem tok ya blong hem i strong, be biaen, hem i no mekem? Sipos wan man i mekem olsem, ol narafala bambae oli no moa save trastem hem, mo hem i letem “Setan” i bos long hem.—Ridim Matiu 5:33-37.

2. ?From wanem i no rong blong talem wan strong promes?

² Tok ya blong Jisas i no min se i rong blong talem wan strong promes. Yumi luk finis long las stadi se Jehova God mo ol gudfala man blong hem olsem Ebraham, oli stap mekem strong promes long ol samting we oli impoten tumas. Mo tu, Loa we God i givim long ol man Isrel, i talem se man i mas talem wan strong tok blong pruvum se hem i no giaman. (Eks. 22:10, 11; Nam. 5:21, 22) Taswe samtaem i stret we wan Kristin i promes blong talem trutok. Maet hem i mekem samting ya taem hem i pas long kot. No samtaem maet wan Kristin i mekem wan strong promes taem hem i plan blong mekem wan samting no taem hem i wantem pruvum se hem i no stap giaman long saed blong wan trabol we i bin hapen. Jisas i tok tru taem hem i stanap long fored blong kaonsel blong ol man Jiu, mo hae pris i talem long hem se “Hae God i laef, i stap we i stap, mo long nem blong hem, yu yu mas talem trutok.” (Mat. 26:63, 64) Jisas i no nid blong yusum nem blong Jehova blong pruvum se hem i stap tok tru, from we hem i no save giaman. Be plante taem, hem i talem se: “Tru mi talem long yu.” Hem i talem tok ya blong soemaot long ol man se oli save trastem tok blong hem. (Jon 1:51; 13:16, 20, 21, 38) Long stadi ya bambae yumi  tokbaot Jisas, Pol, mo sam narafala man mo woman blong bifo. Olgeta ya oli soem eksampol long yumi from we taem oli talem “Yes” oli minim Yes.

TAEM JISAS I TALEM “YES” HEM I MINIM YES

3. ?Wanem promes we Jisas i talem long prea blong hem? ?Taem Jisas i prea olsem, Papa blong hem i talem wanem?

³ “Hem i talem bakegen se, ‘God, mi mi rere blong mekem ol samting ya we yu yu wantem, stret olsem we oli raetem long buk blong Loa blong yu, blong tokbaot mi.’” (Hib. 10:7) Long prea ya Jisas i promes se bambae hem i mekem ol samting we God i wantem. Hemia i min se bambae hem i mekem olgeta samting we profet tok i bin talem long saed blong laen blong woman. Wan long ol samting ya se snek bambae i ‘kakae leg blong hem,’ we i min se Setan bambae i kilim Jisas i ded. Jisas i letem olgeta samting ya i hapen long hem. (Jen. 3:15) I no gat wan man samtaem we i olsem Jisas we i rere blong mekem bigfala wok ya. Jehova i ansa long prea blong Jisas, mo i talem se hem i trastem Pikinini blong hem fulwan, nating se Jisas i no talem wan tok blong mekem promes blong hem i strong.—Luk 3:21, 22.

4. ?Jisas i mekem wanem blong soemaot se taem hem i talem “Yes” hem i minim Yes?

⁴ Taem Jisas i talem “Yes” oltaem nomo hem i minim Yes. Hem i no letem wan samting i pulumaot hem long wok ya we Papa blong hem i givim long hem. Hem i gohed blong talemaot gud nius blong Kingdom blong God. Mo taem God i pulum ol man oli kam long Jisas, Jisas i pulum ol man ya oli kam disaepol. (Jon 6:44) Jisas i holem promes we hem i mekem long God. Baebol i soemaot samting ya se: “Jisas ya, hem i olsem ansa we i talem se ‘Yes’ long olgeta promes we God i talem finis.” (2 Kor. 1:20) Jisas i soem gudfala eksampol long yumi. Hem i mekem evri samting stret olsem we hem i promes long Papa blong hem blong mekem. Naoia bambae yumi tokbaot wan man we i traehad blong folem fasin blong Jisas.

TAEM POL I TALEM “YES” HEM I MINIM YES

5. ?From wanem Pol i wan gudfala eksampol long yumi?

