Ga Ra Yog ni Er Rogon Ma Nge Par ni Er Rogon
Ga Ra Yog ni Er Rogon Ma Nge Par ni Er Rogon
“Ke mus ni nge lungum Er rogon fa reb e nge lungum Dangay.”—MATT. 5:37.
MU GUY KO RAYOG NI NGAM PI’ E FULWEG:
Mang e ke yog Jesus u murung’agen be’ nra yog ara rin’ ban’en ya nge mich u wan’uy nriyul’ e n’en ni ke yog?
Uw rogon nib fel’ ni ke dag Jesus rogon ni ma lebguy e n’en ni ke micheg?
Mingiyal’ u lan e yafas rodad e nap’an ni ka dogned ni Er rogon ma thingari par ni Er rogon?
1. Mang e ke yog Jesus u murung’agen ni nga nog ara rin’ ban’en ya nge mich u wan’uy nriyul’ e n’en ni kan micheg, ma mang fan?
TIN riyul’ e Kristiano e ba ga’ nde t’uf ni ngar rin’ed ara rogned ban’en ya nge mich u wan’uy nriyul’ e n’en ni kar micheged. Ya yad ma fol ko n’en ni yog Jesus ni gaar: “Ke mus ni nge lungum Er rogon fa reb e nge lungum Dangay.” Ma fan e n’en ni ke yog e thingari yog be’ e tin riyul’ mab t’uf ni nge rin’ e n’en ni ke yog. Ma u m’on riy e yog ni gaar: “Dab mmicheged ngak be’ u p’eowchen Got e tin ni ka mogned ngak faanem ni bay mu rin’ed.” Ke yog ni aram rogon ya boor e girdi’ ni yad ma rin’ ara yog ban’en ya nge mich u wan’uy nriyul’ e n’en ni kar micheged, machane darur lemnaged ni ngar lebguyed. Mang e ra buch nfaanra ke micheg be’ ni nge rin’ ban’en machane de rin’? Be m’ug riy ndabiyog ni ngan pagan’uy ngak ma “Faanem nib Kireb” e be gagiyegnag.—Mu beeg e Matthew 5:33-37.
2. Ngam weliy fan ni gathi gubin ngiyal’ nib kireb ni nga nog ara rin’ ban’en ya nge mich u wan’uy nriyul’ e n’en ni kan micheg.
2 Thin rok Jesus e gathi be yip’ fan nib kireb ni nga nog ara rin’ ban’en ya nge mich u wan’uy nriyul’ e n’en ni kan micheg ngak. Kad filed ko bin som’on e article ni Jehovah nge Abraham e kar rin’ew ni aram rogon ni fan ko tin nib ga’ fan. Maku Motochiyel rok Got e be yog nib t’uf ni nge rin’ be’ ni aram rogon ni ngan pithig boch e magawon. (Ex. 22:10, 11; Num. 5:21, 22) Ere, sana ba t’uf rok reb e Kristiano ni nge rin’ ara yog ban’en ya nge mich u wan’uy nriyul’ e n’en nra yog u nap’an nra weliy ban’en u kort. Ara sana yu ngiyal’ mab t’uf ni nge rin’ reb e Kristiano ni aram rogon ni fan ni nge mich u wan’ boch e girdi’ e tin baadag ni nge rin’ ara nap’an ni ngan pithig reb e magawon. Ke non Jesus u fithik’ e yul’yul’ ngak e piin ni tapuf oloboch u nap’an ni ka nog ban’en ngak ya kar k’aringed ni nge yog e tin riyul’. (Matt. 26:63, 64) Machane, de t’uf ni nge yog ara rin’ Jesus ban’en ya nge mich u wan’uy ni be yog e tin riyul’. Bochan ni baadag ni nge guy e girdi’ ni thin ni be machibnag ngorad e rayog ni nge pagan’rad ngay, ma ba ga’ ni ma yog ngorad ni gaar: “Nggog e tin riyul’ ngomew, [ni fan e, “Riyul’ nriyul’”].” (John 1:51; 13:16, 20, 21, 38) Gad ra guy ko mang boch ban’en ni ngad filed ko n’en ni ke rin’ Jesus, nge Paul nge boch e girdi’ nnap’an ni ka rogned ni Er Rogon ma ke par ni Er Rogon.
