1. Eaa ta Iesu i tuatua no runga i te papau anga i te au taputou e no teaa ra?

MEI tei matauia ana kare te au Kerititiano mou e anoanoia ana kia rave i te au taputou anga. No te mea te akarongo ra ratou kia Iesu, tei tuatua e: ‘Kia riro ra ta kotou Koia, ei Koia.’ Te aiteanga o tana tuatua, kia akatupu tetai tangata i tana i tuatua. Kua akamata a Iesu i taua akauenga na te tuatua anga e: “Auraka e taputou, auraka rava.” Kua tuatua pakari aia i teia no te mea e mea matau na te au tangata i te rave putuputu i te taputou i roto i ta ratou pukapukaanga, kare ra ratou e akatupu ana i te reira. E me maata atu ta tetai ka tuatua i to te tuatua ua anga e Koia ia me kore Kare, ei akakite anga i to ratou manako, te akaari maira te reira e tei raro ake ratou i te akaaere anga a te ‘vaerua kino.’​—E tatau ia Mataio 5:33-37.

2. Akamarama mai eaa ra kare i te mea tarevake i te papau i te au taputou anga?

² Te aiteanga ainei te tuatua a Iesu e e tarevake i te papau i te au taputou anga ravarai? Kare. Mei ta tatou rai i kite mai mei te atikara i mua atu, kua papau te Atua ko Iehova raua ko tona tavini tuatua tika ko Aberahama i te au taputou no runga i tetai au mea puapinga. Te umuumu katoa maira te Ture a te Atua e kia papau ia tetai taputou anga no te akatikatika anga i tetai au manamanata. (Exo. 22:10, 11; Nume. 5:21, 22) No reira, e mea tau no tetai Kerititiano kia akakite i te tika me tu aia ki mua i te akavaanga. Me kore penei ka anoanoia tetai Kerititiano kia taputou i te akapapu ki tetai ke i tana ka rave me kore me akatikatikaia tetai manamanata. E tika rai, te tuku anga te taunga maata ia Iesu kia taputou mai, kua ariki aia i te reira e kua akakite i te tika ki te Sunederi o te ngati Iuda. (Mata. 26:63, 64) Kare a Iesu e anoanoia kia taputou ki tetai ua atu tangata. Inara, ei akapapu anga e e tika tana karere, kua akakite putuputu aia e: “Tika, tika  tikai taku e karanga atu kia kotou.” (Ioa. 1:51; 13:16, 20, 21, 38) Ka akara ana tatou eaa ta tatou ka kite mai mei te akaraanga o Iesu, Paulo e tetai pae tei akatupu i ta ratou Koia ei Koia.

3. Eaa ta Iesu i taputou ki te Atua i roto i tana pure, e akapeea tona Metua i te rangi te pau mai anga iaia?

³ “I na, e taku Atua, te aere nei au e akatika i toou anoano.” (Ebe. 10:7) Na roto i teia au tuatua puapinga, kua oronga a Iesu iaia uaorai ki te Atua no te akatupuanga i te au mea ravarai tei totouia no runga i te Uanga tei taputouia mai, kapiti mai i te ‘akaparuparuia anga tona pooavae’ e Satani. (Gene. 3:15) Kare rava e tangata ke i oronga ana iaia uaorai i te apai i teia apainga maata. E kua akakite mai a Iehova mei runga mai i te rangi i tona irinaki maata i tana Tamaiti, noatu e kare aia e umuumu ra ia Iesu kia taputou mai i te akatupu i tana tuatua.​—Luka 3:21, 22.

4. Akapeea a Iesu i te akapapu anga e kua akatupu aia i tana tuatua Koia ei Koia?

⁴ E akatupu ua ana a Iesu i tana i tuatua e Koia ei Koia i roto i tana angaanga tutuanga. Kare aia e tuku ana i tetai apinga kia akaanga ke iaia mei te angaanga ta tona Metua i oronga kiaia kia tutu aere i te tuatua meitaki o te Patireia o te Atua, e kia akariro i te au tangata ta te Atua i arataki kia Iesu ei pipi. (Ioa. 6:44) Kua akapapu mai te Pipiria e kua akatupu a Iesu i tana i taputou ki te Atua na te tuatua anga e: “Te au mea katoa ta te Atua i tuatua mai, e koia anake ïa i roto iaia.” (2 Kori. 1:20) Ae, ko Iesu te akaraanga meitaki rava atu no te akatupu tikai anga i tana i taputou ki tona Metua. Aru mai, ka uriuri tatou no runga i tetai tangata tei tauta i te aru meitaki ia Iesu.

