Ia Avea la Outou Upu o le Ioe ia Ioe

“A ia avea la outou upu o le Ioe, ia Ioe; ma le Leai, ia Leai.”—MATA. 5:37.

PE MAFAI ONA E TALIINA FESILI NEI:

O le ā le fetalaiga a Iesu e faatatau i le faia o tautoga?

Aiseā ua avea ai Iesu ma faaaʻoaʻoga sili i le tausisi i mea na tautō ai?

O ā vala o le olaga e tāua ai ona tatou tausisi i a tatou upu?

1. O le ā le fetalaiga a Iesu e faatatau i le faia o tautoga, ma aiseā?

INA ua fetalai Iesu “ia avea la outou upu o le ioe, ia ioe,” o lona uiga e tatau i tagata ona tausisi i a latou faamatalaga. Talu ai e usitaʻia e Kerisiano lenā fetalaiga, o le māfuaaga lea e masani ona lē manaʻomia ai ona latou faia se tautoga. Na fetalai Iesu, ʻaua lava neʻi e tautō,’ auā ua fai ma masaniga a le toʻatele le faia o se tautoga ae lē tausisi i ai. O le ā le iʻuga? Ua faapogaia ai le lē maufaatuatuaina o i latou, ma taaʻina ai e “lē o leaga.”—Faitau le Mataio 5:33-37.

2. Aiseā e lē afāina ai i taimi uma le faia o se tautoga?

² E leʻi faapea mai Iesu e sesē le faia o se tautoga, auā na taʻua i le mataupu ua mavae, sa faia e Ieova ma Aperaamo tautoga e faatatau i mataupu tāua. I lalo o le Tulafono, sa manaʻomia ona faia se tautoga ina ia foʻia ai nisi o faafitauli. (Eso. 22:10, 11; Nu. 5:21, 22) Ua faaalia ai, e iai taimi e manaʻomia ai e se Kerisiano ona faia se tautoga, pe a tulaʻi i le faamasinoga. Ae e iai nisi tulaga e ono manaʻomia ai e se Kerisiano ona tautō ina ia faamaonia ai se gaoioiga, po o se faamatalaga. E leʻi tetee Iesu ina ua faatautō o ia e le ositaulaga sili, ae na ia tautala ma le faamaoni i le Faamasinoga Sili. (Mata. 26:63, 64) Ona e faamaoni Iesu, sa lē manaʻomia ai ona ia faia se tautoga. Ae ina ia faamaonia le moni o ana fetalaiga, sa masani ai ona ia faapea mai, “e moni, e moni, ou te fai atu iā te outou.” (Ioa. 1:51; 13:16, 20, 21, 38) I lenei mataupu, o le a iloiloina ai po o ā mea e tatou te aʻoaʻoina mai iā Iesu, Paulo, ma isi sa avea la latou upu o le ioe, ia ioe.

 IESU—O LE FAAAʻOAʻOGA SILI

3. (i) O le ā le tautoga sa faia e Iesu i lana tatalo? (ii) O le ā le auala na tali mai ai lona Tamā?

³ “Faauta! Le Atua e, ua ou sau e fai lou finagalo.” (Epe. 10:7) O le tatalo lea a Iesu i lona Tamā, na ia tautō ai e faataunuuina valoaga e faatatau i le Fanau folafolaina, lea e aofia ai le ʻtuʻimomomoina o lona mulivae’ e Satani. (Kene. 3:15) E leai se isi tagata soifua na ofo atu e faia lea tiute tauave faigatā. Sa lē manaʻomia ona faia e Iesu se tautoga ina ia faataunuuina le finagalo o le Atua. Ae sa talia e Ieova lana tatalo, e faaalia ai lona maufaatuatuaina atoatoa o lona Alo.—Luka 3:21, 22.