KE DAG JESUS E KANAWO’ NRIB FEL’
3. Nap’an e meybil ni tay Jesus, mang e ke micheg ngak Got? Uw rogon ni ke fulweg Got taban e meybil rok?
3 “Ma aram me lungug, Got, gub aray ni nggu rin’ e tin ni gab adag.” (Heb. 10:7) U lan e re meybil rok Jesus ney e micheg ni nge rin’ e tin nib m’agan’ Got ngay. Re n’ey e be yip’ fan nra rin’ urngin ban’en ni ka nog u murung’agen Jesus ni faen Owchen ni kan micheg, mab muun ngay ni nge pag Satan ni nge “k’ad wurilen e rifrif u ay.” (Gen. 3:15) Dariy yugu be’ ni ke ognag ir ni nge rin’ ban’en ni aram rogon. Ke fulweg Jehovah taban e re meybil nem me yog ni kari pagan’ ngak Fak, ma de yog nib t’uf ni nge yog ara rin’ Jesus ban’en ya nge mich u wan’ nriyul’ e n’en ni ke micheg.—Luke 3:21, 22.
4. Mang e ke m’agan’ Jesus ngay ni nge rin’ me yan i aw nnap’an ni ke yog ni Er rogon ma ke par ni Er rogon?
4 Gubin ngiyal’ ni ma yog Jesus ni Er rogon ma ke par ni Er rogon. De pag ni bay ban’en ni nge taleg ni nge dabkiyog ni nge rin’ e maruwel ni ke pi’ Got ngak. Ke ulul Jesus i machibnag fare thin nib fel’ u murung’agen Gil’ilungun Got me pingeg e girdi’ ni ke pow’iyrad Got ngar bad ngak ngar manged pi gachalpen. (John 6:44) Thin nu Bible e be micheg nra lebguy Jesus e tin ni ke micheg ya be gaar: “Ya ir e aram e “Ke fel’” rok Got ngak urngin ban’en ni yog Got ni bay rin’ ngak e girdi’. Ereray fan nu daken Jesus Kristus e ka dogned e “Amen” rodad riy, ni aram e gadad be ta’ fan Got.” (2 Kor. 1:20) Rib fel’ e kanawo’ ni dag Jesus rogon ni ke lebguy e tin ni ke micheg ngak e Chitamangin. Bin migid, e gad ra weliy murung’agen be’ ni ke rin’ e tin rayog rok ya nge yag ni nge folwok rok Jesus.
I PAR PAUL NIB YUL’YUL’ KO THIN ROK
5. Mang kanawo’ nib fel’ ni ke dag apostal Paul ngodad?
5 “Ere mang e nggu rin’, Somol?” (Acts 22:10) Nap’an ni kan piliyeg e changar rok Paul, ni fithingan som’on e Saul, ma ireray e n’en ni ke yog ngak Jesus. Baadag ni nge dabki gafgownag Paul e pi Kristiano. Ma bochan e re n’em me kalngan’ Paul, me un ko taufe, me adag ni nge rin’ e maruwel ni kan pi’ ngak ni nge fek fare thin nib fel’ u murung’agen Jesus ngak girdien e pi nam. Me ulul Paul i pining Jesus ni “Somol,” me fol rok ni ki mada’ ko ngiyal’ ni ke yim’. (Acts 22:6-16; 2 Kor. 4:5; 2 Tim. 4:8) Bay boch e girdi’ nib thil e n’en ni kar rin’ed ko n’en ni rin’ Paul, ya yog Jesus ngorad ni gaar: “Mang fan ni gimed be piningeg ni be lungumed Somol, Somol, ma damur rin’ed e tin ni gu be yog ngomed?” (Luke 6:46) Baadag Jesus ni urngin e girdi’ ni yad ma pining Somol ngak e ngar rin’ed e tin ni kar micheged ni bod e n’en ni rin’ Paul.
6, 7. (a) Mang fan ni ke thilyeg Paul e rran ni nge yan nga Korinth nge guyrad? Boch e girdi’ e ka rogned ndabiyog ni nge pagan’rad ngak Paul, mang fan nib kireb e re n’em? (b) Susun uw rogon u wan’dad e piin ni kan dugliyrad ni nge ayuwegdad u lan e ulung?