⁵ “?Masta, bambae mi mekem olsem wanem?” (Wok 22:10) Hemia tok we Sol i talem long Masta Jisas we i kamtru long hem long wan vison. Jisas i talem long Sol se hem i no mas kilim ol Kristin. Ale Sol i tanem tingting blong hem from ol samting we hem i mekem. Hem i baptaes mo i glad blong mekem spesel wok ya blong karem gud nius blong Jisas i go long ol man blong ol narafala kantri. Sol ya, hemia Pol. Stat long taem ya i go kasem en blong laef blong hem, hem i singaot Jisas se “Masta,” mo i obei long hem oltaem. (Wok 22:6-16; 2 Kor. 4:5; 2 Tim. 4:8) I gat sam narafala man we oli stap singaot Jisas se “Masta.” Be olgeta ya, oli no holem promes we oli mekem long hem. Jisas i tokbaot olgeta ya se: “?Weswe yufala i stap singaot mi se, ‘Masta, Masta,’ be yufala i no save mekem ol samting ya we mi talem long yufala?” (Luk 6:46) Sipos wan man i stap singaot Jisas se Masta, ale man ya i mas holem ol promes blong hem, olsem we aposol Pol i mekem.

6, 7. (1) ?From wanem Pol i no go hareap long Korin? ?From wanem i no stret blong talem se Pol i man blong giaman? (2) ?Wanem tingting we yumi mas gat long ol brata we oli lidim yumi?

⁶ Pol i wok strong blong talemaot gud nius blong  Kingdom long olgeta ples long Esia Maena mo Yurop. Hem i stanemap plante kongregesen long ol ples ya, mo biaen hem i visitim ol kongregesen ya bakegen. Samtaem hem i mas pruvum se samting we hem i raetem long leta blong hem i tru. (Gal. 1:20) I gat sam brata long kongregesen blong Korin we oli talem se Pol i stap giaman. Be Pol i no wantem se olgeta ya oli gat tingting ya, taswe hem i talem se: “God i tru oltaem, mo mi folem fasin ya blong hem blong talem long yufala, se long promes ya blong mi we mi mekem long yufala, mi no save miksimap tufala tok ya, se ‘Yes’ mo ‘No’, long sem taem nomo.” (2 Kor. 1:18) Taem Pol i raetem tok ya, hem i lego Efesas finis mo hem i stap long Masedonia blong go long Korin. Fastaem, tingting blong hem se bambae hem i go long Korin mo biaen i go long Masedonia. Be plan blong hem i jenis. (2 Kor. 1:15, 16) Samtaem i gat sam samting we i mekem se plan blong yumi i mas jenis. Traem tingbaot ol eria elda tede. Samtaem oli jenisim ol dei we oli bin plan blong kam visitim ol kongregesen. Oli no jenisim ol plan ya from enikaen risen nomo we i no impoten. Plante taem oli mas jenisim plan from sam impoten samting. Pol i gat wan gudfala risen from wanem hem i no go long Korin. Hem i mekem olsem from we hem i wantem givhan long kongregesen ya. ?Hem i wantem givhan long olgeta long wanem?

⁷ Taem Pol i stap long Efesas, hem i harem nius se i gat sam problem long kongregesen blong Korin. Ol brata oli no stap joen gud. I gat wan man long olgeta we i stap mekem rabis fasin wetem wan woman, be kongregesen i no putumaot hem. (1 Kor. 1:11; 5:1) Pol i raetem fas leta blong hem i go long kongregesen blong Korin, mo i givim strong toktok long olgeta blong givhan long olgeta blong stretem ol problem ya. Biaen, taem Pol i aot long Efesas, hem i no tekem sip i go stret long Korin. Pol i letem smol taem i pas blong givim janis long ol brata ya blong oli stretem problem blong olgeta fastaem. Olsem nao, taem hem i kam, bambae hem i save givhan moa long olgeta. Ale Pol i raetem namba tu leta blong hem i go long kongregesen blong Korin. Long leta ya hem i talem risen from wanem hem i no bin kam stret long Korin. Mo hem i talem strong se risen ya i tru, hem i se: “Mi mi askem long God, blong hem i witnes blong mi, se mi no giaman. Mi mi no kam long Korin bifo ya, from we mi no wantem spolem yufala, mi wantem mekem i gud long yufala.” (2 Kor. 1:23) Yumi no mas mekem olsem ol brata ya long Korin we oli tok nogud long Pol se hem i giaman. Yumi mas gat bigfala respek long ol brata we oli gat wok blong lidim yumi. Taem Pol i talem se bambae hem i mekem wan samting, hem i mekem samting ya. Yumi mas folem fasin blong Pol, olsem we Pol tu i stap folem fasin blong Kraes.—1 Kor. 11:1; Hib. 13:7.