4. O le ā le auala sa tausisi ai Iesu i ana upu?

⁴ Sa tausisi Iesu i ana upu. E na te leʻi faatagaina so o se mea e taaʻina ese o ia, mai le faia o le galuega na tuuina mai e lona Tamā, o le talaʻia lea o le tala lelei o le Malo. Sa ia faia foʻi ma soo i latou na tosina mai e le Tamā. (Ioa. 6:44) Ua faamautinoa mai i le 2 Korinito 1:20, sa faataunuu e Iesu le mea sa ia tautō ai i lona Tamā: ʻPo o le ā lava le tele o folafolaga a le Atua, a ua Ioe uma ona o Iesu.’ O Iesu le faaaʻoaʻoga sili o lē na tausisi e faia le mea sa ia tautō ai i lona Tamā. O lea, o le a tatou iloiloina se isi tagata na faaaʻoaʻo iā Iesu.

NA TAUSISI PAULO I ANA UPU

5. O le ā le faaaʻoaʻoga na faataatia e Paulo mo i tatou?

⁵ “O le ā se mea ou te faia le Alii e?” (Galu. 22:10) O le tali lea a Saulo, ina ua faaali atu Iesu iā te ia i se vaaiga, ina ia taofia lona sauāina o Kerisiano. O le iʻuga, na salamō Saulo, lea na mulimuli ane taʻua o Paulo, ma papatisoina ai o ia. Na ia talia foʻi le tofiga tāua o le molimau atu lea i isi nuu e faatatau iā Iesu. Talu mai lenā taimi seʻia oo ina māeʻa lona soifuaga faalelalolagi, sa usiusitaʻi pea Paulo iā Iesu, ma taʻua o ia o lona “Alii.” (Galu. 22:6-16; 2 Kori. 4:5; 2 Timo. 4:8) Na fetalai Iesu iā i latou na taʻua o ia o le Alii, ae leʻi tausisi i a latou upu e faapea: “Aiseā tou te fai mai ai iā te aʻu, ʻLe Alii e! Le Alii e!’ ae lē faia mea ou te fai atu ai?” (Luka 6:46) E pei ona sa faia e Paulo, e tatau foʻi iā i latou e taʻua Iesu o le Alii ona faamaoni i a latou upu.

6, 7. (i) Aiseā na toe tolopō ai e Paulo lana asiasiga i Korinito? (ii) Aiseā e leʻi talafeagai ai tuuaʻiga na faia e faatatau iā Paulo? (iii) O le ā le uiga e tatau ona faaalia i ē o loo taʻimua iā i tatou?

⁶ Na talaʻia ma le maelega e Paulo le  tala lelei o le Malo i Asia Itiiti ma isi vaega o Europa, amataina faapotopotoga ma toe asia i latou. Sa iai taimi na manaʻomia ai e Paulo ona faia se tautoga, e faamaonia ai mea na ia tusia. (Kala. 1:20) Ina ua tuuaʻia o ia e tagata Korinito i le lē faamaoni, na ia tusi e faapea: “E faamaoni le Atua, na matou lē fai atu iā te outou, Ioe, ona toe fai atu lea e Leai.” (2 Kori. 1:18) Na ia tusia lenā faamatalaga ina ua ia tuua Efeso. O lana fuafuaga sa iai, o le toe asia lea o Korinito pe a tuua Efeso, a o leʻi agaʻi atu i Maketonia. Peitaʻi, na suia lana fuafuaga ma malaga muamua ai i Maketonia, a o leʻi agaʻi atu i Korinito. (2 Kori. 1:15, 16) E pei o Paulo, e iai taimi e suia ai e ovasia femalagaaʻi taimi e asia ai faapotopotoga, ona o ni māfuaaga talafeagai. Sa iai māfuaaga lelei na toe tolopō ai e Paulo lana asiasiga i Korinito. O ā na māfuaaga?