6 Ke wereg Paul e thin u murung’agen Gil’ilungun Got nga Asia Minor nge Europe. Ma boor e ulung ni ke tababnag, miki sul ko pi ulung nem nge guyrad bayay. Immoy ba ngiyal’ ni ke pirieg nib t’uf ni nge yog ban’en ya nge mich u wan’ e girdi’ nib riyul’ e n’en ni ke yoloy. (Gal. 1:20) Boch e pi walag u Korinth e ka rogned ndabiyog ni nge pagan’rad ngak Paul. Ma baadag ni ngar nanged ni n’en ni ke yoloy ngorad e riyul’, ere ke yol ngorad ni gaar: “Rogon feni yul’yul’ Got, e aram rogon e thin ni gog ngomed ni gathi ba “Ke fel’” nge ba “Danga’.” (2 Kor. 1:18) Ke chuw Paul u Efesus u nap’an ni yoloy e re n’em, ma be milekag ni nge yan nga Macedonia ma tomur riy e ra yan nga Korinth. Ma n’en ni kan yarmiy som’on e susun ni nge sul nga Korinth u m’on ni nge yan nga Macedonia. (2 Kor. 1:15, 16) Machane, yu ngiyal’ e ba t’uf ni ngan thilyeg e n’en ni kan yarmiy. Bod ni, piin piilal ni ma lekag e ulung e yu ngiyal’ e yad ma thilyeg e rran ni ngar guyed e pi ulung. Machane, dab ra thilyeged ndariy fan ya susun bay ban’en ni ke buch ni ke magawonnag e yaram rorad. Ere, ku bay fan ni ke thilyeg Paul e rran ni nge yan nga Korinth. Rayog ni nge yibnag angin e re n’em ko ulung u rom. Ni uw rogon?
7 Nap’an ni immoy Paul u Efesus, ma ke rung’ag ni bay e magawon ko ulung nu Korinth. Daki taareban’ e pi walag u rom, ma dariy ban’en ni kar rin’ed ngak reb e walag u lan e ulung ni ke un ko ngongol ndarngal. (1 Kor. 1:11; 5:1) Ere ke yoloy Paul e bin som’on e babyor ni nge pi’ e fonow nib gel ngak e pi walag u Korinth ya nge yag ni ngan pithig e re magawon rorad nem. Ma tomur riy, e ke dugliy Paul ni nge dabi yan nga Korinth ko ngiyal’ nem, ya baadag ni nge pi’ e tayim ngak e pi walag ya nge yag ni ngar folgad ko fonow ni ke pi’ ngorad, ma aram e nap’an nra yan ngaram nge guyrad mab gel e felfelan’ ni yad ra tay. Ma nap’an ni yoloy Paul e bin l’agruw e babyor, me weliy nriyul’ ni ireray fan nde yan ngaram ni gaar: “Gu be yog e re bugithin ney u p’eowchen Got - ye ir e manang lanin’ug! Gu dugliy ndab ku gub nga Korinth ni fan e nge dab gu kirebnag an’med.” (2 Kor. 1:23) Dab da boded e piin ni kar gathibthibnaged Paul, ya ngarda ted fan e piin ni kan dugliyrad u lan e ulung ni ngar ayuweged gadad. Ma bin riyul’ riy, e rib fel’ nfaanra ngad folwokgad rok Paul, ni bod rogon ni be folwok rok Kristus.—1 Kor. 11:1; Heb. 13:7.
BOCH E GIRDI’ NI KAR DAGED E KANAWO’ NIB FEL’
8. Mang kanawo’ ni ke dag Rebekah ni fan ngodad?
8 “Nggu un ngak.” (Gen. 24:58) Ireray e n’en ni ke yog Rebekah u nap’an ni ke fith e chitiningin nge walagen ni pumoon ko baadag ni nge mang leengin Isak ni fak Abraham. Ba t’uf ni nge chuw ko tabinaw rorad ko re rran nem ma nge un ngak be’ nu bang ngar milekaggow ni boor ko 500 mayel (800 km) palogin. (Gen. 24:50-58) Er rogon ni ke yog Rebekah ma ke par ni Er rogon. Me mang leengin Isak nib fel’ ma i pigpig ngak Got u fithik’ e yul’yul’. I par u lan e tent u lan ba nam ni gathi nam rok, ni aram fare Binaw ni kan Micheg, nge mada’ ko ngiyal’ ni ke yim’. Ke tow’athnag Got Rebekah ya ke rin’ e n’en ni ke micheg u fithik’ e yul’yul’. Ma Jesus Kristus ni faen Owchen ni kan micheg e bagayad e piin owchen Rebekah.—Heb. 11:9, 13.