SAM NARAFALA MAN MO WOMAN WE OLI TALEM “YES”

8. ?From wanem Rebeka i soemaot wan gudfala eksampol long yumi?

⁸ “Yes, i gud nomo.” (Jen. 24:58) Hemia toktok blong Rebeka. Hem i talem tok ya taem mama blong hem mo brata blong hem, tufala i askem long hem sipos hem i glad blong mared long Aesak, pikinini blong Ebraham. Long sem dei ya nomo we hem i talem yes, hem i mas lego hom blong hem mo i mas wokbaot 800 kilometa wetem wan strenja. (Jen. 24:50-58) Rebeka i talem “Yes” mo hem i minim Yes. Hem i kam wan gudfala woman blong Aesak, mo long laef blong hem, hem i gohed oltaem blong wosip long God. Stat long taem ya i go kasem we hem i ded, hem i laef long ol haos tapolen nomo long Promes Lan, mo hem i wan strenja nomo long ples ya. God i blesem hem from we hem i holem promes blong hem. Wan long ol smol bubu long laen blong Rebeka, hemia Jisas Kraes, Pikinini ya we God i promes blong sanem.—Hib. 11:9, 13.

9. ?Taem Rut i talem “No” hem i mekem wanem blong soemaot se hem i minim No?

⁹ “No, mitufala i mas kam wetem yu blong go stap wetem ol famle blong yu.” (Rut 1:10) Hemia nao toktok we Rut mo Opa, tufala i talem long Nomi. Tufala i woman Moab mo tufala i mared long tufala boe blong Nomi. Be man blong tufala i ded, mo man blong Nomi tu i ded. Ale Nomi i aot long kantri ya Moab, i wantem gobak long Betlehem. Nomi i stap talem strong long tufala ya se tufala i mas gobak long hom blong tufala. Ale Opa i gobak. Be Rut i talem “No” mo hem i minim No. (Ridim Rut 1:16, 17.) Hem i no wantem lego Nomi. Hem i wantem stap wetem Nomi nating se bambae hem i no moa save luk famle blong hem bakegen, mo i mas lego giaman skul  blong ol man Moab. Stat long taem ya i go kasem taem we hem i ded, hem i wosip long Jehova nomo, mo Jehova i blesem hem. Long Baebol, buk blong Matiu i talem lis blong olgeta bubu blong Kraes, mo long lis ya i gat nem blong faef woman nomo. Wan long olgeta faef woman ya, hemia Rut.—Mat. 1:1, 3, 5, 6, 16.

10. ?From wanem Aesea i soemaot wan gudfala eksampol long yumi?

¹⁰ “!Mi ya, mi save go! !Yu sanem mi!” (Aes. 6:8) Bifo we Aesea i talem tok ya, hem i luk wan vison mo long vison ya Jehova i stap sidaon long bigfala jea blong hem antap long tempol blong Isrel. Nao Aesea i harem Jehova i talem se: “?Bambae mi mi sanem hu? ?Hu bambae i go talemaot tok blong mifala?” Jehova i wantem se wan man i go talemaot tok blong hem long ol man blong hem we oli no moa obei long hem. Taem Aesea i talem se: “!Mi ya, mi save go! !Yu sanem mi!” i olsem we hem i stap talem se: “Yes, mi bambae mi go blong mekem wok ya we yu givim long mi.” Nao Aesea i soemaot se taem hem i talem “Yes” hem i minim Yes. Hem i mekem samting ya taem hem i talemaot ol profet tok blong God, 46 yia. Hem i talemaot se God bambae i panisim ol stronghed man blong hem, mo biaen bambae i karem olgeta oli kambak long ples ya blong oli mekem wosip long hem.