⁷ Sa logotala Paulo i le lē autasi o le faapotopotoga i Korinito. Sa faataga foʻi ona iai pea i le faapotopotoga, se tagata sa ola i se olaga lē mamā. (1 Kori. 1:11; 5:1) O lea, a o leʻi malaga atu i Korinito, sa ia tuuina atu se taimi e latou te faatatauina ai aʻoaʻiga malolosi, na ia avatu i lana tusi muamua. Na ia naunau e matuā faalaeiauina i latou i lana asiasiga, ma o le māfuaaga moni lenā na toe suia ai ana fuafuaga. Ina ia faamaonia lenā tulaga, na faapea mai Paulo i lana tusi lona lua: “Ou te manaʻo e fai le Atua ma molimau i loʻu nei ola, ou te leʻi alu atu i Korinito ina neʻi atili ai ona outou mafatia.” (2 Kori. 1:23) Nai lo o le pei o ē na tuuaʻia Paulo, e tatau ona tatou faaalia le faaaloalo loloto i ē ua tofia e taʻimua iā i tatou. E atamai mo i tatou ona faataʻitaʻi iā Paulo, e ala i le tausisi i a tatou upu, auā sa ia faaaʻoaʻo iā Keriso.—1 Kori. 11:1; Epe. 13:7.

O ISI FAAAʻOAʻOGA LELEI

8. Aiseā ua avea ai Repeka o se faaaʻoaʻoga lelei mo i tatou?

⁸ “Ua ou lotomalie ma te ō.” (Kene. 24:58) O upu na a Repeka i lona tinā ma lona tuagane, e faaalia ai lona lotomalie e tuua lona aiga i le aso lava lenā. O lea, na la faimalaga ai ma se tagata ese, i le mamao e silia ma le 500 maila (800 km), ina ia avea o ia ma avā a Isaako. (Kene. 24:50-58) E ui lava sa aumau o se tagata ese i faleʻie i lona olaga atoa i le Nuu Folafolaina, ae na ia faamaoni pea i ana upu. Na ia faamaonia o ia o se avā e faamaoni ma mataʻu i le Atua. Sa tauia lona faamaoni, e ala i le avea ma sē na tupuga mai ai le Fanau folafolaina, o Iesu Keriso.—Epe. 11:9, 13.

9. Sa faapefea ona faamaoni Ruta i ana upu?

⁹ “E leai, ae tatou te ō atu ma oe i lou nuu.” (Ruta 1:10) O le faamatalaga lenā a Ruta ma Orepa, iā Naomi le tinā o a la tane ua feoti, ona o lona ʻaiʻoi atu pea iā i laʻua e toe foʻi i o la nuu. O le taimi lea ua toe foʻi ane Naomi mai i Moapi ae agaʻi atu i Peteleema. Mulimuli ane, na toe foʻi Orepa, ae sa faamaoni pea Ruta i ana upu. (Faitau le Ruta 1:16, 17.) Na tuulafoaʻia e Ruta lona aiga, ma tapuaʻiga sesē i Moapi, ae avea o se auauna faamaoni a Ieova. Na tauia o ia e Ieova, ma o ia o se tasi o fafine mai i fafine e toʻalima, na taʻua e Mataio e tupuga mai ai le Keriso.—Mata. 1:1, 3, 5, 16.

10. Aiseā e tāua ai le faaaʻoaʻoga a Isaia?

¹⁰ “O aʻu lenei! Inā auina atu ia aʻu.” (Isa. 6:8) O le tali lenā a Isaia, ina ua ia vaai i se faaaliga, o loo afio Ieova i lona nofoālii. Na faalogo Isaia o fetalai  Ieova i lenā faaaliga e faapea: “O ai ou te auina atu, ma o ai foʻi o le a alu atu mo i matou?” Sa manaʻomia ona faailoa atu e se tasi le feʻau a Ieova i ona tagata lē usiusitaʻi. E silia ma le 46 tausaga o tausisi pea Isaia i ana upu. Na ia auauna faamaoni o se perofeta, i le avatuina o feʻau faafaamasinoga a Ieova. Na ia faailoa atu foʻi folafolaga matagofie, e faatatau i le toe faafoʻisia lea o le tapuaʻiga moni.