9 Uw rogon ni ke lebguy Ruth e n’en ni ke micheg?
9 “Danga’! Nggu unew ngom nga darod ngak e tirom e girdi’.” (Ruth 1:10) Ruth nge Orpa ni yow girdi’ nu Moab e ka rognew e pi thin ney ni boor yay ngak Naomi ni chitiningin e pumoon rorow. Ma Naomi e ke yim’ e pumoon rok, me chuw u Moab nge sul nga Bethlehem. Boor yay ni ke yog Naomi ngorow ni ngar sulow nga binaw rorow, me munmun me sul Orpa. Machane fare bugithin ni Danga’ ni ke yog Ruth e ke par ni Danga’. (Mu beeg e Ruth 1:16, 17.) I par nib yul’yul’ ngak Naomi, ma i par rok, me digey e tabinaw rok nge teliw rok u Moab. I pigpig ngak Jehovah u fithik’ e yul’yul’ me tow’athnag. Ma bagayad fa lal e ppin ni kar manged pi ga’ rok Jesus ni yoloy Matthew.—Matt. 1:1, 3, 5, 6, 16.
10. Mang fan nib fel’ ni ngad folgad rok Isaiah?
10 “Bay gu wan! Mu l’ugeg!” (Isa. 6:8) U m’on ni ke yog Isaiah e pi thin ney e kan piliyeg e changar rok me guy Jehovah ni be par u daken e chiya rok. Ngiyal’ nem ma ke rung’ag Isaiah laman Jehovah ni gaar: “I mini’ e nggu l’og nge yan?” Be fith Jehovah ko mini’ e nge yan ni nge pi’ e thin Rok ngak e girdi’ rok ndarur folgad rok. Nap’an ni gaar Isaiah: “Bay gu wan! Mu l’ugeg!” ma bod ni gowa ke gaar, “Er rogon, bay gu wan ni nggu rin’ e maruwel ni kam pi’ ngog.” Ma Er rogon ni ke yog Isaiah e ke par ni Er rogon. Ya riyul’ ni ke lebguy e n’en ni ke micheg. Ma boor ko 46 e duw ni ke yog ngak e girdi’ ni bayi gechignag Got e girdi’ ndarur folgad rok, ma boch nga m’on ma ra fekrad nga bang ni baadag ni ngar liyorgad ngak riy.
11. (a) Mang fan nri ba ga’ fan ni ngad lebuguyed e tin ni kad micheged? (b) Mang e gad ra fil rok e piin ndar lebuguyed e n’en ni kar micheged?
11 Mang fan ni ke gagiyegnag Jehovah ni ngan yoloy e pi n’ey nga lan e Bible? Ma uw feni ga’ fan nnap’an ni ga ra yog ni Er rogon ma nge par ni Er rogon? Ba tamilang ni be yog e Bible ni girdi’ ndar “yul’yul’gad ko tin ni ka rogned ni ngar rin’ed” e yad ra un ko piin ni “ngan li’rad ngar m’ad.” (Rom. 1:31, 32) Farao nu Egypt, nge Zedekiah ni Pilung nu Judah, nge Ananias nge Safira e yad ba muun ko piin nib kireb ni be weliy e Bible, ya nap’an ni ka rogned ni Er rogon ma de par ni Er rogon. Ma wenegan riy e kar gafgowgad. Ere n’en ni ke buch rorad e ra fil ban’en ngodad.—Ex. 9:27, 28, 34, 35; Ezek. 17:13-15, 19, 20; Acts 5:1-10.