5. Eaa te akaraanga ta te apotetoro ko Paulo i akanoo mai no tatou?

⁵ ‘E te Atu, ka akapeea au?’ (Anga. 22:10) Na roto i teia au tuatua ngakau tae, kua aru a Paulo, tei kiteaia i mua ana e ko Saula, i te aratakianga a te Atu ko Iesu tei akakakaia, e tei mama mai ki mua iaia i roto i te orama i te tapu iaia mei te takinokino anga i te au pipi a Karaiti. Tei tupu mai, kua tataraara a Saula no tana i rave e kua papetitoia, e kua ariki aia i tetai angaanga puapinga kia akakitekite aere no runga ia Iesu ki te au pa enua. Mei reira mai, kua tuatua ua rai a Paulo ia Iesu e ko tona “Atu,” te aru rotai anga i taua tuatua ra e tae ua atu ki te openga o tona oraanga i te enua nei. (Anga. 22:6-16; 2 Kori. 4:5; 2 Timo. 4:8) Kare a Paulo mei tetai ua atu tangata ta Iesu i tuatua e: “Eaa kotou i tuatua mai ei kiaku nei e, E te Atu, e te Atu, e kare kotou i akarongo i taku tuatua?” (Luka 6:46) Ae, te umuumu maira a Iesu i te katoatoa tei ariki iaia ei Atu no ratou kia akatupu i ta ratou i tuatua, mei ta te apotetoro rai ko Paulo i rave.

6, 7. (a) Eaa ra a Paulo i taui ei i tana parani no te atoro akaou anga i to Korinetia, e eaa ra tona aronga akaapa kare e tau ana kia ekoko i tona tu irinakiia? (e) Eaa to tatou manako i te aronga tei ikiia kia rave i te arataki anga i rotopu ia tatou?

 ⁶ Kua akatotoa maroiroi a Paulo i te karere o te Patireia na roto ia Asia Minora e ia Europa, te akanooanga e te atoro akaou anga i te au putuputuanga e manganui. I tetai au taime, kua kite mai aia e ka anoanoia aia kia akapapu e e tika rai tana i tata. (Gala. 1:20) Te akaapa anga tetai pae i Korinetia e kare a Paulo e tau kia irinakiia, kua tata aia i te akakite i te tika e: “E tuatua-mou ra ta te Atua ra, e kare ïa ta matou tuatua i karanga atu kia kotou na i te koia e te kare.” (2 Kori. 1:18) Te tuatau i tata ei aia i te reira, kua akaruke a Paulo ia Ephesia e te teretere atura aia na roto ia Makedonia ki Korinetia. Te akamataanga, kua parani aia i te atoro akaou atu ia Korinetia i mua ake ka aere ei aia ki Makedonia. (2 Kori. 1:15, 16) Inara, e taui ana te parani i tetai au taime, mei te tupu ana ki te au akaaere tutaka i teia tuatau. Kare taua au taui anga e raveia ana no tetai au tumu puapinga kore ua, mari ra me tupu poitirere mai tetai mea. I roto i to Paulo turanga, te tumu i taroaroa ai aia i te atoro i to Korinetia, koia oki kia puapingaia te putuputuanga. Akapeea ra?