11. (1) ?From wanem i impoten tumas we taem yumi talem “Yes” yumi mas minim Yes? (2) ?Hu olgeta we oli talem “Yes” be biaen oli no mekem samting we oli talem?

¹¹ ?From wanem Jehova i wantem we stori blong ol man ya i stap long Baebol? ?I rili impoten se taem yu talem “Yes” yu mas minim Yes? Baebol i givim woning we i klia nomo long yumi se, man we i “brekem ol promes” blong hem, “hem i mas ded from.” (Rom 1:31, 32) King blong Ijip, King Sedekaea blong Juda, mo Ananaeas wetem Safaera, olgeta tu oli talem “Yes,” be biaen oli no mekem samting we oli talem mo oli kasem trabol from. Stori blong olgeta ya i olsem woning long yumi.—Eks. 9:27, 28, 34, 35; Esik. 17:13-15, 19, 20; Wok 5:1-10.

12. ?Wanem i save givhan long yumi blong tok tru?

¹² Yumi stap long “ol las dei” mo ol man raonabaot long yumi oli “no gat fasin blong stap tru.” “Long fes blong ol man, i luk olsem we oli stap fasgud long God, be oli giaman nomo.” (2 Tim. 3:1-5, NW) Yumi mas traem bes blong yumi blong yumi no joen plante wetem ol man olsem. Defren olgeta, yumi mas joen plante wetem ol man we oli traehad blong tok tru, ol man ya we taem oli talem “Yes” oli minim Yes.—Hib. 10:24, 25.

YU TALEM “YES” LONG WAN SAMTING WE I IMPOTEN TUMAS

13. ?Wanem promes we ol man blong Jisas Kraes oli mekem we i impoten moa i winim ol narafala promes?

¹³ I gat wan promes we yumi mekem we i moa impoten i winim ol narafala promes. Hemia promes blong givim laef blong yumi i go long God. Taem yumi wantem kam disaepol blong Jisas, i gat tri defren taem we bambae yumi mas talemaot se yumi wantem mekem ol samting we God i wantem. (Mat. 16:24) Taem wan man i no baptaes yet be hem i wantem talemaot gud nius, i gat tu elda we bambae tufala i mas storian wetem man ya, mo tufala i askem long hem se: “?Yu yu rili wantem kam wan Witnes blong Jehova?” Biaen, taem man ya i gohed gud mo hem i wantem baptaes, ol elda oli storian wetem hem bakegen, mo oli askem long hem se: “?Yu yu prea long Jehova finis blong givim laef blong yu i go long hem?” Nao long dei blong baptaes, brata we i givim  tok bambae i askem bakegen long olgeta we bambae oli baptaes se: “?From bilif blong yu long sakrefaes blong Jisas Kraes, yu yu tanem tingting blong yu from ol sin blong yu, mo yu yu givim laef blong yu i go long Jehova blong mekem ol samting we hem i wantem?” Olgeta ya bambae oli talem “Yes” long fored blong olgeta man mo woman we oli stap. Oli promes se bambae oli mekem wok blong God blong olwe.

14. ?Wanem ol kwestin we yumi mas tingbaot?

¹⁴ Maet yu yu jes baptaes. No maet yu mekem wok blong God plante yia finis. Be i gud yu tingbaot ol kwestin ya: ‘?Mi mi stap folem fasin blong Jisas? ?Taem mi talem “Yes” mi stap minim Yes, mo mi holem promes we mi mekem long Jehova? ?Mi mi gohed blong prij mo mi stap pulum ol man oli kam disaepol olsem we Jisas i talem? ?Mi tingbaot wok ya se i moa impoten i winim ol narafala samting long laef blong mi?’—Ridim 2 Korin 13:5.

15. ?Wanem ol narafala promes we yumi mas holem?