12. Mang e ra ayuwegdad ya nge yag ni ngad lebuguyed e n’en ni kad micheged?
12 Gadad be par ko “tin tomren e rran” ni boor e girdi’ u toobdad ni “dab kur liyorgad ngak Got, [dar yul’yul’gad, NW]” ma “bay ur dake yad be liyor ngak Got, machane bay ra pied keru’rad nga gelngin.” (2 Tim. 3:1-5) Rogon nrayog rodad, e dab da chaggad ngak e girdi’ ni aram rogon e ngongol rorad. Ma ngaud chaggad ngak e piin nnap’an ni yad ra yog ni Er rogon ma yad ra athamgil ni nge par ni Er rogon ara ngar lebuguyed e n’en ni kar micheged.—Heb. 10:24, 25.
FARE ER ROGON NI KA MOG NTH’ABI GA’ FAN
13. Mang Er rogon ni ke yog reb i gachalpen Jesus Kristus nth’abi ga’ fan?
13 N’en th’abi ga’ fan nrayog ni nge micheg be’ e nap’an nra ognag ir ngak Got. Piin ni yad baadag ni ngar manged pi gachalpen Jesus e dalip yay ni ngan fith ngorad ngan nang ko riyul’ nib m’agan’rad ni ngar rin’ed e tin nib m’agan’ Got ngay, fa. (Matt. 16:24) Nap’an nra fith l’agruw e piilal boch e deer ngak e cha’ nem ni baadag ni nge mang unbaptized publisher ara tamachib ndawori un ko taufe, ma reb ko pi deer ni ngar deeriyew e nge lungurow, “Riyul’ ni ga baadag ni ngam mang e Mich rok Jehovah?” Me munmun, ma faanra ke mon’og e cha’ nem ko tirok Got ban’en ma baadag ni nge un ko taufe, ma fa gali piilal e yow ra non ngak bayay mar fithew ni nge lungurow, “Kam ognagem ngak Jehovah u daken e meybil, fa?” Ma bin tomur e deer e yira fith ngak u nap’an nra un ko taufe, ma reb e piilal e ra fith e deer ngak urngin e girdi’ ni kar dugliyed ni ngar uned ko taufe ko re rran nem ni nge gaar, “U daken fare maligach rok Jesus Kristus, ma kam kalngan’um ko denen ma kam ognagem ngak Jehovah ni ngam rin’ e tin nib m’agan’ ngay?” Ere pi cha’ nem ni yira taufenagrad e yad ra yog ni Er rogon ara kar micheged ni ngar pigpiggad ngak Got ni manemus ni bay e girdi’ u toobrad ni yad be motoyil ngorad.
14. Yu ngiyal’, ma mang deer e thingar da fithed gadad riy?
14 Demtrug ko ka fin mu un ko taufe ara ke yoor e duw ni kam pigpig ngak Got, mab t’uf ni yu ngiyal’ e ngam fithem ni nge lungum: ‘Gu be par ni gu be folwok rok Jesus ni aram e gu ma athamgil ni fare Er rogon ni ku gog e nge par ni Er rogon ara gu be ulul i rin’ e n’en ni kug micheg ngak Jehovah? Ma ka be par ni machib min pingeg e girdi’ ngar manged pi gachalpen Jesus e aram e maruwel nth’abi ga’ fan ko yafas rog, ya ireray e n’en ni ke tay Jesus chilen ngodad?’—Mu beeg e 2 Korinth 13:5.
15. Mang boch e kanawo’ ni fare Er rogon ni ka dogned e rib ga’ fan ni nge par ni Er rogon?
15 Gad ra lebguy e n’en ni kad micheged ngak Got u nap’an ni kad ognaged gadad ngak, e kub t’uf ni ngaud yul’yul’gad u boch ban’en. Bod ni: Faanra kam un ko mabgol, ma thingar mu lebguy e n’en ni kam micheg ko en mabgol rom ni nga i par nib t’uf rom. Gur, kam sayin nga reb e babyor ni bay rogon ko fol chuway’ ara reb e babyor ni bay rogon ko maruwel u lan e ulung? Ere ngam lebguy e n’en ni kam micheg. Gur, bay be’ nib gafgow ni ke piningem ko abich? Ere ngam lebguy e n’en ni kam micheg ngak nyugu aram rogon ni bay be’ nib fel’ rogon ni ki piningem. Ara kam micheg ngak be’ ni kam mada’gow u nap’an e machib u mit e tabinaw i yan ni ngam sul ngak, ere fare Er rogon ni ka mog ngak e susun ni nge par ni Er rogon ara ngam lebguy e n’en ni kam micheg ngak. Ma ra tow’athnag Jehovah e machib ni ga be tay.—Mu beeg e Luke 16:10.