⁷ Muri ake te rave anga i tana au parani mua, kua tae mai tetai au nuti kino kia Paulo e te ariki uaia ra te tu tau kore e kare te au taeake e taokotai ana i Korinetia. (1 Kori. 1:11; 5:1) Ei akatikatikaanga i te manamanata, kua tata aia i tetai akoanga pakari i roto i tana reta mua ki to Korinetia. Kare aia i aere tika atu ki Korinetia mei ia Ephesia mai, mari ra kua tuku a Paulo i tetai tuatau no tona au taeake kia taangaanga i tana akoanga e me tae atu aia ka riro tana atoro anga ei mea akamaroiroianga. Kua tata a Paulo kia ratou i roto i te rua o tana reta i te tumu tikai i taui ei aia i tana au parani te na ko anga e: “E karanga atu au ki te Atua ei kite i taku vaerua nei e, i akaperepere au ia kotou i kore ei au i tae vave atu ki Korinetia na.” (2 Kori. 1:23) Auraka rava tatou e aru i te tu o te aronga tei akaapa ia Paulo; mari ra, kia akangateitei ua rai tatou i te aronga tei ikiia kia rave i te arataki anga i rotopu ia tatou. Te tikaanga ka meitaki atu tatou me aru tatou i to Paulo tu, mei iaia i aru ia Karaiti.​—1 Kori. 11:1; Ebe. 13:7.

8. Eaa te akaraanga ta Rebeka i akanoo mai no tatou?

⁸ “Ka aere rai au.” (Gene. 24:58) Kua tuatua a Rebeka i teia te ui anga tona metua vaine e tona tungane me ka inangaro aia kia riro mai ei vaine na te tamaiti a Aberahama ko Isaaka. E ka akaruke aia i tona enua anau i taua ra rai e ka aru atu i tetai tangata kare aia i matau no tetai au 800 kiro mita te mamao. (Gene. 24:50-58) Kua akatupu a Rebeka i tana Koia ei Koia, e kua riro aia ei vaine tiratiratu e te mataku Atua, na Isaaka. I te katoaanga o tona oraanga kua noo aia ki roto i te au puakapa ei tuitarere i roto i te Enua Taputouia. Kua akameitakiia aia no tona tu tiratiratu na te riro mai anga e ko tetai o te tupuna vaine o te Uanga tei taputouia mai ko Iesu Karaiti.​—Ebe. 11:9, 13.

9. Akapeea a Ruta te akatupu anga i tana ‘Kare’ ei Kare?

⁹ ‘Kare, ka aru katoa rai maua ia koe i toou oki anga ki toou au tangata ra.’ (Ruta 1:10) Kua tuatua ua rai te nga vaine takaua o Moabi ko Ruta raua ko Orapa i teia ki to raua metua vaine ongai ko Naomi iaia e akaruke ra ia Moabi i te oki ki Betelehema. I te openga ra, na roto i ta Naomi porokirokianga, kua oki atu a Orapa ki tona enua anau. Inara, kua akatupu a Ruta i tana ‘Kare’ ei Kare. (E tatau ia Ruta 1:16, 17.) Kua aru tiratiratu atu rai aia ia Naomi, te akaruke takiri anga i tona pamiri e te akonoanga pikikaa o Moabi. Kua akakoromaki aia ei vaine akarongo mou no Iehova e kua akameitakiia aia na te riro anga e ko tetai o te rima o te vaine tei taikuia e Mataio i roto i te papaanga kopu tangata o Karaiti.​—Mata. 1:1, 3, 5, 6, 16.

10. Eaa ra a Isaia i riro ei ei akaraanga meitaki no tatou?

 ¹⁰ “Teia au; ko au taau e tono.” (Isa. 6:8) Mua ake ka tuatua ai aia i teia, kua kite atu a Isaia i tetai orama no runga ia Iehova te noo ra i runga i Tona terono i runga ake i te iero o Iseraela. Iaia e akara ua ra i teia turanga kaka, kua akarongo atu a Isaia ia Iehova e tuatua ra e: “Koai taku e tono? koai te ka aere no tatou?” E patianga teia kia riro mai aia ei vaa tuatua no Iehova no te akakite anga i Tana karere ki te au tangata akarongo kore. Kua akatupu a Isaia i tana i tuatua Koia ei Koia. No tetai au 46 mataiti kua tavini tiratiratu aia ei peroveta, te akakiteanga i tetai au karere akautunga anga e te au taputou anga mataora no runga i te akatupu akaou anga i te akamorianga mou.