11. (i) Aiseā e tāua ai ona avea la tatou ioe o le ioe? (ii) O ai nisi o loo taʻua i le Tusi Paia e leʻi tausisi i a latou upu?

¹¹ Aiseā ua faamauina ai nei faaaʻoaʻoga i le Tusi Paia? O le ā le tāua o le tausisi i a tatou upu? Ua lapataʻi mai le Tusi Paia, o se tasi ʻe lē tausisi i maliega, e tatau i ai le oti.’ (Roma 1:31, 32) O nisi nei o faaaʻoaʻoga i le Tusi Paia o ē e leʻi tausisi i a latou upu, ma e leaga iʻuga na oo i ai. O Farao o Aikupito, Setekaia le tupu o Iuta, Anania ma Safaira. Ua avea i latou ma faaaʻoaʻoga lapataʻi.—Eso. 9:27, 28, 34, 35; Eseki. 17:13-15, 19, 20; Galu. 5:1-10.

12. O le ā e fesoasoani iā i tatou ina ia tausisi ai pea i a tatou upu?

¹² Ona ua tatou ola i “aso e gata ai,” ua taʻua i le 2 Timoteo 3:1-5, o le a iai i latou e ʻlē faamaoni, o ē e foliga mai e faamaoni i le Atua, ae e latou te lē o ola e tusa ai ma lea mana.’ O lea, ia ʻalofia le faifaimea faatasi ma i latou. Peitaʻi, e tatau ona tatou auaufaatasi e lē aunoa, ma i latou o loo taumafai malosi e tausisi i a latou upu.—Epe. 10:24, 25.

LE TAUTOGA E SILI ONA TĀUA

13. O le ā le “Ioe” e sili ona tāua e faia e se soo o Keriso?

¹³ O le “Ioe” po o le tautoga e sili ona tāua, o le tuuina atu lea i le Atua. E tolu ni avanoa faapitoa e mafai ai e i latou e fia avea moni ma soo o Iesu, ona faamaonia atu o latou faanaunauga. (Mata. 16:24) Pe a fia avea se tasi ma tagata talaʻi e leʻi papatisoina, e faia sa latou faatalatalanoaga ma ni toeaina se toʻalua. E fesiligia o ia, “Pe e te manaʻo moni lava e avea oe ma Molimau a Ieova?” Pe a agaʻigaʻi i luma faaleagaga lenā tagata, ma ua manaʻo e papatiso, ona toe faia lea o se feiloaʻiga ma toeaina. E fesiligia o ia, “Po ua māeʻa ona e tuuina atu oe lava iā Ieova i le tatalo?” I le aso o le papatisoga, e fesiligia foʻi sui papatiso uma, “E faavae i le taulaga togiola a Iesu Keriso, po ua e salamō mai i au agasala ma tuuina atu oe iā Ieova e faia lona finagalo?” E mafai e i latou uma ona tali mai “Ioe,” pe tautō i luma o tagata o le a auauna iā Ieova e oo i le faavavau.

14. O ā fesili e tatau ona iloiloina ai i tatou lava?

 ¹⁴ E tusa po ua e faatoʻā papatiso po ua loa ona e auauna iā Ieova, e manaʻomia ona iloilo lou tulaga mai lea taimi i lea taimi. Ia fesili ifo iā te oe lava: ʻPo o oʻu faaaʻoaʻo iā Iesu, i le faaauau pea ona tausisi i laʻu tautoga e sili ona tāua? Po o faaauau pea ona ou usiusitaʻi iā Iesu, i le avea lea o le galuega talaʻi ma le faia o soo, ma taulaʻiga autū o loʻu olaga?’—Faitau le 2 Korinito 13:5.