¹⁵ Sipos yumi wantem holem promes we yumi mekem taem yumi baptaes, i gat sam narafala impoten promes bakegen we yumi mas holem. Traem tingbaot ol promes ya: Sipos yu mared, yu mas holem promes ya se bambae yu lavem mo yu lukaot gud long man no woman blong yu. Sipos yu saenem wan kontrak blong bisnes, no sipos yu fulumap wan pepa blong mekem wan wok long kongregesen no long ogenaesesen, ale yu mas mekem samting ya we yu promes blong mekem. Maet wan brata we i no gat plante samting i singaot yu yu go kakae long haos blong hem, mo yu talem yes. Nao long semtaem, wan narafala brata tu i singaot yu, mo yu laekem moa blong go long haos blong hem i bitim narawan. Nating se i olsem, yu mas holem promes we yu mekem faswan. Sipos yu prij long wan man mo yu promes se bambae yu kambak luk hem, yu mas holem promes blong yu. Long rod ya, bambae Jehova i blesem yu.—Ridim Luk 16:10.

JISAS WE I HAE PRIS MO KING BLONG YUMI, I SAVE GIVHAN LONG YUMI

16. ?Sipos yumi no holem promes blong yumi, yumi mas mekem wanem?

¹⁶ Baebol i talem se yumi sinman taswe “plante taem, yumi evriwan i mekem i no stret.” Tru ya, yumi stap mestem long plante samting, antap moa long ol toktok blong yumi. (Jem. 3:2) ?Olsem wanem sipos yumi luksave se yumi no bin holem promes we yumi bin mekem? ?Yumi mas mekem wanem? Loa we God i givim long Isrel, i talem se sipos wan man i mekem wan strong promes “be i no tingting gud fastaem,” God i save fogivim hem. (Lev. 5:4-7, 11) Tede tu, sipos wan Kristin i no mekem samting we hem i bin promes blong mekem, God i save fogivim hem. Yumi mas talemaot long Jehova se yumi no bin holem promes blong yumi. Nao Jehova bambae i sore long yumi mo i fogivim yumi. Jisas Kraes i olsem Hae Pris blong yumi. Hem i save givhan long yumi blong fren gud bakegen wetem God. (1 Jon 2:1, 2) Be sipos yumi wantem fren gud bakegen wetem God yumi mas soemaot se yumi rili tanem tingting blong yumi. I nogud yumi gat fasin ya we oltaem yumi stap mekem promes mo biaen yumi no holem ol promes ya. Mo yumi mas traem bes blong yumi blong stretem ol trabol we yumi mekem taem yumi brekem promes blong yumi. (Prov. 6:2, 3) Be i tru se, i moagud blong tingting gud fastaem bifo we yumi mekem wan promes, i bitim we yumi mekem promes finis nao yumi no naf blong holem promes ya.—Ridim Prija 5:2.

17, 18. ?Ol man we oli stap talem “Yes” mo oli traehad blong minim Yes, bambae oli kasem wanem gudfala fiuja?

¹⁷ Olgeta man blong Jehova we oli talem “Yes” mo oli traehad blong mekem se tok blong olgeta i tru, bambae oli save kasem wan gudfala laef long fiuja. Olgeta 144,000 man we tabu spirit i makemaot olgeta, bambae oli gat laef we i no save finis long heven. Bambae oli kam king mo oli rul wetem Jisas blong wan taosen yia. (Rev. 20:6) Mo i gat plante milian narafala man we bambae oli laef long Paradaes long wol ya. Taem Kraes i King long Kingdom blong God mo i rulum wol ya, bambae hem i mekem we ol milian man ya oli no moa gat sin, nao bodi mo tingting blong olgeta bambae i kam stret gud olgeta.—Rev. 21:3-5.

¹⁸ Long en blong wan taosen yia ya, bambae oli letem Setan i kamaot long kalabus blong i traem ol man laswan. Olgeta we oli no biaen long Setan, bambae oli gat raet blong stap long Paradaes, nao bambae i no moa gat man i giaman. (Rev. 20:7-10) Olgeta we bambae oli laef long taem ya bambae oli talem “Yes” mo oli minim Yes, mo taem oli talem “No” bambae oli minim se No. Bambae oli folem fasin blong Jehova, Papa blong olgeta we i “no save giaman.”—Hib. 6:18.

[Kwestin]

[Tok blong pija long pej 29]

Stat long taem we Jisas i baptaes i go kasem taem we hem i ded, hem i mekem evri samting we hem i promes blong mekem

[Tok blong pija long pej 31]

?Yu yu holem promes ya we i impoten moa i winim ol narafala promes?