11. (a) Eaa ra i puapinga ai kia akatupu i ta tatou i tuatua? (e) Eaa te au akaraanga akamatakiteanga no runga i tetai pae tei kare i akatupu i ta ratou “Koia” ei Koia?

¹¹ Eaa ra a Iehova i rekoti mai ei i te au akaraanga i runga akenei i roto i tana Tuatua no tatou? Mei teaa ra te puapinga kia akatupu i ta tatou Koia ei Koia? Kua akamatakite mai te Pipiria e ko tetai tangata tei “akaatikau koreromotu” ra, ko ratou tetai o te aronga “e tau ia ratou te mate.” (Roma 1:31, 32) Ko Pharao o Aiphiti, ko te Ariki ko Zedekia o Iuda, e Anania raua ko Saphira tetai i roto i te aronga e akaraanga kino to ratou, tei akakiteia mai i roto i te Pipiria tei kare i akatupu i ta ratou Koia ei Koia. Kua takore katoatoaia ratou e te riro ra teia au akaraanga ei akamatakite anga no tatou.​—Exo. 9:27, 28, 34, 35; Eze. 17:13-15, 19, 20; Anga. 5:1-10.

12. Eaa te ka tauturu ia tatou kia akatupu i ta tatou i tuatua?

¹² Te noo nei tatou i te “tuatau openga” e takapini ia nei e te au tangata “viivii” me kore tiratiratu kore, e e au tangata teia e “tutu akono i te Atua to ratou, kareka te mana ra, kua akakore ratou i te reira.” (2 Timo. 3:1-5) Kia tauta pakari tatou kia kore tatou e piri atu ki teia au tu tangata. Mari ra, kia piri putuputu atu tatou ki te aronga e aruaru ra i te akatupu i ta ratou Koia ei Koia.​—Ebe. 10:24, 25.

13. Eaa te tuatua puapinga rava atu no runga i te Ae ta tetai pipi a Iesu Karaiti ka tuatua?

¹³ Ko te taputou puapinga rava atu a tetai tangata, ko tana akatapuanga ki te Atua. E uiia ana e toru au uianga puapinga ki te aronga e inangaro ra kia riro mai ei au pipi na Iesu e kia tuatua e Ae ki ta ratou e akakoro ra i te rave. (Mata. 16:24) Me uiui tetai nga tangata pakari i tetai tangata te inangaro ra kia riro mai ei papuritia kare i papetitoia, ka ui raua e, “Te inangaro tikai ra ainei koe kia riro mai e ko tetai o te Au Kite o Iehova?” E me te tere ra te reira tangata ki mua i te pae vaerua e te inangaro ra kia papetitoia, ka aravei atu te nga tangata pakari iaia e ka ui atu e, “Kua rave ana ainei koe i taau uaorai akatapuanga kia Iehova na roto i te pure?” E me tae ki te ra o te papetitoanga ka uiia ki te aronga tataki tai ka papetitoia e, “Kia tau ki te atinga o Iesu Karaiti, kua tataraara ainei koe no taau au ara e kua akatapu ia koe  uaorai kia Iehova no te rave i tona anoano?” E i mua i te au kite, ka karanga teia aronga ou e Ae no runga i ta ratou taputou anga kia tavini i te Atua e tuatau ua atu.

14. Eaa ta tatou ka akara meitaki no runga ia tatou uaorai i tetai au taime?

¹⁴ Me e tangata papetito ou koe me kore kua tavini ana i te Atua no tetai au raungauru mataiti, ka anoanoia koe kia akara meitaki ia koe uaorai i tetai au taime e kia ui i teia au uianga e: ‘Na te aru anga ia Iesu Karaiti, te akatupu ra ainei au i taku tuatua puapinga rava atu e Ae? Te akarongo ra ainei au kia Iesu na te tuku anga i te angaanga tutuanga e te akariro anga i te au tangata ei pipi ei mea puapinga i roto i toku oraanga?’​—E tatau ia 2 Korinetia 13:5.