JESUS NI PRIST NIB TOLANG NGE PILUNG RODAD E RA AYUWEGDAD
16. Faanra de yag rodad ni ngad lebguyed e tin ni kad micheged, ma mang e thingar da rin’ed?
16 Be yog e Bible nbochan ndawor da flontgad ma “gadad ma oloboch” ko thin rodad. (Jas. 3:2) Mang e thingar da rin’ed nfaanra de yag rodad ni ngad lebguyed e n’en ni kad micheged? Rogon ni yog fare Motochiyel rok Got ni ke pi’ ngak piyu Israel e faanra “gurgur be’ nge micheg ban’en” ma de yag ni nge lebguy, ma rayog ni ngan dag e runguy ngak. (Lev. 5:4-7, 11) Maku arrogon e Kristiano ni ke rin’ e denen ni aram rogon e rayog ni ngan n’ag fan. Faanra nga dogned ngak Jehovah ni bay ban’en ni kad micheged nde yag rodad ni ngad lebuguyed ma ra n’ag fan rodad. Bay Jesus Kristus ni ir e Prist rodad nib Tolang nra ayuwegdad ni nge fel’ e tha’ u thildad Got bayay. (1 John 2:1, 2) Machane, rayog ni nge par nib fel’ e tha’ u thildad Got nfaanra ngad daged nriyul’ ni kad kalgadngan’dad ko denen rodad. Ni aram e ngad athamgilgad ni ngad lebguyed e n’en ni kad micheged. Ma ngad athamgilgad ni ngad pithiged e magawon ni ke yib ya bochan dad lebguyed e n’en ni kad micheged. (Prov. 6:2, 3) Riyul’ ni kab fel’ ni u m’on ni ngad micheged ban’en, ma ngad lemnaged nib fel’ rogon ko som’on ko rayog ni ngad lebguyed fa, danga’.—Mu beeg e Eklesiastes 5:2.
17, 18. Mang athap nrib fel’ nra yag ngak e piin nnap’an ni kar micheged ban’en ma ka rogned ni Er rogon ma ke par ni Er rogon?
17 Rib fel’ e tow’ath nra yag ngak urngin e tapigpig rok Jehovah ni yad be athamgil nnap’an ni ka rogned e Er rogon ma nge par ni Er rogon! Fa 144,000 e Kristiano ni kan dugliyrad e yad ra par u tharmiy ma dab ku ur m’ad, ma yad ra un ngak Jesus “ko gagiyeg u lan bbiyu’ e duw.” (Rev. 20:6) Ma bay bokum milyon e girdi’ ni yad ra par u paradis u fayleng u tan e gagiyeg rok Kristus. Ma yira ayuweg ni nge flont dowrad nge lem rorad.—Rev. 21:3-5.
18 Nap’an nra m’ay e gagiyeg rok Jesus ma bay e bin tomur e skeng ni fan ko girdi’. Kemus ni piin nra par nib yul’yul’ ku Got e rayog ni ngaur pared u Paradis, ni aram e tayim nrayog ni ngaur pagedan’rad ngorad u nap’an nra yog be’ ban’en ngorad. (Rev. 20:7-10) Nap’an nra yog be’ ni Er rogon ma nge par ni Er rogon ma nap’an nra yog be’ ni Danga’ ma nge par ni Danga’. Ma aram e rayog ni ngar folwokgad rok Jehovah ni Chitamangirad, ni ir e ba Got nib “yul’yul’.”—Ps. 31:5.
[Study Questions]
[Sasing ko page 29]
Nap’an ni kan taufenag Jesus ni ki mada’ ko ngiyal’ ni ke yim’ ma ke lebguy e tin ni ke micheg ngak e Chitamangin
[Sasing ko page 31]
Gur, ga be par ni gab yul’yul’ ko fare Er rogon nth’abi ga’ fan ni ka mog?