15. O ā vala o le olaga e tāua ai ona tatou tausisi i a tatou upu?

¹⁵ O lo tatou tuuina atu iā Ieova, e aofia ai le faamaoni i isi mataupu tāua. O se faaaʻoaʻoga: Pe afai ua e faaipoipo, e tatau ona e tausisi i le tautoga sa e faia, o le alofa ma faapelepele i lau paaga faaipoipo. Pe afai na e sainia se konekarate faapisinisi, pe faatumu se pepa talosaga mo galuega tauofo i le faalapotopotoga a Ieova, e tatau ona e faia mea ua e tautō ai. Pe afai na e talia le valaaulia a se tagata e lē tagolima ina ia lua faiʻaiga faatasi, e lē tatau ona toe teena ona o se isi valaaulia e sili atu. Pe afai na e folafola e toe asia se tasi na e feiloaʻi ai i le talaʻiga, e tatau ona e tausisi i au upu sa fai. E mautinoa o le a faamanuia e Ieova lau auaunaga, pe a faia faapea.—Faitau le Luka 16:10.

IESU LO TATOU TUPU MA LE OSITAULAGA SILI

16. O le ā e tatau ona fai pe a tatou lē taulau e faataunuu se mea na tautō ai?

¹⁶ E tatou te lē lelei atoatoa. O le mea lea ua faapea mai ai le Tusi Paia, “e sesē i tatou uma i mea e tele,” aemaise lava i a tatou faamatalaga. (Iako. 3:2) O le ā e tatau ona fai pe a tatou lē taulau e faataunuu se mea na tautō ai? Sa iai i le Tulafono na avatu e Ieova iā Isaraelu, se sauniuniga agalelei mo ē e ʻtautatala e aunoa ma le mafaufau.’ (Levi. 5:4-7, 11) E agalelei mai Ieova ma faamagaloina foʻi i tatou, pe a taʻutino atu iā te ia lo tatou lē taulau i se tautoga sa tatou faia. E ala iā Iesu lo tatou Ositaulaga Sili, ua tatou maua ai se leleiga ma Ieova. (1 Ioa. 2:1, 2) Peitaʻi, ina ia maua pea le finagalo malie o Ieova, e tatau ona tatou faaalia le salamō moni. E lē tatau ona fai ma masaniga le lē tausisi i a tatou folafolaga. Ae a tulaʻi mai se faafitauli ona o lenā tulaga, e tatau ona tatou taumafai e toe faaleleia. (Faata. 6:2, 3) E lē tatau ona tautō i se mea, pe a tatou iloa e lē mafai ona faataunuuina.—Faitau le Failauga 5:2.

17, 18. O le ā le lumanaʻi matagofie mo ē e taumafai malosi e tausisi i a latou upu?

¹⁷ O le a maua e auauna uma a Ieova se lumanaʻi matagofie, pe a taumafai malosi e faataunuu mea na latou tautō ai. O le a maua e le 144,000 le ola e lē mafai ona oti i le lagi, ma ʻpule faatasi ai ma Iesu o ni tupu mo le afe tausaga’ i lona Malo. (Faaa. 20:6) Ae o le a faasolosolo ona maua e le isi faitau miliona, le tulaga lelei atoatoa i o latou soifua ma mafaufau, i lalo o le Pulega a Keriso.—Faaa. 21:3-5.

¹⁸ O i latou o le a faamaoni i le tofotofoga mulimuli i le iʻuga o le Pulega a Iesu, o le a tumau pea i le Parataiso, ma mautinoa e maufaatuatuaina a latou faamatalaga. (Faaa. 20:7-10) Ona o le a lelei atoatoa tagata uma i lenā taimi, o le a avea foʻi la latou upu o le “Ioe,” ia Ioe, ma le “Leai,” ia Leai. O le a mafai foʻi ona tatou faaaʻoaʻo i lo tatou Tamā “le Atua faamaoni,” i se tulaga lelei atoatoa.—Sala. 31:5.

[Fesili mo le Suʻesuʻega]

[Ata i le itulau 28]

Sa tausisi Iesu i lana tautoga i lona Tamā, mai lava le taimi na papatiso ai seʻia oo i lona maliu

[Ata i le itulau 30]

Po o e tausisi i lau Ioe e sili ona tāua?