15. I roto i teea au tuanga o te oraanga e puapinga tikai kia akatupu koe i taau Koia ei Koia?

¹⁵ Te aiteanga o te akatupu anga i ta tatou tia akatapuanga, kia tiratiratu katoa tatou i roto i tetai atu au mea puapinga. Ei akaraanga: Kua akaipoipo ainei koe? Ina, e akangateitei ua atu rai i te tia puapinga tikai taau i tuatua e ka inangaro e ka akaperepere koe i toou tokorua akaipoipo. Kua taina ana ainei koe i tetai koreromotu pitiniti me kore i tetai pepa no tetai apainga teokaratiki? Ina, e akatupu i taau i taputou e ka rave koe. Kua ariki ainei koe i tetai patianga ki tetai kaikaianga no ko mai i tetai tangata kare e puapinga roa ana? Ina, eiaa e akakore atu i te reira me orongaia mai tetai patianga meitaki atu e tetai tangata ke. Me kore, kua taputou ainei koe ki tetai tangata tei aravei ana koe ia koe e tutu ra mei tera are ki tera are e ka oki akaou koe kia tauturu atu iaia i te pae vaerua? Ina, e akatupu i taau Koia ei Koia e ka akameitaki mai a Iehova i taau angaanga orometua.​—E tatau ia Luka 16:10.

16. Me kare tatou i akatupu ana i ta tatou i tuatua, eaa ta tatou ka rave?

¹⁶ Te akakite maira te Pipiria e no te mea e au tangata apa tatou, no reira “te apa anake nei tatou i te au mea katoa e manganui,” me tuatua tikai tatou. (Iako. 3:2) Eaa ra ta tatou ka rave me kite mai tatou e kare tatou e akatupu ana i ta tatou i tuatua? I roto i te Ture a te Atua ki to Iseraela, e oronga aroaia ana tetai tauturu ki tetai tangata tei apa no te “tuatua [manako kore] anga o tona vaa.” (Levi. 5:4-7, 11) E oronga aroa katoaia ana tetai tauturu ki te au Kerititiano tei rave i te ara. Me akakite tatou i te ara kia Iehova, ka akakore aroa mai aia i ta tatou ara na roto i to tatou Tauanga Maata ko Iesu Karaiti. (1 Ioa. 2:1, 2) Inara, kia rauka ua rai ia tatou ta te Atua akaperepereanga, ka akaari ua rai tatou i te tu tataraara na te kore anga e rave matau i taua au ara ra, e na te tauta pakari anga i te akatupu i te au tei tamanamanataia e ta tatou au tuatua manako kore. (Mase. 6:2, 3) E tika, e mea meitaki atu i te akamanako meitaki anga i mua ake ka rave ei tatou i tetai taputou anga e kare e rauka ia tatou i te akatupu.​—E tatau ia Koheleta 5:2.

17, 18. Eaa te oraanga kaka i mua i te katoatoa te tauta ra i te akatupu i ta ratou Koia ei Koia?

¹⁷ E oraanga mataora tikai to mua i te aronga akamori katoatoa o Iehova te tauta ra i te akatupu i ta ratou Koia ei Koia! E oraanga mate kore i runga i te rangi to te aronga akatainuia e 144,000, te ka piri atu kia Iesu i roto i tona Patireia e “ka tutara ei au ariki ma ia katoa e tai tauatini au mataiti.” (Apo. 20:6, NW) E no te au mirioni ua atu tangata kare e rauka kia tareia, ka puapingaia ratou me tutara te Patireia o Karaiti i rungao i te enua parataito. Ka tauturuia mai ratou kia rauka mai te turanga apa kore i te pae kopapa e te pae manako.​—Apo. 21:3-5.

¹⁸ Me vai tiratiratu tatou i roto i te timata anga openga o to Iesu Tutaraanga Tauatini Mataiti, kare rava tatou e ekoko akaou i te tuatua a tetai tangata. (Apo. 20:7-10) Ka riro te au tuatua ravarai e Koia ei Koia e te Kare ei Kare. Ka rauka i reira i te au tangata katoatoa ka ora mai i te aru apa kore i to tatou Metua aroa i te rangi ko Iehova “te Atua tuatua-mou.”​—Sala. 31:5.